ဇဝ်ဖြာ ဝီ ကာလာင် ဒီ အာယေဟူ အီ မုး ဂွန် အာဟာနာနီ၊ ကာလာင် လွင် မှာပ် အာဘာဆာ တွိုန်။ အန် တဝ်း၊ 2 “န့ ပီ အုဝ် ဟဲ့ ဒိုဝ်း လေး မဲ ခဲင် ကာပုး။ အုဝ် ဟဲ့ ဝီ တဲး မဲ ဘဲန် ခုန်ဒီခမ်၊ ဝီ အိုပ် ဒူအီ အီဆာရေလ။ မဲ ယီ ဝီ ဘူင် ဒူပ် ပီ ဘူင် အာယေရုဝ်ဘုဝ် တွိုန်၊ တဲး ဘော ဂေ ဒူအီ အီဆာရေလ အီ မုး ဒူအီ ပီ အိုပ် အုဝ် ဝီ ဘူင် မှာပ်။ မဲ ဟဲ့ ဘူင် တဲး အုဝ် ရူ ကာဆဝ် ကူပ် မှာပ် ဂေ တီ။ 3 ခုဝ်၊ အုဝ် ဒီ ဝဲန် အာဘာဆာ ဘော လှုက်လှာန် အန်၊ တဲး န့ ပီ လှုက်လှာန် အာယေရုဝ်ဘုဝ် တွိုန်။ 4 လှုက်လှာန် အာဘာဆာ တွိုန်၊ အာဆေ ဘော ယမ် ခဲင် မိူင်၊ မာဆုဝ် ဒီ တး ဟူမ်။ အာဆေ ဘော ယမ် နာ ရေတ့် မိူင်၊ မာဆိမ် ဒီ တး ဟူမ်။” ခဲ့ တီ အာယေဟူ လုဝ် တဝ်း ဒီ အာဘာဆာ။

5 လွင် ပီ ဘူင် အာဘာဆာ အီ ညှမ် ဒွိုမ် ကာလာင်၊ လွင် ပဲ့ ဟဲ့ ဘူင် အန် ဘော လွင် အာဖုင် ဒင်ခုဝ် အန်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် အီဆာရေလ။ 6 အာဘာဆာ ဘော ယမ် ဒူပ် ဒါ ဒါ အန်။ ဂေ ဘော ဒိပ် အန် ခဲင် မိူင် ဒီရာစာ။ ဂွန် အီမာယ် အန် အီ စိူဝ် အာအေလာဟာ ဘော ဝီ ပ့လု အန်၊ ဘဲန် ခုန်ဒီခမ်။

7 ဒဲင် တီ ဇဝ်ဖြာ ဟဲ့ ကာလာင် ဂြုဝ်း ဒီ အာယေဟူ အီ မုး ဂွန် အာဟာနာနီ၊ ကာလာင် လွင် မှာပ် ပဲ့ ဟဲ့ ဘူင် အာဘာဆာ ဘော ဒူအီ အန်။ ကူပ် မှာပ် ပဲ့ ဟဲ့ ဘူင် အန် တီ၊ န့ ဟဲ့ တဲး ဇဝ်ဖြာ ရူ ဒီ အန်။ အန် ဟဲ့ ဘူင် ပီ အာယေရုဝ်ဘုဝ် တွိုန်။ ကူပ် ပဲ့ ဟဲ့ ဘူင် အန် တီ၊ ဇဝ်ဖြာ ဟဲ့ ဝဲန် တူတ့် အာမျုဝ် အန်။

8 ဒေါ မုး အာဆာ ခုန်ဒီခမ် အီ အိုပ် မိူင် ယူဒါ အာဒါ အာ ဂိုဝ် ဒီ ဒဝ် ဆီနမ်၊ အာအေလာဟာ အီ မုး ဂွန် အာဘာဆာ တွိုန် ဝီ ဘဲန် ခုန်ဒီခမ် ခဲင် မိူင် အီဆာရေလ၊ ကွယ် ဒီ မိူင် ဒီရာစာ။ အန် ဘော အိုပ် မိူင် တီ အာဒါ အူယ် ဆီနမ်။

9 န့ ယီ မုး အာမူ အာမာတ် အန်၊ အီ အိုပ် လက်လဝ် အန် အူ ကာတဲ တွိုန်၊ အန် စိူဝ် အာဇီမာရီ။ အန် ဝီ ခြာမ် ဒီ ငဝ်း အာအေလာဟာ။ ဒေါ အန် တီ အာအေလာဟာ ကွယ် ခဲင် မိူင် ဒီရာစာ၊ ဒျီင် ပဝ်း ခဲင် ကာင် အာစာ အီ မုး ဒါ အီ အိုပ် ဟုဝ် အန်။ 10 အာဇီမာရီ ဘော တး ငဝ်း ယမ် အန် ဒီ တီ။ အာဇီမာရီ ဟဲ့ ဟွတ့် ငဝ်း ယမ် အာအေလာဟာ၊ အန် ဝီ ဘဲန် ခုန်ဒီခမ်။ ဒေါ အန် တီ ခုန်ဒီခမ် အာဆာ ဟဲ့ အိုပ် မိူင် ယူဒါ အာဒါ အာ ဂိုဝ် ဒီ ဘူ ဆီနမ်။

11 ဒေါ ဘဲန် အာဇီမာရီ ခုန်ဒီခမ်၊ ကွယ် ဒဲင် မာလာင် တွိုန်၊ အူ ဇေန့် အန် ဘော ငဝ်း ဒူအီ အာဘာဆာ ဘောကာဂ့လျီတ်၊ တဲး ဂေ ယမ်။ အီမာယ် အူ ဝီ မိူဝ် အန် တူ အုန်။ ဘော ဝေါဝဲ အာဘာဆာ ဘော ဂိုက် အာဘာဆာ အာဝ် တဝ်း၊ အန် ငဝ်း ဝဲန် တူတ့်။ 12 ပါယ် တီ အာဇီမာရီ ဘော ငဝ်း ယမ် ဒူအီ အာမျုဝ် အာဘာဆာ ဘောကာဂ့လျီတ်၊ တဲး န့ ဘဲန် ပီ ဒွိုမ် ကာလာင် ဇဝ်ဖြာ လွင် မှာပ် အာဘာဆာ ဒီ အာယေဟူ အီ မုး ဒူအီ ဘျာန် ဂြုဝ်း ဇဝ်ဖြာ။ 13 မှာပ် အာဘာဆာ ဘော မှာပ် ဂွန် အန် အီ စိူဝ် အာအေလာဟာ တွိုန်၊ န့ ဝီ တဲး ဘော ဂေ ဒူအီ အီဆာရေလ ဘူင် မှာပ် ဒူပ်။ ခုဝ်၊ ဇဝ်ဖြာ အီ အိုပ် ဒူအီ အီဆာရေလ၊ အန် ဟဲ့ ဝီ ရူ ဒီ ဂေ ကူပ် ကြိုပ် ဂေ အာရိုပ် ရာင် အီ တူ မိုဝ်း ဒီခုဝ် မာဆေ။

14 လွင် ပီ ဘူင် အာအေလာဟာ အီ ညှမ် ဒွိုမ် ကာလာင်၊ လွင် ပဲ့ ဟဲ့ ဘူင် အန် တူတ့် ဒွန် မျုဝ်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် အီဆာရေလ။

15 အာဆာ ဟဲ့ ဘဲန် ခုန်ဒီခမ် ခဲင် မိူင် ယူဒါ အာဒါ အာ ဂိုဝ် ဒီ ဘူ ဆီနမ်၊ အာဇီမာရီ ဝီ ဘဲန် ခုန်ဒီခမ် ခဲင် မိူင် အီဆာရေလ၊ ကွယ် ခဲင် မိူင် ဒီရာစာ။ အန် ဘော ဝီ အိုပ် ဘိုင် အာဒါ ဘူ ဆီငဲ။ ဒေါ အန် တီ ဂေ ဒါ ဆိုက် ဘောကာဂ့လျီတ် ဟဲ့ ချ ဒီ မိူင် ဂီဘေဆူန် ဒူင် ကွယ် ဒူအီ ဖီလီထီ။ 16 ဒါ ဆိုက် ဟဲ့ ဟွတ့် ချ ဒူင် တွိုန်၊ ဒေါ ယိုဝ် ဂေ လွင် အာဇီမာရီ ဟဲ့ ငဝ်း ခုန်ဒီခမ် ဂေ၊ အူ ဇေန့် ဂေ ဘော ကာဖြူမ် ဒီ စုဝ့် ဒါ ဘုဝ် အီ အိုပ် ဂေ၊ အီ စိူဝ် အာအုဝ်မာရီ၊ တဲး အန် ဘဲန် ခုန်ဒီခမ် အီ အိုယ် ဒူအီ အီဆာရေလ။

17 အာအုဝ်မာရီ တွိုန် ဘော ဂေ ဒါ ဆိုက် ဒူအီ အီဆာရေလ အီ ကွယ် ဒူပ် အန်၊ ဂေ ဘော လေး ဒီ မိူင် ဂီဘေဆူန်၊ ဝီ ဟုဝ့် ရူပ် မိူင် ဒီရာစာ တွိုန်။ 18 အာဇီမာရီ ဘော နပ်၊ ဂေ ဟဲ့ ဟွတ့် ပွိုန် မိူင် တီ၊ အန် ဘော လိုပ် ဟာဝ် ခဲင် ဟုဝ် အန်။ အန် ဘော ဒိုဝ်း ငဝ် ဒုဝ့် ဒုဝ် အန်၊ တဲး အန် ဘော ယမ် ခဲင် ငဝ် တီ။

19 န့ ဘဲန် ပါယ် တီ ကူပ် မှာပ် ပီ ဘူင် အန်၊ ပီ တူ အိုင် ဇဝ်ဖြာ၊ ကူပ် ညိုင် အန် ပီ ဘူင် အာယေရုဝ်ဘုဝ် တွိုန်၊ ဘော ကူပ် မှာပ် ပဲ့ ဟဲ့ ဘူင် ဒူအီ အီဆာရေလ ဒူပ် အာယေရုဝ်ဘုဝ်။

20 လွင် ပီ ဘူင် အာဇီမာရီ အီ ညှမ် ဒွိုမ် ကာလာင် ဘော လွင် ဟဲ့ ဝဲန် အန် အာအေလာဟာ တွိုန်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် အီဆာရေလ။

21 ဝါယ် အန် တီ ဒူအီ အီဆာရေလ ဘော ဘဲန် အာ ဖိုင်။ အူ ကာတဲ ဒူပ် အာတီဘာနီ အီ မုး ဂွန် အာကီနာတ်၊ ဆီ တဲး အန် ဘဲန် ခုန်ဒီခမ်။ ပေါ အူ ကာတဲ ဒူပ် အာအုဝ်မာရီ။ 22 ဂေ အီ ဒူပ် အာအုဝ်မာရီ တွိုန် ဘော ပဲ ဂေ အီ ဒူပ် အာတီဘာနီ အီ မုး ဂွန် အာကီနာတ် တွိုန်။ ခုဝ်၊ အာတီဘာနီ ဘော ယမ်။ အာအုဝ်မာရီ ဘော ဝီ ဘဲန် ခုန်ဒီခမ်။

23 ဒေါ ဟဲ့ ဘဲန် အာဆာ ခုန်ဒီခမ် ခဲင် မိူင် ယူဒါ အာဒါ အူယ် ဂိုဝ် ဒီ အူ ဆီနမ်၊ အာအုဝ်မာရီ ဘော ဝီ ဘဲန် ခုန်ဒီခမ် အီ အိုပ် မိူင် အီဆာရေလ။ အန် အိုပ် ဘိုင် မိူင် အာဒါ ဂိုဝ် ဒီ အာ ဆီနမ်။ အာဒါ ဒဝ် ဆီနမ် အန် ကွယ် ခဲင် မိူင် ဒီရာစာ။ 24 အန် ဘော ဒိုဝ်း ရွိုန် အာ ထာလေန် ဘော စိုဝ်း နွန် ဆာမာရီ ဒီ အာဆာမာရာ အီ မုး ကာညာ ကာဒါယ် တီ။^a အန် ဘော ဒဲ မိူင် ဒဲင် နွန် တီ ဘော တဲး မိူင် တီ စိူဝ် မိူင် ဆာမာရီ၊ တဲး န့ ဒူပ် စိူဝ် ဒါ ကာညာ နွန် တီ။

25 အာအုဝ်မာရီ ဝီ ဘူင် မှာပ် ပီ တူ အိုင် ဇဝ်ဖြာ၊ ဝီ ဘူင် နာ တူ မွှိုမ် လွှိုမ် ဂေ အီ ကွယ် ဒီ အာတ့် အန်။ 26 အန် ဝီ ဘူင် ဒူပ် ပီ ဘူင် အာယေရုဝ်ဘုဝ် အီ မုး ဂွန် အာနေဘတ် တွိုန်။ မှာပ် ပီ ဘူင် အန် တီ၊ အန် ဝီ တဲး ဘော ဂေ ဒူအီ အီဆာရေလ ဒူပ်၊ ဝီ တဲး ဇဝ်ဖြာ အီ အိုပ် ဒူအီ အီဆာရေလ ဝီ ရူ ဒီ ဂေ။ ခုဝ်၊ ဂေ ဟဲ့ ဘူင် အာရိုပ် အီ တူ မိုဝ်း ဒီခုဝ်၊ ဝီ တဝ်း န့ မုး ဇဝ်ဖြာ။

27 လွင် ပီ ဘူင် အာအုဝ်မာရီ အီ ညှမ် ဒွိုမ် ကာလာင် ဘော လွင် အာဖုင် ဒင်ခုဝ် အန်၊ န့ ဟဲ့ ဒဲမ် အုန် ခဲင် ဘပ် ခုန်ဒီခမ် အီဆာရေလ။ 28 အာအုဝ်မာရီ တွိုန် ဘော ယမ် ဒူပ် ဒါ ဒါ အန်။ ဂေ ဘော ဒိပ် အန် ခဲင် မိူင် ဆာမာရီ။ ဂွန် အီမာယ် အန် အီ စိူဝ် အာဟပ် ဘော ဝီ ပ့လု အန်၊ ဝီ ဘဲန် ခုန်ဒီခမ်။

29 ဒေါ ဟဲ့ ဘဲန် အာဆာ ခုန်ဒီခမ် အီ အိုပ် မိူင် ယူဒါ အာဒါ အူယ် ဂိုဝ် ဒီ ဒါ ဆီနမ်၊ အာဟပ် အီ မုး ဂွန် အာအုဝ်မာရီ တွိုန် ဘော ဝီ ဘဲန် ခုန်ဒီခမ် ဘော အိုပ် မိူင် အီဆာရေလ။ အာဟပ် အီ မုး ဂွန် အာအုဝ်မာရီ တီ၊ အန် ဘော ဝီ အိုပ် မိူင် အီဆာရေလ၊ ကွယ် ခဲင် မိူင် ဆာမာရီ အာဒါ အာ ဂိုဝ် ဒီ အာ ဆီနမ်။ 30 အန် ဝီ ဝဲ ဘူင် မှာပ် ပီ တူ အိုင် ဇဝ်ဖြာ လွှိုမ် ဂေ အီ ကွယ် ဒီ အာတ့် အန် တွိုန်။ 31 မှာပ် ပီ ဘူင် အန်၊ န့ ပီ ပဲ့ ဟဲ့ ဘူင် အာယေရုဝ်ဘုဝ် အီ မုး ဂွန် အာနေဘတ် တွိုန်။ အာဝ် ဝန် ခဲ့ တီ။ အန် ဝီ ခတ် ဒိုဝ်း နာင် ယေစာဘေန် အီ မုး ဂွန် အာဟီအေန် အီ အိုပ် မိူင် ဆီဒူန် တွိုန်။ အီဘိုန့် အန် တီ ဝီ လိုမ်လာ ဝီ ကြိုပ် ဇဝ် ဘာလ။ 32 အာဟပ် ဘော ဆမ် ဟုဝ် ဒီ ကြိုပ် ဇဝ် ဘာလ ခဲင် မိူင် ဆာမာရီ၊ ဘော ဘူင် ကာစှူင့် လှူ၊ ဘ့လေး အုန် ခဲင် ဟုဝ် တီ။ 33 အန် ဘော ဘူင် ကန်ထွန် ဒီ ကြိုပ် နာင် ကာနမ် အေဆူရာ။ အန် ဝီ ဝဲ ဘူင်၊ တဲး ဇဝ်ဖြာ အီ အိုပ် ဒူအီ အီဆာရေလ ရူ ဒီ အန်။ အန် ဝီ ဘူင် လွှိုမ် ဂေ အီ ဘဲန် ခုန်ဒီခမ် ဒီ အာတ့် အန် တွိုန်။

34 ဒေါ မုး စုဝ် ဘာန် အန် တီ၊ အာဟီအေန် အီ ကွယ် ခဲင် မိူင် ဘေဒါအေန်၊ အန် ဝီ မ့ပြာယ် မိူင် ယေရီခုဝ်။ ဒေါ ဘူင် အန် ရဲင် မိူင် တွိုန်၊ အန် စှိုမ် ဂွန် အီမာယ် အီ မုး ဂွန် ဂိန့် အန်၊ အီ စိူဝ် အာဖီရမ်။ ဂွန် တီ ဘော ယမ်။ ဒေါ ဘူင် အန် မာလုဝ်း မိူင်၊ ဂွန် တျီ့ အန် အီ စိူဝ် အာဆေကူပ် ဘော ယမ်။ န့ ပီ ပဲ့ ဟဲ့ ဒွိုမ် ကာလာင် အုန် ဇဝ်ဖြာ ဒီ အာယုဝ်ဆူအာ အီ မုး ဂွန် အာနုန် တွိုန်။