1 န့ မိုဝ်း ဒူအီ အူ ဝီ အန် တး မိူင် ထီဆာဘီ အီ ကွယ် ခဲင် ကာဒါယ် မိူင် ဂီလေအာတ် အီ စိူဝ် အာအေလီယာ။ အန် ကာလာင် ဂြုဝ်း ဒီ ခုန်ဒီခမ် အာဟပ် တဝ်း၊ “ဇဝ်ဖြာ အီ အိမ် ဆေဆေ ပီ ကြိုပ် အေ ဒူအီ အီဆာရေလ၊ အန် ဘော မုး ဇဝ်ဖြာ အီ စ်ု အုဝ်။ ခုဝ်၊ ဆေ အုဝ် တူ တဝ်း တဲး ဂ့လာယ် စုဝ်း နမ် နီ၊ ဂ့လာယ် မိူဝ် တူ စုဝ်း။ အိုမ် ဒီငါန် မိူဝ် တူ စုဝ်း။”

2 ဝါယ် အန် တီ ဇဝ်ဖြာ ဝီ ကာလာင် ဒီ အာအေလီယာ တွိုန်။ 3 အန် တဝ်း၊ “တဲး မဲ လေး ဒူင် ကွယ် မဲ နီ၊ တဲး မဲ ဟာဝ် နာ လေး ဆီငဲ။ မဲ ဟာဝ် ချြီင် မဲ ခူပ် ဒီလယ့် အိုမ် ခြေိတ်၊ အီ မုး တ ဘ့လဲင် ယောဒါန် တွိုန်။ 4 မဲ လုဝ် ဒျီင် အိုမ် ဒီ ဘ့လဲင် တီ။ အုဝ် မိူဝ် ဟဲ့ စ်ု မာကာအ တဲး ဂေ ဒိုဝ်း တး တိုယ် ပီ ဒီ ဟူမ် ဒီ မဲ ဒီ တီ။”

5 အန် ဘော ဟာဝ် ဘူင် ဒူပ် ပီ တဝ်း ဇဝ်ဖြာ တီ။ ပန် တီ အန် ဘော ဟာဝ် ကွယ် ခူပ် ဒီလယ့် အိုမ် ခြေိတ် အီ ကွယ် နာ တ ဘ့လဲင် အိုမ် ယောဒါန် တွိုန်။ 6 န့ ဘော မိုဝ်း မာကာအ၊ ဂေ ဒိုဝ်း တး ခါမုန် ဘော ယင် ဆိန့်ဝး အူ ဇေန့် ဘော ဘာ ဒီ အပ် အူ ဇေန့်။ အီ မုး အိုမ်၊ အန် ဘော ဒျီင် ဒီ ဘ့လဲင် တွိုန်။

7 ဝါယ် တီ ကူပ် ဂ့လာယ် တူ စုဝ်း ဒီ မိူင် တီ၊ အိုမ် ခဲင် ဘ့လဲင် တီ ဘော ဟိတ် တူတ့်။ 8 ဒေါ အန် တီ နဝ်း ဖွိုမ် ဇဝ်ဖြာ ပီ ဝီ တး ကာလာင် ဒီ အာအေလီယာ တဝ်း၊ 9 “တဲး မဲ ယိတ့် ဟာဝ် ဒီ မိူင် စာရေဖတ် အီ မုး ခဲင် ကာဒါယ် မိူင် ဆီဒူန် တွိုန်။ တဲး မဲ ဟာဝ် ကွယ် ဒီ တီ။ အုဝ် ဟဲ့ စ်ု ယာ ဆီပြး အူ ဝီ အီ ကွယ် ခဲင် မိူင် တီ၊ တဲး အန် လိုမ်လာ မဲ။” 10 အန် ဘော ဟာဝ် ဒီ မိူင် စာရေဖတ် တီ။ ဒေါ ဟာဝ် ဇမ် အန် ဘာင် မာလုဝ်း မိူင် တီ၊ န့ မိုဝ်း ယာ ဆီပြး အူ ဝီ အီ ဒိုဝ်း ဟေ ကာဟဝ်း အီ ကွယ် ဒီ တီ။ အန် ဘော ဒဲ့ ယာ ဆီပြး တီ တဝ်း၊ “ဒိုဝ်း ကာပဝ် အိုမ် မဲ၊ တဲး အုဝ် ဒျီင် ခေါ အီ စဲက်။” 11 ဒေါ တဝ်း ယာ ဆီပြး ဒီ ဟာဝ် ဒိုဝ်း အိုမ် တီ အန် ပီ ဝီ ဒဲ့ ပေါ အူ ဇေန့်၊ ဝီ တဝ်း၊ “တဲး မဲ ဒိုဝ်း ဘော ခါမုန် ခေါ အီ စဲက် တး။”

12 ပန် တီ ယာ ဆီပြး ဝီ တဝ်း ဒီ အန်၊ “ဇဝ်ဖြာ ဟဲ့ နပ်၊ အုဝ် တူ ကာလုဝ်။ အုဝ် တူ မိုဝ်း ခါမုန် မာဆေ၊ မိုဝ်း မီ ကာပဲ့ ဆီ ကွယ် ခဲင် ကာလုဝ့်။ ဘော နာမန် ဆီ ကွယ် ခဲင် ကာပဝ် အီ စဲက်။ အုဝ် ဒီ ဒိုဝ်း ဝေန့် ဟေ ခေါ အီ စဲက်၊ တဲး အုဝ် ဘူင် ခါမုန် ကာနာယ် ယာယ် ဂွန် အုဝ်။ ယာယ် ဟီ ဟွတ့် ဟူမ်၊ ယာယ် ဒီ ယမ်။”

13 အာအေလီယာ ဝီ တဝ်း၊ “ကွဲ့ တဲး နဝ်း မဲ မှဲ။ ဟာဝ် ဘူင် ဒူပ် ပီ တဝ်း အုဝ် ဒီ မဲ တီ။ တဲး မဲ ဘူင် ခါမုန် ဒီတဲတ် အာဒါ အုဝ် ဒီ အာတ့်၊ တဲး မဲ ဘော ဒိုဝ်း တး။ ဝါယ် တီ မဲ ဘော ဝီ ဘူင် အာဒါ ဘာယ် ဂွန် မဲ။ 14 ဇဝ်ဖြာ ပီ ကြိုပ် ဒူအီ အီဆာရေလ အန် ဟဲ့ တဝ်း၊ “ကာပဲ့ ခါမုန် အီ ကွယ် ခဲင် ကာလုဝ့် တွိုန်၊ အန် တူ နပ် ဒီ တူတ့်။ ဘော နာမန် အီ ကွယ် ခဲင် ကာပဝ် တွိုန် န့ တူ နပ် ဒီ ယူမ် ဒေါ မှဝ်၊ တဲး န့ ကော ဇမ် ဆီငဲ ဒီ တဲး ဇဝ်ဖြာ ဂ့လာယ် စုဝ်း။”

15 အာအေလီယာ ဟဲ့ ဟွတ့် တဝ်း ပါယ် တီ ယာ ဆီပြး တွိုန် ဘော ဟာဝ် ဘူင် ပီ တဝ်း အာအေလီယာ တွိုန်။ ဘော အာအေလီယာ ဘော န့ဟူမ် ယာ ဆီပြး တွိုန် ဘော ပွိုန် ဒီ ဟူမ် လှေန့် ကာပဲ့ ခါမုန် အီ ကွယ် ခဲင် ကာလုဝ့် တွိုန်၊ အာဝ် ဟူ နပ် ဒီ တူတ့်။ 16 ဘော နာမန် အီ ကွယ် ခဲင် ကာပဝ် တွိုန်၊ အာဝ် နပ် ဒီ ယူမ်။ ဟဲ့ မှာန် ခဲ့ ပီ တဝ်း ဇဝ်ဖြာ ဒီ အာအေလီယာ တွိုန်။

17 ဝါယ် တီ ဂွန် အီမာယ် ခဲင် ကာင် တွိုန် ဝီ မိုဝ်း ဆဝ်။ ဆဝ် အန် ဟဲ့ ရာမ် ကာဆဝ်၊ ကော ရိန် ဒီ ယမ်။ 18 မာ အန် ဘော ဒီမွှတ် အာအေလီယာ တွိုန် တဝ်း၊ “အိုယ် မဲ ဒါ အီ ပီ တိုယ် ဇဝ်ဖြာ၊ အုဝ် အာဝ် ဟူ နပ် ပီ ဘော မုး။ ကူပ် တး မဲ ဒူင် ကွယ် အုဝ်၊ မဲ ဟဲ့ တဲး အုဝ် လှုဝ်း မှာပ် အုဝ်။ ယုဝ် န့ မုး ကူပ် မဲ၊ ဂွန် အုဝ် ပီ ဆော ရိန် ဒီ ယမ်။” 19 အာအေလီယာ ဝီ တဝ်း ဒီ မာ အန် တွိုန်၊ “ဒိုဝ်း တး ဂွန် မဲ တီ ဒီ အုဝ်။” အန် ဘော စုဝ့် ဂွန် တွိုန် ဒဲင် ဘိုမ် မာ အန်၊ ဝီ ဟုဝ့် ဒူင် အိတ် အန် ခြွင့် ဒဲင် တွိုန်။ အန် ဘော ဘ့လေး ဒဲင် ကာစှူင့် အိတ် အန်။ 20 ပန် တီ အာအေလီယာ ဘော ဆာခိုဝ် ဇဝ်ဖြာ တဝ်း၊ “အိုယ် မဲ ဇဝ်၊ မဲ မုး ဇဝ်ဖြာ ပီ ကြိုပ် အုဝ်။ မဲ ဇဝ် ဟဲ့ ဘူင် တဲး န့ ဘဲန် ဒုက် ဒီ ကာင် ယာ ဆီပြး ဒူင် တး ဘိုင် အုဝ် နီ။ မဲ ဟဲ့ တဲး ဂွန် အီမာယ် အန် ယမ်။” 21 ပန် တီ အန် ဘော အိတ် ကာတပ် ဒဲင် ဒုဝ် ဂွန် အီမာယ် တွိုန် အူယ် ဇေန့်။ အန် ပီ ဝီ မှာန့် ဒီ ဇဝ်ဖြာ ဝီ တဝ်း၊ “အိုယ် ဇဝ်ဖြာ၊ မဲ မုး ဇဝ်ဖြာ ပီ ကြိုပ် အုဝ်။ အုဝ် မှာန့်၊ တဲး နဝ်း ဖွိုမ် ဂွန် အီမာယ် နီ ဝီ တး လိုပ် ခဲင် ဒုဝ် အန်။”

22 ပန် တီ ဇဝ်ဖြာ ဘော ယိုဝ် ဂြုဝ်း အာအေလီယာ တွိုန် ဘော တဲး နဝ်း ဖွိုမ် ဂွန် အီမာယ် တွိုန် ဝီ လိုပ် ခဲင် ဒုဝ် အန်။ အာဆာက် အန် ဝီ အိမ် ပီ ဘြိမ်။ 23 အာအေလီယာ ဘော ဒိုဝ်း ဂွန် အီမာယ် တွိုန် ဒီ ဒူင် အိတ် အန် ခြွင့် ဒဲင်၊ လူင် ခြွင့် ခြိုမ်၊ ဝီ အာပ် ဒီ မာ အန်။ အန် တဝ်း ဒီ မာ အန်၊ “တဲး မဲ ယွတ်၊ ဂွန် မဲ ဟဲ့ ဝီ အိမ်။”

24 ပါယ် တီ မာ ဂွန် တွိုန် ဝီ တဝ်း၊ “ဒေါ တီ နီ အုဝ် ဟဲ့ နပ်၊ မဲ မုး ဒါ အီ ပီ တိုယ် ဇဝ်ဖြာ။ ဘော ဂြုဝ်း ဇဝ်ဖြာ အီ လေး ခဲင် မူတ့် မဲ တီ ဟဲ့ မှာန် အာခါခ်ု။”