1 ဝါယ် အန် တီ ဟဲ့ ပွုန် ဟာဝ် ရာမ် လှေန့်၊ ဇဝ်ဖြာ ဝီ ကာလာင် ဂြုဝ်း ဒီ အာအေလီယာ တွိုန်။ ဒေါ ဒီ နုဝ့် အူယ် ဆီနမ် တွိုန် အန် တဝ်း၊ “မဲ ဟာဝ် ဒူင် ကွယ် ခုန်ဒီခမ် အာဟပ်။ အုဝ် ဒီ ဝီ တဲး ဂ့လာယ် စုဝ်း ဒဲင် ကာဒါယ် နီ။” 2 အာအေလီယာ ဘော ဟာဝ် ဒူင် ကွယ် ခုန်ဒီခမ် အာဟပ် တွိုန်။

ဒေါ အန် တီ န့ မိုဝ်း ဒုက် တာင် ခဲင် မိူင် ဆာမာရီ တွိုန်။ ဂေ ဒူအီ အေတ့် ပီ ဒီ ဟူမ်။ ငှုဝ် ဂေ ဘ့လေ ဘဲန် မျုဝ် ဘဲန် မျုဝ် ဟဲ့ ငဝ်း ကာဆဝ်။ 3 ခုန်ဒီခမ် အာဟပ် ဘော ဒဲ့ ဒါ အူ ဝီ၊ အန် စိူဝ် အာအောဘာဒီ။ အန် မုး ဒါ အီ အိုပ် ဟုဝ် ခုန်ဒီခမ် တွိုန်။ အန် ဘော မုး ဒူအီ အီ ကြိုပ် ဆီချာ ဇဝ်ဖြာ။ 4 နာင် ယေစာဘေန် တွိုန် ဟဲ့ ငဝ်း ဝဲန် ဒူအီ အီ ဘျာန် ဂြုဝ်း ဇဝ်ဖြာ။ ဒေါ အန် တီ အာအုဝ်ဘာဒီ ဘော ဒိုဝ်း ဒူအီ အီ ဘျာန် ဂြုဝ်း ဇဝ်ဖြာ အူ မာယဝ်း ဝီ၊ ချြီင် အုန် ဂေ ခဲင် ကာဒဝ် မာဝ်။ အန် ချြီင် အူ ကာဒဝ် ဖန် ဂိုဝ် ဝီ။ အန် ဘော ဒိုဝ်း ခါမုန် ဘော အိုမ်၊ ဟျီင် လိုမ်လာ ဂေ။ 5 ပန် တီ ခုန်ဒီခမ် အာဟပ် တွိုန် ဘော ကာလာင် ဒီ အာအောဘာဒီ တဝ်း၊ “မဲ ဟာဝ် ဒွန် ပ့လုဝ့် လဲပ် ဒီ ယွတ် ခဲင် မိူင် နီ။ မဲ ဟာဝ် ယွတ် ဒူင် တုဝ်း အိုမ်။ မဲ ဒူပ် ဒီလယ့် ဒွန် ပ့လုဝ့်။ မဲ ဟြေတ့် ဒီ ယွတ် ပေတ့် တဲး မင်ပြွင့် ဂေ မာလုဝ် ပွိုန် ဒီ ဟူမ်၊ ကွဲ့ တဲး အေ ကာဒုး ဒီ ငဝ်း ယမ် ဒုဝ် ဆတ်ဒါဝါ အေ။” 6 အန် ဟဲ့ ဟွတ့် တဝ်း ပါယ် တီ ဂေ ဘော လာယ် ကာယဝ်း၊ ဟာဝ် အူ ဝီ အူ ဘ့လာက်၊ တဲး န့ ကော ကာလတ့် ဒွန် ပ့လုဝ့် ခဲင် မိူင် ဘော မိူင်။ ခုန်ဒီခမ် အာဟပ် ဘော ဟာဝ် အူ န့တေန့်၊ အာအောဘာဒီ ဘော ဟာဝ် ပေါ အူ န့တေန့်။ အာဆေ မိူဝ် ဘော ဟာဝ်၊ ရာင် အာဆေ ရာင် အန်။

7 ဒေါ ဟာဝ် အာအောဘာဒီ ဒူပ် န့တေန့် တွိုန်၊ အန် ဘော ကာတုန့် အာအေလီယာ။ အန် ဟဲ့ နပ် န့ မုး အာအေလီယာ တွိုန်၊ အန် ဘော မုတ် ခြိုပ်ခြဝ် ဒီမွှတ် အန် တဝ်း၊ “အိုယ် မဲ ဒါ ဆာရာ၊ န့ မှာန် မုး မဲ ဒါ ဆာရာ အုဝ်၊ အီ မုး အာအေလီယာ တွိုန်။း”

8 အာအေလီယာ ဝီ တဝ်း ဒီ အန်၊ “အိုဝ်၊ ဟဲ့ မုး အုဝ်။ မဲ ဟာဝ် ကာလာင် ဒီ ဒါ ကာညာ မဲ တဝ်း၊ အာအေလီယာ ကွယ် ဒီ နီ။”

9 အာအောဘာဒီ ဝီ တဝ်း၊ “မှဝ် န့ ပါယ် ပီ စ်ု မဲ အုဝ် ဘူင် ဇိုဝ် တီ။း အုဝ် မိုဝ်း မှာပ် မာဆေ၊ အီ တဲး မဲ အာပ် အုဝ် ဒီ ခုန်ဒီခမ် အာဟပ်။း မှဝ် န့ ပါယ် ပီ ဆီ တဲး မဲ အန် ပွိုန် ဒီ ငဝ်း အုဝ်။း 10 ဘော ဇဝ်ဖြာ ဟဲ့ နပ်၊ ဂြုဝ်း အုဝ် ဟဲ့ မှာန်။ အာဝ် မိုဝ်း ခေါ အူ မိူင်၊ အာဝ် မိုဝ်း ဒူအီ အာမျုဝ် မှဝ် ဒူင် တူ စ်ု ခုန်ဒီခမ် ဒဲစေန့် အန် ဟာဝ် ဟြေတ့် မဲ။ ဆေ ဂေ ဟီ တဝ်း၊ ‘အန် တူ ကွယ် ဒီ တီ၊’ ဂေ ဒီ ကာဒုး ဒီ ခမ် ကာဒိက် ဆတ်ဇာ ကူပ် တူ ယိုဝ် ဂေ ဒီ မဲ။ 11 ဒေါ တီ နီ မဲ ဟဲ့ တဝ်း၊ ‘ဟာဝ် ကာလာင် ဒီ ဒါ ကာညာ မဲ တဝ်း၊ အာအေလီယာ ကွယ် ဒီ နီ။’ 12 ဒေါ ဟာဝ် အုဝ် တီ၊ အုဝ် ယုဝ် နဝ်း ဖွိုမ် ဇဝ်ဖြာ ပီ ကြိုပ် မဲ ဝီ ဒိုဝ်း ဟာဝ် မဲ ပေါ အူ ပ့လုဝ့် ဒူင် တူ နပ် အုဝ်။ ဆေ အုဝ် ဟီ ဝီ ဟာဝ် ဒူင် ကွယ် ခုန်ဒီခမ်၊ ဆေ အန် တူ ယိုဝ် မဲ၊ အန် ဒီ ငဝ်း ယမ် အုဝ်။ အုဝ် ယီ ဟဲ့ ရုဝ်ဆေ ဘော ကြိုပ် ဇဝ်ဖြာ ဆိန့် ဒီတဲတ် အုဝ်။ 13 မဲ မိူဝ် ညှမ် နပ် လွင် ပဲ့ ဟဲ့ ဘူင် အုဝ်။း ဒေါ ဒိုဝ်း နာင် ယေစာဘေန် ဒူအီ ဘျာန် ဂြုဝ်း ဇဝ်ဖြာ၊ ငဝ်း ဝဲန် ဂေ၊ အုဝ် ဒိုဝ်း ဒူအီ ဘျာန် ဂြုဝ်း ဇဝ်ဖြာ အူ မာယဝ်း ဝီ၊ ချြီင် အုန် ဂေ ခဲင် ကာဒဝ် မာဝ်၊ အူ ပ့လုဝ့် ဖန် ဂိုဝ် ဝီ။ အုဝ် မိူဝ် ဟဲ့ ဒိုဝ်း ခါမုန် ဂေ အိုမ်၊ ဟျီင် လိုမ်လာ ဂေ။ 14 ဒေါ တီ နီ၊ မဲ စ်ု အုဝ် တဝ်း၊ ‘ဟာဝ် ကာလာင် ဒီ ဒါ ကာညာ မဲ၊ အာအေလီယာ ကွယ် ဒီ နီ။’ ဆေ အုဝ် ဘူင် ပါယ် တီ အန် ဒီ ငဝ်း အုဝ်။”

15 အာအေလီယာ ပီ ဝီ တဝ်း၊ “ဘော ဇဝ်ဖြာ ပီ ကြိုပ် အုဝ် အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ နပ်၊ အုဝ် ကာလာင် ဂြုဝ်း မှာန်။ အာတိုဝ် နီ အုဝ် ဒီ တး ဇမ် ဒူင် ကွယ် ခုန်ဒီခမ် အာဟပ်။”

16 အာအေလီယာ ဟဲ့ ဟွတ့် တဝ်း ပါယ် တီ အာအောဘာဒီ တွိုန် ဘော ဟာဝ် ကာလာင် ဒီ ခုန်ဒီခမ် အာဟပ်။ ခုန်ဒီခမ် ဘော ဟာဝ် လာယ် ကာတုန့် ဒီ အာအေလီယာ။ 17 ခုန်ဒီခမ် အာဟပ် ဘော တဝ်း ဒီ အန်၊ “ဟဲ့ မုး မဲ၊ အီ ပျာတ့် ဒူအီ အီဆာရေလ။း”

18 အာအေလီယာ ဝီ တဝ်း၊ “အုဝ် တူ မိုဝ်း ဒီ ပျာတ့် ဒူအီ အီဆာရေလ။ ဘော မဲ ဘော ဒူအီ မဲ၊ ဘေ ဟဲ့ ဝဲန် ဒါရာ ပီ ဒမ် အုန် ဇဝ်ဖြာ။ ဘေ ဟဲ့ ဝီ ဒူပ် ကြိုပ် အာရိုပ် ဇဝ် ဘာလ၊ တဝ်း အန် မုး ဇဝ်ဖြာ။ အာတီ အီ ပျာတ့် ဒူအီ အီဆာရေလ။ 19 ခုဝ်၊ ဒေါ တီ နီ တဲး မဲ ဒဲ့ တး ဂေ ဒူအီ အီဆာရေလ ဘောကာဂ့လျီတ်။ ဘော ဂေ ဒူအီ အီ ဘျာန် ဂြုဝ်း ဇဝ် ဘာလ တွိုန်၊ ဂေ ဖွုန် မာယဝ်း ဒီ ဖန် ဂိုဝ် ဝီ၊ ဘော ဂေ ဒူအီ အီ ဘျာန် ဂြုဝ်း နာင် ကာနမ် အေဆူရာ ဖွုန် မာယဝ်း ဝီ၊ ဘော ဂေ အီ ဟူမ် ကာဒူပ် ဒီ ကာစှူင့် ဟူမ် နာင် ယေစာဘေန် တွိုန်၊ တဲး ဂေ တး ကာဇု တူတ့် ဒဲင် နွန် ဂါမေလ တွိုန်။”

20 အန် ဟဲ့ ဟွတ့် ကာလာင် ပါယ် တီ ခုန်ဒီခမ် အာဟပ် ဘော စ်ု ဂေ ဒဲ့ ဒူအီ အီဆာရေလ ဘော ဂေ ဒူအီ အီ ဘျာန် ဂြုဝ်း ဇဝ် ပီ ကြိုပ် ဂေ တွိုန် ဒွန် အီ၊ တဲး ဂေ တး ကာဇု ဒီ နွန် ဂါမေလ တွိုန်။ 21 ဘော အာအေလီယာ တး ဒူင် ကွယ် ဂေ ဒဲင် နွန် တွိုန်။ အန် တဝ်း ဒီ ဂေ၊ “နဝ်း ဘေ ညှိုမ် အူ ကာတဲ၊ တူ ညှိုမ် အူ ကာတဲ။ ဘေ ဆီ ကွယ် လှေန့် ခဲ့ မှဝ် ဒီ ကာတဲ အာ မျုဝ် တီ။း ဆေ ဇဝ်ဖြာ မုး ဇဝ်ဖြာ ခါခ်ု၊ တဲး ဘေ ဘိုင် ကြိုပ် မီ ဇဝ်ဖြာ။ ဆေ ဇဝ် ဘာလ ဟဲ့ မုး ဇဝ်ဖြာ၊ တဲး ဘေ ဘိုင် ကြိုပ် မီ အန်။” ဟဲ့ ဟွတ့် ထူမ် ဂြုဝ်း တီ၊ ဒူအီ ဂေ တွိုန် ယီ တူ တဝ်း မာဆေ။

22 ပန် တီ အာအေလီယာ ဝီ တဝ်း ဒီ ဂေ၊ “ဒူအီ အီ ဘျာန် ဂြုဝ်း ဇဝ်ဖြာ ခါခ်ု၊ န့ ဂိတ် မီ အုဝ် အူ ဝီ။ ဒူအီ အီ ဘျာန် ဂြုဝ်း ဇဝ် ဘာလ ယီ မိုဝ်း ဖွုန် မာယဝ်း ဒီ ဖန် ဂိုဝ် ဝီ။ 23 တဲး ဘေ ဒိုဝ်း ရဝ်း မက် အာလူင့် အာ ဒုဝ် အာဒါ အေ၊ တဲး အေ လှူ၊ တဲး ငဝ် ကာဆိုမ်။ တဲး ဘေ ဒိုဝ်း အူ ဒုဝ် အာဒါ ဂေ၊ တဲး ဂေ ဘူင် ကာဒဲပ် ဘဲန် ပွတ် ဘဲန် ပွတ်၊ ဒိုဝ်း ဘ့လေး ဒဲင် ဟေ။ ယီ တူ ပွိုန် ဒိုဝ်း ငဝ် ပီဒဝ့်။ အုဝ် မိူဝ် ဒီ ဘူင် ပါယ် တီ။ မက် အာလူင့် အာဒါ အူ ဒုဝ် အုဝ် ဒီ ဒိုဝ်း ဘ့လေး ဒဲင် ဟေ၊ ယီ တူ ဒိုဝ်း ငဝ် ပီဒဝ့်။ 24 ပန် တီ တဲး ဘေ ကာဖြူမ် ဒီ ဒဲ့ ဇဝ် ပီ ကြိုပ် ဘေ တီ။ အုဝ် မိူဝ် ဒီ ဒဲ့ အီ မုး ဇဝ်ဖြာ ပီ ကြိုပ် အုဝ်။ ဇဝ်ဖြာ အီ ဒီ တဲး ငဝ် တး လူင် ဒီ တီ၊ အန် ဟဲ့ မုး ဇဝ်ဖြာ အာခါခ်ု။” အာအေလီယာ ဟဲ့ ဟွတ့် တဝ်း ပါယ် တီ၊ ဂေ ဒူအီ တွိုန် ကာဖြူမ် ဒီ တဝ်း၊ “အိုဝ်၊ ဂြုဝ်း အန် နီ ဟဲ့ မုး၊ ဟဲ့ ကျ၊ ဟဲ့ မှာန်။”

25 ပန် တီ အာအေလီယာ တဝ်း ဒီ ဂေ၊ “ဒူအီ အီ လှူ ဒီ ဇဝ် ဘာလ တွိုန်၊ ကူပ် ဘေ ကိူန်၊ တဲး ဘေ ရဝ်း မက် အူ ဒုဝ် အာဒါ ဘေ၊ တဲး ဘေ ရဲန် ဒီ အာတ့်။ န့ ပါဝ် ပီဒဝ့် ငဝ်။”

26 ပန် တီ ဂေ တွိုန် မိူဝ် ကာဖြူမ် ဒီ ဘူင်၊ ရဲန် မ့ပြာယ် တဲး န့ ဆီချာ။ ဟဲ့ ဟွတ့်၊ ဂေ မိူဝ် ဘော ဒဲ့ ဇဝ် ဘာလ။ ဂေ တဝ်း၊ “စွယ် ယေ၊ စွယ် ယေ။” ယီ တူ မိုဝ်း ဂြုဝ်း မာဆေ၊ ယီ တူ မိုဝ်း အာဆေ ဝျီ့ ဂြုဝ်း ဂေ။ ဂေ ယီ ကာဖြူမ် ဒီ ဂါ ခူပ် ဒူင် ဘ့လေး ဂေ ပီ ဒီ လှူ ဂေ တွိုန်။

27 ကော ဇမ် ဆီငဲ ကာတဲ၊ အာအေလီယာ ပီ ဝါညာက် ဒီ ဂေ။ အန် တဝ်း၊ “ဆေ ဘေ ကာဖြူမ် ဒီ ဒတ် ဟဲန့် ဟဲန့်၊ ဒတ် တာင် တာင်၊ ဇဝ်ဖြာ ဘေ တီ ဟဲ့ နမ်လှုဝ်း ဘေ။ ဆေ အာဝ် ပါယ် တီ ယုဝ် အန် ညှမ် ဒန် ထူမ်။ အာဝ် ပါယ် တီ မိူဝ်၊ ယုဝ် အန် ပဲ့ ဟဲ့ ဟာဝ် ဒူပ် န့တေန့် တူင့်။ အာဝ် ပါယ် တီ၊ ယုဝ် အန် ပဲ့ ဟဲ့ အိတ်။ ခုဝ်၊ န့ လုဝ် အူ ဝီ ဟာဝ် ဘျိတ့် အန်။” 28 ပန် တီ ဂေ ဝီ ဝဲ ကာဖြူမ် ဒီ ဒတ် တာင်။ ဘော ဒိုဝ်း အာတိုမ် ဘော ဟိန် ဘတ့် ကြိး ဒီ ဒုဝ် ဂေ။ တဲး န့ ဒူပ် ဟိတ် ထုင်ဂျာမ် ဂေ။ တဲး နှာမ် လေး ဒီ ဒုဝ် ဂေ။ 29 ဆီငဲ ဟဲ့ ဟွတ့် ကာတဲ မိူဝ်၊ အာဝ် မိုဝ်း အာဆေ ဝျီ့ ဂြုဝ်း ဂေ။ ဂေ ဝီ ကာဖြူမ် ဒီ ဘ်ု ဒီ လှူ ကော ဇမ် ဘာ ဒီ အပ် မိူဝ်၊ အာဝ် မိုဝ်း အာဆေ အီ ထူမ် ဂြုဝ်း ဂေ။

30 ဟဲ့ ဟွတ့်၊ အာအေလီယာ ဝီ တဝ်း ဒီ ဒူအီ ဂေ တွိုန်၊ “တဲး ဘေ တး ချြီ့ အုဝ်။” ဂေ ဒူအီ ဂေ တွိုန် ဘော တး ချြီ့ အန်။ ဒေါ အန် တီ အန် ဘော ဝီ မ့ပြာယ် ကာစှူင့် လှူ ဒီ ဇဝ်ဖြာ အီ ဟဲ့ လိုဝ် တွိုန်။ 31 အာအေလီယာ ဘော ဒိုဝ်း မာဝ် ဂိုဝ် ဒီ အာ ဘူင့်။ အန် တိး ဒူပ် ဂွန် အာကူပ် အီ ဟဲ့ ပွိုန် ကာဒိက် ဆတ်ဇာ ဒီ ဇဝ်ဖြာ၊ အီ မုး ဒူအီ အီဆာရေလ။ 32 အန် ဒိုဝ်း မာဝ် ဂေ တွိုန်၊ တဲး ဘဲန် ကာစှူင့် လှူ ဒီ ဇဝ်ဖြာ။ အန် ဂိုဝ်း ရူင် ရူပ်၊ တဲး န့ ဝဝ်း ခဲ့ ပွိုန် ဒီ ဟပ် ငှုဝ် အာဒါ အာ ခွန်။ အန် ဘော ဒိုဝ်း ဟေ၊ ဘ့လေး တဲး န့ ဆီချာ။ 33 အန် ဘော ကာဒဲပ် မက် အာလူင့် တွိုန်၊ ဘဲန် ပွတ် ဘဲန် ပွတ်၊ ဘ့လေး ဒဲင် ဟေ တွိုန်။ အန် ဝီ တဝ်း၊ “ဒိုဝ်း ကာလုဝ့် တာင် ဖွုန် ဘူင့်၊ ဟ်ု အိုမ် တဲး န့ နုဝ့်။ ဘေ ဟုး ဒီ ပီ ဒီ လှူ။ ဘော ဒီ ဟေ တီ။”

34 ဂေ ဟဲ့ ဟွတ့် ဘူင်၊ အန် ပီ ဝီ တဝ်း၊ “တဲး ဘေ ဝီ ဟုး ပေါ အူ ဇေန့်။” ဂေ ပီ ဝီ ဟုး ပေါ အူ ဇေန့်။ ဟဲ့ ဟွတ့်၊ အန် ပီ ဝီ တဝ်း၊ “တဲး ဘေ ဝီ ဟုး ပေါ အူ ဇေန့်။” ဂေ ပီ ဝီ ဟုး ဘော နုဝ့် အူယ် ဇေန့်။ 35 အိုမ် ဘော လှဲ ရူပ် ကာစှူင့် လှူ၊ တဲး န့ ကော နုဝ့် ခဲင် ရူင် တွိုန်။

36 ဒေါ ဇမ် ခြာဝ် ဒီ လှူ ဘာ ဒီ အပ်၊ အာအေလီယာ ဘော တး ကွယ် ချြီ့။ အန် ဘော ဆာခိုဝ် မှာန့် ဒီ ဇဝ်ဖြာ၊ “အိုယ် မဲ ဇဝ် အီ မုး ဇဝ်ဖြာ ပီ ကြိုပ် အာဘြာဟမ် ဘော အာဆဲက် ဘော အာအီဆာရေလ။^a အုဝ် မှာန့် တဲး ဂေ ဒွန် အီ နပ် လွင် မဲ ဇဝ်၊ မဲ မုး ဇဝ်ဖြာ အီ အိုပ် ဂေ ဒူအီ အီဆာရေလ။ ဘော အုဝ် တဲး ဂေ နပ်၊ အုဝ် မုး ဒဲစေန့် မဲ ဇဝ်။ ပဲ့ ဟဲ့ ဘူင် အုဝ်၊ အုဝ် ဟဲ့ ဘူင် ဒွန် မျုဝ် ကူပ် ဟဲ့ စ်ု မဲ အုဝ် ဘူင်။ အုဝ် ဂါဝ် ပွုန် မဲ ဇဝ် ဘူင် ပီ မှာန့် အုဝ် အာတိုဝ် နီ။ 37 အိုယ် မဲ ဇဝ်ဖြာ၊ အုဝ် မှာန့် တဲး မဲ ဇဝ် ထူမ် ဂြုဝ်း ပီ ဆာခိုဝ် အုဝ် နီ၊ တဲး ဒူအီ ဂေ နီ နပ် လွင် မဲ ဇဝ်၊ မဲ မုး ဇဝ်ဖြာ။ မဲ ဇဝ် တဲး ဂေ ကာပ့လု နဝ်း ဂေ။”

38 အန် ဟဲ့ ဟွတ့် ဆာခိုဝ် ပါယ် တီ ဇဝ်ဖြာ ဘော တဲး ငဝ် စုဝ်း လူင် ကာဆိုမ် ဘော ပီ လှူ အန် ဘော ဟေ။ ဘော မာဝ် ဘော ကာဒါယ် ဒီ တွိုန် ဘော အိုမ် ခဲင် ရူင် တွိုန်၊ န့ ဘော ဟိတ် ဟေန့် တူတ့်။

39 ဒူအီ ဂေ တွိုန် ဟဲ့ ဟွတ့် ယိုဝ်၊ ဂေ ဘော ကာဖြူမ် ဒီ ခြိုပ်ခြဝ် ကြိုပ် တဝ်း၊ “ဇဝ်ဖြာ နီ ဟဲ့ မုး ဇဝ်ဖြာ။ ဇဝ်ဖြာ နီ ဟဲ့ မုး ဇဝ်ဖြာ ခါခ်ု။”

40 အာအေလီယာ ဝီ ကာလာင် ဒီ ဂေ တဝ်း၊ “တဲး ဘေ မှေတ့် ပါ ဂေ ဒူအီ အီ လှူ ဒီ ဇဝ် ဘာလ တီ။ ခေါ အူ ဝီ မိူဝ်၊ ကွဲ့ တဲး န့ လွတ်။” ပန် တီ ဂေ အီ ကွယ် ခူပ် အာအေလီယာ ဝီ ကာဖြူမ် ဒီ မှေတ့် ဂေ။ အာအေလီယာ ဘော ဒိုဝ်း ဟာဝ် ဂေ ဘာင် ဘ့လဲင် အိုမ် အီ စိူဝ် ကီဆူန် တွိုန် ဘော ငဝ်း ယမ် တူတ့် ဂေ ဒီ တီ။

41 ဝါယ် အန် တီ အာအေလီယာ ဝီ တဝ်း ဒီ ခုန်ဒီခမ် အာဟပ်၊ “မှာန့်၊ တဲး မဲ ဝေန့် ဟူမ် ဒီ ကာင် မဲ၊ န့ ဟဲ့ မိုဝ်း ကာနမ်၊ န့ ဒီ ဂ့လာယ် တာင်။” 42 ခုန်ဒီခမ် အာဟပ် တွိုန် ဘော ဝေန့် ဒီ ကာင် အန်။ အာအေလီယာ ဘော ဝီ ဟုဝ့် ဒီ နွန် ဂါမေလ၊ အန် ဘော ဆာခိုဝ် ဘော မုတ် ဂိုပ် ဒဲင် ကာဒါယ်၊ တဲး နာ အန် စူ ဒီ ဂိန့်ကြူင့် အန်။ အန် ဝီ တဝ်း ဒီ မှာယ် အန်။ “မဲ ဟုဝ့် ယွတ်၊ နာ ကွယ် အိုမ် နမ်မုက်ဆာရာ ဒွယ်။”

43 မှာယ် အန် တွိုန် မိူဝ် ဟုဝ့် ယွတ်။ အန် ဝီ တး တဝ်း၊ “အာဝ် ပွိုန် ယိုဝ် မာဆေ။” အာအေလီယာ ပီ ဝီ တဝ်း ပေါ ဘူ ဇေန့်၊ “မဲ ဟာဝ် ယွတ် ပေါ အူ ဇေန့်။” မှာယ် တွိုန် ဘော ဟာဝ် ဟဲ့ နုဝ့် ဘူ ဇေန့် တွိုန်၊ 44 အန် ဘော ယိုဝ် ကာမိုက် ဂ့လာယ် ဒီတဲတ် မွက့် ခဲ့ ကာဘာ ဒဲ ဒူအီ၊ န့ ဘော ဟုဝ့် နာ ကွယ် အိုမ် နမ်မုက်ဆာရာ။ အာအေလီယာ ဝီ ကာလာင် ဒီ အန် တဝ်း၊ “တဲး မဲ ဝေန့် ကာလာင် ဒီ ခုန်ဒီခမ် အာဟပ်၊ တဲး အန် မ့ပြာယ် လက်လဝ် အန်၊ တဲး အန် ဟာဝ် အာတ့် စုဝ်း ဂ့လာယ်၊ ကွဲ့ တဲး အန် ဒန် အမ် ည။”

45 ကွယ် အူ ကာစန် န့ ဘော မိုဝ်း န့အု ဝွင့် ခဲင် ဂါင်ဟြာဝ်။ ဘော ခုန် ဘော ဂ့လာယ် ဘော စုဝ်း တာင် ကာဆဝ်။ ခုန်ဒီခမ် အာဟပ် မိူဝ် ဘော ပဝ့် လက်လဝ် အန်၊ ဝေန့် မိူင် ယေစာရေလ။ 46 ပန် တီ ဇဝ်ဖြာ ဒွါ ပွုန် အန် ဒီ အာအေလီယာ။ အန် ဘော ဒိုဝ်း ဆီတုဝ် အန်၊ စျှီပ် ဒီ ဆဲ့ အန်၊ တဲး အန် ပွိုန် ဒီ ကာဘ့လဲပ် ယဲတ့် နာ အာတ့် အာဟပ် တွိုန်၊ တဲး အန် တး ဇမ် ဘာင် မာလုဝ်း မိူင် ယေစာရေလ တွိုန်။