1 ခုန်ဒီခမ် အာဟပ် ဘော ကာလာင် လွင် ပဲ့ ဟဲ့ ဘူင် အာအေလီယာ ဘော လွင် ပဲ့ ဟဲ့ ငဝ်း ဝဲန် အန် ဒူအီ ဘျာန် ဂြုဝ်း ဇဝ် ဘာလ တွိုန်၊ 2 နာင် ယေစာဘေန် ဘော စ်ု ဒါလာမ် အန် အူ ဝီ ဟာဝ် ဒူင် ကွယ် အာအေလီယာ၊ ကာလာင် ဒီ အန် တဝ်း၊ “ခဲညှာ အာခြာဝ် နီ၊ ဆေ အုဝ် တူ ဘူင် တဲး မဲ ယမ် ပီ ဒူအီ ပဲ့ ဟဲ့ ငဝ်း ဝဲန် မဲ တွိုန်၊ အုဝ် ဒီ တဲး ဇဝ် ဒွန် ကာဒင် ဒမ် မှာပ် ဒီ အုဝ်။”

3 ဒေါ အန် တီ အာအေလီယာ ဘော ယုဝ်။ အန် ဘော တဝ် ဟာဝ် ဇမ် ဒူင် စိူဝ် ဘီရာဆေဘာ ခဲင် မိူင် ယူဒါ။ အန် တဝ်း၊ တဲး အန် လွတ် ယမ်။ အန် ဘော အုန် ဒီဘဲ အန် ဒီ တီ။ 4 အန် ယီ ဟာဝ် ခဲင် ပြဲ ကာဟဝ်း အာဒါ အူ ဆီငဲ။ အန် ဘော ဟာဝ် ဇမ် ခြိုမ် ဟေ ရာထာမ်၊ တုတ့် ကွယ် ဒီ တီ၊ ဆာခိုဝ် မှာန့် ဒီ ဇဝ်ဖြာ တဝ်း၊ “အိုယ် မဲ ဇဝ်၊ မှာန့် တဲး မဲ တဲး အုဝ် ယမ် ဒေါ တီ နီ။ အုဝ် ဟဲ့ ပိုဝ် ဘဲန် ဒူအီ။ တဲး အုဝ် ယမ်။ အုဝ် မိူဝ် တူ မွှိုမ် လွှိုမ် ဂေ ဂုန့် ဒင် အုဝ်။” 5 ဟဲ့ ဟွတ့် ဆာခိုဝ် ပါယ် တီ အန် ဘော ပွိုန် ဒီ အိတ် ခြိုမ် ဟေ ရာထာမ် တွိုန်။

ဒေါ အန် တီ အာမူ အာမာတ် ဇဝ်ဖြာ ဘော တး ဒုး အန်။ အန် တဝ်း၊ “ယိတ့်၊ ဟူမ် ပီ ဒီ ဟူမ် မဲ။” 6 အာအေလီယာ ဝီ ဘ့လာင် ငါယ် အန်၊ ယွတ်။ အန် ယိုဝ် ခါမုန် ဟဲ့ ဟွတ့် တာတ် ဒဲင် ငဝ်။ ဘော အိုမ် အူ ကာပဝ် ကွယ် နာ ဒဲင် ဂိန့် အန်။ အန် ဘော ဟူမ်။ ဟဲ့ ဟွတ့်၊ အန် ပီ ဝီ အိတ်။

7 အာမူ အာမာတ် ဇဝ်ဖြာ တွိုန် ပီ ဝီ တး ပေါ အူ ဇေန့်၊ ဒုး အန်၊ ကာလာင် ဒီ အန် တဝ်း၊ “န့တေန့် ဒူင် လုဝ် ဟာဝ် မဲ၊ န့ ဆီ တူင့် ကာဆဝ်။ တဲး မဲ ယိတ့် ဟူမ် ပေါ န့ ပွါ။” 8 အန် ဘော ဝီ ယိတ့် ဟူမ် ပေါ အူ ဇေန့်။ ပီ ဒီ ဟူမ် တီ၊ တဲး န့ ဘဲန် ပ့လူမ် ဘဲန် ဟဲန့် ဒီ အန်၊ တဲး အန် ပွိုန် ဒီ ဟာဝ် ခြာဝ် န့တေန့် အာဒါ ဖွုန် ဂိုဝ် ဆီငဲ ဒီ ဖွုန် ဂိုဝ် မှိုဝ်။ အန် ကော ဇမ် ဒီ နွန် ဟုဝ်ရေပ် အီ မုး နွန် ဒူင် ကွယ် ဇဝ်ဖြာ။ 9 အန် ဘော လိုပ် ဟာဝ် ခဲင် ကာဒဝ် မာဝ်၊ ကွယ် ဒီ တီ။

ဇဝ်ဖြာ ဝီ တး ဇမ် ဒူင် ကွယ် အန်၊ ကာလာင် ဂြုဝ်း ဒီ အန်။ ဇဝ်ဖြာ တဝ်း၊ “အိုယ် အာအေလီယာ၊ မာဆေ ပီ ဘူင် မဲ ဒီ နီ။း”

10 အာအေလီယာ ဘော ဝီ တဝ်း။ “နဝ်း အုဝ် ဟဲ့ ဂျုဝ်ဂျာ ဒီ ဘူင် ဘဲန် မျုဝ် ဘဲန် မျုဝ်၊ တဲး ဂေ ဒူအီ အီဆာရေလ ဒူပ် မဲ ဇဝ်ဖြာ။ ဂေ ယီ ဟဲ့ ဝဲန် ဒါရာ မဲ ဇဝ်။ ဂေ ဟဲ့ ပျာတ့် ဝဲန် ဘော ကာစှူင့် လှူ ဂေ ဒီ မဲ ဇဝ်။ ဘော ဒူအီ လှူ ဒီ မဲ ဇဝ်၊ ဂေ ဟဲ့ ငဝ်း ဝဲန်။ န့ ဂိတ် မီ အုဝ် အူ ဝီ။ ဂေ ဟဲ့ ဟြေတ့် ဘော အုဝ် တဲး ဂေ ပွိုန် ဒီ ငဝ်း။”

11 ဇဝ်ဖြာ ဝီ တဝ်း ဒီ အန်၊ “တဲး မဲ လေး နာ ရေတ့် ကာဒဝ် မာဝ်၊ စွင့် ကွယ် ဒီ အာတ့် အုဝ်။ မဲ ဒီ ယိုဝ် အုဝ် ဒေါ ဝဝ့် ဟာဝ် အုဝ် နာ အာတ့် မဲ။”

ပန် တီ န့ ဘော မိုဝ်း ခုန် တာင် ဘုတ်။ နွန် ဒါအာင် မာဝ် ဂေ တွိုန် ဘော ကာလာတ့် ဘဲန် ဘူင့် ဘဲန် ဘူင့် အာတ့် တး ဇဝ်ဖြာ။ ဇဝ်ဖြာ ယီ တူ ကွယ် ခဲင် ခုန် တွိုန်။ ဝါယ် ခုန် တာင် တွိုန် ပီ ဝီ မိုဝ်း မာအိမ် ယေန့်။ ဇဝ်ဖြာ ယီ တူ တး ဒေါ ယေန့် မာအိမ် တီ။ 12 ဝါယ် မာအိမ် ယေန့် တွိုန်၊ ပီ ဝီ မိုဝ်း ငဝ်။ ဇဝ်ဖြာ ယီ တူ ကွယ် ခဲင် ငဝ်။ ဝါယ် ငဝ် တီ ပီ ဝီ မိုဝ်း ဂြုဝ်း ဖူဖာပ် န့စု န့စမ်။ 13 အာအေလီယာ ဘော ယိုဝ် ဂြုဝ်း တီ၊ အန် ဘော ဒိုဝ်း ဟိုပ်၊ ကာမှုဝ့် ဂိန့် အန်၊ လေး စွင့် ဘာင် ကာဒဝ် မာဝ်။ ဒေါ အန် တီ အန် ဘော ယိုဝ် ဂြုဝ်း တး တဝ်း ဒီ အန်၊ “မာဆေ ပီ ဘူင် မဲ ဒီ နီ။း”

14 အန် မိူဝ် ဝီ တဝ်း၊ “အုဝ် ဟဲ့ ဂျုဝ်ဂျာ ကာဆဝ် ဒီ ဘူင် ဘဲန် မျုဝ် ဘဲန် မျုဝ်၊ တဲး ဒူအီ ဒူပ် မဲ ဇဝ်ဖြာ။ ဂေ ဒူအီ အီဆာရေလ၊ ဂေ ယီ ဟဲ့ ဝဲန် ပီ ကာဆဲန့် ဂေ ဒီ မဲ ဇဝ်ဖြာ။ ဂေ ဟဲ့ ပျာတ့် ဝဲန် ဘော ကာစှူင့် လှူ ဒီ မဲ ဇဝ်၊ ဟဲ့ ငဝ်း ဝဲန် ဂေ ဒူအီ လှူ ဒီ မဲ ဇဝ်။ ဟဲ့ ဂိတ် မီ အုဝ် အူ ဝီ။ ဘော အုဝ်၊ ဂေ ဟဲ့ ဆီ ငဝ်း ယမ်။”

15 ဇဝ်ဖြာ ဝီ တဝ်း ဒီ အန်၊ “မဲ ဟာဝ် ဝီ ဝေန့် ဒူပ် န့တေန့် နီ၊ တဲး မဲ ဇမ် ဒူင် ပြဲ ကာဟဝ်း ကာတတ် မိူင် ဒါမာခူ။ မဲ ဟီ ဟွတ့် ဇမ်၊ မဲ ဖဝ်း နာမန် ဒီ ဂိန့် အာဟာစေလ၊ တဲး အန် ဘဲန် ခုန်ဒီခမ် အိုပ် မိူင် အာရာမ်။ 16 မဲ ဘော ဖဝ်း နာမန် ဒီ ဂိန့် အာယေဟူ အီ မုး ဂွန် အာနိမ်ဆီ တွိုန်၊ တဲး အန် ဘဲန် ခုန်ဒီခမ် အီ အိုပ် ဒူအီ အီဆာရေလ။ မဲ ဘော ဖဝ်း နာမန် ဒီ ဂိန့် အာအေလီဆာ၊ အီ မုး ဂွန် အာဆာဖတ်၊ အီ ကွယ် မိူင် အာဘေလမာဟာလ တွိုန်၊ တဲး အန် ဘဲန် ဒူအီ ဘျာန် ဂြုဝ်း ဇဝ်ဖြာ ကာဒါင် မဲ။ 17 ဂေ အီ လွတ် ယမ် ဒီ မာပွါ့ အာဟာစေလ တွိုန်၊ အာယေဟူ ဒီ ငဝ်း ယမ်။ ဂေ အီ လွတ် ယမ် ဒီ မာပွါ့ အာယေဟူ တွိုန်၊ အာအေလီဆာ ဒီ ဝီ ငဝ်း ယမ်။ 18 ခဲင် ဒူအီ အီဆာရေလ အုဝ် ယီ တဲး န့ ဆီ ဂိတ် ဘူ ဟြဲန့် ဝီ၊ ဂေ တူ ဒွိုမ် ခြိုပ်ခြဝ် နာ အာတ့် ဇဝ် ဘာလ ဘော တူ ဒွိုမ် အုး အန်။”

19 ဇဝ်ဖြာ ဟဲ့ ဟွတ့် ကာလာင် ဂြုဝ်း ဒီ အာအေလီယာ တွိုန်၊ အန် ဘော ယိတ့် ဒီ တီ၊ ဟာဝ် ဘော ကာတုန့် အာအေလီဆာ အီ မုး ဂွန် အာဆာဖတ် တွိုန်။ အာအေလီဆာ ဟဲ့ ဒိုဝ်း မာမက်၊ ထဲ ဒူင် နာ အန်။ အန် ဟာဝ် ဒူပ် မက် အီ မုး ဂိုဝ် ဒီ အာ ဂူ တွိုန်။ အာအေလီယာ ဘော ဟာဝ် ကာတတ် အန်၊ ဘော ဒိုဝ်း ဟိုပ် ဒီဖဝ့် ဒီ အန်။ 20 အာအေလီဆာ ဘော ဘ့လေး အုန် မက် အန်၊ ဘော ဟာဝ် ဒူပ် အာအေလီယာ တွိုန်။ အန် ဝီ မှာန့် ဒီ အာအေလီယာ တဝ်း၊ “တဲး အုဝ် ပွိုန် ဒီ ဝေန့် အုး ပုတ့် ဂုန့် မာ အုဝ် အူ ကာစန်။ ဟဲ့ ဟွတ့်၊ အုဝ် ဒီ ဘော ဒူပ် မဲ ဆာရာ။”

အာအေလီယာ ဝီ တဝ်း ဒီ အာအေလီဆာ၊ “တဲး မဲ ဝေန့်။ မဲ ဘော ဝီ တး၊ အာဝ် လိူက်။”

21 အန် ဘော ယိတ့် ဒူင် ကွယ် အာအေလီယာ၊ ဝီ ဝေန့်။ အန် ဘော ဝေန့်၊ ငဝ်း မက် အန် အူ ဂူ၊ အန် ဘော ဒိုဝ်း ခြိုင် ထဲ အန် ဂေ တွိုန်၊ ဒုဝ့် တဲး အန် ပွိုန် ဒီ ဒင် ယင် မက် အန် တွိုန်။ အန် ဘော ဘ့လေး ဂေ ဒွန် အီ ဟူမ်။ အန် ဟဲ့ ဟွတ့် ဘူင် ပါယ် တီ အန် ဘော ဒူပ် အာအေလီယာ တွိုန်၊ ဘော ဘဲန် ဒဲစေန့် အန်။