1 အာဘေန်ဟာဒါတ် အီ မုး ခုန်ဒီခမ် အီ အိုပ် မိူင် အာရာမ် တွိုန်၊ အန် ဘော ဒဲ့ ဒါ ဘုဝ် အန်၊ တဲး ဂေ တး ကာဇု။ ဘော ဒါ တာင် အူယ် ဂိုဝ် ဒီ အာ ဝီ ဘော ဒါ ဆိုက် အီ ပဝ့် မ့ပြွင့် ဘော ဒါ ဆိုက် အီ ပဝ့် လက်လဝ်၊ ဂေ မိူဝ် ဟုဝ့် ရူပ် မိူင် ဆာမာရီ။ ဂေ ဒီ တိုက် မိူင် တီ။ 2 အန် ဘော စ်ု ဒါလာမ် အန်၊ တဲး ဂေ လိုပ် ဟာဝ် ခဲင် မိူင် အာဟပ် အီ မုး ခုန်ဒီခမ် အီ အိုပ် ဒူအီ အီဆာရေလ၊ တဲး ဂေ ကာလာင် ဟာဝ် ဂြုဝ်း တဝ်း၊ 3 “ရွိုန် မဲ ဂေ ခြိဝ် မဲ ဒီ ဘဲန် ကြုဝ် အုဝ်။ ဘော ဂွန် မဲ၊ အီဘိုန့် မဲ အီ ဟဲ့ စှိတ် လွှိုမ် အီ ဟဝ်၊ ဂေ ဒီ ဘဲန် ကြုဝ် အုဝ်။”

4 ခုန်ဒီခမ် အီဆာရေလ ဝီ တဝ်း၊ “အိုယ် မဲ ဇဝ်၊ မဲ ဒါ ဘုဝ် တာင်၊ ခဲ့ ပီ တဝ်း မဲ ဇဝ် တီ၊ ခဲ့ ပီ မိုဝ်း အုဝ် ကြုဝ်ကြာမ်၊ န့ ဒီ ဘဲန် ကြုဝ် မဲ ဇဝ်။”

5 ဒါလာမ် ဂေ တွိုန် ပီ ဝီ တး ပေါ အူ ဇေန့်၊ ပီ ဝီ တဝ်း၊ “အာဘေန်ဟာဒါတ် ဒမ် ဟာဝ် ဂြုဝ်း နီ။ အန် တဝ်း၊ ‘ရွိုန် မဲ ဂေ ခြိဝ် မဲ၊ အီဘိုန့် မဲ ဂေ ဂွန် မဲ၊ အာဇ တီ န့ ပီ မဲ ဟဲ့ အာပ် ဒွါ ဒီ အုဝ်။ 6 ပါ ခဲညှာ ဟီ ဇမ် အာခြာဝ် နီ၊ အုဝ် ဒီ တဲး ဂေ ဒီဘဲ အုဝ် ဟာဝ် ဒူင် ကွယ် မဲ၊ တဲး ဂေ ခြုဝ်း ခဲင် ကာင် မဲ ဘော ခဲင် ကာင် ဒီဘဲ မဲ။ ခဲ့ ပီ ယိုဝ် ဂေ အီ လဝ့် နဝ်း ဂေ၊ ဂေ ဒီ ဒိုဝ်း ဟာဝ် တူတ့်။’”

7 ပန် တီ ခုန်ဒီခမ် အီဆာရေလ တွိုန် ဘော ဒဲ့ ဒူအီ ရဝ် ဒူအီ ကာင်၊ ဒူအီ ကတ် ဒူအီ ဂဲ၊ တဲး ဂေ ဘောကာဂ့လျီတ် တး ကာဇု။ အန် ဘော ကာလာင် ဒီ ဂေ တဝ်း၊ “တဲး ဘေ ယွတ် လွင် ပဲ့ ဟဲ့ ဘူင် ဒူအီ ဝီ နီ၊ အန် ဆီ ဟြေတ့် ဒီ ကာလုတ့် ဒီ အုဝ်။ ဒေါ ဟဲ့ မှာန့် အန် ဘော အီဘိုန့် ဂေ ဂွန် အုဝ်၊ ဘော ရွိုန် ဂေ ခြိဝ် အုဝ်၊ အုဝ် တူ တဝ်း မာဆေ၊ တူ ထဲန့် အန်။”

8 အန် ဟဲ့ ဟွတ့် ကာလာင် ဂြုဝ်း တီ၊ ဂေ ဒါ တာင် တွိုန် ဒွန် အီ ဘော ကာဖြူမ် ဒီ တဝ်း ဒီ အန်၊ “မဲ ခုန်ဒီခမ် အာဝ် လုဝ် ထူမ် ဂြုဝ်း အန်။”

9 ကူပ် အန် တီ၊ ခုန်ဒီခမ် အာဟပ် ဝီ ကာလာင် ဒီ ဒါလာမ် ခုန်ဒီခမ် အာဘေန်ဟာဒါတ် ဂေ တွိုန် တဝ်း၊ “ဘေ ဝီ ဝေန့် ကာလာင် တဝ်း ဒီ ခုန်ဒီခမ် ဘေ၊ ‘ခဲ့ ပီ တဝ်း မဲ ဇဝ် ဒေါ ဂုဝ် တွိုန်၊ အုဝ် ဟဲ့ ဆီဖဝ်။ မာလဲ၊ ခဲ့ မှာန့် မဲ ဒေါ တီ နီ၊ အုဝ် တူ ပွိုန် တဲး မဲ ဘူင်။’” ဒါလာမ် ဂေ တွိုန် ဘော ဝီ ဝေန့် ကာလာင် ဂြုဝ်း တွိုန် ဒီ ခုန်ဒီခမ် ဂေ။

10 ပန် တီ အာဘေန်ဟာဒါတ် တွိုန် ဝီ စ်ု ဂေ ဟာဝ် ပေါ အူ ဇေန့်၊ တဲး ဂေ ဝီ ကာလာင် ဒီ ခုန်ဒီခမ် အာဟပ် တဝ်း၊ “အုဝ် ဒီ ဒိုဝ်း တူတ့် ကြုဝ် မဲ။ ဘော ကာဒါယ် ဘော ကာပုး ခဲင် မိူင် အီဆာရေလ၊ အူ ဝီ အူ ကာနျီမ် အုဝ် မိူဝ် တူ တဲး န့ ဂိတ် အာဒါ ဂေ အီ ဒူပ် အုဝ်။ ဆေ အုဝ် တူ ဘူင် ပါယ် တီ တဲး ဂေ ဇဝ် ပီ ကြိုပ် အုဝ် ဒမ် မှာပ် ဒီ အုဝ်။”

11 ခုန်ဒီခမ် ခဲင် မိူင် အီဆာရေလ ဝီ တဝ်း၊ “တဲး ဘေ ကာလာင် ဒီ ခုန်ဒီခမ် တဝ်း၊ ‘ဒေါ စှိုပ် ဘေ ခြိုင် ဆိုက်၊ အာဝ် လုဝ် အိူပ် ဒုဝ် ဘြိမ် ဘေ ပီ ဂေ ဒါ ဆိုက် အီ ဟဲ့ ဝီ ဘုတ့် ခြိုင် ဝါယ် ဟဲ့ အွင် ဂေ။’”

12 ခုန်ဒီခမ် အာဘေန်ဟာဒါတ် ဘော ယိုဝ် ဂြုဝ်း တီ ဒေါ ဆီငျာ ဟူမ် ဂေ ဘူမ် ခဲင် ထိုပ် အန်။ ဘော အန် ဘော ဂေ အီ အိုပ် မိူင်၊ ဂေ ကွယ် ဒီ တီ။ အန် မိူဝ် ဝီ ကာလာင် ဒီ ဒူအီ အန် တဝ်း၊ “ရဲန် ဆိုက် အေ၊ မ့ပြာယ် ဒုဝ် ဘေ။” ဂေ တွိုန် မိူဝ် မ့ပြာယ် ဒုဝ် ဂေ၊ ရဲန် ဘဲန် မျုဝ် ဘဲန် မျုဝ် တဲး ဂေ ပွိုန် ဒီ တိုက် မိူင် အီဆာရေလ။

13 ဒေါ အန် တီ ဒူအီ ဘျာန် ဂြုဝ်း ဇဝ်ဖြာ အူ ဝီ ဘော တး ဒူင် ကွယ် ခုန်ဒီခမ် အာဟပ်။ အန် တဝ်း၊ “ဇဝ်ဖြာ ဟဲ့ ကာလာင် တဝ်း ပါယ် နီ၊ ‘မဲ ဟဲ့ ယိုဝ် ဒါ ဆိုက် ကိူန် ဂေ နီ၊ အုဝ် ဒီ တဲး မဲ ပဲ ဂေ အာတိုဝ် နီ။ အုဝ် ဒီ တဲး မဲ နပ်၊ အုဝ် မုး ဇဝ်ဖြာ။’”

14 ခုန်ဒီခမ် အာဟပ် ဝီ တဝ်း၊ “အန် ဇဝ် ဒီ တဲး အာဆေ ဘူင် ဇိုဝ် တီ။း” အန် ဝီ တဝ်း၊ “ဇဝ်ဖြာ တဝ်း၊ ‘န့ မုး ဒါ ဆိုက် အီ ယဲတ့် အီ ဟဝ်၊ ဂေ အီ ညှမ် တာင်၊ ဂေ ဒီ ဘူင် ပါယ် တီ။’” ခုန်ဒီခမ် ပီ ဝီ ဒီမွှတ် မ့ပွါ တဝ်း၊ “အာဆေ ဒီ ကာဂုဝ်း ဒီ အာတ့်။” ဒူအီ ဘျာန် ဂြုဝ်း ဇဝ်ဖြာ တွိုန် ဝီ တဝ်း၊ 15 “မဲ ဒီ ကာဂုဝ်း ဒီ အာတ့်။”

ပန် တီ ခုန်ဒီခမ် အာဟပ် ဘော ဒဲ့ ဒါ ဆိုက် အီ ယဲတ့် အီ ဟဝ် တွိုန်။ န့ မိုဝ်း အာ မာယဝ်း ဒီ အူယ် ဂိုဝ် ဒီ အာ ဝီ။ ဟဲ့ ဟွတ့်၊ အန် ပီ ဝီ ဒဲ့ ခဲ့ ကွယ် ဒူအီ အီဆာရေလ။ ဂေ ဘောကာဂ့လျီတ် မိုဝ်း ဘူ ဟြဲန့် ဝီ။ 16 ဂေ ဘော ကာဖြူမ် ဒီ လေး ဒေါ ကာတဲ ဆီငဲ။ အီ မုး အာဘေန်ဟာဒါတ် ဂေ တွိုန်၊ ဂေ ဆီ ဒျီင် ပဝ်း ကွယ် ခဲင် ထိုပ် ဂေ ဒါ တာင် အီ စွယ် အန်၊ အီ မုး အူယ် ဂိုဝ် ဒီ အာ ဝီ တွိုန်။ ဂေ ကော ယိုတ့် ကာဆဝ် ပဝ်း။ 17 ဒါ ဆိုက် အီဆာရေလ အီ ယဲတ့် ဂေ တွိုန်၊ ဂေ ဘော လေး ဟာဝ် ဒီ အာတ့်။ အီ မုး အာဘေန်ဟာဒါတ် တွိုန်၊ အန် ဟဲ့ စ်ု ဒူအီ အန် မင် အီ ဟာဝ် ချွင် ဒီ ယွတ်။ ဂေ ဝီ ကာလာင် ဒီ အာဘေန်ဟာဒါတ် တဝ်း၊ “ဒူအီ ခဲင် မိူင် ဆာမာရီ ဟဲ့ တး။”

18 အန် ဝီ တဝ်း ဒီ ဂေ၊ “ဆေ ဂေ ဘော တး ဒါခိုယ်၊ တဲး ဘေ မှေတ့် ဒုဝ် အိမ် ဂေ။ ဆေ ဂေ ဘော တး တဝ်း ဒီ ကာဂုဝ်း၊ တဲး ဘေ မိူဝ် မှေတ့် ဒုဝ် အိမ် ဂေ။”

19 ပန် တီ ဒါ ဆိုက် ခုန်ဒီခမ် အာဟပ် အီ ယဲတ့် တွိုန် ဘော ဒါ ဘုဝ် ဒါ ဆိုက် အီ ဒူပ် ဂေ တွိုန်၊ ဂေ ကာဖြူမ် ဒီ လေး ခဲင် မိူင် ဂေ။ ဂေ ဝီ ကာဂုဝ်း ဒီ ရန်ဆူ ဂေ အူ ဝီ ဒုဝ် အူ ဝီ။ 20 ဒူအီ အာရာမ် ဂေ တွိုန် ဘော တဝ်။ ဒူအီ အီဆာရေလ ဘော ခုင်ခြး ဒူပ် ဂေ။ အီ မုး ခုန်ဒီခမ် အာဘေန်ဟာဒါတ် ဘော ဂေ ဒူအီ အာရာမ် ဘော ဒါ ဆိုက် အီ ပဝ့် မ့ပြွင့် ဂေ တွိုန်၊ ဂေ ဘော ကာဒူပ် တဝ်၊ တဲး ဂေ လွတ်။ 21 ခုန်ဒီခမ် အီဆာရေလ ဘော တး ပျာတ့် ဝဲန် ဒပ် ဂေ ဘော မင်ပြွင့် ဘော လက်လဝ် ဂေ။ အန် ဘော ငဝ်း ယမ် ကိူန် ကာဆဝ် ဂေ။

22 ဟဲ့ ဟွတ့်၊ ဒူအီ ဘျာန် ဂြုဝ်း ဇဝ်ဖြာ တွိုန် ဘော ဝီ တး ဒူင် ကွယ် ခုန်ဒီခမ် အီဆာရေလ။ အန် တဝ်း၊ “မဲ ဟာဝ် မ့ပြာယ် ဒုဝ် မဲ၊ တဲး မဲ မိုဝ်း ဟဲန့် ကာမာယ်။ မဲ လုဝ် ဆာဒိက်၊ ဇဝ်ဖြာ ဒီ ဝီ ဘူင် ပါယ် မှဝ်။ ဟီ ဇမ် ခြာဝ် ဒီယာင် နာ အာတ့် နီ၊ ခုန်ဒီခမ် အာရာမ် ဒီ ဝီ တး ကာဂုဝ်း ပေါ အူ ဇေန့်။”

23 ဒေါ အန် တီ ဂေ ဒီဘဲ ခုန်ဒီခမ် အာရာမ် တွိုန် ဝီ တး ကာလာင် ဒီ အန် တဝ်း၊ “ဇဝ်ဖြာ ဂေ ဒူအီ အီဆာရေလ၊ အန် မုး ဇဝ်ဖြာ အီ အိုပ် ဒီ နွန်။ ခုဝ်၊ ဟဲန့် ဂေ ကိူန် လွှိုမ် အေ။ အေ ဝီ ဟာဝ် ကာဂုဝ်း ဒီ ဂေ ဒူင် ဂ့လင် ပေါ အူ ဇေန့်။ ဆေ အေ ကာဂုဝ်း ပါယ် တီ အေ ဒီ မိုဝ်း ဟဲန့် ကိူန် လွှိုမ် ဂေ အာခ်ု မှာန်။ မှာန့်၊ တဲး အေ ဘူင် ပါယ် တီ။ 24 မှာန့် ဒီ ဘ့လွာ့ လူင် အာယာ ဒါ ကာညာ ဒွန် အီ၊ ဝီ ဒါင် ဒါ ဆိုက် ပ့လု ဒုဝ် ဂေ၊ 25 ဝီ ရဲန် ဒပ် တဲး န့ ကိူန် ကာရမ် အီ ဟဲ့ စှိုမ် ခါ အာတ့်။ တဲး မ့ပြွင့် ကာဒါင် မ့ပြွင့် အီ ဟဲ့ စှိုမ်၊ လက်လဝ် ကာဒါင် လက်လဝ်။ အေ ကာဂုဝ်း ဒီ ဂေ ဒူင် ဂ့လင် ခါ နီ။ အေ ဒီ ဟဲန့် လွှိုမ် ဂေ အာခ်ု မှာန်။” အန် မိူဝ် ထူမ် ပီ တဝ်း ဂေ တွိုန်။ ဂေ မိူဝ် တဝ်း ဒီ ဘူင် ပါယ် တီ။

26 ဝါယ် အန် တီ ဘော နုဝ့် အူ ဆီနမ်၊ အာဘေန်ဟာဒါတ် တွိုန် ဘော ရဲန် ဒါ ဆိုက် အန်၊ ဟာဝ် မိူင် အာဝှဲက်၊ တဲး ဂေ ဟာဝ် ကာဂုဝ်း ဒီ ဂေ ဒူအီ အီဆာရေလ တွိုန်။ 27 ဂေ ဒါ ဆိုက် အီဆာရေလ မိူဝ် ရဲန် ဒါ ဆိုက် ဂေ ဘော ရဲန် စာရိ စာခ ပီ ဒီ ဟူမ် ဂေ။ ဒါ ဆိုက် ဂေ ဘော ဟာဝ်။ ဒူအီ အီဆာရေလ ဂေ တွိုန် ယီ မိုဝ်း ပြေတ့် ဘော နှဲန် ဖိုင် မာပဲ အာ ဖိုင် အီ ချ နာ အာတ့် ရန်ဆူ ဂေ တွိုန်။ အီ မုး ဒူအီ အာရာမ် ဂေ တွိုန်၊ ဂေ ကိူန် ဟဲ့ ကွယ် ဒွန် ပ့လုဝ့်။

28 ဒေါ အန် တီ ဒူအီ ပီ တိုယ် ဇဝ်ဖြာ အူ ဝီ ဘော တး ကာလာင် ဂြုဝ်း ဒီ ခုန်ဒီခမ် အာဟပ်။ အန် တဝ်း၊ “ဇဝ်ဖြာ တဝ်း၊ ‘ဂေ ဒူအီ အာရာမ် တဝ်း၊ ဇဝ်ဖြာ အေ အန် မုး အီ အိုပ် ဒီ နွန်။ အန် တူ မုး ဇဝ်ဖြာ အီ အိုပ် ဒူင် ဂ့လင်။ ခုဝ်၊ အုဝ် ဒီ တဲး မဲ ပဲ ဂေ ဒူအီ ကိူန် တီ၊ တဲး မဲ နပ်၊ အုဝ် မုး ဇဝ်ဖြာ။’”

29 ဂေ ဒါ ဆိုက် မိူဝ် ချ တဲး န့ လာယ် ကာဆိူဝ်။ ဂေ ဘော ကွယ် ကော နုဝ့် ဘူ ဆီငဲ။ ဟဲ့ နုဝ့် ဘူ ဆီငဲ တွိုန်၊ ဂေ ဘော ကာဂုဝ်း။ ဆီငဲ တီ ဒူအီ အီဆာရေလ ဘော ငဝ်း ယမ် ဒူအီ အာရာမ် တွိုန် အူ ဆဲန့် ဝီ။ 30 ဂေ ဒူအီ အီ ဆီ ဂိတ် တွိုန်၊ ဂေ ဘော တဝ် ဟာဝ် မိူင် အာဝှဲက် တွိုန်။ ဒေါ လိုပ် ဟာဝ် ဂေ ခဲင် မိူင် တွိုန်၊ ရဲင် မိူင် ဘော ကေး ထိပ် ဂေ ဒူအီ အာ မှိုန့် ဒီ ဘူ ဟြဲန့် ဝီ။ အီ မုး အာဘေန်ဟာဒါတ် တွိုန်၊ အန် ဘော တဝ် ဟာဝ် ခဲင် မိူင်၊ ဘော ဟာဝ် ချြီင် အန် ခဲင် ဟူင် အိတ် အီ ကွယ် အီ ခဲင်။

31 ဒီဘဲ အန် ဂေ တွိုန် ဝီ တဝ်း ဒီ အန်၊ “မဲ ဇဝ် ဟဲ့ ယိုဝ် လွင် ခုန်ဒီခမ် ဒူအီ အီဆာရေလ၊ အန် မုး ခုန်ဒီခမ် အီ မိုဝ်း နဝ်း ကာဝေ အီ။ တဲး ယေ ဒိုဝ်း ခြိုင် စာန် စှိုပ် ဒီ ညွယ် ယေ၊ ဒိုဝ်း ဘော ဝန် ကျီန် ဒီ ဂိန့် ယေ။ ဆေ ယေ ဝီ ဟာဝ် ဒူင် ကွယ် ခုန်ဒီခမ် အာဟပ် တီ၊ ယေ ထာင် အန် ဒီ ခြဲ အာဆာက် မဲ၊ တဲး န့ ဒါခိုယ်။”

32 ဂေ ဘော ကာဖြူမ် ဒီ ဒိုဝ်း ခြိုင် စာန် စှိုပ် ဒီ ညွယ် ဂေ၊ ဘော ဒိုဝ်း ဝန် ကျီန် ဒီ ဂိန့် ဂေ။ ဘော ဇမ် ဒူင် ကွယ် ခုန်ဒီခမ် အီဆာရေလ၊ ဂေ ဘော ကာလာင် တဝ်း ဒီ အန်၊ “အိုယ် မဲ ဇဝ်၊ ဒဲစေန့် မဲ အီ မုး အာဘေန်ဟာဒါတ် တွိုန်၊ အန် ဘော တဝ်း၊ ‘အုဝ် ဒွင်ဘာန် မဲ ဇဝ်၊ မှာန့် တဲး မဲ တဲး အုဝ် ကွယ် ဒါခိုယ် ဂတ် ယေန် ဂျာမ်ဆာ။’” ပန် တီ ခုန်ဒီခမ် အီဆာရေလ တွိုန် ဝီ ဒီမွှတ် တဝ်း၊ “အန် ဆီ အိမ်၊ အန် ညှမ် ယမ်။း ဆေ န့ ပါယ် တီ အန် ဒီ ပီ အူကတ် အူဝါ အုဝ်။”

33 ဂေ တွိုန် မိူဝ် ပီခြန် ဒီ ထူမ် ဂြုဝ်း အန်။ တဲး ဂေ နပ် ဆီချာ ဂြုဝ်း အန် ဒွန် ဒဲ။ ဂေ မိူဝ် ဝီ တဝ်း၊ “အူကတ် အူဝါ မဲ ဇဝ် တီ၊ ဆီ အိမ်။” ခုန်ဒီခမ် အာဟပ် ဝီ ဒမ် တဝ်း၊ “တဲး ဘေ ဟာဝ်၊ ဒဲ့ တး အန်။” အာဘေန်ဟာဒါတ် တွိုန် ဘော တး ညိူဝ် ဒူင် ကွယ် အန်။ အန် ဘော တဲး အာဘေန်ဟာဒါတ် တွိုန် လိုပ် ပဝ့် လက်လဝ် ရိုမ် ဒူပ် အန်။

34 အာဘေန်ဟာဒါတ် ဘော ကာလာင် တဝ်း၊ “မိူင် ပီ ဖာတ် ဂုန့် အုဝ် ဒီ ဂုန့် မဲ တွိုန် မိူဝ်၊ အုဝ် ဒီ ဝီ ဒွါ ဝိဝ် ဒီ မဲ။ မဲ ဇဝ် ဘော ဆီ ဘူင် န့တေန့် ပါယ် မှဝ် ခဲင် မိူင် ဒါမာခူ တီ၊ ဟဲ့ ပွိုန်။ တဲး န့ ကော ပီ ပဲ့ ဟဲ့ ဒွိုမ် ဘူင် အုန် ဂုန့် အုဝ် ခဲင် မိူင် ဆာမာရီ။” ခုန်ဒီခမ် အာဟပ် ဝီ တဝ်း၊ “အုဝ် ဒီ ဘူင် တဲး အာယ် ဘဲန် အူ ဂိုက်။” အန် ဘော ဘူင် ပဲ့ တဲး ဂါယ် လာယ် ကာဆဲန့်။ ဟဲ့ ဟွတ့် ဘော ဘ့လေး အန် ဟာဝ်။

35 န့ ယီ မိုဝ်း ဒီဘဲ ဒူအီ ဘျာန် ဂြုဝ်း ဇဝ်ဖြာ အူ ဝီ၊ အန် ဟဲ့ ဟွတ့် ထူမ် ဂြုဝ်း ဇဝ်ဖြာ။ အန် တဝ်း ဒီ ဂိုက် အန်၊ “မှာန့် မဲ မး အုဝ်။” ဂိုက် အန် တွိုန် ဝီ တဝ်း၊ “အုဝ် တူ ခမ် ဒီ မး မဲ။”

36 အန် ဝီ တဝ်း ဒီ ဂိုက် အန် တွိုန်၊ “ကူပ် တူ ထူမ် မဲ ဂြုဝ်း ဇဝ်ဖြာ၊ မဲ ဟီ ကာယဝ်း ဒီ အုဝ် ဒီ နီ၊ မာ မာခြင်ဆီ ဒီ ကဝ့် ယမ် မဲ။” ပန် တီ အန် ဘော ဟာဝ်။ မာခြင်ဆီ ဘော ကာတုန့် အန်၊ ဘော ကဝ့် ယမ် အန်။

37 ဒူအီ ဘျာန် ဂြုဝ်း ဇဝ်ဖြာ တွိုန် ပီ ဝီ ကာတုန့် ပေါ အူ ဝီ။ အန် ပီ ဝီ တဝ်း၊ “တဲး မဲ မး အုဝ်။” အီ တွိုန် ဘော မး အန် တဲး န့ ကော ဆဝ် ကာဆဝ်။ 38 ဒူအီ ဘျာန် ဂြုဝ်း ဇဝ်ဖြာ တွိုန်၊ ဘော ဟာဝ် တုတ့် ကွယ် ခူပ် န့တေန့်၊ ဘ်ု ခုန်ဒီခမ်၊ ဘော ဒိုဝ်း ကာမယ့် ကာမှုဝ့် နာ အန်။ 39 ပန် တီ ခုန်ဒီခမ် ဘော တး ဟာဝ် ဒူပ် န့တေန့် တွိုန်။ အန် ဘော ကာလာင် ဂြုဝ်း ဒီ ခုန်ဒီခမ် တဝ်း၊ “အုဝ် နီ ဟဲ့ တး ကာဂုဝ်း။” ဒေါ အန် တီ ဒါ ဆိုက် အူ ဝီ ဟဲ့ တး၊ စ်ု အုဝ် ဘ်ု ဒူအီ ပီ မှေတ့် ဂေ။ အန် ဟဲ့ တဝ်း၊ “လုဝ် ဆာဒိက် ဘ်ု ဆီချာ။ ဆေ အန် ဟီ ဟြာယ် ဘော မုး ကူပ် မာဆေ၊ အာဆာက် မဲ ဒီ စှိုမ်။ ဆေ အာဝ် ပါယ် တီ မိူဝ်၊ မဲ ဒီ ကာဒုး ဒီ ယဝ် ရွိုန် ဘြိမ် အူ ထာလေန်။^a 40 ဒေါ အန် တီ အုဝ် ဘော မိုဝ်း ဂါန် ပီ လုဝ် ဟာဝ် ဘဲန် ပ့လုဝ့် ဘဲန် ပ့လုဝ့်။ ဒူအီ တွိုန် ဘော ဟြာယ်။” အန် ဟဲ့ ဟွတ့် တဝ်း ပါယ် တီ ခုန်ဒီခမ် အာဟပ် ဝီ တဝ်း ဒီ အန်၊ “မဲ လုဝ် ခမ် မှာပ် မဲ ပါယ် တီ။”

41 အန် တွိုန် ဘော ပီခြန် ဒီ ဒိုဝ်း ဝဲန် ကာမယ့် ပီ ကာမှုဝ့် အန် နာ အန် တွိုန်။ ပန် တီ ခုန်ဒီခမ် အီဆာရေလ ဘော နပ်၊ အန် မုး ဒူအီ ဘျာန် ဂြုဝ်း ဇဝ်ဖြာ။ 42 အန် ဝီ ကာလာင် ဒီ ခုန်ဒီခမ် တဝ်း၊ “ဇဝ်ဖြာ တဝ်း၊ ‘ကူပ် ဟဲ့ ဘ့လေး မဲ ဒူအီ ပီ တဝ်း အုဝ်၊ တဲး အန် လိုဝ်၊ တဲး အန် စှိုမ်၊ ကူပ် တဲး မဲ ဝီ တီ လွတ်၊ အာဆာက် မဲ ဒီ စှိုမ်။ ဘော ဒူအီ မဲ ဒီ စှိုမ် ကူပ် တူ ဘူင် မဲ တဲး ဂေ ဒူအီ ဒူပ် အန် စှိုမ်။’” 43 ပန် တီ ခုန်ဒီခမ် အီဆာရေလ ဘော က့လိုဝ်။ နဝ်း အန် ဘော ဒီတဲတ်။ အန် ဘော ဝီ ဝေန့် ဘော တး ဇမ် ဒူင် ကွယ် ဟုဝ် အန် ခဲင် မိူင် ဆာမာရီ တွိုန်။