1 ဝါယ် အန် တီ န့ မိုဝ်း အာနာဘူတ် အီ ကွယ် ခဲင် မိူင် ယေစာရေလ။ အန် မိုဝ်း မာန် အာငုန် ခဲင် မိူင် တီ။ န့ ကွယ် ခူပ် ဝဲင် ဟုဝ် ခုန်ဒီခမ် အာဟပ် အီ ကွယ် မိူင် ဆာမာရီ တွိုန်။ 2 အူ ဆီငဲ ခုန်ဒီခမ် အာဟပ် ကာလာင် ဒီ အာနာဘူတ် တွိုန် တဝ်း၊ “ဆီ မဲ တဲး မာန် မဲ နီ ဒီ အုဝ်။ ကူပ် န့ ကာတတ် ဝဲင် ဟုဝ် အုဝ်၊ အုဝ် ဆီ ဘူင် မာန် ဒဝ်။ အုဝ် ဒီ ဝီ တဲး မာန် အီ ဘွတ် လွှိုမ် နီ ဒွါ ဒီ မဲ။ ဆေ မဲ ဘော ဆီ ပွိုန် ရွိုန်၊ အုဝ် ဒီ ဒွါ။ တဲး န့ ကာဒါန် ခဲ့ ငဝ်း မာန် မဲ တီ။”

3 အာနာဘူတ် ဝီ တဝ်း ဒီ ခုန်ဒီခမ် အာဟပ်၊ “အိုယ် မဲ ဇဝ်၊ မဲ ကွဲ့ ဘူင် တဲး အုဝ် ကာဒုး ဒီ ကာထုဝ့် ဒူင် မုး ခါဂုန် ဆိန့် စုဝ် ဒါ ဒါ အုဝ် ပဲ့ ဟဲ့ ဒွါ ဇဝ်ဖြာ ဒီ ဂေ။ ကွဲ့ တဲး အုဝ် ဝီ ဒွါ ဒီ မဲ ဇဝ်။”

4 ခုန်ဒီခမ် အာဟပ် ဘော ဘဲန် နဝ်း က့လိုဝ်၊ နဝ်း ဒီတဲတ် ကူပ် ဂြုဝ်း ပီ ကာလာင် အာနာဘူတ် တွိုန် တဝ်း၊ “အုဝ် တူ ခမ် ဒီ တဲး။ အာနီ ဟဲ့ မုး ကာဒါယ် ဆိန့် စုဝ် ဒါ ဒါ အုဝ်၊” အန် ဘော ဝေန့် ခဲင် ဟုဝ် အန်၊ တး ဇမ် ကာစှူင့် အိတ် အန် ဘော အိတ်၊ တူ ဟူမ် မာဆေ။

5 အီဘိုန့် အန် အီ မုး နာင် ယေစာဘေန် ဘော တး ဒီမွှတ် အန် တဝ်း၊ “နဝ်း မဲ ဇဝ် ဘော လိုဝ် ကူပ် မာဆေ၊ မဲ ပီ ဟူ ဟူမ် ဘူမ် ပီ ဟူ ဒျီင် အိုမ်။”

6 ခုန်ဒီခမ် ဝီ တဝ်း၊ “အုဝ် ဟဲ့ တဝ်း ဒီ အာနာဘူတ် အီ ကွယ် ခဲင် မိူင် ယေစာရေလ တွိုန်၊ တဲး အန် ယွင့် မာန် အာငုန် အန် ဒွါ ဒီ အုဝ်။ အုဝ် ဟဲ့ တဝ်း၊ မဲ ဆီ ပွိုန် ရွိုန်၊ အုဝ် ဒီ တဲး ငဝ်း အန် ဒီ မဲ။ ဆေ မဲ ဆီ ပွိုန် မာန် အာငုန်၊ အုဝ် ဒီ ဟြေတ့် ပေါ အူ ပ့လုဝ့် ဒွါ ဒီ မဲ။ အာနာဘူတ် ယီ တဝ်း၊ ‘အုဝ် တူ တဲး မာန် အာငုန် တီ ဒီ မဲ ဇဝ်။’ န့ ပါယ် တီ နဝ်း အုဝ် ဘော ဒီတဲတ် က့လိုဝ် ကာဆဝ်။”

7 အီဘိုန့် အန် အီ မုး နာင် ယေစာဘေန် ဝီ တဝ်း၊ “ဆေ မဲ ဇဝ် မုး ဒါ ကာညာ အီ အိုပ် မာန် မိူင် ဒူအီ အီဆာရေလ၊ တဲး မဲ ဝီ ယိတ့် ပီဒါခိုယ် နဝ်း မဲ၊ ဝီ ဟူမ် ဘူမ်၊ ဒျီင် အိုမ်။ အုဝ် ဒဲစေန့် မဲ ဒီ ဒိုဝ်း မာန် အာငုန် အာနာဘူတ် တီ၊ အာပ် ဒွါ ဒီ မဲ ဇဝ်။”

8 အီဘိုန့် အန် တွိုန် ဘော ဒိုဝ်း စိူဝ် ခုန်ဒီခမ် အာဟပ်၊ ဒဲမ် ပဲ့၊ ဒွက် ဇိုမ် အန်၊ တိုယ် ဟာဝ် ဒီ ဂေ အီ မုး ဒါ တာင်၊ ဘော ဂေ အာမူ အာမာတ် အီ ကွယ် ခဲင် မိူင် ယေရေအေန် တွိုန်။ 9 ခဲင် ပဲ့ ပီ ဒဲမ် တီ န့ တဝ်း၊ “တဲး ဘေ ကာလာင် ဒီ ဒွန် အီ အူ ဆီငဲ အီ လုဝ် ယိူန် ပီ ဒီ ဟူမ်။ ဒေါ အန် တီ ဘေ လုဝ် တဲး အာနာဘူတ် ကွယ် ဒူင် ကွယ် ဒါ တာင် အီ တာင် လွှိုမ် အီ ဟဝ်။ 10 တဲး ဘေ ဘော ဒိုဝ်း ဒူအီ တူ မွှိုမ် အာ ဝီ၊ တဲး ဂါယ် ကွယ် နာ အာတ့် အန်။ တဲး ဘေ ဘော ခါနှာပ် ဂါယ် တဲး ဂါယ် တဝ်း ဒီ အာနာဘူတ်၊ ‘မဲ နီ၊ မဲ ဟဲ့ အေး ဟဲ့ ဒိူင် ဇဝ်ဖြာ ဘော ခုန်ဒီခမ်။’ ဂါယ် ဟဲ့ ဟွတ့် ဘူင် ပါယ် တီ တဲး ဘေ ဘော ဒိုဝ်း လေး အာနာဘူတ် တွိုန်၊ ဘော ဒိုဝ်း မာဝ် ဝိုန့်၊ တဲး အန် ယမ်။”

11 ဂေ ဟဲ့ ဟွတ့် တိး ပဲ့ တီ၊ ဒူအီ အီ ကွယ် ခဲင် မိူင် တွိုန်၊ ဂေ အီ ဘဲန် ဒါ တာင်၊ အီ မုး ဘော အာမူ အာမာတ် ခဲင် မိူင် တွိုန်၊ ဂေ မိူဝ် ဘူင် ပီ စ်ု နာင် ယေစာဘေန်။ 12 ဂေ ကာဖြူမ် ဒီ ဒဲ့ ဒီ ကာလာင် လုဝ် ယိူန် ပီ ဒီ ဟူမ်။ ဒေါ ကွယ် ရိုမ် ဂေ၊ ဂေ ဘော တဲး အာနာဘူတ် ကွယ် ဒူင် ကွယ် ဒါ တာင် အီ တာင် လွှိုမ် ဒူအီ ကိူန် တွိုန်။ 13 ဒူအီ အာ ဝီ ဘော တး တုတ့် နာ အာတ့် အန်။ န့ မုး ဒူအီ ပီ ခါနှာပ် ဂေ တွိုန်၊ တဲး ဂါယ် ဘဲန် ဆက်ဆေ၊ ကွယ် နာ အာတ့် အာနာဘူတ် တွိုန်။ ဂါယ် ဝီ ကာလာင် တဝ်း၊ “မဲ နီ၊ မဲ ဟဲ့ အေး ဟဲ့ ဒိူင် ဘော ဇဝ်ဖြာ ဘော ခုန်ဒီခမ်။” ဟဲ့ ဟွတ့်၊ ဂေ ဘော ဒိုဝ်း လေး အန် နာ ရေတ့် မိူင်၊ ဘော ဒိုဝ်း မာဝ်၊ ဝိုန့် တဲး အန် ကော ယမ်။ 14 ပန် တီ ဂေ တိုယ် အီ ကာလာင် ဒီ နာင် ယေစာဘေန် တဝ်း၊ “အာနာဘူတ်၊ ဂေ ဟဲ့ ဝိုန့် မာဝ်။ အန် ဟဲ့ ဟွတ့် ယမ်။”

15 နာင် ယေစာဘေန် ဘော ယိုဝ် လွင် အာနာဘူတ် ဟဲ့ ဟွတ့် ယမ် ဒီ မာဝ် ပီ ဝိုန့် ဂေ၊ အန် ဘော ဝီ ကာလာင် ဒီ အာဟပ် တွိုန် တဝ်း၊ “မဲ ဟုဝ့် ဒိုဝ်း မာန် အာငုန် အာနာဘူတ်၊ အီ မုး ဒူအီ ယေစာရေလ တွိုန်။ ကူပ် အန် တူ ဆီ ယွင့် ဒွါ ဒီ မဲ ဇဝ်၊ ဒေါ တီ နီ အန် ဟူ ကွယ်၊ ဟဲ့ ဟွတ့် ယမ်။” 16 အာဟပ် တွိုန် ဘော ယိုဝ် လွင် အာနာဘူတ် ဟဲ့ ဟွတ့် ယမ်၊ အန် ဘော ဟာဝ် ဒူင် ကွယ် မာန် အာနာဘူတ် အီ မုး ဒူအီ ယေစာရေလ တွိုန်၊ တဲး အန် ပွိုန် ဒီ ဒိုဝ်း ဒီ အန်။

17 ပန် တီ ဇဝ်ဖြာ ကာလာင် ဂြုဝ်း ဒီ အာအေလီယာ အီ မုး ဒူအီ ထီဆာဘီ တွိုန်။ အန် တဝ်း၊ 18 “တဲး မဲ ဟာဝ် ဒူင် ကွယ် ခုန်ဒီခမ် အာဟပ် အီ အိုပ် ဒူအီ အီဆာရေလ၊ အီ ကွယ် ခဲင် မိူင် ဆာမာရီ တွိုန်။ အန် ကွယ် ဒီ မာန် အာငုန် ပီ ဖာတ် အန် ဒီ အာနာဘူတ် တွိုန်။ 19 မဲ ကာလာင် ဒီ အန် တဝ်း၊ ‘ဇဝ်ဖြာ ဟဲ့ တဝ်း၊ မဲ ဟဲ့ ငဝ်း ယမ် အီ၊ ဝီ ဖာတ် ဘော ခါဂုန် အီ၊ တဲး န့ ဝီ ဘဲန် ကြုဝ် မဲ။’ ခုဝ်၊ ဇဝ်ဖြာ ပီ ဝီ တဝ်း၊ ‘မာဆုဝ် အီ လျီ့ နှာမ် အာနာဘူတ် အီ စုဝ်း ဒီ တီ၊ ဂေ ပီ ဒီ ဝီ လျီ့ ဘော နှာမ် မဲ ဒီ တီ။’”

20 ပန် တီ ခုန်ဒီခမ် အာဟပ် ဝီ တဝ်း ဒီ အာအေလီယာ၊ “မဲ ရန်ဆူ အုဝ်၊ မဲ လုဝ် မာဆေ ဒီ အုဝ်။း” အာအေလီယာ ဝီ တဝ်း၊ “မဲ ဟဲ့ ခမ် ဒီ ဘူင် နာ တူ မွှိုမ် ဒီ အာတ့် ဇဝ်ဖြာ။ ခုဝ်၊ အာယ် ဝီ လုဝ် လာယ် ကာတုန့်။” 21 ဇဝ်ဖြာ ပီ ဝီ တဝ်း ဒီ မဲ၊ “အုဝ် ဒီ ဒမ် မှာပ် ဒီ မဲ၊ တဲး ဘော လှုက်လှာန် မဲ ယမ် တူတ့်။ ဘော ဒူအီ အီ ဘဲန် မှာယ်၊ ဘော ဒူအီ အီ တူ ဘဲန် မှာယ်၊ ခဲ့ ကွယ် အီမာယ် မျုဝ် အာဟပ် ခဲင် မိူင် အီဆာရေလ အုဝ် ဒီ ဝဲန် တူတ့် ဂေ။ 22 အုဝ် ဒီ တဲး မဲ ဘော ပီ မျုဝ် အာယေရုဝ်ဘုဝ်၊ အီ မုး ဂွန် အာနေဘတ်၊ တဲး မဲ ပီ ဘော မျုဝ် အာဘာဆာ အီ မုး ဂွန် အာဟီယာ တွိုန်။ မဲ ဟဲ့ ဘူင် မှာပ် တဲး အုဝ် ရူ။ မဲ မိူဝ် ဟဲ့ ဘူင် တဲး ဘော ဒူအီ အီဆာရေလ ဘူင် မှာပ် ဒူပ် မဲ။ ကူပ် ပဲ့ ဟဲ့ ဘူင် မဲ တီ၊ မဲ လုဝ် ခမ် ဇိုဝ် တီ။”

23 ဇဝ်ဖြာ ဘော တဝ်း၊ “ဘော နာင် ယေစာဘေန်၊ မာဆုဝ် ဒီ ဟူမ် ဘော ယင် အန် ခူပ် ရဲင် မိူင် ယေစာရေလ။”

24 ဒူအီ အာမျုဝ် အာဟပ် အီ ယမ် ခဲင် မိူင် တီ၊ မာဆုဝ် ဒီ ဟူမ်။ ဂေ အီ ယမ် နာ ရေတ့် မိူင်၊ မာဆိမ် အီ ကွယ် ခဲင် ဘ့လေန့် အီ ဒီ ဟူမ်။

25 န့ တူ ဒွိုမ် မိုဝ်း အာဆေ အီ ပီ အာဟပ်၊ အီ ခမ် ဒီ ဘူင် နာ တူ မွှိုမ် ဒီ အာတ့် ဇဝ်ဖြာ။ န့ ယီ မုး အီဘိုန့် အန် နာင် ယေစာဘေန်၊ အန် ဟဲ့ ယဲတ့် အန် ဘူင် ဇိုဝ် တီ။ 26 အန် တွိုန် ဘိုင် ကြိုပ် အာရိုပ်၊ တဝ်း န့ မုး ဇဝ်ဖြာ၊ ဘူင် အီ မွှိုမ် ကာအိး၊ တဲး န့ ပီ ပီ ဘူင် ဒူအီ အာမုဝ်ရိတ် ပီ ညွန် လေး ဇဝ်ဖြာ ခဲင် မိူင် ဂေ ဒေါ တး ဒူအီ အီဆာရေလ တွိုန်။

27 ခုန်ဒီခမ် အာဟပ် တွိုန် ဘော ယိုဝ် ဂြုဝ်း အာအေလီယာ တီ၊ အန် ဘော ကာယာတ့် ခြိုင် ပီ တာ အန် ကူပ် က့လိုဝ် နဝ်း အန်၊ ဘော ဝီ စှိုပ် ဒီ တာ ခြိုင် စာန်။ ဟဲ့ ဟွတ့်၊ အန် ဘော ယိူန် ပီ ဒီ ဟူမ်၊ အိတ် ခဲင် ခြိုင် စာန် အန် တွိုန်။ အန် ဘော ဟာဝ် နာ မှဝ် မိူဝ်၊ စှိုပ် ခြိုင် စာန် အန် တီ၊ ပီတျီမ် နဝ်း အန်။ 28 ဇဝ်ဖြာ ဝီ တဝ်း ဒီ အာအေလီယာ၊ အီ မုး ဒူအီ ထီဆာဘီ တွိုန်၊ 29 “မဲ ဟဲ့ ယိုဝ် လွင် အာဟပ်၊ အန် ဟူ ပီခိုက် အန်။ အန် ဟဲ့ ဘ့လေး ဒုဝ် ဘြိမ် တျီမ် ဒီ အာတ့် အုဝ်။ ကူပ် ဟဲ့ ပီတျီမ် အန် ဒုဝ် အန် ဒီ အာတ့် အုဝ်၊ အုဝ် တူ ဒမ် မှာပ် တွိုန် ဒီ အန် ဒေါ မုး စုဝ် အန် နီ။ အုဝ် ဒီ ဝီ တဲး န့ ဇမ် စုဝ် ဘာန် ဂွန် အန်။”