1 ဝါယ် တီ၊ ဇဝ်ဖြာ ဘော ရူ ကာဆဝ် ဒီ ဂေ ဒူအီ အီဆာရေလ။ အန် ဘော ကာဆုး အာဒါဝိတ် တဲး အန် ဘူင် နာ တူ မွှိုမ် ဒီ ဂေ။ အန် တဝ်း၊ “ဟာဝ် တိး ဒူအီ အီဆာရေလ ဘော ဒူအီ အာယူဒါ။”

2 အာဒါဝိတ် မိူဝ် ဝီ ကာလာင် ဒီ အာယောဖ ဘော ဒီ ဒါ ဘုဝ် အီ ကွယ် ဒူပ် အန်။ အန် တဝ်း၊ “ဘေ ဟာဝ် လဲပ် ဒီ ယွတ် ဒူင် ကွယ် ဒူအီ အီဆာရေလ၊ စုး ဒီ မိူင် ဒါန် ကော ဇမ် ဒီ မိူင် ဘီရာဆေဘာ။ ခဲ့ ကွယ် ဂေ ဒူအီ အီ ပွိုန် ကာဂုဝ်း၊ တဲး ဘေ ဒဲမ် တူတ့် ဇာရာင် ဂေ၊ တဲး အုဝ် နပ် ဒူအီ ဂေ တီ ဟဲ့ ကိူန် ခဲ့ မှဝ်။”

3 အာယောဖ ဝီ တဝ်း ဒီ ခုန်ဒီခမ်၊ “ဇဝ်ဖြာ အီ မုး ဇဝ်ဖြာ ပီ ကြိုပ် မဲ၊ တဲး အန် တဲး ဒူအီ ဘြဲ ကိူန် လွှိုမ် အီ ဟဲ့ မိုဝ်း ဒေါ တီ နီ၊ တဲး န့ ဝီ မိုဝ်း ဒါ ဆိုက် ပေါ အူ မာယဝ်း ဘုန်။ ဆေ မဲ ခုန်ဒီခမ် ကော ပွိုန် ဒီ ယိုဝ်၊ မှဝ် န့ ပါယ် ပီ ဆီ နပ် မဲ ခဲ့ ကိူန် ဒူအီ မဲ။း”

4 အာယောဖ ဘော ဒါ ဘုဝ် ဂေ တွိုန်၊ ဂေ ကာဒုး ဒီ ထူမ် ဂြုဝ်း ခုန်ဒီခမ် တွိုန်။ ခုဝ်၊ ဂေ ဘော လေး ဒူင် ကွယ် ခုန်ဒီခမ် ဘော ဟာဝ် တိး ဒူအီ အီဆာရေလ ဘော ဒဲမ် ဇာရာင် ဂေ။ 5 ဂေ ဘော ဟာဝ် ကာလုဝ်း ဘ့လဲင် အိုမ် ယောဒါန် တွိုန်၊ ဘော ချ ကာတတ် မိူင် အာရော ဒူင် မိုဝ်း ဒီလယ့် ဘ့လဲင်။ ဟဲ့ ဟွတ့်၊ ဂေ ဘော ကာလုဝ်း မိူင် ဂတ် ဘော ဇမ် ဒီ မိူင် ယာဇေရာ။ 6 ဂေ ပီ ဝီ ဟာဝ် ဒီ မိူင် ဂီလေအာတ် ဘော မိူင် ထက်တေမ်ဟွတ်ဆီ၊ ဝီ ဇမ် ဘော ဒီ မိူင် ဒါန်ယာန်၊ ဝီ လဲပ် တး ဇမ် ဒီ မိူင် ဆီဒူန်။ 7 ဂေ ပီ ဝီ တး ဇမ် ဘော ဒူင် မိုဝ်း ရဲင် တာင် ကာတတ် မိူင် ထူရုဝ်။ ဂေ ဘော ဟာဝ် ဒွန် နာ ဒွန် ပ့လုဝ့်၊ ဒူင် ကွယ် ဂေ အီ မုး ဒူအီ ဟီဝိတ် ဂေ ဒူအီ ကာနန့်။ ဟဲ့ ဟွတ့်၊ ဂေ ဘော ဟာဝ် နာ ကွာ မိူင် ယူဒါ ကော ဇမ် မိူင် ဘီရာဆေဘာ။

8 ဂေ ဘော လဲ ဟာဝ် ခဲင် မိူင် ဘော မိူင် အာဒါ ဒိမ် မာဂျီန် ဒီ အာ ဂိုဝ် ဆီငဲ။ ဟဲ့ ဟွတ့်၊ ဂေ ဘော ဝီ တး ခဲင် မိူင် ယေရူဆာလဲမ်။

9 အာယောဖ ဘော ဟာဝ် ဒိုဝ်း ဇာရာင် ဒူအီ ဂေ တွိုန်၊ ဝီ အာပ် ဒီ အာဒါဝိတ်။ အီ မုး ဒူအီ အီဆာရေလ အီ ပွိုန် ကာဂုဝ်း တာ မာပွါ့ လာင်၊ န့ ကွယ် ဒါ ဆဲန် ဝီ။ အီ မုး ဒူအီ အာယူဒါ၊ န့ ကွယ် ဖန် ဆဲန် ဝီ။

10 အာဒါဝိတ် ဟဲ့ ဟွတ့် တိး ခဲ့ ကွယ် ဒူအီ ဂေ တွိုန်၊ အန် ဝီ ကာလုတ့် နဝ်း အန်။ အန် ဝီ တဝ်း၊ “နာ တူ မွှိုမ် ပဲ့ ဟဲ့ ဘူင် အုဝ် ဟဲ့ ကိူန် ကာဆဝ်။ ဒေါ တီ နီ အုဝ် မှာန့် မဲ ဇဝ် တဲး မဲ ဂဝ်း ဝဲန် မှာပ် အုဝ် နီ။ အုဝ် ဟဲ့ ဘူင် အီ ရိုဝ် ကာဆဝ်။” 11 ဘော ဇမ် ဆိန့်ဝး အာတ့် ယိတ့် အာဒါဝိတ်၊ ဇဝ်ဖြာ ဟဲ့ ကာလာင် ဒီ ဒူအီ ဘျာန် ဂြုဝ်း ဇဝ်ဖြာ အီ စိူဝ် အာဂတ် တွိုန်။ အန် မုး ဒူအီ အီ ဒီမွှတ် ဒီ ဇဝ်ဖြာ အာဒါ အာဒါဝိတ်။ ဇဝ်ဖြာ ဟဲ့ တဝ်း ဒီ အန်၊ 12 “မဲ ကာလာင် ဒီ အာဒါဝိတ် တဝ်း၊ ‘ဇဝ်ဖြာ ဟဲ့ တဝ်း၊ အုဝ် ဒီ ဘျ အူယ် မျုဝ် ဒီ မဲ။ မဲ လုဝ် ရဝ်း အူ မျုဝ် ပီ ဒီ ဘူင် အုဝ် ဒီ မဲ။’”

13 အာဂတ် တွိုန်၊ ဘော ဟာဝ် ဒူင် ကွယ် အာဒါဝိတ် ဘော တဝ်း ဒီ အန်၊ “မဲ လုဝ် ရဝ်း ပီ ဒီ ဘူင် ဇဝ်ဖြာ။ အန် ဒီ တဲး ဘေ အေတ့် ပီ ဒီ ဟူမ် ခဲင် မိူင် မဲ နီ အာဒါ အူယ် ဆီနမ်။ ဆေ အာဝ် ပါယ် တီ၊ မဲ လုဝ် တဝ် ရန်ဆူ မဲ အာဒါ အူယ် မာဂျီန်။ ဆေ အာဝ် ပါယ် တီ အုဝ် ဒီ တဲး ဘေ မိုဝ်း ဆဝ်၊ တဲး န့ ကော နုဝ့် အူယ် ဆီငဲ။ တဲး မဲ ဇေန့်ဇာ ကာဖာ ခဲင် နဝ်း မဲ၊ ကာလာင် ဒီ အုဝ်၊ တဲး အုဝ် ပွိုန် ဒီ ဝီ ကာလာင် ဒီ အန် ဇဝ် အီ ဟဲ့ စ်ု အုဝ် တး ဒူင် ကွယ် မဲ။”

14 အာဒါဝိတ် ဝီ တဝ်း ဒီ အာဂတ်၊ “အုဝ် ဟဲ့ ဇမ် ဒုက် တာင်။ မှာန့်၊ တဲး ဇဝ်ဖြာ ဘူင် ခဲ့ ပီ အိုင် အန် ဒီ အုဝ်။ ခုဝ်၊ အန် နပ် ဒီ ကာဝေ ကာဆဝ်။ ကွဲ့ တဲး ဒူအီ ဘူင် ပီ အိုင် ဂေ ဒီ အုဝ်။”

15 ပန် တီ ဇဝ်ဖြာ ဘော တဲး ဒူအီ အီဆာရေလ ဆဝ်။ န့ ဘော စုး ဆိန့်ဝး တွိုန် ကော တူတ့် အာခြာဝ် ပီ တဝ်း ဇဝ်ဖြာ တွိုန်။ စုး ဒီ မိူင် ဒါန်၊ ဟာဝ် ဇမ် ဒီ မိူင် ဘီရာဆေဘာ တွိုန်၊ ဒူအီ ဘော ယမ် ဘူ မှိုန့် ဝီ။

16 ပန် တီ အာမူ အာမာတ် ဇဝ်ဖြာ တဝ်း ဒီ ပျာတ့် မိူင် ယေရူဆာလဲမ်။ ဒေါ အန် တီ ဇဝ်ဖြာ ဘော ဝီ ဘဲန် နဝ်း က့လိုဝ်။ အန် ဝီ နမ်လှုဝ်း ဒုက် တာင် ပီ ဒီ လုဝ် ခမ် ဂေ။ ခုဝ်၊ အန် ဝီ ကာလာင် ဒီ အာမူ အာမာတ် အန် တွိုန် တဝ်း၊ “စူ ခဲ့ တီ။ ကွဲ့ ဟူ ဘူင် ပွါ။” ဒေါ အန် တီ အာမူ အာမာတ် ဇဝ်ဖြာ တွိုန်၊ အန် ကွယ် ခူပ် ကာင်နဝ်း၊ အီ မုး ကာင်နဝ်း အာရောနာ အီ မုး ဒူအီ ယေဘူဆိတ်။ 17 အာဒါဝိတ် ဘော ယိုဝ် အာမူ အာမာတ် ဇဝ်ဖြာ ဟဲ့ ဒမ် မှာပ် ဒီ ဒူအီ ကိူန်၊ အန် ဘော ဆာခိုဝ် ဒီ ဇဝ်ဖြာ တဝ်း၊ “န့ မုး အုဝ် အီ ဟဲ့ ကာလိုပ်။ အုဝ် ဟဲ့ ဘူင် နာ စာဝ် နာ မိူက်။ အီ မုး ဒူအီ ဂေ နီ၊ ဂေ ပီ မာဘူ တူ ဘူင် မာဆေ။ အုဝ် မှာန့် မဲ ဇဝ်၊ တဲး မဲ ဒမ် မှာပ် မီ ဒီ အုဝ် ဘော ဒီ ခြိုဝ် အုဝ်။”

18 ဆီငဲ တီ၊ အာဂတ် တွိုန်၊ အန် ဘော တး ဒူင် ကွယ် အာဒါဝိတ် ဘော တဝ်း၊ “တဲး မဲ ဝီ ဟာဝ် ဘူင် ကာစှူင့် လှူ ဒီ ဇဝ်ဖြာ ဒီ ကာင်နဝ်း အာရောနာ အီ မုး ဒူအီ ယေဘူဆိတ် တွိုန်။”

19 ပန် တီ အာဒါဝိတ် ဘော ဘူင် ခဲ့ ပီ ကာလာင် ဇဝ်ဖြာ ဒီ အာဂတ်။ 20 အာရောနာ ဘော ယိုဝ် အာဒါဝိတ် ဂေ ဒူအီ အန်၊ ဂေ တး ဒူင် ကွယ် အန်။ အန် ဘော လေး ဟာဝ် မုတ် ဂိုပ် ဒီ ကာဒါယ် နာ အာတ့် ခုန်ဒီခမ်။ 21 အန် ဘော ဒီမွှတ် တဝ်း၊ “ကူပ် မာဆေ မဲ တး ဒူင် ကွယ် အုဝ် နီ။း” အာဒါဝိတ် ဝီ တဝ်း၊ “ယေ တး တဲး ယေ ပွိုန် ဒီ စိုဝ်း အူင့် ကာင်နဝ်း မဲ၊ တဲး ယေ ပွိုန် ဒီ ဘူင် ကာစှူင့် လှူ ဒီ ဇဝ်ဖြာ၊ တဲး အန် ဂဝ်း ဝဲန် ဆဝ် ဒူအီ၊ တဲး ဂေ ဝီ ကဲန်။”

22 အာရောနာ ဝီ တဝ်း ဒီ အာဒါဝိတ်၊ “တဲး မဲ ဒိုဝ်း လှူ ခဲ့ ပီ အိုင် မဲ ဒါ ကာညာ အုဝ်။ ဒီ နီ အုဝ် ဟဲ့ မိုဝ်း ဘော မက် အီ ပွိုန် လှူ၊ ဘော ခြိုင် မး ငှုဝ် တွိုန်၊ တဲး န့ ဘဲန် ဟေ ဒုဝ့် ဒီ ငဝ်။ 23 ခဲ့ ပီ မိုဝ်း အုဝ် ဒီ နီ ဒွန် မျုဝ်၊ အုဝ် ဒီ အာပ် ဒွါ ဒီ မဲ ခုန်ဒီခမ်။” ဟဲ့ ဟွတ့်၊ အာရောနာ ပီ ဝီ တဝ်း၊ “တဲး ဇဝ်ဖြာ ပီ ကြိုပ် မဲ ဒါ ကာညာ ဘော ရပ် ပီ လှူ မဲ။”

24 ခုန်ဒီခမ် ဝီ တဝ်း ဒီ အာရောနာ၊ “အာဝ် မုး ပါယ် တီ။ အုဝ် ဒီ တဲး ငဝ်း အန် ဒီ မဲ။ အုဝ် ဒီ စိုဝ်း တူတ့်။ ဆေ အုဝ် တူ တူတ့် ရွိုန်၊ အာဝ် ပွိုန် လှူ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်။” အာဒါဝိတ် ဘော ဒိုဝ်း ရွိုန် ဖန် ဂိုဝ် ဘူင့် စိုဝ်း အူင့် ကာင်နဝ်း ဘော မက်။ 25 အန် ဘော ဘူင် ကာစှူင့် လှူ ဒီ ဇဝ်ဖြာ၊ ဘော လှူ ပီ လှူ အီ ဒုဝ့် ဒီ ငဝ် ဘော ပီ လှူ အီ ကွယ် ကာဇု ဟူမ် ရိုမ်။ ပန် တီ ဇဝ်ဖြာ ဘော ထူမ် ဂြုဝ်း ပီ ဆာခိုဝ် အာဒါဝိတ် အာဒါ ဒူအီ ခဲင် မိူင် အန်။ အန် ဘော တဲး ဆဝ် ဂေ ဟြာယ်၊ ဘော တဲး န့ ယေန် ဒီ ဒူအီ အီဆာရေလ။ ခဲ့ တီ ဟဲ့ ဒဲမ် လွင် ခုန်ဒီခမ် အာဒါဝိတ်။