1 ဒီ နီ ဟဲ့ ဝီ ဒဲမ် အုန် ဂြုဝ်း ပီ ကာလာင် အာဒါဝိတ် အာတ့် ယမ် အန်။ အာဒါဝိတ် မုး ဂွန် အာယေဆေ တွိုန်။ အန် မုး ဝီ အီ မိုဝ်း အာဖုင် ဒင်ခုဝ် တာင် ပဲ့ ဟဲ့ ဒွါ ဇဝ်ဖြာ အီ မုး ဇဝ်ဖြာ ပီ ကြိုပ် အာကူပ် တွိုန်။ အန် ဘော မုး ဝီ ပီ ဖဝ်း ဂေ နာမန် ဒီ ဂိန့် အန်၊ ဝီ အီ တဝ်း မှုဝ် ထမ် ကာတဲ ဒူအီ အီဆာရေလ။ န့ မုး မှုဝ် ထမ် အီ လေး မဲင် ဒါခိုယ်။ အန် တဝ်း၊

2 “နဝ်း ဖွိုမ် ဇဝ်ဖြာ ဟဲ့ တဲး အုဝ် ကာလာင် ဂြုဝ်း။ ဒါရာ အန် ဇဝ် ဟဲ့ လေး ခဲင် မူတ့် အုဝ်။

3 ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ ကာလာင် ဒီ အုဝ်။ အန် ဇဝ် အီ ပီ ဒါအာင် မာဝ် ပီ ဘိုင် ဂေ ဒူအီ အီဆာရေလ၊ အန် ဟဲ့ တဝ်း၊ ဆေ န့ မုး ဒူအီ အိုပ် မိူင်၊ ဆေ အန် ရုဝ်ဆေ ဇဝ်ဖြာ ဘော ဘူင် နာ မှာန် ဆေဆေ၊ 4 ဒူအီ ဝီ တီ ပီ ဘ့လာင် ဆီငဲ အီ လေး ဆိန့်ဝး စေဝ် ဒေါ တူ မိုဝ်း န့အု။ အန် ဘော ပီ ဘ့လာင် ဆီငဲ အီ လေး ဆွိုန် ဝါယ် ဂ့လာယ် ဟဲ့ စုဝ်း၊ အီ တဲး ပေတ့် လတ့်။

5 အာမျုဝ် အုဝ် ဒီ ဘော ဘူင် ပီ အိုင် ဇဝ်ဖြာ။ ခုဝ်၊ အန် ဇဝ် ဟဲ့ ဟွတ့် ဒွါ ကာဒိက် ဆတ်ဇာ ဒီ အုဝ်။ န့ တူ နပ် ဒီ လိုဝ် ဒေါ မှဝ်။ ကာဒိက် ဆတ်ဇာ တီ ဟဲ့ ဆီချာ၊ ဟဲ့ ဇေ့ဇုင်။ ခုဝ်၊ န့ ဒီ ဘော ဘဲန် ဒွန် မျုဝ် ပီ တဝ်း အန်၊ န့ ဒီ ဘော ချွတ် အုဝ်။ အန် ဇဝ် ဒီ ဘော ဒွါ တူတ့် ဒွန် မျုဝ် ခဲ့ လဝ့် နဝ်း အုဝ်။

6 ခဲ့ ကွယ် ဒူအီ တူ မွှိုမ်၊ န့ ကာအာပ် ဝဲန် ဂေ ပီ ဟေ မာအာတ့် ပီ ဝဲန် အီ။ ဟေ မာအာတ့် တီ တူ ပွိုန် ပါ၊ တူ ပွိုန် ဒိုဝ်း တာ ဒဲ။

7 အီ မှဝ် ဆီ ပါ၊ ဆီ ဒိုဝ်း ဒီ ဂူင့်၊ အန် ကာဒုး ဒီ ဂူင့် န့ရိး ဘော ဂ့လွင့် လျီး။ ဘော လုဝ် ဒုဝ့် ဝဲန် တူတ့် ဒူင် ကွယ် ဒင် ဂေ တွိုန်။” ခဲ့ တီ ဂြုဝ်း ပီ ကာလာင် အာဒါဝိတ်။

8 ဒီ နီ န့ မုး စိူဝ် ဂေ ဒါ တာင် ဒါ ဆိုက် အီ ဒူပ် အာဒါဝိတ်။ န့ မုး အာယုဝ်ဆေ ဘာဆေဘေတ်၊ အီ မုး ဒူအီ အာမျုဝ် ဟက်မောနီ။ အန် အိုပ် ဖိုင် ဒါ ဘုဝ်။ အာဒါ အူ ဇေန့် အန် ဟဲ့ ဒွိုမ် ဒိုဝ်း ဘ့လာ လျီး အန်၊ ကာဂုဝ်း ဆတ် ယမ် ဒူအီ ဒါ မာယဝ်း ဝီ။

9 ဝါယ် အန် တွိုန် န့ မုး အာလေအာဆာ အီ မုး ဂွန် အာဒေါဒါ အီ မုး ဒူအီ အာမျုဝ် အာဟုဝ်ဟိတ်။ အန် ဘော ဘာ ခဲင် ဖိုင် ဒါ ဘုဝ် တာင် အူယ် ဝီ အီ အိုပ် ဒါ ဆိုက် အီ ဒူပ် အာဒါဝိတ်။ ဒေါ ကာခဲန့် ဂေ ဒီ ဒူအီ ဖီလီထီ အီ ဟဲ့ တး ကာဇု ဒီ ဒူင် စိူဝ် ဘာဆာထာမိမ်၊ တဝ်း ဒီ ကာဂုဝ်း ဒီ ဒူအီ အီဆာရေလ၊ ဂေ ဒါ ဆိုက် ဒူအီ ဖီလီထီ ဘော ဝီ ဂိူတ် ဝီ ဝိဝ် နာ ပန်။ 10 န့ ယီ မုး အာလေအာဆာ တွိုန်၊ အန် ဘော ကာဂုဝ်း ငဝ်း ဝဲန် ဒူအီ ဖီလီထီ၊ တဲး ဒဲ အန် ကော ညှမ် ကော ဟူ ဝီ ပွိုန် ဘ့လေး အုန် မာပွါ့ လာင် အန်။ ဆီငဲ တီ ဇဝ်ဖြာ ဘော တဲး ဂေ အွင် ကိူန် ကာဆဝ်။ ပန် တီ ဒါ ဆိုက် အီဆာရေလ ဘော ဝီ တး ဒူင် ကွယ် အာလေအာဆာ တွိုန်၊ တဲး ဂေ ပွိုန် ဒီ ဒိုဝ်း တး ဘော ခြိုင် ဘော ကြုဝ်ကြာမ် ဂေ အီ ဟဲ့ ယမ်။ 11 ဒဲင် တီ န့ ဝီ မိုဝ်း အာဆာမာ အီ မုး ဂွန် အာကီ၊ အီ မုး ဒူအီ အာမျုဝ် ဟာရာ။ ဒေါ တး ကာဇု ဒူအီ ဖီလီထီ ဂေ ဘဲန် ဖိုင် ဘဲန် ဖိုင်၊ ဂေ ကွယ် ဒီ ဒူင် နာ ပီ ဆမ် ဂေ ဘ့လေ လူမ်။ ဒေါ အန် တီ ဒူအီ အီဆာရေလ ဘော ကာဖြူမ် ဒီ တဝ် လေး ဒူင် ကွယ် ဒူအီ ဖီလီထီ ဂေ တွိုန်။ 12 အာဆာမာ တွိုန် ဘော ယိတ့် စွင့် ခဲင် ဒူင် နာ၊ ဘ်ု ဒီ ယွတ်၊ ဘ်ု ဒီ ရဲ။ အန် ဘော ကာဂုဝ်း ငဝ်း ဝဲန် ဒူအီ ဖီလီထီ။ ဇဝ်ဖြာ ဘော ဘူင် တဲး ဒူအီ အာဒါဝိတ် အွင်၊ တဲး ဂေ ပဲ ကိူန် ကာဆဝ်။

13 ဒေါ မုး ခြာဝ် ဆုဝ့် အီ ငှုဝ်၊ န့ မိုဝ်း ဒူအီ အူယ် ဝီ အီ မုး ဒါ တာင် ခဲင် ဖိုင် ဒါ ဘုဝ် အူယ် ဂိုဝ် ဝီ တွိုန်။ ဂေ ဘော ဟာဝ် ဒူင် ကွယ် အာဒါဝိတ် ဒီ ကာဒဝ် မာဝ် အာဒူလမ်။ ဒေါ အန် တီ ဒါ ဆိုက် ဂေ ဒူအီ ဖီလီထီ ဘော ချ ဘာင် ဘ့လဲင် ရေဖိမ် တွိုန်။ 14 အာဒါဝိတ် ယီ ဆီ ကွယ် ခဲင် ဒူင် ချြီင် အန်။ ဂေ ဒါ ဆိုက် ဒူအီ ဖီလီထီ၊ ဂေ ကွယ် ဒီ မိူင် ဘေတ်လဲမ်။ 15 အာဒါဝိတ် မိုဝ်း နဝ်း လှုဝ်း ကာဖာ။ အန် တဝ်း၊ “တဲး အုဝ် နပ် အာဆေ ဒီ တဝ့် တး အိုမ် ခဲင် အိုမ် ခိုမ် အီ ကွယ် ခူပ် မာလုဝ်း မိူင် ဘေတ်လဲမ် တွိုန်။ အာဆေ ဒီ ဒိုဝ်း တး၊ တဲး အုဝ် ပွိုန် ဒီ ဒျီင်။း”

16 ဒါ ဘုဝ် အူယ် ဝီ တွိုန်၊ ဂေ ဘော လိုပ် ဟာဝ် ရိုဝ် ကာတဲ ဒူအီ ဖီလီထီ။ ဂေ ဟဲ့ တဝ့် အိုမ် ခဲင် အိုမ် ခိုမ် အီ ကွယ် ခူပ် မာလုဝ်း မိူင် ဘေတ်လဲမ် တွိုန်၊ ဂေ ဝီ ဒိုဝ်း တး ဒူင် ကွယ် အာဒါဝိတ်။ မာလဲ၊ အန် ယီ တူ ဒျီင်။ အန် ဝီ ဟုး ဒဲင် ကာဒါယ်၊ လှူ ဒီ ဇဝ်ဖြာ။ အန် ဝီ တဝ်း၊ 17 “မဲ ဇဝ်ဖြာ၊ အုဝ် တူ ဒျီင် အိုမ် နီ ဒေါ မှဝ်။ အိုမ် နီ၊ န့ ပီ နှာမ် ဂေ အီ တူ လှယ့် အာဆာက် ဒုဝ် ဘြိမ် ဂေ။” ကူပ် န့ ပါယ် တီ အန် တူ ဒျီင်။ ဂေ ဒါ ဘုဝ် အီ အိုပ် ဒါ ဆိုက် အူယ် ဝီ တွိုန်၊ ဂေ ဟဲ့ ဘူင် ပါယ် တီ။

18 န့ ဘော မုး ဝါ အာယောဖ အီ စိူဝ် အာဖီဆေ၊ အီ မုး ဂွန် နာင် စေရူယာ တွိုန်။ အန် မိူဝ် ယဲတ့် ဒါ ဆိုက် အူယ် ဝီ။ အန် ဘော ဒိုဝ်း ဒီ ဂူင့် ဘ့လာ လျီး အန်၊ ကာဂုဝ်း ငဝ်း ယမ် ဒူအီ အူယ် မာယဝ်း ဝီ။ ဒွန် အီ ဘော နပ် လွင် အန် ပီ ဂေ နပ် လွင် ဂေ အူယ် ဝီ တွိုန်။ 19 အန် ဘော မိုဝ်း ဆာရေ လွှိုမ် ဂေ အူယ် ဝီ တွိုန်။ ကူပ် န့ ပါယ် တီ အန် ဘဲန် ဒါ အီ အိုပ် ဂေ။ အန် ယီ တူ ဘာ ခဲင် ဖိုင် အူယ် ဝီ တီ။

20 အာဘီနာယာ အီ မုး ဂွန် အာယေဟောယာဒါ၊ အန် တး မိူင် ကာဘာဇေလ။ အန် မုး ဒါ ဆိုက် အီ ယ ကာဂုဝ်း။ အန် ဟဲ့ ဒွိုမ် အွင် ဘဲန် ဇေန့် ဘဲန် ဇေန့်။ အန် ဘော ငဝ်း ယမ် ဒူအီ အာမုဝ်အာပ် အာ ဝီ အီ ကျ ဒီ ကာဂုဝ်း လွှိုမ် အီ ဟဝ်။ ဒဲင် တီ၊ ဒေါ မုး ခြာဝ် စုဝ်း အိုမ် ဒါတ်၊ အန် ဘော ဟာဝ် လိုပ် ခဲင် ကာဒဝ် ကာဒါယ် ဒိုဝ်း မာခြင်ဆီ၊ ငဝ်း ယမ်။

21 ဒူအီ အဲဂိုပ် အီ တာင် စာ ကာဆဝ် မိူဝ်၊ အန် ငဝ်း ယမ်။ ဒူအီ အဲဂိုပ် တွိုန် ယီ ဂူင့် ဘ့လာ လျီး။ အီ မုး အာဘီနာယာ တွိုန်၊ အန် ဂူင့် မီ မင် မး။ အန် ဟာဝ် ဖာတ် ဘ့လာ လျီး ခဲင် ဒဲ ဒူအီ အဲဂိုပ် တွိုန်၊ ဝီ ငဝ်း ယမ် အန်။

22 အာဘီနာယာ အီ မုး ဂွန် အာယေဟောယာဒါ အန် ဘူင် ပါယ် တီ ဘဲန် ဇေန့် ဘဲန် ဇေန့်။ ဒွန် အီ ဘော နပ် လွင် အန် ပီ ဂေ နပ် လွင် အူယ် ဝီ တွိုန်။ 23 အန် ဟဲ့ မိုဝ်း ဆာရေ လွှိုမ် ဂေ အူယ် ဂိုဝ် ဝီ တွိုန်၊ အန် ယီ တူ ဘာ ခဲင် ဖိုင် ဒါ ဘုဝ် အူယ် ဝီ တွိုန်။ အာဒါဝိတ် ဝီ တဲး အန် အိုပ် ဒါ ဆိုက် အီ ဘ်ု အာဆာက် အန်။

24 ဂေ ဒူအီ ခဲင် ဖိုင် အူယ် ဂိုဝ် ဝီ၊ န့ ဘော ဘာ ဒူအီ ဂေ နီ။ အာဆာဟေလ အီ မုး ဝါ အာယောဖ တွိုန်၊ အာအေဟာနန် အီ မုး ဂွန် အာတောတော အီ ကွယ် မိူင် ဘေတ်လဲမ် တွိုန်၊

25 အာဆာမာ အီ မုး အာမျုဝ် ဟာရောဒိတ် ဘော အာအေလီက အီ မုး အာမျုဝ် ဟာရောဒိတ်။

26 န့ မုး ဘော အာဟေလေတ် အီ မုး အာမျုဝ် ဖာလာတီ၊ အာအီရာ အီ မုး ဂွန် အာအီကေဆာ အီ တး မိူင် ဒေကော၊

27 အာဘီအေစာ အီ မုး အာမျုဝ် အာနာထူတ်၊ အာမေဘုန်နီ အီ မုး အာမျုဝ် ဒူအီ ဟူဆာ၊

28 အာစောလမုန် အီ မုး အာမျုဝ် အာဟုဝ်ဟိတ် ဘော အာမာဟာရေ အီ မုး အာမျုဝ် အာနေတောဖာ။

29 န့ မုး ဘော အာဟေလိတ် အီ မုး ဂွန် အာဘာအာနာ၊ အီ မုး အာမျုဝ် အာနေတောဖာ၊ အာအီဒေ အီ မုး ဂွန် အာရီဘေ အီ ကွယ် မိူင် ဂီဘီယာ၊ အီ မုး အာမျုဝ် အာဘေန်ယာမ်၊

30 အာဘီနာယာ အီ မုး အာမျုဝ် ဘီရာထူန်၊ အာဟီဒေ အီ ကွယ် ဒူပ် ဒီလယ့် ကာအာတ်၊

31 အာဘာလဘုန် အီ မုး အာမျုဝ် အာဘာဆီ၊ အာဇာမာဝိတ် အီ မုး အာမျုဝ် ဘာဟူမီ၊

32 အာအေလီအာဘာ အီ မုး အာမျုဝ် ဆာလာဘူန်။ န့ မုး ဘော ဂေ ဂွန် အာယာဆေန် ဘော အာယုဝ်နာထာန် 33 အီ မုး ဂွန် အာဆာမာ အီ မုး ဒူအီ ဟာရာ၊ အာဟီအာမ် အီ မုး ဂွန် အာဆာရ၊ အီ မုး ဒူအီ အာမျုဝ် အာရရီ၊

34 အာအေလီဖေလေတ် အီ မုး ဂွန် အာဟာဆဖဲ၊ အီ မုး အာမျုဝ် ဒူအီ မာခါထိတ်၊ အာအေလမ် အီ မုး ဂွန် အာဟီဆောဖေလ၊ အီ မုး အာမျုဝ် ကီလုဝ်၊

35 အာဟေစာရော အီ မုး အာမျုဝ် ကာမေလ၊ အာဖာရေ အီ မုး အာမျုဝ် အာဖီ၊

36 အာအီဂါလ အီ မုး ဂွန် အာနာထာန် အီ ကွယ် ခဲင် မိူင် စောဖ၊ အီ မုး ဂွန် အာဟာ​ကေရီ။

37 န့ မုး ဘော အာဇေလိက် အီ မုး အာမျုဝ် အမ်မူန်၊ အာနာဟာရေ အီ မုး အာမျုဝ် ဘီရောဆီ။ အန် မုး ဒူအီ အီ ဂူင့် ခြိုင် ကာဂုဝ်း အာဒါ အာယောဖ အီ မုး ဂွန် နာင် စေရူယာ တွိုန်။

38 န့ မုး ဘော အာအီရာ အီ မုး အာမျုဝ် အီထာရီ၊ အာကောရိပ် အီ မုး အာမျုဝ် အီဆာရီ

39 ဘော အာအူရီယာ အီ မုး အာမျုဝ် ဟေထိတ် တွိုန်။ ခဲ့ ကွယ် ဒူအီ ဂေ တီ၊ ဂေ ဘောကာဂ့လျီတ် ကွယ် အူယ် ဂိုဝ် ဒီ ဘူ ဝီ။