1 ဒေါ မွိုန် န့ မိုဝ်း ဒူအီ အူ ဝီ ခဲင် န့ကြိုဝ်း အာဇူဖာ၊ အန် စိူဝ် အာအေန်ခါနာ။ မိူင် ဘြိမ် အန် မုး မိူင် ရာမာ အီ ကွယ် ဒီ ခူပ် နွန် ခဲင် မိူင် တာင် အီ စိူဝ် မိူင် အာအေဖာရိမ်။ အာအေန်ခါနာ တွိုန် မုး ဂွန် အာယေရုဝ်ဟမ်။ အာယေရုဝ်ဟမ် ဝီ မုး ဂွန် အာအေလီဟူ။ အာအေလီဟူ မုး ဂွန် အာတောဟူ။ အာတောဟူ ဝီ မုး ဂွန် အာဇူဖ၊ အီ မုး ဒူအီ ခဲင် ခြိုဝ် အာအေဖာရိမ်။ 2 အာအေန်ခါနာ တွိုန် မိုဝ်း အီဘိုန့် အာ ဝီ။ အီဘိုန့် အူ ဝီ စိူဝ် နာင် ဟာနာ။ အီဘိုန့် ပေါ ဝီ စိူဝ် နာင် ဘေနီနာ။ နာင် ဘေနီနာ တွိုန် အန် မိုဝ်း ဒီ ဟျီင် ဂွန်။ အီ မုး နာင် ဟာနာ တွိုန် အန် ယီ တူ မိုဝ်း ဒီ ဟျီင် ဂွန်။

3 ဒွန် ဆီနမ် ဒွန် ဆီနမ် အီမာယ် တွိုန် ဟုဝ့် ဒီ မိူင် ဆီလုဝ်၊ တဲး အန် ပွိုန် ဒီ လှူ ကြိုပ် ဇဝ်ဖြာ ဒီ တီ။ အန် မုး ဇဝ်ဖြာ အီ အိုပ် တူတ့် ဒွန် မျုဝ်။ ဒါ တာင် အီ လှူ ဒီ ဇဝ်ဖြာ ကွယ် ဒီ မိူင် ဆီလုဝ် တွိုန်။ န့ မုး အာအေလီ ဘော ဂွန် အီမာယ် အန် အာ ဝီ အီ စိူဝ် အာဟောဖိမ် ဂါယ် အာဖီနေဟာတ်။ 4 ဘော ဇမ် ပန် ဒီ လှူ အာအေန်ခါနာ တွိုန်၊ ဝါယ် ဟဲ့ ဟွတ့် လှူ၊ အန် ဝီ ကာဆာင် မျုဝ် ပီ လှူ ဂေ၊ တဲး အီဘိုန့် အန် ဂေ ဂွန် အန် ဒွန် အီ ပွိုန် ဒီ ဟူမ်။ 5 အီ မုး နာင် ဟာနာ တွိုန်၊ အန် ယီ ဒွါ အာ ဘုန်။ ခုဝ်၊ အန် ရွက့် ကာဆဝ် ဝီ တီ။ ဇဝ်ဖြာ ယီ တူ တဲး နာင် ဟာနာ တွိုန် ပွိုန် ဒီ ဟျီင် ဂွန်။ 6 ကူပ် တူ တဲး ဇဝ်ဖြာ အန် ပွိုန် ဒီ ဟျီင် ဂွန်၊ အီဘိုန့် ပေါ ဝီ တွိုန် ပျာတ့် အန်၊ ဘူင် နာ စီစိဝ် ဒီ အန်။ 7 ဒွန် ဆီနမ် ဒွန် ဆီနမ် န့ ဘော ပါယ် တီ။ ဒေါ ဟုဝ့် ဂေ ဒူင် ကြိုပ် ဂေ ဇဝ်ဖြာ၊ န့ မုး အီဘိုန့် ပေါ ဝီ တွိုန်၊ အန် ဝီ ပျာတ့် နာင် ဟာနာ။ ခုဝ်၊ နာင် ဟာနာ ဘော ယာမ်၊ အာဝ် ဟူ ဟူမ် မာဆေ။ 8 ပန် တီ အာအေန်ခါနာ အီ မုး အီမာယ် အန် ဘော ဒီမွှတ် အန် တဝ်း၊ “အိုယ် နာင် ဟာနာ၊ ကူပ် မာဆေ ပီ ယာမ် မဲ။း မဲ ပီ ဆော ဟူ ဟူမ် ပီ ဒီ ဟူမ်၊ မှဝ် န့ ပါယ် နဝ်း မဲ ပီ ဆော ဒီတဲတ် ပါယ် တီ။း နဝ်း အုဝ် ဒါခိုယ် ဒီ မဲ လွှိုမ် အုဝ် မိုဝ်း ဂွန် အီမာယ် ဂိုဝ် ဝီ။”

9 န့ ဘော မိုဝ်း အာဒါ အူ ဆီနမ်၊ ဝါယ် ဟဲ့ ဟွတ့် ဂေ ဟူမ် ဘ့လွယ် လှူ ဒီ မိူင် ဆီလုဝ် တွိုန်၊ နာင် ဟာနာ ဘော ယိတ့် ဟာဝ် ဆာခိုဝ် ဒီ ဇဝ်ဖြာ။ ဒေါ အန် တီ အာအေလီ တွိုန် ကွယ် ခူပ် ရွင့် ဘာင် မာလုဝ်း ဒူင် ကြိုပ် ဂေ ဇဝ်ဖြာ။ 10 နာင် ဟာနာ ယီ မိုဝ်း နဝ်း က့လိုဝ် ကာဆဝ်။ အန် ဘော ဆာခိုဝ် ဒီ ဇဝ်ဖြာ။ အိုမ် ငါယ် အန် မိူဝ် လှဲ။ 11 အန် ဒွါ ကာဒိက် ဆတ်ဇာ ဒီ ဇဝ်ဖြာ တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ တဲး မဲ ယွတ် အီ ဒုက် ဒီ နဝ်း အုဝ် နီ။ တဲး မဲ နမ်လှုဝ်း အုဝ်၊ ကွဲ့ တဲး မဲ ပိဝ် အုဝ်။ အုဝ် မှာန့် မဲ ဒွါ ဂွန် အီမာယ် ဒီ အုဝ်။ အုဝ် မိူဝ် ဝီ အာပ် ဒွါ အန် ဒီ မဲ ဇဝ်ဖြာ ဘော စုဝ် အာဆာက် အန်။ ဂေ မိူဝ် တူ ကပ် ဂိန့် အန် ဒေါ မှဝ်။”

12 ဒေါ ဆာခိုဝ် အန် တီ၊ အန် မိူဝ် ဆာခိုဝ် လှေန့် ဒီ အာတ့် ဇဝ်ဖြာ။ အာအေလီ ဘော ယွတ် ပီ ပါယ် မူတ့် အန်။ 13 နာင် ဟာနာ ယီ ဆာခိုဝ် ခဲင် နဝ်း အန်။ မာလဲ၊ ဆီပိုန့် အန် ရ်ု ရ်ု၊ ဂြုဝ်း အန် ယီ တူ လေး။ ခုဝ်၊ အာအေလီ ဘော ထာင်၊ အန် ဟဲ့ ယိုတ့် ပဝ်း။ 14 အာအေလီ ဘော တဝ်း ဒီ အန်၊ “မဲ ဟဲ့ ယိုတ့် ပဝ်း နီ၊ ဟဲ့ လှေန့် ခဲ့ မှဝ်။း ဝဲန် နဝ်း ဆီ ဒျီင် မဲ ပဝ်း တီ။”

15 နာင် ဟာနာ ဘော ဝီ ကာလာင် ဒီ အန် တဝ်း၊ “အာဝ် မုး။ အုဝ် နီ၊ အုဝ် မုး အီဘိုန့် နဝ်း န့စမ်၊ နဝ်း ဒီတဲတ်။ အုဝ် တူ မိုဝ်း ဒီ ဒျီင် အိုမ် မာငုန် ဂေ ပဝ်း။ အုဝ် ယီ ဆာခိုဝ် ဒီ အာတ့် ဇဝ်ဖြာ နီ။ အုဝ် ကာလာင် တူတ့် ဒုက် ဒွန် မျုဝ် ဒီ အန် ဇဝ်။ 16 မဲ ကွဲ့ ထာင်၊ အုဝ် မုး အီဘိုန့် အီ တူ မွှိုမ်။ ကူပ် နဝ်း အုဝ် ဟဲ့ က့လိုဝ် ကာဆဝ်၊ အုဝ် ဟဲ့ ကာလာင် တူတ့် ဒီ ဇဝ်ဖြာ။”

17 အာအေလီ ဘော ဝီ တဝ်း၊ “တဲး မဲ ကွယ် ဒါခိုယ်။ တဲး ဇဝ်ဖြာ ပီ ကြိုပ် အေ ဒူအီ အီဆာရေလ ကာဝေ မဲ၊ တဲး အန် ဒွါ ခဲ့ ပီ ဟဲ့ ဆာခိုဝ် မှာန့် မဲ တီ။”

18 အန် မိူဝ် ဝီ တဝ်း၊ “ဟဲ့ မုး ဂုင် ဂေဇူ မဲ ဒါ။ တဲး ပီ ဘူင် အုဝ် ဒူပ် ပီ အိုင် မဲ ဆေဆေ။” ပန် တီ အန် ဘော ဟာဝ် ဟူမ် ဘူမ်။ နာ အန် မိူဝ် ဝီ ဆီ ဘ့လာင်။

19 ပါ ခဲညှာ ဆိန့်ဝး စေဝ်၊ ဂေ ဝီ ယိတ့် ဝီ ကြိုပ် ဇဝ်ဖြာ။ ဟဲ့ ဟွတ့်၊ ဂေ ဘော ဝိဝ် ဒူင် ကွယ် ဂေ ဒီ မိူင် ရာမာ တွိုန်။ ပန် တီ အာအေန်ခါနာ ဘော ဝီ ဟာဝ် အိတ် ဒူပ် နာင် ဟာနာ။ ဇဝ်ဖြာ ဘော နမ်လှုဝ်း ပဲ့ ဟဲ့ ဆာခိုဝ် အန်။ 20 နာင် ဟာနာ ဘော ဒဲ ဘာဒိက် ဆန်ထေ။ ဘော ဇမ် အာခြာဝ် ဒီ ဂွိုတ် ဂွန်၊ အန် ဘော ဂွိုတ် ဂွန် အီမာယ်။ အန် ဘော တဲး ဂွန် တီ စိူဝ် အာဆာမူအေန်။ ခုဝ်၊ အန် တဝ်း၊ “ဂွန် တီ မုး ပီ ဆာခိုဝ် မှာန့် အုဝ် ဒီ ဇဝ်ဖြာ။”

21 ဘော ဇမ် ဆီနမ် ဒီ တး၊ အာအေန်ခါနာ ဘော န့ဟူမ် အန် ဂေ ဒွန် အီ၊ ဂေ ဝီ ဟုဝ့် လှူ ဒီ ဇဝ်ဖြာ၊ တဲး န့ ပီ ပီ ဒွိုမ် လှူ ဂေ ဒွန် ဆီနမ် တွိုန်၊ တဲး ဂေ လှူ ပီ ဒွိုမ် ကာဆဲန့် ဂေ ဒီ ဇဝ်ဖြာ။ 22 နာင် ဟာနာ တွိုန် ယီ တူ ဟာဝ်။ ခုဝ်၊ အန် တဝ်း ဒီ အီမာယ် အန်၊ “ဆေ ဂွန် နီ ဟီ ဟွတ့် ဂဝ်း ပူ၊ အုဝ် ဒီ ဝီ ဟုဝ့် အာပ် အန်၊ တဲး အန် ကွယ် ဒီ အာတ့် ဇဝ်ဖြာ ဆေဆေ။”

23 အာအေန်ခါနာ ဘော ဝီ တဝ်း၊ “အိုဝ်၊ ပါယ် တီ အာဝ် လိုက်။ တဲး မဲ ကွယ်၊ တဲး န့ ကော ဇမ် ပန် ဂဝ်း ဂွန် ဒီ ပူ တီ။ တဲး န့ မှာန် ခဲ့ ပီ ဒွါ မဲ ကာဒိက် ဆတ်ဇာ ဒီ ဇဝ်ဖြာ။” ပန် တီ နာင် ဟာနာ တွိုန် ဘော ကွယ် ဟျီင် ဂွန် အန်၊ တဲး န့ ကော ဇမ် ပန် ဒီ တဲး အန် ဂွန် တွိုန် ဂဝ်း ပူ။

24 ဂွန် တွိုန် ဟဲ့ ဟွတ့် ဂဝ်း ပူ၊ အန် ဘော ဒိုဝ်း ဂွန်၊ ဘော မက် အာလူင့် အူ ဒုဝ်၊ အာဆာက် အီ ဟဲ့ နုဝ့် အူယ် ဆီနမ် ဘော ကာပဲ့ ဂိုဝ် ဒီ ဖန် ဘ့လဲ၊ ဘော အိုမ် မာငုန် အူ ပုင်။ အန် ဘော ဟာဝ် ဇမ် ဒူင် ကြိုပ် ဂေ ဇဝ်ဖြာ ဒီ မိူင် ဆီလုဝ် တွိုန်။ ဒေါ အန် တီ ဂွန် အန် ယီ ဆီ ဒီတဲတ်။ 25 ဂေ ဘော ငဝ်း ယမ် မက် တွိုန်၊ ဘော ဒိုဝ်း ဂွန်၊ ဟာဝ် တိုယ် အန် ဇမ် ဒူင် ကွယ် အာအေလီ တွိုန်။ 26 နာင် ဟာနာ ဘော တဝ်း၊ “အိုယ် မဲ ဒါ၊ မဲ နုဝ် အုဝ်။း အုဝ် မုး အီဘိုန့် အီ ကွယ် ခူပ် မဲ အီ ဆာခိုဝ် ဒီ ဇဝ်ဖြာ ဆီငဲ တွိုန်။ 27 ဒေါ အန် တီ အုဝ် ဆာခိုဝ် တဲး အုဝ် ပွိုန် ဂွန် နီ။ ဇဝ်ဖြာ မိူဝ် ဟဲ့ ကာဝေ ဒွါ ပီ မှာန့် အုဝ် တီ။

28 ကူပ် န့ ပါယ် တီ အုဝ် ကော ခမ် ဒီ အာပ် ဂွန် အုဝ် တီ ဒီ ဇဝ်ဖြာ။ အန် မိူဝ် ဒီ ဘဲန် ဒဲစေန့် ဇဝ်ဖြာ ဘော စုဝ် အာဆာက် အန်။” နာင် ဟာနာ ဟဲ့ ဟွတ့် ကာလာင် ဂြုဝ်း တီ ဒီ အာအေလီ တွိုန်၊ အာအေလီ ဘော ဝီ ကြိုပ် ဇဝ်ဖြာ။