1 ဝါယ် တီ အာဘုဝ်အာပ် ဘော ဟာဝ် တုတ့် ဘာင် မာလုဝ်း မိူင်။ အန် ဘော ယိုဝ် အီ မုး ဝေါဝဲ ကာချြီ့ အာအေလီမာလေက် ပီ တဝ်း အန် တွိုန်။ ဒူအီ ဝီ တီ ဟဲ့ ဟာဝ် ဒူပ် န့တေန့်။ အန် ဘော ဒဲ့ ဒါ အီ တီ တဝ်း၊ “အိုယ် ဒါ ဂိုက်၊ တး တုတ့် ဒီ နီ အူ ကာစန်။” ဒူအီ တွိုန် ဘော တး တုတ့် ဒီ တီ။

2 အာဘုဝ်အာပ် ဘော ဝီ ဟာဝ် ဒဲ့ ဘော ဂေ အီ မုး ဒါ တာင် ဂိုဝ် ဝီ ခဲင် မိူင် တွိုန်။ အန် ဘော တဝ်း ဒီ ဂေ၊ “တး တုတ့် ဒီ နီ။” ဂေ ဘော တုတ့် ဒီ တီ။ 3 အန် ဝီ ကာလာင် ဒီ ဒါ အီ မုး ဝေါဝဲ ကာချြီ့ တွိုန် တဝ်း၊ “နာင် အုဝ်မီ အီ တး မိူင် မုဝ်အာပ် တွိုန်၊ အန် ဆီ ယွင့် ဒူင် နာ အီ မုး ကြုဝ် အာအေလီမာလေက် အီ မုး အီကတ် အာယ် တွိုန်။ 4 အုဝ် ထာင်၊ အုဝ် လုဝ် ကာလာင် တဲး မဲ နပ်။ ဆေ မဲ ဆီ စိုဝ်း၊ တဲး မဲ စိုဝ်း၊ တဲး ဘော ဂေ ဒူအီ အီ တုတ့် ဒီ နီ ယိုဝ်၊ တဲး ဘော ဂေ အီ မုး ဒါ တာင် ခဲင် မိူင် အေ နီ ဘော နပ်။ ဆေ မဲ တူ စိုဝ်း၊ မဲ ဝီ ကာလာင်၊ တဲး အုဝ် နပ်။ အာဝ် မိုဝ်း အီ ဒီ ကာအာပ် စိုဝ်း ဒဲင် မဲ။ အီ မုး အုဝ်၊ အုဝ် လုဝ် ဒီမွှတ် မဲ ဒီ အာတ့်။” အန် ဝီ တဝ်း ဒီ အာဘုဝ်အာပ်၊ “အိုဝ်၊ အုဝ် အီ ဒီ စိုဝ်း။”

5 ဟဲ့ ဟွတ့်၊ အာဘုဝ်အာပ် ဝီ တဝ်း ဒီ အန်၊ “မဲ ဟီ စိုဝ်း ဒူင် နာ တီ ဒီ နာင် အုဝ်မီ၊ မဲ လုဝ် ဒိုဝ်း ဘော နာင် ရူထာ အီ မုး ယာ ဆီပြး အီ မုး ဒူအီ မုဝ်အာပ် တွိုန်၊ တဲး အန် ဘဲန် အီဘိုန့် မဲ။ မဲ လုဝ် ဆိူပ် ခါဂုန် ဂေ အီ ဟဲ့ ဟွတ့် ယမ် တွိုန်၊ ကွဲ့ တဲး အာမျုဝ် ဂေ ဟြာယ်။”

6 ဒူအီ တွိုန် ဝီ တဝ်း၊ “ဆေ န့ ပါယ် တီ အုဝ် တူ ဘဲန် စိုဝ်း။ အုဝ် ယုဝ် ဘော ခါဂုန် အုဝ် ဝီ စှိုမ်။ ပဲ့ ဟဲ့ ကာအာပ် အုဝ် စိုဝ်း တီ၊ အုဝ် ဝီ အာပ် ဒွါ ဒီ မဲ။”

7 ဒေါ မွိုန် ဂေ ဒူအီ အီဆာရေလ မိုဝ်း ထုင်ဂျာမ် ပါယ် နီ။ ဆေ ဂေ ကာစိုဝ်း ကာယွင့် ကြုဝ်ကြာမ် ဂေ၊ ဒူအီ ယွင့် လုဝ် ဘုတ့် ခူဒိန့် အန် ဒွါ ဒီ ဒူအီ စိုဝ်း။ ဂေ ဘူင် ပါယ် တီ တဲး ဒွန် အီ နပ်၊ ပီ ကာစိုဝ်း ကာယဝ်း ဂေ ဟဲ့ မုး ဟဲ့ မှာန်။

8 ဒူအီ အီ မုး ဝေါဝဲ အာဘုဝ်အာပ် ဝီ တဝ်း ဒီ အာဘုဝ်အာပ်၊ “တဲး မဲ စိုဝ်း ဒီ မဲ။” ဟဲ့ ဟွတ့်၊ အန် ဘော ဘုတ့် ခူဒိန့် အန် ဒွါ ဒီ အာဘုဝ်အာပ်။

9 အာဘုဝ်အာပ် ဝီ တဝ်း ဒီ ဂေ ဒါ တာင် ဘော ဂေ အီ ကွယ် ဒီ တွိုန်၊ “အာတိုဝ် နီ၊ တဲး ဘေ ဘဲန် ဆက်ဆေ လွင် ဟဲ့ စိုဝ်း အုဝ် ကြုဝ်ကြာမ် အာအေလီမာလေက်၊ ကြုဝ်ကြာမ် အာခီလူန်၊ ဘော ကြုဝ်ကြာမ် အာမာဟာလူန် ဒွန် မျုဝ်။ အုဝ် ဟဲ့ စိုဝ်း ကြုဝ် တီ ဒီ နာင် အုဝ်မီ။ 10 ဒဲင် တီ၊ အုဝ် ဟဲ့ ပွိုန် ဘော နာင် ရူထာ အီ မုး ဒူအီ မုဝ်အာပ် အီ မုး အီဘိုန့် အာမာဟာလူန် တွိုန်၊ တဲး အန် ဝီ ဘဲန် အီဘိုန့် အုဝ်၊ တဲး အုဝ် ဝီ ဆိူပ် ခါဂုန် ဂေ အီ ဟဲ့ ဟွတ့် ယမ် တွိုန်၊ ကွဲ့ တဲး အာမျုဝ် ဂေ ဟြာယ်၊ တဲး ဂေ မိုဝ်း လှုက်လှာန် ခဲင် ကာင် ဂေ ဘော ခဲင် မိူင် နီ။ ဘေ ဟဲ့ ဘဲန် ဆက်ဆေ လွင် အန် တီ အာတိုဝ် နီ။”

11 ပန် တီ ခဲ့ ကွယ် ဂေ ဒူအီ ဘာင် မာလုဝ်း မိူင် ဘော ဂေ ဒါ တာင်၊ ဂေ တဝ်း၊ “အိုဝ်၊ ယေ ဟဲ့ ဘဲန် ဆက်ဆေ မဲ။ တဲး ဇဝ်ဖြာ မွင့်ကာရာ တဲး ဘော ဒီ အီဘိုန့် အီ ဒီ တး ကွယ် ခဲင် ကာင် မဲ တီ၊ တဲး အန် ပီ နာင် ရာအေန် ဂါယ် နာင် လေအာ၊ အီ မုး မာ ဒင် အေ ဒူအီ အီဆာရေလ။ မဲ မိူဝ် တဲး ဒွန် အီ ကွယ် ခဲင် မိူင် အေဖာရာ နီ ဘော ရုဝ်ဆေ မဲ။ တဲး မဲ ဘော မိုဝ်း အာဖုင် ဒင်ခုဝ် ခဲင် မိူင် ဘေတ်လဲမ် နီ။ 12 ဆေ ဇဝ်ဖြာ ဒီ ဒွါ ဂွန် ဒီ အီဘိုန့် ဝီ နီ၊ တဲး န့ဟူမ် မဲ ဘော ပီ န့ဟူမ် အာဖေရေတ် အီ မုး ဂွန် အာယူဒါ ဂါယ် နာင် ထာမာ တွိုန်။”

13 ဟဲ့ ဟွတ့်၊ အာဘုဝ်အာပ် ဘော ဒိုဝ်း နာင် ရူထာ တဲး အန် ဘဲန် အီဘိုန့် အန်။ ဇဝ်ဖြာ ဘော တဲး အန် ဒဲ ဘာဒိက် ဆန်ထေ။ အန် ဘော မိုဝ်း ဂွန် အီမာယ် အူ ဝီ။

14 န့ ဘော မိုဝ်း ဂေ အီဘိုန့် မင် အီ ဘော တဝ်း ဒီ နာင် အုဝ်မီ၊ “တဲး အေ အိူပ် ဇဝ်ဖြာ။ အာတိုဝ် နီ ဇဝ်ဖြာ ဟဲ့ တဲး မဲ မိုဝ်း လှာန် အီ ဒီ ယွတ် မဲန် မဲ။ တဲး အန် ဘဲန် ဒါ တာင် ကာတဲ အေ ဒူအီ အီဆာရေလ။ 15 ပန် ဒီ ကတ် မဲ အန် ဒီ ယွတ် လိုမ်လာ မဲ။ ခုဝ်၊ အဝ် မဲ ဟဲ့ ဘဲန် မာ အန်။ မဲ မိူဝ် ဟဲ့ ရွက့် အန် လွှိုမ် ဂွန် အီမာယ် ဘူ ဝီ။”

16 နာင် အုဝ်မီ ဘော စုဝ့် ဂူင့် ဂွန် င တီ ဘော လိုမ်လာ၊ တဲး အန် ကော ပီ ဂွန် အာရာင် အန်။

17 ဂေ အီဘိုန့် အီ ကွယ် ကာတတ် အန် တဝ်း၊ “နာင် အုဝ်မီ ဟဲ့ ပွိုန် ဒီ ဟျီင် ဂွန် အီမာယ်။” ဂေ ဘော တဝ်း၊ တဲး အန် စိူဝ် အာအုဝ်ဘေတ်။ အန် တီ ဝီ မုး ဂုန့် အာယေဆေ။ အာယေဆေ ဝီ မုး ဂုန့် အာဒါဝိတ် တွိုန်။

18 အီ မုး လှုက်လှာန် အာဖေရေတ်၊ ဂေ စိူဝ် ပါယ် နီ။ အာဖေရေတ် ဝီ မိုဝ်း ဂွန် အီ စိူဝ် အာဟေဇာရူန်။

19 အာဟေဇာရူန် ဝီ မိုဝ်း ဂွန် အီ စိူဝ် အာရာမာ။ အာရာမာ ဝီ မိုဝ်း ဂွန် အီ စိူဝ် အာမီနာဒါပ်။

20 အာမီနာဒါပ် ဝီ မိုဝ်း ဂွန် အီမာယ် အီ စိူဝ် အာနာဆူန်။

21 အာနာဆူန် ဝီ မိုဝ်း ဂွန် အီ စိူဝ် အာဆာလာဂူန်။ အာဆာလာဂူန် ဝီ မိုဝ်း ဂွန် အီ စိူဝ် အာဘုဝ်အာပ်။ အာဘုဝ်အာပ် ဝီ မိုဝ်း ဂွန် အီ စိူဝ် အာအုဝ်ဘေတ်။

22 အာအုဝ်ဘေတ် ဝီ မိုဝ်း ဂွန် အီ စိူဝ် အာယေဆေ။ အာယေဆေ ဝီ မိုဝ်း ဂွန် အီ စိူဝ် အာဒါဝိတ်။