1 ဆီငဲ နာင် အုဝ်မီ ဝီ တဝ်း ဒီ အဝ် အန်၊ “အိုယ် ဂွန်၊ အုဝ် ဆီ တဲး မဲ ခတ်၊ ဒဲ န့ဟူမ်၊ တဲး မဲ ပွိုန် ဒီ ကွယ် ဒါခိုယ်။ 2 အာဘုဝ်အာပ် အီ မုး ဒါ ကာညာ ဂွန် အီဘိုန့် အီ ဟဲ့ ဘဲန် ဂိုက် မဲ၊ အန် ဘော မုး ဝေါဝဲ အာယ်။ ခဲင် မှိုဝ် နီ ဂေ ဒီ မး ငှုဝ် ဘာလီ ဂေ ဒီ အူင့် ကင်နဝ်း။ 3 တဲး မဲ တာ အိုမ်၊ ဖဝ်း နာမန် အုး ငှုန်၊ စှိုပ် ခြိုင် စှိတ် မဲ။ ဟဲ့ ဟွတ့်၊ တဲး မဲ လူင် ဒီ အူင့် ကင်နဝ်း၊ ဒူင် မး ဂေ ငှုဝ် တီ။ အာတ့် ဟွတ့် ဟူမ်၊ ဟွတ့် ဒျီင် အာဘုဝ်အာပ်၊ မဲ ကွဲ့ တဲး အန် ယိုဝ် ဒုဝ် မဲ။ 4 မဲ ယွတ် ဆီချာ၊ တဲး မဲ နပ် ဒူင် ဟာဝ် အိတ် အန်။ မဲ ဟဲ့ နုဝ် ဒူင် အိတ် အန်၊ မဲ ဘော ဟာဝ် ဝိုဝ်း ဟိုပ် ပီ ပ့လိုက် အန် ဒီ ပ့လဝ် အန်၊ ဘော အိတ် ဒီ တီ။ ဟဲ့ ဟွတ့်၊ အန် ဒီ ကာလာင် ပီ ဒီ ပါယ် ဒီ မဲ။”

5 နာင် ရူထာ ဝီ တဝ်း၊ “အိုဝ်၊ မဲ ဂိုန့် တဝ်း ပါယ် မှဝ်၊ အုဝ် ဒီ ဒူပ် ပါယ် တီ။” 6 ပါယ် တီ အန် ဘော ဟာဝ် ဒူင် ကွယ် အူင့် ကင်နဝ်း တွိုန်။ အန် ဘော ဒူပ် ဒွန် မျုဝ် ခဲ့ ပီ တဝ်း ဂိုန့် အန်။

7 အာဘုဝ်အာပ် တွိုန် ဟဲ့ ဟွတ့် ဟူမ်၊ နဝ်း အန် မိူဝ် ဟဲ့ ဒါခိုယ်။ အန် ဘော ဟာဝ် အိတ် ခူပ် မ့ပိုမ် ငှုဝ် အီ ကွယ် နာ တ ဆိူတ်။ ပန် တီ နာင် ရူထာ ဘော ဟာဝ်၊ ကွဲ့ တဲး န့ ဂြန့်။ အန် ဘော ဝိုဝ်း ဟိုပ် ပီ ပ့လိုက် အာဘုဝ်အာပ် ဒီ အန်။ ဟဲ့ ဟွတ့်၊ အန် ဘော အိတ် ဒီ တီ။

8 ဘော ဇမ် ကာတဲ ဆွိုမ်၊ အာဘုဝ်အာပ် ဘော ကာစွာ။ အန် ဝီ ယွတ် ဘော နပ်၊ ဟဲ့ မိုဝ်း အီဘိုန့် တး အိတ် ဒင် စေန့် အန်။

9 အန် ဝီ ဒီမွှတ် တဝ်း၊ “အိုယ်၊ အာဆေ မဲ မုး။း” နာင် ရူထာ ဝီ တဝ်း၊ “အုဝ် မုး ရူထာ၊ အီ မုး ဒဲစေန့် မဲ။ အုဝ် မှာန့် ဒီ ဒိုဝ်း ကာတုဝ့် ဟိုပ် ပီ ပ့လိုက် မဲ နီ၊ ဝီ ပ့လိုက် ဒီ အုဝ် အီ စဲက်၊ ကူပ် မုး မဲ ဝေါဝဲ ကာချြီ့ အုဝ်၊ အီ ကာအာပ် ယွတ် မဲန် အုဝ်။”

10 ပန် တီ အာဘုဝ်အာပ် ဝီ တဝ်း၊ “အိုယ် ဂွန်၊ တဲး ဇဝ်ဖြာ မွင့်ကာရာ ဒွါ နာ ဘွတ် နာ မွှိုမ် ဒီ မဲ။ ပဲ့ ဟဲ့ ဘူင် မဲ ဒေါ တီ နီ၊ ဟဲ့ မွှိုမ် လွှိုမ် ပဲ့ ဟဲ့ ဘူင် မဲ အာတ့် နီ။ မဲ မိူဝ် တူ ဟြေတ့် ဒီ ဒူပ် အီ မုး ကာညူမ်။ ဘော အီ ခြမ် ဘော အီ ဖ့လာန် မဲ တူ ဒူပ်။ 11 အိုယ် ဂွန်၊ ဒေါ တီ နီ ကွဲ့ တဲး မဲ ယုဝ် မာဆေ။ အုဝ် ဒီ ဘူင် ခဲ့ ပီ မှာန့် မဲ။ ဒူအီ ခဲင် မိူင် ဒူင် ကွယ် အုဝ် နီ၊ ဂေ ဘော မိူင် ဟဲ့ နပ်၊ မဲ မုး အီဘိုန့် အီ မိုဝ်း နဝ်း ဘွတ်၊ နဝ်း မွှိုမ်။ 12 ဟဲ့ မှာန်၊ အုဝ် ဟဲ့ မုး ဝေါဝဲ ကာချြီ့ အီ ကာအာပ် ယွတ် မဲန် မဲ။ မာလဲ၊ န့ ဆီ မိုဝ်း ပေါ အူ ဝီ၊ အီ မုး ဝေါဝဲ မဲ။ အန် ဆီ ကာချြီ့ လွှိုမ် အုဝ်။ 13 ခဲင် မှိုဝ် နီ တဲး မဲ အိတ် ဒီ နီ၊ အာဝ် လိူက်။ ခဲညှာ ဆိန့်ဝး၊ ဆေ အန် ဘော ခမ် ဒီ ဘဲန် ဒါ အီ ယွတ် မဲန် မဲ၊ တဲး အန် ဘဲန်။ ဆေ အန် ယီ တူ ခမ် ဒီ ယွတ် မဲန် မဲ၊ အုဝ် ဒီ ခမ်။ ဇဝ်ဖြာ မိူဝ် ဟဲ့ နပ်၊ အုဝ် တူ ကာလုဝ် မဲ။ တဲး မဲ အိတ် ဒီ နီ ကော ဇမ် ဆိန့်ဝး။”

14 ပန် တီ နာင် ရူထာ ဘော အိတ် ဒင် စေန့် အာဘုဝ်အာပ် တီ၊ ကော ဇမ် ဆိန့်ဝး။ အန် ဘော ယိတ့် ဆိန့် ဆိန့်ဝး ဝွင့်၊ ကွဲ့ တဲး အီ ယိုဝ် အန်။ ခုဝ်၊ အာဘုဝ်အာပ် ဟဲ့ တဝ်း၊ “ကွဲ့ တဲး အာဆေ နပ်၊ န့ မိုဝ်း အီဘိုန့် အီ တး ဒူင် ကွယ် အုဝ် ဒီ အူင့် ကာင်နဝ်း နီ။”

15 အာဘုဝ်အာပ် ပီ ဝီ တဝ်း ဒီ နာင် ရူထာ၊ “ဘ့လး ဟိုပ် ပီ ကန် မဲ တီ ဒီ နီ။” အန် ဟဲ့ ဟွတ့် ဘ့လး၊ အာဘုဝ်အာပ် ဘော ဂိတ် ငှုဝ် ဘာလီ ဒဝ် ဘ့လဲ၊ ဒွါ ဒီ အန်၊ စွယ် အန် စုဝ့်။ ဟဲ့ ဟွတ့်၊ အာဘုဝ်အာပ် ဝေန့် ခဲင် မိူင် ဒူင် ကွယ် အန်။

16 အန် ဘော တး ဇမ် ဒူင် ကွယ် ဂိုန့် အန်၊ ဂိုန့် အန် ဘော ဒီမွှတ် အန် တဝ်း၊ “အိုယ် ဂွန်၊ န့ ဘော ပါယ် မှဝ်။း” အန် ဘော ကာလာင် တဲး ဂိုန့် အန် ထူမ် ပီ ပါယ် အာဘုဝ်အာပ် ဒီ အန်။

17 အန် ဝီ တဝ်း၊ “ဒူအီ တွိုန် ဟဲ့ ဝီ ဒွါ ဘော ငှုဝ် ဘာလီ ဒဝ် ဘ့လဲ ဒီ အုဝ်။ အန် တဝ်း၊ ‘ကွဲ့ တဲး မဲ ဝေန့် ဒုဝ် ဒီလူယ် ဒူင် ကွယ် ဂိုန့် မဲ။’”

18 ဂိုန့် အန် ဝီ တဝ်း၊ “ဂွန် အိုယ်၊ တဲး မဲ အူတ် နဝ်း၊ ကွယ် နှိမ် နှိမ်၊ ဘ်ု ဒီ ယွတ် လွင် အန် တီ၊ န့ ဒီ ပါယ် မှဝ်။ အီမာယ် တီ၊ အန် တူ နှဝ့် လှေန့်။ အန် ဒီ ဘူင် တဲး န့ ဟွတ့် အာတိုဝ် နီ လွင် အန် တီ။”