1 နာင် အုဝ်မီ တွိုန် ဝီ မိုဝ်း ဝေါဝဲ အီမာယ် အန် အူ ဝီ။ ဒူအီ ဝီ တီ၊ အန် ခြမ် ကာဆဝ်။ ဂါယ် အာအေလီမာလေက် မုး အူ ခြိုဝ်။ အန် စိူဝ် အာဘုဝ်အာပ်။

2 နာင် ရူထာ အီ မုး ဒူအီ မုဝ်အာပ် တွိုန် ဘော မှာန့် ဒီ ဂိုန့် အန် တဝ်း၊ “တဲး အုဝ် ဟာဝ် ဂဲပ် ကာယူင့် ငှုဝ် အီ စုဝ်း ခဲင် ဒူင် နာ၊ ယုဝ် န့ ဘော မိုဝ်း အီ ကာဝေ အုဝ်၊ ဆော တဲး အုဝ် ဂဲပ်။” ဂိုန့် အန် ဝီ တဝ်း၊ “အိုဝ်၊ တဲး မဲ ဟာဝ်။”

3 ပန် တီ နာင် ရူထာ ဘော ဟာဝ် ဟြေတ့် ဒီ ဂဲပ် ကာယူင့် ငှုဝ် အီ စုဝ်း အီ ဘြတ် နာ ပန် ဂေ အီ ဆုဝ့် ငှုဝ် တီ။ ဟဲ့ ဟွတ့်၊ အန် ဘော ဝီ နပ်၊ ဒူင် ဟဲ့ ဟာဝ် ဂဲပ် အန် ဟဲ့ ဝီ မုး ခဲင် ဒူင် နာ အာဘုဝ်အာပ် အီ မုး လှုက်လှာန် အာအေလီမာလေက် တွိုန်။

4 ဒေါ ကွယ် အန် ဒူင် တီ အာဘုဝ်အာပ် ဘော တး ခဲင် မိူင် ဘေတ်လဲမ်၊ တး ဟာဝ် ကာလာင် ဒီ ဂေ အီ ဆုဝ့် ငှုဝ် ခဲင် ဒူင် နာ အန်။ အန် တဝ်း၊ “တဲး ဇဝ်ဖြာ မွင့်ကာရာ ဒွါ ဒီ ဘေ။” ဂေ အီ ဆုဝ့် ငှုဝ် တွိုန် ပီ ဝီ တဝ်း၊ “တဲး ဇဝ်ဖြာ မွင့်ကာရာ တဲး ဘော ဒီ မဲ။” 5 အာဘုဝ်အာပ် ဘော ဒီမွှတ် ဒါ အီ ယဲတ့် ဂေ အီ ဆုဝ့် ငှုဝ် တဝ်း၊ “ဂွန် အီဘိုန့် နီ၊ အန် မုး ဝေါဝဲ အာဆေ။း”

6 ဒါ အီ ယဲတ့် ဂေ ဝီ တဝ်း၊ “အန် မုး ဒူအီ အာမျုဝ် မုဝ်အာပ် အီ ဒူပ် တး နာင် အုဝ်မီ တွိုန်။ 7 အန် ဟဲ့ တဝ်း ဒီ ယေ၊ ‘အုဝ် မှာန့် ဒီ ဂဲပ် ကာယူင့် ငှုဝ် အီ စုဝ်း နာ ပန် ဘေ နီ။’ အန် ဟဲ့ တး ဂဲပ် ဆိန့် ဆိန့်ဝး စေဝ် ကော ဇမ် ဒေါ တီ နီ။ အန် ဘော ရန့် ဆေဆေ၊ ဒီလှဝ် ခဲင် ထိုပ် အာဒါ အူ ကာစန်။”

8 အာဘုဝ်အာပ် ဝီ တဝ်း ဒီ နာင် ရူထာ၊ “မဲ ထူမ် ဂြုဝ်း အုဝ်။ အာဝ် လုဝ် ဟာဝ် ဂဲပ် ငှုဝ် ခဲင် ဒူင် နာ ပေါ အူ ပ့လုဝ့်။ အာဝ် လုဝ် လေး တ ဒီ နီ။ တဲး မဲ ဂဲပ် မီ ခဲင် ဒူင် နာ အုဝ် နီ ဒူပ် ဂေ ဒဲစေန့် အုဝ်။

9 တဲး မဲ ယွတ် ဒူပ် အီဘိုန့် အီ ကွယ် ခဲင် လွက့် နာ ပဲ့ ဟဲ့ ဆုဝ့် ဂေ။ အုဝ် ဟဲ့ ဟွတ့် ကာလာင် ဒီ ဂေ အီမာယ်၊ ကွဲ့ တဲး ဂေ ဘ့လတ့် မဲ။ ဆေ မဲ ဘော ဆီ ဒျီင် အိုမ်၊ ဟာဝ် ဒျီင် အိုမ် ပဲ့ ဟဲ့ တဝ့် အုန် ဂွန် ကာညူမ် ဂေ ခဲင် ကာလုဝ့် နီ။”

10 အန် ဟဲ့ ဟွတ့် တဝ်း ပါယ် တီ၊ နာင် ရူထာ ဘော မုတ် ဂိုပ် ဒီ ကာဒါယ် ကြိုပ် အန်၊ ဝီ တဝ်း ဒီ အန်၊ “မှဝ် န့ ပါယ် ပီ ရီမာတ် မဲ ဒီ အုဝ် ခဲ့ တီ ဘော ကာလာင် ဂြုဝ်း ဒီ အုဝ် အီ မုး ဒူအီ အာမျုဝ် ဟဝ်။း”

11 အာဘုဝ်အာပ် ဝီ တဝ်း ဒီ အန်၊ “အီ ဟဝ် ဟဲ့ ဟွတ့် ကာလာင် တူတ့် ဒွန် မျုဝ် ဒီ အုဝ် လွင် မဲ။ မဲ ဟဲ့ လိုမ်လာ ဆီချာ ဂိုန့် မဲ ဝါယ် ဟဲ့ ဟွတ့် ယမ် အီမာယ် မဲ။ ဂေ ဘော ကာလာင် လွင် မဲ ဟဲ့ ခမ် ဒီ ဝဲန် ဂုန့် မာ မဲ၊ ဝီ တး ကွယ် ကာတဲ ဒူအီ ပီ တူ ဒွိုမ် ယိုဝ် မဲ။ 12 တဲး ဇဝ်ဖြာ ဝီ ဒွါ နာ မွှိုမ် ဒီ မဲ၊ တဲး န့ ပီ ပဲ့ ဟဲ့ ဘူင် မဲ နာ မွှိုမ် ဒီ အီ။ ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ ပီ တဝ်း မဲ ဒီ တး ဘိုင်၊ တး ကြိုပ်၊ တဲး အန် ဝီ ဘူင် ဝျီ့ အီ မွှိုမ် ဒွန် မျုဝ် ဒီ မဲ။”

13 နာင် ရူထာ ဝီ တဝ်း ဒီ အန်၊ “အိုယ် မဲ ဒါ ကာညာ။ မဲ ဟဲ့ ကာဝေ ကာဆဝ် အုဝ်၊ ဟဲ့ ကာလာင် ဂြုဝ်း ဒါခိုယ် ဒီ အုဝ်။ အုဝ် ယီ တူ မုး အီ ပွိုန် ဘူင် ဂါန် မဲ။”

14 ဟဲ့ ဟွတ့်၊ ဘော ဝီ ဇမ် အာခြာဝ် ဒီ ဟူမ် ဘူမ်။ အာဘုဝ်အာပ် ဝီ ကာလာင် ဒီ နာင် ရူထာ တဝ်း၊ “တဲး မဲ တး ဟူမ် ခါမုန်၊ စူ အိုမ် မာငုန် ဒီ နီ။” ပါယ် တီ နာင် ရူထာ ဘော တး တုတ့် ခူပ် ဂေ အီ ဆုဝ့် ငှုဝ် တွိုန်။ အာဘုဝ်အာပ် ဘော ဒိုဝ်း ငှုဝ် မာတုး၊ ဒွါ ဒီ အန်။ အန် ဘော ဟူမ်၊ တဲး အန် ကော ဖဲ။ န့ ကော ဝီ ကာလူယ်။ 15 နာင် ရူထာ ဟဲ့ ဟွတ့် ဟူမ်၊ အန် ဘော ဝီ ဟာဝ် ဂဲပ် ကာယူင့် ငှုဝ် အီ စုဝ်း တွိုန်။

အာဘုဝ်အာပ် ဝီ ကာလာင် ဒီ ဂေ အီ ဆုဝ့် ငှုဝ် တဝ်း၊ “တဲး အန် ဂဲပ် ဘော ဆီဘယ့် ငှုဝ် ပီ ဘ့လေး အုန် ဘေ၊ ကွဲ့ တဲး အန် မွှိုမ် ဆာယ်။ 16 တဲး ဘေ ဒိုဝ်း ဘော ကာယူင့် ငှုဝ် မင် ကာလဝ့်၊ ဒွါ ဒီ အန်၊ ဘ့လေး တဲး အန် ဒိုဝ်း။ ဘေ ကွဲ့ နဲ အန်။”

17 ပန် တီ နာင် ရူထာ ဘော ဂဲပ် ကာယူင့် ငှုဝ် အီ စုဝ်း အီ ရး ခဲင် ဒူင် နာ တွိုန်။ ဘော ဇမ် ဘာ ဒီ အပ်၊ အန် ဘော မး ကာယူင့် ပီ ဂဲပ် အန်။ အန် ပွိုန် အူ အေဖာ၊ အီ ပီ ကာဘက် ဂိုဝ် ဒီ အာ ဘ့လဲ။ 18 အန် ဘော ပး ဝေန့် ငှုဝ် အန် ခဲင် မိူင် ဒူင် ကွယ် ဂိုန့် အန်၊ အန် ဘော ဒိုဝ်း ဘော ငှုဝ် မာတုး ကာလူယ် ဟူမ် အန်၊ ဒွါ ဒီ ဂိုန့် အန်။

19 ဂိုန့် အန် ဝီ တဝ်း ဒီ အန်၊ “အာတိုဝ် မဲ ဘော ဟာဝ် ဂဲပ် ငှုဝ် နာ မှဝ်။း မဲ ဘော ဟာဝ် ဘူင် ဂါန် မာဆေ။း ဒူအီ အီ ဟဲ့ ကာဝေ မဲ တီ၊ တဲး ဇဝ်ဖြာ မွင့်ကာရာ တဲး ဒီ အန်။” နာင် ရူထာ ဘော ဝီ ကာလာင် လွင် ဒူအီ တွိုန် အီ မုး ဒါ ကာညာ ဒူင် ဟာဝ် ဘူင် အန် ဂါန်၊ တဲး ဂိုန့် အန် နပ်။ အန် တဝ်း၊ “ဒူင် ဟာဝ် ဘူင် ရိုမ် အုဝ် ဂါန် အာတိုဝ် နီ၊ န့ မိုဝ်း အီမာယ် အူ ဝီ၊ အန် စိူဝ် အာဘုဝ်အာပ်။”

20 နာင် အုဝ်မီ ဝီ တဝ်း ဒီ အဝ် အန်၊ “တဲး ဇဝ်ဖြာ မွင့်ကာရာ တဲး ဒီ ဒူအီ ဝီ တီ။ ဇဝ်ဖြာ နပ် ဒီ ဘူင် ပီ ဒွိုမ် ဒွါ အန် ကာဒိက် ဆတ်ဇာ ဒီ ဒူအီ အိမ် ဘော ဒီ ဒူအီ ယမ်။” ဟဲ့ ဟွတ့်၊ နာင် အုဝ်မီ ပီ ဝီ တဝ်း၊ “ဒူအီ ဝီ တီ မုး ဝေါဝဲ ကာချြီ့ ဒီ အုဝ်။ အန် ဘော မုး ဒါ အီ ကာအာပ် ယွတ် မဲန် အာယ်။”

21 နာင် ရူထာ အီ မုး ဒူအီ အာမျုဝ် မုဝ်အာပ် ပီ ဝီ တဝ်း၊ “အိုဝ်၊ ဟဲ့ မှာန်၊ ဒူအီ ဝီ တီ၊ အန် ဟဲ့ တဝ်း ဒီ အုဝ်၊ ‘တဲး မဲ ဂဲပ် ကာယူင့် ငှုဝ် ဒူပ် ဂေ ဒဲစေန့် အုဝ်၊ တဲး ဂေ ကော ဟွတ့် တူတ့် ဆုဝ့် ငှုဝ် နီ။’”

22 ဟဲ့ ဟွတ့်၊ နာင် အုဝ်မီ ဝီ တဝ်း ဒီ နာင် ရူထာ၊ “အိုယ် မဲ ဂွန် အုဝ်၊ တဲး မဲ ဘူင် ဂါန် ဒူပ် ဂေ ဂွန် အီဘိုန့် အီ မုး ဒဲစေန့် အန်။ အာဝ် လုဝ် ဟာဝ် ခဲင် ဒူင် နာ အီ ဟဝ်၊ ယုဝ် ဂေ ဘူင် နာ တူ မွှိုမ် ဒီ မဲ။”

23 ပါယ် တီ အန် ဘဲန် ဂိုက် ဂေ အီဘိုန့် အီ မုး ဒဲစေန့် အာဘုဝ်အာပ် တွိုန်။ အန် ဘော ဂဲပ် ကာယူင့် ငှုဝ် အီ စုဝ်း အီ ရး၊ တဲး ဂေ ကော ဟွတ့် တူတ့် ဆုဝ့် ငှုဝ် ဘာလီ ဂါယ် ခဝ်ချုင်။ အန် ဘော ကွယ် ရိုမ် ဒူပ် ဂိုန့် အန် ပါယ် တီ။