1 ခါ အာတ့် န့ မိုဝ်း ဒါ တာင် အီ ဆုင်ဖျာတ် ဒါရာ ခဲင် မိူင် အီဆာရေလ။ ဒေါ အန် တီ ဒူအီ အီ ကွယ် ခဲင် မိူင် တီ၊ ဂေ ဘော အေတ့် ပီ ဒီ ဟူမ်။ န့ ဘော မိုဝ်း ဒူအီ အူ ဝီ အီ ကွယ် မိူင် ဘေတ်လဲမ် ခဲင် ကာဒါယ် မိူင် ယူဒါ။ အန် ဘော ယူင့် ဘော အီဘိုန့် ဘော ဂွန် အီမာယ် အန် အာ ဝီ၊ တဲး ဂေ ဟာဝ် ကွယ် ဒီ မိူင် မုဝ်အာပ်။ 2 ဂုန့် ဂေ စိူဝ် အာအေလီမာလေက်။ အီဘိုန့် အန် စိူဝ် နာင် အုဝ်မီ။ ဂွန် အန် အာ ဝီ စိူဝ် အာမာဟာလူန် ဂါယ် အာခီလူန်။ ဂေ မုး ဒူအီ အာမျုဝ် အေဖာရာတ် အီ ကွယ် ခဲင် မိူင် ဘေတ်လဲမ် ခဲင် ကာဒါယ် မိူင် ယူဒါ တွိုန်။ ဂေ ဘော ဝီ ဟာဝ် ဒီ မိူင် မုဝ်အာပ်၊ တဲး ဂေ ကွယ် ဒီ တီ။

3 အာအေလီမာလေက် တွိုန် ဘော ယမ်၊ တဲး န့ ဂိတ် မီ နာင် အုဝ်မီ ဂေ ဂွန် အီမာယ် အန် အာ ဝီ။ 4 ဂွန် အန် ဂါယ် တွိုန် ဘော ခတ်၊ ဒိုဝ်း အီဘိုန့် အီ မုး ဒူအီ မုဝ်အာပ်။ အူ ဝီ စိူဝ် နာင် အောရာဘာ၊ ပေါ အူ ဝီ စိူဝ် နာင် ရူထာ။ ဂေ ဘော ကွယ် ခဲင် မိူင် တီ အာဒါ ဂိုဝ် ဆီနမ်။ 5 ဟဲ့ ဟွတ့်၊ အာမာဟာလူန် ဂါယ် အာခီလူန် တွိုန် ဘော ဝီ ယမ်။ နာင် အုဝ်မီ အာဝ် ဟူ မိုဝ်း အီမာယ် ဂေ ဂွန်။

6 ဝါယ် အန် တီ နာင် အုဝ်မီ ဟဲ့ ယိုဝ် လွင် ဇဝ်ဖြာ ဟဲ့ ဝီ ကာဝေ ဂေ ဒူအီ အာမျုဝ် ယူဒါ၊ ဟဲ့ တဲး ဂေ ဝီ မိုဝ်း ပီ ဒီ ဟူမ်။ ခုဝ်၊ နာင် အုဝ်မီ ဘော အဝ် အန် အာ ဝီ တွိုန်၊ ဂေ ဝီ တဝ်း ဒီ လေး ခဲင် မိူင် မုဝ်အာပ်။ 7 ဘော အန် ဘော အဝ် အန် ဝီ လေး ခဲင် မိူင် မုဝ်အာပ်၊ တဲး ဂေ ဝီ ဇမ် ခဲင် မိူင် ယူဒါ။

8 ဒေါ ဟာဝ် ဂေ ဒူပ် န့တေန့် တီ၊ နာင် အုဝ်မီ ဘော ဝီ ကာလာင် ဒီ အဝ် အန် တဝ်း၊ “တဲး ဘာယ် ကွယ် ဒီ ကာင် ဘြိမ် ဘာယ်၊ ကွယ် ရိုမ် ဒူပ် ဂုန့် မာ ဘာယ်၊ တဲး ဇဝ်ဖြာ ဘော ကာဝေ ဘာယ်၊ တဲး န့ ပီ ပဲ့ ဟဲ့ ဒွိုမ် ကာဝေ ဘာယ် ဒီ အုဝ် ဘော ဂေ အီ ဟဲ့ ဟွတ့် ယမ်။” 9 တဲး ဇဝ်ဖြာ တဲး ဘာယ် ဝီ ဒဲ န့ဟူမ် ကာမာယ်၊ တဲး ဘာယ် ပွိုန် ဒီ ကွယ် ဒါခိုယ်။

ဟဲ့ ဟွတ့်၊ အန် ဘော အုး ဂါယ်။ ဂါယ် မိူဝ် ယာမ်။ 10 ဂါယ် ဝီ တဝ်း ဒီ အန်၊ “ယာယ် မိူဝ် ဆီ ဟာဝ် ရိုမ် ဒူပ် မဲ၊ ဟာဝ် ဒူင် ကွယ် ဝေါဝဲ မဲ။” 11 နာင် အုဝ်မီ ဝီ တဝ်း၊ “ဂွန် ဘာယ် အိုယ်၊ မှဝ် န့ ပါယ် ပီ ဆီ ဟာဝ် ဘာယ် ဒူပ် အုဝ်။း အုဝ် အာဝ် ဟူ မိုဝ်း ဂွန် အီ ပွိုန် ဝီ ဘဲန် အီမာယ် ဘာယ်။ 12 ဂွန် ဘာယ် အိုယ်၊ တဲး ဘာယ် ဝီ ဝေန့်။ အုဝ် ဟဲ့ ကတ်၊ အာဝ် ဟူ ခမ် ဒီ ဝီ ဒိုဝ်း အီမာယ် ပေါ အူ ဝီ။ 13 ဆေ အုဝ် ပီ ဘော ဒိုဝ်း အီမာယ် အာတိုဝ်၊ ဆေ အုဝ် ပီ ဘော မိုဝ်း ဂွန် အီမာယ် အာ ဝီ၊ ဘာယ် ဒီ ဘော ခမ် ဒီ ဘ်ု တဲး ဂွန် အုဝ် တီ ကော ဝီ တာင်၊ တဲး ဂါယ် ဝီ ဘဲန် အီမာယ် ဘာယ်။း ဘာယ် ဒီ ဘော ခမ် ဒီ ဘ်ု၊ တူ ဒိုဝ်း အီမာယ် အီ ဟဝ်။း ဂွန် ဘာယ် အိုယ်၊ အာဝ် ပွိုန် ဘဲန် ပါယ် တီ။ န့ ဟဲ့ ညှာပ် ကာဆဝ် ဒီ နဝ်း အုဝ် ကူပ် ဘာယ်။ ခုဝ်၊ ဇဝ်ဖြာ ဟဲ့ တဲး အုဝ် ခမ် ဒုက် တီ။”

14 ဟဲ့ ဟွတ့်၊ ဂေ ဘော ဝီ ယာမ် ပေါ န့ ပွါ။ အီ မုး နာင် အောရာဘာ တွိုန် ဘော အုး ဂိုန့် အန် ဝီ ဝေန့် မိူင် ဘြိမ် အန်။ အီ မုး နာင် ရူထာ၊ အန် ဘော ဟာဝ် ဒူပ် ဂိုန့် အန်။

15 နာင် အုဝ်မီ ဝီ တဝ်း ဒီ နာင် ရူထာ၊ “မဲ ယွတ် မာအာန် မဲ၊ အန် ဟဲ့ ဝီ ဝေန့် ဒူင် ကွယ် ဘီနွင် ဝေါဝဲ အန်။ အန် ဘော ဝေန့် ကြိုပ် ဇဝ် ပီ ဒွိုမ် ကြိုပ် အန်။ တဲး ဘော မဲ ဝီ ဝေန့် ဒူပ် မာအာန် မဲ။”

16 နာင် ရူထာ ဝီ တဝ်း၊ “မဲ ဂိုန့်၊ မဲ ကွဲ့ ခြဲ အုဝ် ဟာဝ် ဒူပ် မဲ။ အုဝ် တူ ခမ် ဒီ ဘ့လေး မဲ အူ ဝီ ဟာဝ်။ မဲ ဘော ဟာဝ် နာ မှဝ်၊ အုဝ် မိူဝ် ဒီ ဟာဝ် ဒူပ် မဲ။ မဲ ဘော ကွယ် ဒီ မှဝ်၊ အုဝ် မိူဝ် ဒီ ကွယ် ဒီ တီ။ ဒူအီ အာမျုဝ် မဲ ဟဲ့ ဘဲန် ဒူအီ အာမျုဝ် အုဝ်။ ဇဝ်ဖြာ ပီ ကြိုပ် မဲ ဟဲ့ ဘဲန် ဇဝ်ဖြာ ပီ ကြိုပ် အုဝ်။ 17 မဲ ဘော ယမ် ဒီ မှဝ်၊ အုဝ် မိူဝ် ဒီ ယမ် ဒီ တီ၊ တဲး အီ ဘော ဒိပ် အုဝ် ဒီ တီ။ ဆေ အုဝ် ဟီ ဘူင် ဘဲန် မျုဝ် ဘဲန် မျုဝ် တဲး အုဝ် ပွိုန် ဒီ ကာယဝ်း ဒီ မဲ အာတ့် ယမ် အုဝ်၊ တဲး ဇဝ်ဖြာ ဒမ် မှာပ် ကာဆဝ် ဒီ အုဝ်။” 18 ပန် တီ နာင် အုဝ်မီ ဟဲ့ နပ် ဆီချာ၊ အဝ် အန် အီ မုး နာင် ရူထာ၊ အန် ဟဲ့ ဆီ ဟာဝ် မှာန် ဒူပ် အန်။ အန် မိူဝ် အာဝ် ဟူ ဝီ တဝ်း မာဆေ။

19 ဟဲ့ ဟွတ့်၊ ဂါယ် ဘော ဟာဝ် ဒီ မိူင် ဘေတ်လဲမ်။ ဒေါ တး ဇမ် ဂါယ် ခဲင် မိူင် ဘေတ်လဲမ်၊ ဂေ ဒူအီ အီ ကွယ် ခဲင် မိူင် ဂေ ဘောကာဂ့လျီတ် ဘော ခူယ် ယွတ် ဂါယ်။ ဂေ လာယ် တဝ်း၊ “န့ နှဲန်၊ နာင် အုဝ်မီ ဟဲ့ တး။”

20 နာင် အုဝ်မီ ဝီ တဝ်း ဒီ ဂေ၊ “ဘေ ကွဲ့ ဟူ တဝ်း အုဝ် စိူဝ် နာင် အုဝ်မီ။ တဲး ဘေ တဝ်း နာင် မာရာ ဒီ အုဝ်။ ခုဝ်၊ အန် ဇဝ် အီ တာင် လွှိုမ် တူတ့် ဟဲ့ ဘူင် တဲး န့ ဒုက် ကာဆဝ် ဒီ အုဝ်။ 21 အုဝ် ဟဲ့ မိုဝ်း ဇေ့ဇုင် တူတ့် ဒွန် မျုဝ် ဒေါ လေး အုဝ် ခဲင် မိူင် နီ။ ဒေါ တီ နီ အုဝ် ဝီ တး၊ အုဝ် အာဝ် ဟူ မိုဝ်း မာဆေ။ ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ တဲး အုဝ် ဇမ် ဒုက် ပါယ် တီ။ ခုဝ်၊ အာဝ် လုဝ် တဝ်း အုဝ် စိူဝ် နာင် အုဝ်မီ။”^a

22 ပါယ် တီ နာင် အုဝ်မီ ဂါယ် အဝ် အန် အီ စိူဝ် နာင် ရူထာ အီ မုး ဒူအီ မုဝ်အာပ် ဂါယ် ဝီ တး ဇမ် ခဲင် မိူင် ဘေတ်လဲမ် ဒေါ မုး အာခြာဝ် ဆုဝ့် ငှုဝ်။