1 ဒေါ တး ကာဇု ဂေ ဒူအီ အီဆာရေလ ဒီ မိူင် မီဇာဖာ တွိုန်၊ ဂေ ဘော ဒိူင် တဝ်း၊ “ကာတဲ အေ နီ န့ တူ မိုဝ်း အာဆေ ခေါ အူ ဝီ အီ တဲး ဂွန် ဒီဘျာ အန် ခတ် ဒိုဝ်း ဒူအီ အာဘေန်ယာမ်။”

2 ပါယ် တီ ခဲ့ ကွယ် ဂေ ဒူအီ အီဆာရေလ ဘောကာဂ့လျီတ် ဘော ဟာဝ် ဒီ မိူင် ဘေဒါအေန် ဘော ကွယ် နာ အာတ့် ဇဝ်ဖြာ ဘော ယာမ် တာင် ကာဆဝ် ဘော ငှုန် တဝ်း၊ 3 “အိုယ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် ယေ ဒူအီ အီဆာရေလ၊ မှဝ် န့ ပါယ် ပီ ဘဲန် ပါယ် နီ ဒီ ယေ။း အာတိုဝ် နီ၊ ဒူအီ ကာန်ု ယေ ဒူအီ အီဆာရေလ ဟဲ့ ဘျုဝ်း ဟဲ့ ဟြာယ် အာဒါ အူ ခြိုဝ်။”

4 န့ ဘော ဝီ ဇမ် ပန် ခဲညှာ ဆိန့် ဆိန့်ဝး ဝွင့်၊ ဂေ ဒူအီ အီဆာရေလ ဘော ယိတ့် ဘူင် ကာစှူင့်၊ တဲး ဂေ ပွိုန် ဒီ လှူ ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ အီ ကွယ် ကာဇု ဟူမ် ရိုမ်။

5 ပါယ် တီ ဂေ ဒူအီ အီဆာရေလ ဘော ဝီ လာယ် ဒီမွှတ် ကာန်ု ဂေ တဝ်း၊ “န့ ဆီ မိုဝ်း အာဆေ ခဲင် ခြိုဝ် ဒူအီ အီဆာရေလ အီ တူ တး ကာဇု ဒီ အာတ့် ဇဝ်ဖြာ ဒီ နီ။း” ခုဝ်၊ ဂေ ဟဲ့ ဟွတ့် ဒိူင် ဟဲ့ ဟွတ့် ကာဆဲန့် တဝ်း၊ “အာဆေ တူ တး ကာဇု ဒီ အာတ့် ဇဝ်ဖြာ ဒီ မိူင် မီဇာဖာ အာတိုဝ် နီ၊ န့ ကာအာပ် ယေ ဒီ ငဝ်း ဝဲန် အန်။”

6 ဟဲ့ ဟွတ့် ပါယ် တီ ဂေ ဒူအီ အီဆာရေလ ဘော ဝီ လှုဝ်း ဝါ ဂေ အီ မုး ဒူအီ ခြိုဝ် အာဘေန်ယာမ်။ ဂေ ဘော ဝီ လာယ် တဝ်း၊ “အာတိုဝ် နီ၊ ဒူအီ အီဆာရေလ ဟဲ့ ဟွတ့် စှိုမ် အာဒါ အူ ခြိုဝ်။

7 မှဝ် အေ ဒီ ပါယ် ဒီ ဝီ ဟြေတ့် အီဘိုန့်၊ ဝီ ဒွါ ဒီ ဂေ ဒူအီ အာဘေန်ယာမ် အီ ဆီ ဂိတ် အီ ဆီ အိမ် ဂေ တွိုန်။ ခုဝ်၊ အေ ဟဲ့ ဟွတ့် ဒိူင်၊ ဟဲ့ ဟွတ့် ကာဆဲန့် ဒီ အာတ့် ဇဝ်ဖြာ တဝ်း၊ ‘အေ တူ တဲး ဂွန် ဒီဘျာ အေ ခတ် ဒိုဝ်း ဂေ။’” 8 ဂေ ပီ ဝီ လာယ် ဒီမွှတ် တဝ်း၊ “ခဲင် ခြိုဝ် အေ ဒူအီ အီဆာရေလ၊ အာဆေ တူ တး ကာဇု ကြိုပ် ဇဝ်ဖြာ ဒီ မိူင် မီဇာဖာ နီ။း” ဟဲ့ ဟွတ့်၊ ဂေ ဘော ဝီ နပ် ဒူအီ အီ ကွယ် ခဲင် မိူင် ယာဘေတ်ဂီလေအာတ် တူ တး ကာဇု ခေါ အူ ဝီ ဒူပ် ဖိုင် ဂေ ဒူအီ ကိူန်။ 9 ခုဝ်၊ ဒေါ တိး ဂေ ဒူအီ ဘောကာဂ့လျီတ်၊ ဂေ ဒူအီ ခဲင် မိူင် ယာဘေတ်ဂီလေအာတ် အာဝ် မိုဝ်း ခေါ အူ ဝီ။

10 ပါယ် တီ ဂေ ဒူအီ ကိူန် ဘော စ်ု ဒါ ဆိုက် ဂေ အီ ယ ကာဂုဝ်း အူ မှိုန့် ဒီ အာ ဟြဲန့် ဝီ ဘော ကာလာင် ဒီ ဂေ တဝ်း၊ “တဲး ဘေ ဟာဝ် ကာဂုဝ်း၊ ဟာဝ် ငဝ်း ဝဲန် ဒူအီ ခဲင် မိူင် ယာဘေတ်ဂီလေအာတ် ဘော အီဘိုန့် ဘော အီမာယ် ဘော ဂွန်။ 11 ဘေ လုဝ် ငဝ်း ယမ် တူတ့် အီမာယ်။ ဘော အီဘိုန့် အီ တူ မုး ဒီဘျာ ဘေ လုဝ် ငဝ်း ဝဲန် တူတ့် ဒွန် အီ။” 12 ခဲင် မိူင် ယာဘေတ်ဂီလေအာတ် တွိုန်၊ ဂေ ဘော ယိုဝ် ဂွန် အီဘိုန့် အီ မုး ဒီဘျာ ဇဲတ် အာဒါ ဖွုန် မာယဝ်း ဝီ။ ဂေ ဘော ဝီ ဒိုဝ်း တး ဂေ တီ ဒီ မိူင် ဆီလုဝ် အီ ကွယ် ခဲင် ကာဒါယ် မိူင် ကာနန့် တွိုန်။

13 ဟဲ့ ဟွတ့်၊ ဂေ ဘော ဝီ စ်ု ဒူအီ ဟာဝ် ဒူင် ကွယ် ဂေ ဒူအီ အာဘေန်ယာမ် အီ ကွယ် ဒီ ဒါအာင် မာဝ် ရိမ်မူန် တွိုန်။ ဂေ ဘော ဝီ ကာလာင် တဲး ဂေ နပ်၊ ဒါ ဆိုက် အီ လာယ် ကာဂုဝ်း ဟဲ့ ဟွတ့် ယေန်။ 14 ဒူအီ အာဘေန်ယာမ် ဂေ တီ ဘော ဝီ တး။ ဂေ ဒူအီ အီဆာရေလ ဘော ဝီ ဒိုဝ်း ဒီဘျာ ပီ တူ ငဝ်း ယမ် ဂေ ခဲင် မိူင် ယာဘေတ်ဂီလေအာတ် တွိုန်၊ ဝီ အာပ် တဲး န့ ဘဲန် အီဘိုန့် ဂေ ဒူအီ အာဘေန်ယာမ် တီ။ မာလဲ၊ ဒီဘျာ ဂေ တီ ယီ တူ ဂြုဝ် တူ ဂ့လိုမ် အာဒါ ဂေ ဒွန် အီ။

15 ဂေ ဒူအီ ကိူန် ဘော ဝီ ကာဝေ ဒူအီ အာဘေန်ယာမ် ဂေ တီ။ ခုဝ်၊ ဇဝ်ဖြာ ဟဲ့ ဘူင် တဲး ခြိုဝ် ဒူအီ အီဆာရေလ ဟြာယ် အာဒါ အူ ခြိုဝ်။ 16 ဂေ အီ မုး ဒါ တာင် အီ အိုပ် ဂေ ဒူအီ အီဆာရေလ၊ ဂေ ဘော ဝီ လာယ် ကာမွုန် တဝ်း၊ “ကူပ် ဟဲ့ ဟွတ့် ယမ် တူတ့် အီဘိုန့် ဒူအီ ခြိုဝ် အာဘေန်ယာမ်၊ မှဝ် အေ ဒီ ပါယ် ဒီ ဝီ ဟြေတ့် အီဘိုန့်၊ ဒွါ ဒီ ဂေ အီ ဆီ အိမ် နီ။း 17 ဂေ ဒူအီ အာဘေန်ယာမ် လုဝ် မိုဝ်း ဂွန် အီ ဒီ ဝီ ပ့လု ဂေ။ ကွဲ့ တဲး ဒူအီ အာမျုဝ် အီဆာရေလ ဂိုဝ် ဒီ အာ ခြိုဝ် တွိုန် မိုဝ်း ခြိုဝ် အီ ဟြာယ် အီ ဘျုဝ်း။ 18 အေ ယီ တူ ပွိုန် ဒိုဝ်း ဂွန် ဒီဘျာ အေ၊ ဒွါ ဒီ ဂေ။ ခုဝ်၊ အေ ဒူအီ အီဆာရေလ ဟဲ့ ဟွတ့် ဒိူင်၊ ဟဲ့ ဟွတ့် ကာဆဲန့် တဝ်း၊ ‘အာဆေ ဟီ ဒွါ ဂွန် ဒီဘျာ အန် ဒီ ဒူအီ ခြိုဝ် အာဘေန်ယာမ်၊ အန် ဒီ လုဝ် ခမ် ကာဆမ် ဒိူင်။’” 19 ဂေ ဝီ ဇေန့်ဇာ တဝ်း၊ “ယွတ်၊ ဒွန် ဆီနမ် အေ ဘော ဒွိုမ် ဘူင် ဘ့လွယ် လှူ ဒီ ဇဝ်ဖြာ ဒီ မိူင် ဆီလုဝ်။ ဆီငဲ ဘ့လွယ် မိူဝ် ဟဲ့ ဟွတ့် ကာတတ် ဒီ ဇမ်။” မိူင် ဆီလုဝ် တီ၊ န့ ဘော ကွယ် နာ ကွာ မိူင် ဘေဒါအေန် ဘော နာ တေတ့် မိူင် လေပေါနာ ဘော ကွယ် နာ လေး ဆီငဲ န့တေန့် အီ တး ဒီ မိူင် ဘေဒါအေန်၊ ဝီ ဟာဝ် ဒီ မိူင် ဆေခေမ် တွိုန်။

20 ဂေ ဘော ဝီ ကာလာင် ဒီ ဒူအီ ခြိုဝ် အာဘေန်ယာမ် တဝ်း၊ “တဲး ဘေ ဟာဝ် ဘ်ု ခဲင် မာန် မာငုန်။ 21 ဆေ ဂွန် ဒီဘျာ ခဲင် မိူင် ဆီလုဝ် ဟီ တး ဂါ ခဲင် ဘ့လွယ် တီ၊ တဲး ဘေ တး မှေတ့် ဂေ ဘဲန် အီဘိုန့် ဘေ။ တဲး ဘေ ဝီ ဒိုဝ်း ဝေန့် ဂေ ခဲင် မိူင် ဘေ၊ တဲး ဂေ ဘဲန် အီဘိုန့် ဘေ ဝီ မှဝ် ဝီ အန်။ 22 ဆေ ဂုန့် ဂေ ဘော အီကတ် ဝါ ဂေ ဘော ဝီ တး ကာလာင် လွင် ပီ တူ အိုင် ဂေ၊ ယေ ဒီ ဝီ ကာလာင် ဒီ ဂေ တဝ်း၊ ‘မှာန့်၊ တဲး ဘေ စွယ် ဂေ။ ဒေါ လာယ် ကာဂုဝ်း ယေ တွိုန်၊ ယေ တူ မိုဝ်း ဒီ ဒွါ အီဘိုန့် ဒီ ဂေ ဒွန် အီ။ ဘေ မိူဝ် တူ မိုဝ်း ဒီ ဒွါ ဂွန် ဒီဘျာ ဘေ ဒီ ဂေ။ ပါယ် တီ ဘေ တူ မိုဝ်း ဒီ ဘူင် မှာပ် အီ လှိုဝ် ပဲ့ ဟဲ့ ကာဆဲန့် ဘေ။’”

23 ဂေ ဒူအီ အာဘေန်ယာမ် တွိုန် မိူဝ် ဘူင် ဒူပ် ပီ ကာလာင် ဂေ တီ။ ဂေ မိူဝ် မှေတ့် ဂွန် ဒီဘျာ ဒေါ တး ဂါ ဂေ ခဲင် ဘ့လွယ် ဒီ မိူင် ဆီလုဝ် တွိုန်၊ တဲး ဂေ ဘဲန် အီဘိုန့် ဂေ၊ ဝီ မှဝ် ဝီ အန်။ ဟဲ့ ဟွတ့်၊ ဂေ ဘော ဝီ ဝေန့် ဒူင် ကွယ် ဂေ အီ မုး ခါဂုန် ဂေ။ ဂေ ဘော ဝီ မ့ပြာယ် မာန် မိူင် ဂေ တီ၊ ဝီ ကွယ် ဒီ တီ။

24 ဂေ ဒူအီ အီဆာရေလ မိူဝ် ဘော ဝီ လေး ဒီ တီ၊ ဝီ ဝေန့် ဒူင် ကွယ် ဂေ အီ မုး ခါဂုန် ဂေ ခြိုဝ် မှဝ် ခြိုဝ် အန်၊ ကာင် အာဆေ ကာင် အန်။

25 အာခြာဝ် ဒေါ အန် တီ ဂေ ဒူအီ အီဆာရေလ တူ မိုဝ်း ခုန်ဒီခမ်။ ဒွန် အီ မိူဝ် ဘူင် ခဲ့ လဝ့် နဝ်း အန်။