1 ဝါယ် အန် တီ ခဲ့ ကွယ် ဒူအီ အီဆာရေလ ဘောကာဂ့လျီတ်၊ စုး ဒီ မိူင် ဒါန် ကော ဝီ ဇမ် ဒီ မိူင် ဘီရာဆေဘာ ဘော ဒူအီ ခဲင် ကာဒါယ် မိူင် ဂီလေအာတ်၊ ဂေ ဘော တး ကာဇု ဒီ အာတ့် ဇဝ်ဖြာ ခဲင် မိူင် မီဇာဖာ၊ ဘဲန် အူ ဖိုင်။ 2 ဂေ အီ မုး ဒါ တာင် ခဲင် ဖိုင် ဒူအီ အီဆာရေလ ဒွန် ခြိုဝ်၊ ဂေ မိူဝ် တး ကာဇု ဒူပ် ဂေ ဒူအီ ပီ အိုပ် ဇဝ်ဖြာ ဘောကာဂ့လျီတ်။ န့ ဘော မိုဝ်း ဒါ ဆိုက် အီ ဟာဝ် ဒီ ပ့လဝ် အာဒါ ဖွုန် ဆဲန့် ဝီ။ ဂေ ဒွန် အီ ဂူင့် မာပွါ့ လာင် ဂေ။ 3 ဒေါ အန် တီ ဂေ ဒူအီ ခြိုဝ် အာဘေန်ယာမ် ဘော ဝီ ယိုဝ် လွင် ဂေ ဒူအီ အီဆာရေလ ဟဲ့ တး ကာဇု ဒီ မိူင် မီဇာဖာ တီ။ ဂေ ဒူအီ အီဆာရေလ ဘော ဒီမွှတ် ဒူအီ အာလေဝီ တဝ်း၊ “တဲး မဲ ကာလာင် ဒီ ယေ၊ မှဝ် န့ ပါယ် ပီ နပ် ဒီ ဘုဝ် ဘဲန် အာမူ အီ ဟာယ် ကာဆဝ် တီ။း”

4 ဒူအီ အာလေဝီ အီ မုး အီမာယ် အီဘိုန့် အီ ဟဲ့ ယမ် တွိုန်၊ အန် ဘော ကာလာင် တဝ်း၊ “ဘော အုဝ်၊ ဘော အီဘိုန့် တျီ့ အုဝ် ဟဲ့ တး ဇမ် ဒီ မိူင် ဂီဘီယာ ခဲင် ကာဒါယ် ဒူအီ ခြိုဝ် အာဘေန်ယာမ်။ ယေ ဘော တဝ်း ဒီ ဝဝ့် တမ် ဒီ တီ ခေါ အူ မှိုဝ်။ 5 ခဲင် မှိုဝ် တီ၊ ဂေ အီမာယ် ခဲင် မိူင် တီ ဘော တး တဝ်း ဒီ ငဝ်း ယမ် အုဝ်။ ဂေ ဟဲ့ တး ရူပ် ကာင် တီ။ ဂေ ဘော ဝီ ဘူင် နာ တူ မွှိုမ် ဒီ အီဘိုန့် တျီ့ အုဝ်၊ တဲး အန် ကော ယမ်။ 6 အုဝ် ဘော ဒိုဝ်း ဒုဝ် ယမ် အီဘိုန့် တျီ့ အုဝ် တီ၊ ဝီ ကာဒဲပ် ဘဲန် ပွတ် ဘဲန် ပွတ်၊ ဝီ တိုယ် ဟာဝ် ဒီ ဒူင် ကွယ် ဒူအီ အီဆာရေလ ဒွန် နာ ဒွန် ပ့လုဝ့်၊ တဲး ဒွန် အီ နပ်၊ ဂေ ဟဲ့ ဘူင် နာ ဟာယ် နာ မိူက်၊ ဘူင် အီ မွှိုမ် ကာအိး ခဲင် ကာဒါယ် မိူင် အီဆာရေလ အီ မုး ခါဂုန် ပီ ဒွါ ဇဝ်ဖြာ ဒီ အေ။ 7 ပါယ် တီ ဘေ အီ မုး ဒူအီ အီဆာရေလ ဘောကာဂ့လျီတ်၊ တဲး ဘေ လာယ် ဆင်ချာင် ဘော ဆုင်ဖျာတ် အာမူ တီ ဒေါ တီ နီ။”

8 ခဲ့ ကွယ် ဒူအီ ဘောကာဂ့လျီတ်၊ ဂေ ဒွန် အီ ဘော တဝ်း၊ “ခဲ့ ကွယ် ဖိုင် အေ အာဝ် ဟူ လုဝ် ဝီ ဝေန့် ဒီ ကာင် အေ၊ အာဝ် လုဝ် ဝီ ဝေန့် ဒီ ကာင် အေ ခေါ အူ ဝီ။ 9 အေ ဒီ ဘူင် ပါယ် နီ။ အေ ကာတာမ် ဘော ဘူင် ဒူပ် ခဲ့ လေး ပီ ကာတာမ် အေ တီ ဒေါ ဟာဝ် အေ ကာဂုဝ်း ဒီ ဒူအီ ခဲင် မိူင် ဂီဘီယာ တီ။ 10 ကာန်ု ဒူအီ အီဆာရေလ ဘောကာဂ့လျီတ်၊ ဆေ န့ မိုဝ်း အူ မာယဝ်း ဝီ၊ လုဝ် ဒဲ့ ဂိုဝ် ဝီ။ ဆေ န့ မိုဝ်း အူ ဟြဲန့် ဝီ၊ လုဝ် ဒဲ့ အူ မာယဝ်း ဝီ။ ဆေ န့ မိုဝ်း အူ မှိုန့် ဝီ၊ လုဝ် ဒဲ့ အူ ဟြဲန့် ဝီ၊ တဲး ဂေ ဘဲန် အီ တိုယ် ပီ ဒီ ဟူမ် ဒါ ဆိုက်။ ဆေ ဂေ ဒါ ဆိုက် ဟီ ဇမ် ဒီ မိူင် ဂီဘာ အီ မုး ကာဒါယ် ခြိုဝ် အာဘေန်ယာမ်၊ ဂေ လုဝ် ဘူင် ဝျီ့ အီ ဟာယ် အီ မိူက် ပဲ့ ဟဲ့ ဘူင် ဂေ ခဲင် မိူင် အေ ဒူအီ အီဆာရေလ။” 11 ပါယ် တီ ခဲ့ ကွယ် ဒူအီ အီဆာရေလ ဘောကာဂ့လျီတ် ဟဲ့ ဘဲန် အူ နဝ်း အူ ဖွိုမ် ဘော တး ကာဇု၊ တဲး ဂေ ပွိုန် ဒီ ဟာဝ် တိုက် မိူင် ဂီဘီယာ တွိုန်။

12 ဒူအီ အီဆာရေလ ဒွန် ခြိုဝ် ဘော စ်ု ဒူအီ ဂေ ဟာဝ် ကာလာင် ဒီ ဒူအီ အာဘေန်ယာမ် ဒွန် နာ ဒွန် ပ့လုဝ့်၊ တဲး ဂေ ကာလာင် တဝ်း၊ “ဟဲ့ မှာန် အာခါခ်ု အာမူ ပဲ့ ဟဲ့ ဘူင် ဘေ ဟဲ့ မွှိုမ် ကာအိး ကာတ်ဆာ။ 13 ဒေါ တီ နီ၊ တဲး ဘေ ဒိုဝ်း ဒူအီ ခဲင် မိူင် ဂီဘီယာ အီ ဟဲ့ ဘူင် နာ တူ မွှိုမ် တီ၊ အာပ် ဒွါ ဒီ ယေ၊ တဲး ယေ ပွိုန် ဒီ ငဝ်း ဝဲန် ဂေ၊ တဲး ယေ ဒိုဝ်း ဝဲန် မှာပ် အီ ဟဲ ကာဆဝ် ခဲင် အာမျုဝ် ဒူအီ အီဆာရေလ။” မာလဲ၊ ဂေ ဒူအီ အာဘေန်ယာမ် တူ ညိုင်ရာင် ယိုဝ် ဂြုဝ်း ပီ ကာလာင် ဘီနွင် ဂေ အီ မုး ဒူအီ အီဆာရေလ တီ။

14 ပါယ် တီ ခဲ့ ကွယ် ဒူအီ အာဘေန်ယာမ် ဘောကာဂ့လျီတ် ခဲင် မိူင် ဒွန် မိူင် ဘော တး ကာဇု ဒီ မိူင် ဂီဘီယာ၊ တဲး ဂေ ပွိုန် ဒီ ကာဂုဝ်း ဒီ ဒူအီ အီဆာရေလ။ 15 ဆီငဲ တီ၊ ဂေ ဒူအီ အာဘေန်ယာမ် အီ တး ဒွန် ရဝ် ဒွန် မိူင်၊ ဂေ ဘော တိး ခဲ့ ကွယ် ဒါ ဆိုက် ဂေ အီ ဟဲ့ ဂူင့် မာပွါ့ လာင်။ ဂေ ကွယ် အာ မှိုန့် ဒီ ဒဝ် ဟြဲန့် ဝီ။ ခဲင် မိူင် ဂီဘီယာ တွိုန် မိူဝ် ဂေ ဟဲ့ ရဝ်း အီမာယ် ပေါ ဘူ မာယဝ်း ဝီ။ 16 ကာတဲ ဒူအီ ဂေ တီ ပဲ့ ဟဲ့ ရဝ်း ဂေ၊ န့ မုး ဒူအီ ဒဲ ဂ အာဒါ ဘူ မာယဝ်း ဝီ။ ဂေ ဘော မုး ဒူအီ အီ ဆာနုဝ်း ဒီ ပိုဝ့် မက်ကူင်၊ န့ ဒိူန် တူ ဘ့လိူင် ဒေါ မှဝ်။

17 ဒါ ဆိုက် ပဲ့ ဟဲ့ ဖိုက် ဆီချာ ဂေ ဒူအီ အီဆာရေလ အီ ဟဲ့ ဂူင့် မာပွါ့ လာင် ဒွန် အီ၊ ဂေ ကွယ် ဖွုန် ဆဲန့် ဝီ။ န့ ယီ တူ ဘာ ဒူအီ အာဘေန်ယာမ်။

18 ဂေ ဒူအီ အီဆာရေလ ဘော ဟုဝ့် ဒီ မိူင် ဘေဒါအေန်။ ဂေ ဘော ဒီမွှတ် ဇဝ်ဖြာ တဝ်း၊ “ခြိုဝ် မှဝ် အီ လုဝ် ဟာဝ် ကာဂုဝ်း ဒီ ဒူအီ အာဘေန်ယာမ် ဒီ အာတ့် အီ ဟဝ်။း” ဇဝ်ဖြာ ဝီ တဝ်း၊ “ခြိုဝ် အာယူဒါ အီ လုဝ် ယဲတ့် အီ ဟဝ်။”

19 ပါ ခဲညှာ ဆိန့် ဆိန့်ဝး စေဝ်၊ ဂေ ဒူအီ အီဆာရေလ ဟဲ့ ယိတ့် ဟာဝ်။ ဂေ ဘော ဟာဝ် ချ ခူပ် မိူင် ဂီဘီယာ တွိုန်။ 20 ဂေ ဟုဝ့် တဝ်း ဒီ ကာဂုဝ်း ဒီ ဒူအီ အာဘေန်ယာမ်။ ဂေ မိူဝ် ဟဲ့ တး ကွယ် လာယ် ကာဆိူဝ် ဒီ ဒူအီ အာဘေန်ယာမ် ဒီ ခူပ် မိူင် ဂီဘီယာ တွိုန်။ 21 ဂေ ဒါ ဆိုက် ဒူအီ အာဘေန်ယာမ် ဘော လေး ခဲင် မိူင် တွိုန်၊ တး ကာဂုဝ်း ဒီ ဒူအီ အီဆာရေလ အူ ဇေန့်။ ဆီငဲ တီ၊ ဂေ ဒူအီ အီဆာရေလ ဟဲ့ ကေး ယမ် အာဒါ အာ မှိုန့် ဒီ အာ ဟြဲန့် ဝီ။ 22 ပါယ် တီ ဂေ ဒူအီ အီဆာရေလ ဘော လာယ် ကာလာင်၊ ကွဲ့ တဲး ဂေ ယုဝ်။ ဂေ ဝီ ခြိုင် ဒီ ကာဂုဝ်း ပီ ခါ အာတ့်။ 23 ဂေ ဘော ဟာဝ် ဒီ ဒူင် ကြိုပ် ဂေ ဒီ ဇဝ်ဖြာ။ ဂေ ဘော ဝီ တး ယာမ် ဒီ အာတ့် ဇဝ်ဖြာ၊ တဲး န့ ကော ဇမ် ဘာ ဒီ အပ်။ ဂေ ဘော ဝီ ဒီမွှတ် ဇဝ်ဖြာ တဝ်း၊ “ယေ ဆီ ဒီ ပွိုန် ဟာဝ် ကာဂုဝ်း ဒီ ဘီနွင် ယေ အီ မုး ဒူအီ အာဘေန်ယာမ် ပေါ အူ ဇေန့်။း” ဇဝ်ဖြာ ဝီ တဝ်း ဒီ ဂေ၊ “တဲး ဘေ ဟာဝ်။”

24 ဂေ ဒူအီ အီဆာရေလ ပီ ဝီ ဟုဝ့် ကာဂုဝ်း ဒီ ဒူအီ အာဘေန်ယာမ် ပေါ အူ ဇေန့်။ 25 ဆီငဲ တီ မိူဝ် ဂေ ဒါ ဆိုက် ဒူအီ အာဘေန်ယာမ် ဘော လေး တး ခဲင် မိူင် ဂီဘီယာ တွိုန်၊ ဘော ကာဂုဝ်း ဒီ ဂေ ဒါ ဆိုက် ဒူအီ အီဆာရေလ အီ ကျ ဒီ ကာဂုဝ်း၊ ဂေ ဘော ငဝ်း ဒူအီ အီဆာရေလ အူ မှိုန့် ဒီ ဒါ ဟြဲန့် ဝီ အီ ဟဲ့ ဂူင့် မာပွါ့ လာင် ဒွန် အီ။

26 ခဲ့ ကွယ် ဂေ ဒူအီ အီဆာရေလ ဘော ဝီ ဝေန့် တူတ့် ဒီ မိူင် ဘေဒါအေန် တွိုန်။ ဂေ ဘော ဝီ တး မုတ် ဂိုပ် ဒီ အာတ့် ဇဝ်ဖြာ ဘော ယာမ်။ ဂေ ဘော ယိူန် ပီ ဒီ ဟူမ် ဆီငဲ တီ ကော ဇမ် ဘာ ဒီ အပ်။ ဂေ ဘော လှူ ဘော ဒုဝ် ဆတ် အီ ဘဲန် ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ အီ ကွယ် ကာဇု ဟူမ် ရိုမ် ဒီ အာတ့် ဇဝ်ဖြာ။ 27 အာခြာဝ် ဒေါ အန် တီ ဇီဒိူက် ဇဝ်ဖြာ ဆီ ကွယ် ဒီ မိူင် ဘေဒါအေန်။ ဘော အာဖီနေဟာတ် အီ မုး ဂွန် အာလေအာဆာ ဘော လှာန် အာရူန် တွိုန်၊ အန် လိုမ်လာ ဇီဒိူက် ဇဝ်ဖြာ တီ။ ဂေ ဒူအီ ကိူန် ဘော ဝီ ဒီမွှတ် ဇဝ်ဖြာ။ 28 ဂေ တဝ်း၊ “ယေ ဆီ ဒီ ပွိုန် ဝီ ဟုဝ့် ကာဂုဝ်း ဒီ ဘီနွင် ယေ အီ မုး ဒူအီ အာဘေန်ယာမ် ပေါ အူ ဇေန့်။း” ဇဝ်ဖြာ ဝီ တဝ်း၊ “တဲး ဘေ ဟာဝ် ကာဂုဝ်း ခဲညှာ။ အုဝ် ဒီ တဲး ဘေ ပဲ ဂေ။”

29 ပါယ် တီ ဂေ ဒူအီ အီဆာရေလ ဘော တဲး ဒါ ဆိုက် ဂေ မင် အီ ချြီင် ဂေ၊ ဘ်ု ခူပ် မိူင် ဂီဘီယာ တွိုန်။ 30 ဘော ဇမ် ဆီငဲ ဟာအူယ်၊ ဂေ ဒူအီ အီဆာရေလ မိူဝ် ဟုဝ့် ဒီ မိူင် ဂီဘီယာ ပီ ဆီငဲ အာတ့် တွိုန်။ 31 ဂေ ဒူအီ အာဘေန်ယာမ် ဘော လေး ခဲင် မိူင် ဂေ၊ တး ကာဂုဝ်း ဒီ ဒူအီ အီဆာရေလ အူ ဇေန့်။ ဂေ မိူဝ် ဟဲ့ ဟာဝ် ရာမ် ကာတူင့် ဒီ မိူင် ဂေ၊ ဂေ ဘော ငဝ်း ယမ် ဒူအီ အီဆာရေလ မွက် အူယ် ဂိုဝ် ဝီ ဒီ ကာယဝ်း န့တေန့် အီ ဟာဝ် ဒီ မိူင် ဘေဒါအေန် ဂါယ် မိူင် ဂီဘီယာ။

32 ဒူအီ အာဘေန်ယာမ် ဂေ တွိုန် ထာင် ခဲင် နဝ်း ဂေ တဝ်း၊ “ယေ ဒီ ပဲ ဂေ ပီ ဆီငဲ အာတ့် တွိုန်။” ဂေ ဒူအီ အီဆာရေလ ဘော ဝီ လာယ် ကာလာင် တဝ်း၊ “တဲး အေ ဝီ ဝိဝ်၊ တဲး အေ ညဝ့် ဂေ၊ တဲး ဂေ ဟာဝ် ရာမ် တူင့် ဒီ မိူင် ဘော တး ကာဇု ဒူပ် န့တေန့် နီ။”

33 ပါယ် တီ ဂေ ဒါ ဆိုက် ဒူအီ အီဆာရေလ ဘော ဝီ ဝိဝ် နာ ပန်၊ ဝီ ဟာဝ် ဒီ မိူင် ဘာလတမာ။ ဂေ အီ ဟဲ့ ချြီင် ဂေ တွိုန် မိူဝ်၊ ဝီ လေး တး ဒူင် ချြီင် ဂေ အီ ဟဲ့ ကွယ် နာ ဂေတ့် ဆီငဲ မိူင် ဂီဘာ တွိုန်။ 34 အီမာယ် အီ ကျ အီ မွှိုမ် အူ မှိုန့် ဝီ တွိုန် ပဲ့ ဟဲ့ ရဝ်း အုန် ဂေ ကာန်ု ဒူအီ အီဆာရေလ၊ ဂေ ဘော ကာဂုဝ်း ဒီ ဒူအီ ခဲင် မိူင် ဂီဘီယာ။ ဂေ ဘော ကာဂုဝ်း ကာဆဝ် ဆီငဲ တီ။ ပီ ဘော ဟဲ့ ပါယ် တီ မိူဝ်၊ ဂေ ဒူအီ အာဘေန်ယာမ် ယီ ညှမ် နပ် ဟဲ့ ဇမ် ပန် ဒီ စှိုမ် ဂေ။ 35 ဆီငဲ တီ ဇဝ်ဖြာ ဘော တဲး ဂေ ဒူအီ အီဆာရေလ ပဲ ဒူအီ အာဘေန်ယာမ်။ ဂေ ဒူအီ အီဆာရေလ ဘော ကာဂုဝ်း ဘော ငဝ်း ယမ် ဒူအီ အာဘေန်ယာမ် အီ ဟဲ့ ဂူင့် မာပွါ့ လာင် ဒွန် အီ အာဒါ အာ မှိုန့် ဒီ ဖန် ဟြဲန့် ဒီ အူ မာယဝ်း ဝီ။

36 ဟဲ့ ဟွတ့် ပါယ် တီ ဂေ ဒူအီ အာဘေန်ယာမ် ကော ဝီ နပ်၊ ဂေ ဟဲ့ စှိုမ်။ ဂေ ဒူအီ အီဆာရေလ အီ ဟဲ့ တဝ် ဝိဝ် ဒီ ဂေ ဒူအီ အာဘေန်ယာမ် တွိုန်၊ ဂေ မိူဝ် ဟဲ့ နဝ်း တာင် ဒီ ဂေ ဒူအီ အီဆာရေလ အီ ဟဲ့ ချြီင် ဟဲ့ ဘ်ု ခူပ် မိူင် ဂီဘီယာ တွိုန်။ 37 ဂေ ဒူအီ အီ ဟဲ့ ချြီင် ဂေ တီ၊ ဂေ ဘော လေး တး ဘော ကာဘ့လဲပ် လိုပ် ဟာဝ် ခဲင် မိူင် ဂီဘီယာ ခြန် ခြန်။ ဂေ ဘော ကာယဝ်း ဒူအီ ဂေ၊ တဲး ဂေ ဇမ် ဒွန် ကာတုဝ့် ကာတျီမ်။ ဂေ ဘော ဂုဝ်း ဘော ဒဲပ် ယမ် ဒူအီ ခဲင် မိူင် ဘော မိူင်။ 38 ဂေ ဒူအီ အီဆာရေလ ဘော ဂေ ဒူအီ အီ ဟဲ့ ချြီင် ဂေ တွိုန်၊ ဂေ ဟဲ့ လာယ် ဖြူမ် ဒီ ဒုဝ့် ငဝ် တာင် အီ ကုး စာ၊ တဲး ဂေ ယိုဝ် ဒက် ငဝ် အီ လေး ခဲင် မိူင် တွိုန်။

39 ဟဲ့ ဟွတ့်၊ ဂေ ဒူအီ အီဆာရေလ အီ ဟဲ့ တဝ် တွိုန်၊ ဂေ ဒီ ဘော နပ် ဒီ ဝီ ကာဘတ် တး ဒီ မိူင် ဂီဘီယာ။ မာလဲ၊ ဂေ ဒူအီ အာဘေန်ယာမ် ဟဲ့ စုး ဒီ ငဝ်း ယမ် ဒူအီ အီဆာရေလ မွက် အူယ် ဂိုဝ် ဝီ။ ကာန်ု ဂေ၊ ဂေ ဝီ လာယ် တဝ်း၊ “ဟဲ့ မှာန်၊ အေ ဒီ ဝီ ကာဂုဝ်း ပဲ ဂေ ပီ ပီ ဒွိုမ် ပဲ အေ ဒီ ဂေ အာတ့် နီ တွိုန်။” 40 ဒေါ အန် တီ န့ ဘော မိုဝ်း ဒက် ငဝ် ကာစုး ဒီ လေး တး ခဲင် မိူင် တွိုန်။ ဂေ ဒူအီ အာဘေန်ယာမ် ဘော ဝီ ကာဘတ် ယွတ် နာ ပန် ဘော ယိုဝ် ပ့လဲ့ ငဝ် ဟဲ့ ဇမ် ဂါင်ဟြာဝ်၊ ဟဲ့ ကာဆိုမ် မိူင် ဂေ။ 41 ဂေ ပီ ဝီ ယိုဝ် ဘော ဂေ ဒူအီ အီဆာရေလ ဟဲ့ ဝီ ကာဘတ် ညိူဝ် ဂေ။ ဂေ ဘော ကာပိုန့် ကာဆဝ်။ ဒေါ အန် တီ ဂေ မိူဝ် ဟဲ့ ဝီ နပ်၊ ဂေ ဟဲ့ ဟွတ့် စှိုမ်။ 42 ပါယ် တီ ဂေ ဘော ဝီ တဝ် ဒူအီ အီဆာရေလ၊ ဝီ ထေဝ် ဒီ ဟာဝ် ခဲင် ပြဲ ကာဟဝ်း။ မာလဲ၊ ဂေ ယီ တူ လွတ် အီ ကာဂုဝ်း ဒီ ဂေ။ ခုဝ်၊ ဂေ ဟဲ့ စုဝ်း ဒီ ကာတဲ ဒူအီ အီဆာရေလ အီ ဝီ လေး တး ခဲင် မိူင် ဘဲန် မိူင်။ ဂေ ဘော ခမ် ဒုက် တာင် ကာဆဝ်။ 43 ဂေ ဒူအီ အီဆာရေလ မိူဝ် ဝဲင် ရူပ် ရန်ဆူ ဂေ၊ ဂေ မိူဝ် တူ ဂိူတ် တူ ဒီလှဝ်။ ဂေ ဘော ခုင်ခြး ဒူအီ အာဘေန်ယာမ် ကော ဇမ် ဒူင် ဆိူတ် ကာဒါယ် ဘ့လာက် နာ လေး ဆီငဲ မိူင် ဂီဘီယာ တွိုန်။ ဂေ ဘော ငဝ်း ဘော ဒဲပ် ယမ် ဂေ ဒူပ် န့တေန့် တီ။ 44 ဒါ ဆိုက် ဒူအီ အာဘေန်ယာမ် အီ ကျ ဒီလူယ် ဘော ယမ် အာဒါ အူ မှိုန့် ဒီ ဒါ ဟြဲန့် ဝီ။ 45 ဂေ အီ ဆီ ဂိတ် ဆီ ကွယ်၊ ဂေ ဘော ဝီ ဝး ဟာဝ် ခဲင် ပြဲ ကာဟဝ်း ဒူင် ကွယ် ဒါအာင် မာဝ် ရိမ်မူန်။ ဒေါ ဟာဝ် ဂေ ဒူပ် န့တေန့် တီ၊ န့ မိုဝ်း ပေါ ဖန် ဟြဲန့် ဝီ အီ ဟဲ့ ယမ်။ ဂေ ဒူအီ အီဆာရေလ ဘော ခုင်ခြး ဂေ ကော ဇမ် ဒီ မိူင် ဂီဒူမ်၊ ပီ ဝီ ငဝ်း ယမ် ပေါ အာ ဟြဲန့် ဝီ။

46 ဆီငဲ တီ ဂေ ဒါ ဆိုက် ဒူအီ အာဘေန်ယာမ် အီ ကျ ဒီလူယ်၊ ဂေ ဟဲ့ ယမ် အာဒါ အာ မှိုန့် ဒီ ဖန် ဟြဲန့် ဝီ။ 47 န့ ဘော ဂိတ် အာဒါ ဒဝ် မာယဝ်း ဝီ အီ လွတ်။ ဂေ ဟဲ့ တဝ် ဟာဝ် ခဲင် ပြဲ ကာဟဝ်း ဒူင် ကွယ် ဒါအာင် မာဝ် ရိမ်မူန်။ ဂေ ဘော ကွယ် ဒီ တီ အာဒါ ဖွုန် မာဂျီန်။ 48 ဂေ ဒူအီ အီဆာရေလ ဘော ဝီ ဟာဝ် ဒူင် ကွယ် ဂေ ဒူအီ အာဘေန်ယာမ် အီ ဆီ ဂိတ် ဆီ ကွယ်။ ဂေ ဘော ငဝ်း ယမ် ဒွန် အီ ဘော ဒုဝ် ဆတ်ဒါဝါ ဂေ ဘော ဒိုဝ်း ငဝ်၊ ဒုဝ့် ဒွန် မိူင် ခဲ့ ပီ ယိုဝ် ဂေ။