1 အာခြာဝ် ဒေါ အန် တီ ဂေ ဒူအီ အီဆာရေလ တူ မိုဝ်း ခုန်ဒီခမ်။ န့ ဘော မိုဝ်း ဒူအီ အာလေဝီ အူ ဝီ။ အန် ကွယ် ဒီ ဒူင် ဆိူတ် နွန် အာအေဖာရိမ် တွိုန်။ အန် ဘော ဒိုဝ်း အီဘိုန့် အီ တး ခဲင် မိူင် ဘေတ်လဲမ် အီ ကွယ် ခဲင် ကာဒါယ် မိူင် ယူဒါ၊ တဲး အန် ဘဲန် အီဘိုန့် တျီ့ အန်။ 2 မာလဲ၊ အီဘိုန့် တျီ့ အန် တီ တူ မိုဝ်း နဝ်း ဆိူဝ် နဝ်း မှာန် ဒီ အန်။ အီဘိုန့် တီ ဘော ဝဲန် အန်၊ ဝီ ဝေန့် ဒူင် ကွယ် ဂုန့် အန် ဒီ မိူင် ဘေတ်လဲမ် ခဲင် ကာဒါယ် မိူင် ယူဒါ တွိုန်။ အန် ဘော ကွယ် ဒီ တီ အာဒါ ဖွုန် မာဂျီန်။ 3 အီမာယ် အန် ဘော ဒဲ့ ဒဲစေန့် အန် အူ ဝီ၊ တိုန့် ဘော မာလာ အာ ဒုဝ်၊ ဟာဝ် ကာမွုန် ဒီ ဝီ ဒိုဝ်း ဝိဝ် အန်။ အီဘိုန့် တီ ဘော ယိုဝ် အီမာယ် အန် ဟဲ့ တး၊ အန် ဘော ဒဲ့ အီမာယ် အန် လိုပ် ခဲင် ကာင် ဂုန့် အန်။ ဂုန့် အန် မိူဝ် ဘော ယိုဝ် အျီ့ အန် တီ ဟဲ့ တး၊ အန် ဘော ခူယ် ကာဆဝ်။ 4 ပါယ် တီ ဘိုဝ် အန် အီ မုး ဂုန့် အီဘိုန့် တွိုန် ဘော ရွုး အန်၊ တဲး အန် လိုပ် ခဲင် ကာင် အန်။ အန် ဘော ကွယ် ဒူပ် ဘိုဝ် အန် တီ အာဒါ အူယ် ဆီငဲ။ ဂေ ဘော ဟူမ် ရိုမ် ဟူမ် ကာဒူပ် တုင် တး ဘဲန် အန် ခဲတ့် ဂေ တီ။

5 န့ ဘော ပွိုန် ဖွုန် ဆီငဲ၊ ဒူအီ အာလေဝီ တွိုန် ဘော ယိတ့် ဆိန့် ဆိန့်ဝး စေဝ်၊ ရဲန် ဒုဝ် အန်၊ တဝ်း ဒီ လေး ဟာဝ်။ မာလဲ၊ ဘိုဝ် အန် ဝီ တဝ်း ဒီ အန်၊ “တဲး မဲ ဟူမ် ခါမုန် ခေါ အီ စဲက်၊ တဲး နဝ်း မဲ ဒါခိုယ်၊ ဟဲ့ ဟွတ့် မဲ ဘော ဟာဝ်။” 6 ပါယ် တီ ဂါယ် အာ ဝီ တွိုန် ဘော ဝီ ဟူမ်။ ဟဲ့ ဟွတ့် ဘိုဝ် အန် ပီ ဝီ တဝ်း ဒီ အျီ့ အန်၊ “ဆေ ဘာယ် ဒီ ဝီ တမ် ပေါ အူ မှိုဝ်၊ တဲး အေ ကွယ် ဘျုဝ် ဘျုဝ် ကျဝ် ကျဝ်။” 7 ဒေါ တဝ်း ဒူအီ အာလေဝီ တွိုန် ဒီ လေး ဟာဝ်၊ ဘိုဝ် အန် ပီ ဝီ ခြဲ ပေါ န့ ပွါ၊ တဲး အန် တမ် ပေါ အူ မှိုဝ်။ 8 န့ ဘော ဇမ် ဆီငဲ န့ ဖန်၊ အန် ဟဲ့ ခြာမ် ဒီ လေး ဟာဝ်။ မာလဲ၊ ဂုန့် အီဘိုန့် တွိုန် ပီ ဝီ ကာလာင် ဒီ အန် တဝ်း၊ “ဟူမ် ခေါ အူ မျုဝ် အူ မျုဝ်၊ ဘ်ု ဝါယ် ဝန် တာ တီ ဘာယ် ယဝ့် ဝိဝ်။” ဂါယ် ဘော ဝီ ဟူမ် ရိုမ် ဒျီင် ရိုမ် ဒူပ် ဂေ။

9 ဟဲ့ ဟွတ့်၊ ဒူအီ အာလေဝီ တွိုန် ဘော အီဘိုန့် တျီ့ အန် ဘော ဒဲစေန့် အန် ဘော ယိတ့် တဝ်း ဒီ ဟာဝ်။ ဘိုဝ် အန် ပီ ဝီ တဝ်း ဒီ ဂေ၊ “ယွတ်၊ ပြဲ ဟဲ့ ဝီ ရိန် ဒီ အပ်၊ တဲး ဘေ ဝီ တမ် ပေါ အူ မှိုဝ်။ ခဲညှာ တဲး ဘေ ယိတ့် ဝိဝ် ဆိန့် ဆိန့်ဝး စေဝ်။” 10 အန် အာဝ် ဟူ ဆီ တမ် ပေါ အူ မှိုဝ်၊ အန် ဘော လေး ဟာဝ်။ အန် ဘော ဟာဝ် ဇမ် ဒူင် လာယ် ကာဆိူဝ် ဒီ မိူင် ယေဘုတ် အီ ဘော စိူဝ် မိူင် ယေရူဆာလဲမ်။ မာလာ အီ ဟဲ့ စှိုပ် ကွပ် အာ ဒုဝ် ဘော အီဘိုန့် တျီ့ အန် တွိုန်၊ ဟဲ့ ဟာဝ် ရိုမ် ဒူပ် အန်။

11 ဂေ ဘော တး ဇမ် ခူပ် မိူင် ယေဘုတ် တီ၊ ဆီငဲ မိူဝ် ဟဲ့ ရိန် ဒီ ဂေတ့်။ ဒဲစေန့် အန် တွိုန် ဝီ တဝ်း ဒီ အန်၊ “တး၊ တဲး အေ ဟာဝ် ဝဝ့် ဒီ မိူင် ဂေ ဒူအီ ယေဘူဆိတ်၊ တဲး အေ ဒီလှဝ် တမ် ဒီ ဂေ။”

12 မာလဲ၊ ဒါ ကာညာ အန် တီ ဝီ တဝ်း၊ “အေ တူ ပွိုန် ဝဝ့် တမ် ဒီ ဒူအီ အာမျုဝ် ဟဝ် အီ တူ မုး ဒူအီ အာမျုဝ် အီဆာရေလ။ တဲး အေ ဝီ ကာလုဝ်း ဟာဝ် ဇမ် ဒီ မိူင် ဂီဘီယာ။” 13 အန် ပီ ဝီ တဝ်း ဒီ ဒဲစေန့် အန် တွိုန်၊ “တဲး အေ ဟာဝ် ရာမ် ပီခြန်၊ တဲး အေ ဇမ် ခေါ အူ မိူင် ဘော မုး မိူင် ဂီဘီယာ၊ ဘော မုး မိူင် ရာမာ၊ တဲး အေ ဒီလှဝ် တမ် ဒီ တီ ခေါ အူ မှိုဝ်။” 14 အန် ဟဲ့ ဟွတ့် တဝ်း ပါယ် တီ ဂေ ဘော ဟာဝ် ဒူပ် န့တေန့်၊ ဂေ ဘော ဟာဝ် ဇမ် ဒီ မိူင် ဂီဘီယာ အီ မုး မိူင် ဒူအီ ခြိုဝ် အာဘေန်ယာမ်။ ဆီငဲ မိူဝ် ဟဲ့ ဟွတ့် ဂေတ့်။ 15 ဂေ ဘော တဝ်း ဒီ တမ် ဒီ မိူင် ဂီဘီယာ တီ အူ မှိုဝ်။ ဂေ ဟဲ့ ဟွတ့် လိုပ် ခဲင် မိူင် တွိုန် ဘော တုတ့် ဒီဂ့လ ခဲင် မိူင် တီ။ ယီ တူ မိုဝ်း အာဆေ အီ ရွုး ဂေ ဝေန့် ခဲင် ကာင်၊ တဲး ဂေ ပွိုန် ဒီ တမ်။

16 ဒေါ ပြဲ ဟဲ့ ဟွတ့် အပ် ဝွင့်၊ န့ ဘော မိုဝ်း ဒါ ကတ် အူ ဝီ၊ အန် တး ဒီ ဒူင် နာ အန်။ အန် ဘော မုး ဒူအီ အီ တး ဒီ နွန် အာအေဖာရိမ်၊ ဝီ ကွယ် ဒီ မိူင် ဂီဘီယာ တီ။ ဂေ ဒူအီ ခဲင် မိူင် တီ၊ ဂေ ဘော မုး တူတ့် ဒူအီ ခြိုဝ် အာဘေန်ယာမ်။ 17 ဒါ ကတ် တွိုန် ဘော ယိုဝ်၊ ဟဲ့ မုး ခဲတ့် ဒီ တူင့် ဟဲ့ တး ကွယ် ခဲင် မိူင် တီ၊ အန် ဘော ဒီမွှတ် ဂေ တဝ်း၊ “ဘေ တး နာ မှဝ်။း ဘေ ဒီ ဝီ ဟာဝ် နာ မှဝ်။း”

18 ဒူအီ အာလေဝီ တွိုန် ဝီ တဝ်း ဒီ အန်၊ “ယေ တး လဲ ဒီ မိူင် ဘေတ်လဲမ် အီ ကွယ် ခဲင် ကာဒါယ် မိူင် ယူဒါ တွိုန်။ ဒေါ တီ နီ၊ ယေ ဒီ ဝီ ဝေန့် ဒီ ကာင် ဒူင် ကွယ် ယေ အီ ကွယ် ဒီ ဒူင် ဆိူတ် နွန် အာအေဖာရိမ် တွိုန်။ အာဝ် မိုဝ်း အာဆေ အီ ရွုး ယေ ဝေန့် ဒီလှဝ် ခဲင် ကာင် အန်။ 19 ပေတ့် ကာဟဝ်း ဘော ဟျြီင် ပီ ဒီ လုဝ် အွယ် မာလာ ယေ မိူဝ်၊ ယေ ဟဲ့ ဟွတ့် မိုဝ်း။ ခါမုန် ဂေ အိုမ် မာငုန် ယေ ဟဲ့ မိုဝ်း ခဲ့ ပီ လုဝ် ယေ။ ဘော အုဝ် ဘော အီဘိုန့် အုဝ် ဘော ဒဲစေန့် အုဝ်၊ ယေ မုး ဒဲစေန့် မဲ။ ယေ တူ လုဝ် မာဆေ ပေါ န့ ပွါ။”

20 ဒါ ကတ် တွိုန် ဝီ တဝ်း ဒီ ဂေ၊ “အုဝ် အီ ဒီ ရွုး ဘေ၊ အုဝ် ဒီ ဒွါ ဘော ခဲ့ ပီ လုဝ် ဘေ။ မာလဲ၊ ဘေ ကွဲ့ တမ် ဒီဂ့လ နီ။” 21 အန် ဘော ရွုး ဂေ ဝေန့် ခဲင် ကာင် အန်၊ ဘော အွယ် ဘော မာလာ ဂေ တွိုန် ဟူမ် ပေတ့်။ ဂေ ဘော ဘာယ် ပ့လဝ် ဂေ ဘော ဟူမ် ရိုမ်၊ ဒျီင် ရိုမ်။

22 ဒေါ ဆီငျာ ဟူမ် ကျဝ် ဟူမ် ဒါခိုယ် ဂေ တီ၊ န့ ဘော မိုဝ်း ဒူအီ တူ မွှိုမ် အီ မိုဝ်း နဝ်း ကာဝါတ့် ကာဆဝ် မင် အီ၊ ဂေ ဘော တး ရူပ် ကာင် တွိုန်။ ဂေ ဘော မး မာလုဝ်း ကာင် တွိုန် ဘော ဒဲ့ ဘော ဒါ ကတ် အီ မုး ဒါ ကာညာ ကာင် ဒူင် တမ် ဂေ တွိုန် တဝ်း၊ “ဒိုဝ်း လေး အီမာယ် အီ တး လိုပ် ခဲင် ကာင် မဲ နီ၊ တဲး ယေ ပွိုန် ဒီ အိတ် ရိုမ် ဒူပ် အန်။”

23 ဒါ ကတ် အီ မုး ဒါ ကာညာ ကာင် တွိုန် ဘော လေး ဒွင်ဘာန် ဂေ ဘော ကာလာင် ဒီ ဂေ တဝ်း၊ “အိုယ် ဘေ ဘီနွင် အုဝ်၊ အာဝ် လုဝ် ဘူင် နာ ဟာယ် နာ မိူက် ပါယ် တီ။ ခုဝ်၊ ဒူအီ ဝီ နီ၊ အန် ဘော မုး ခဲတ့် အုဝ်၊ အာဝ် လုဝ် ဘူင် အီ မွှိုမ် ကာဒါတ့် ဒီ အန်။ 24 ဒီ နီ ဟဲ့ မိုဝ်း ဂွန် ဒီဘျာ အုဝ် အီ ဆီ မုး ဒီဘျာ ဇဲတ် ဘော အီဘိုန့် တျီ့ အန်။ အုဝ် ဒီ အာပ် ဂါယ် အာ ဝီ တီ ဒီ ဘေ၊ တဲး ဘေ ဘူင် ခဲ့ လဝ့် နဝ်း ဘေ ဒီ ဂါယ်။ မာလဲ၊ ကွဲ့ တဲး ဘေ ဘူင် နာ ဟာယ် နာ မိူက် ဒီ အီမာယ် ဝီ နီ။”

25 မာလဲ၊ အီမာယ် ဂေ တွိုန် တူ ထူမ် ဂြုဝ်း အန်။ ပါယ် တီ ဒူအီ အာလေဝီ တွိုန် ဘော ကာဒုး ဒီ အာပ် အီဘိုန့် တျီ့ အန်၊ ဒွါ ဒီ ဂေ။ ဂေ ဘော အိတ် ဘော လာယ် အန် ဒွင် ခိူန် ဇမ် ပြဲ ဝး။ ပြဲ ဟဲ့ ဟွတ့် ဝး၊ ဂေ ဘော ဘ့လေး အန်။ 26 ပြဲ ဟဲ့ ဟွတ့် ဝး၊ အီဘိုန့် အန် တွိုန် ဟဲ့ တး ကေး ဒီ အာတ့် မာလုဝ်း ကာင် ဒါ ကတ် ဒူင် ကွယ် အီမာယ် အန် တွိုန်။ အန် ဘော ကွယ် ဒီ တီ ဇမ် ပြဲ ဘ့လာင်။

27 ဆိန့်ဝး တီ၊ အီမာယ် အန် တွိုန် ဘော ယိတ့် ဝိုဝ်း မာလုဝ်း တဝ်း ဒီ လေး ဟာဝ်။ ဒေါ အန် တီ အန် ဘော ဝီ ယိုဝ် အီဘိုန့် တျီ့ အန် ဟဲ့ ကေး ကွယ် ဒီ အာတ့် မာလုဝ်း ကာင် တီ။ ဒဲ အန် ဟဲ့ ဝီ ဇာန် ဒီ ဘန်ဒူက် မာလုဝ်း။ 28 အန် မိူဝ် တဝ်း ဒီ အီဘိုန့် အန် တီ၊ “ယိတ့်၊ တဲး အေ ဟာဝ်။” အန် ပီ ဘော တဝ်း ပါယ် တီ မိူဝ်၊ အီဘိုန့် အန် တွိုန် ယီ တူ ဂြုဝ်း။ အန် မိူဝ် ဝီ စုဝ့် အီဘိုန့် အန် တီ ဒါင် ဒဲင် ကာတူ မာလာ၊ ဝီ ဝေန့် ဒီ ကာင် အန်။

29 အန် ဟဲ့ ဟွတ့် တး ဇမ် ဒီ ကာင် အန်၊ အန် ဘော ဒိုဝ်း မာပွါ့၊ ဝီ ပါ ဒုဝ် ယမ် အီဘိုန့် အန် တွိုန်၊ ဝီ ကာဒဲပ် ဒူင် ကာဒုတ် ကာအာင်၊ တဲး န့ ဘဲန် ပွတ် ဘဲန် ပွတ် အာဒါ ဂိုဝ် ဒီ အာ ပွတ်။ အန် ဘော ဝီ တိုယ် ဟာဝ် ဒီ ခြိုဝ် ဒူအီ အီဆာရေလ ဒွန် ခြိုဝ်။ 30 ဂေ အီ ယိုဝ် လွင် အန် တီ ဝီ ကာလာင် ဒီ ဂေ ဒွန် အီ တဝ်း၊ “ဆိန့် ဒေါ လေး ဒူအီ အီဆာရေလ ခဲင် မိူင် အဲဂိုပ် တွိုန်၊ န့ တူ ဒွိုမ် မိုဝ်း အာမူ ဇိုဝ် နီ။ တဲး ဘေ လာယ် ဆင်ချာင် ဒီ လုဝ် ဘူင် ပါယ် မှဝ်။”