1 အာခြာဝ် ဒေါ အန် တီ ဂေ ဒူအီ အီဆာရေလ တူ မိုဝ်း ခုန်ဒီခမ်။ ဂေ ဒူအီ ခြိုဝ် အာဒါန် ဘော ဟြေတ့် ကာဒါယ် ဒူင် ဒီ ကွယ် ဂေ။ ခုဝ်၊ ဒေါ ဇမ် အာခြာဝ် တီ ဂေ ညှမ် ဟုဝ် တဝ် ဂေ ဒူအီ အီ ကွယ် ဒဲင် ကာဒါယ် အီ ဘဲန် ခါဂုန် ဂေ ပဲ့ ဟဲ့ ကာယဝ်း ဒူအီ အီဆာရေလ အာဒါ ဂေ။ 2 ပါယ် တီ ဂေ ဘော ရဝ်း ဒူအီ အီ ကျ အာဒါ ဖန် ဝီ ခဲင် ခြိုဝ် ဒူအီ အာဒါန် တွိုန်၊ တဲး ဂေ လေး ဒီ မိူင် ဇုဝ်ရာ ဂါယ် မိူင် အေဆာတောလာ၊ တဲး ဂေ ဟာဝ် ချွင် ဒီ ယွတ် မိူင်။ ဒူအီ ဂေ တီ မုး ဒါ အီ ယဲတ့် ဒွန် န့ကြိုဝ်း ခဲင် ခြိုဝ် ဂေ။ ဒေါ တး ဇမ် ဂေ ဒီ နွန် အာအေဖာရိမ်၊ ဂေ ဘော တး တမ် ဒီ ကာင် အာမီခါ။ 3 ဒေါ ကွယ် ဂေ နာ ရေတ့် ကာင် အာမီခါ တီ၊ ဂေ ဟဲ့ နုဝ် ဂြုဝ်း ကာညူမ် အီ မုး ဒူအီ အာလေဝီ တွိုန်။ ဂေ ဘော ဟာဝ် ဒူင် ကွယ် အန် ဘော ဒီမွှတ် အန် တဝ်း၊ “အာဆေ ဟဲ့ တိုယ် မဲ တး ကွယ် ဒီ နီ။း ကူပ် မာဆေ မဲ ဟဲ့ တး ကွယ် ဒီ နီ။း ဂါန် မာဆေ ပီ ဘူင် မဲ။း”

4 အန် ဝီ တဝ်း ဒီ ဂေ၊ “အုဝ် ဘဲန် ဒူအီ အီ ဒွါ အာကျာမ် အာငျာန် ဒီ အာမီခါ၊ ဘဲန် ဘော ဒါ အီ လှူ ဒီ ဇဝ်ဖြာ အာဒါ အန်။”

5 ဂေ ပီ ဝီ တဝ်း ဒီ အန်၊ “အိုဝ်၊ ဆေ န့ ပါယ် တီ၊ မှာန့် မဲ ဒီမွှတ် ဇဝ်ဖြာ၊ တဲး ယေ နပ် လွင် ပီ ဒီ ဟာဝ် ဘူင် ယေ နီ၊ န့ ဒီ အွင် တူ အွင်။”

6 ဒါ အီ လှူ ဒီ ဇဝ်ဖြာ တွိုန် ဝီ တဝ်း၊ “အာဝ် လုဝ် တဲး ဘေ မိုဝ်း နဝ်း မှဲ နဝ်း ကာဟွာ့ လွင် ပီ ဒီ ဟာဝ် ဘူင် ဘေ တီ။ ဇဝ်ဖြာ အီ ဒီ ယွတ် မဲန် ဘေ၊ တဲး ဘေ အွင်။”

7 ပါယ် တီ ဂေ ဒူအီ ဖန် ဝီ တွိုန်၊ ဘော ဝီ လေး ဟာဝ် ဇမ် ဒီ မိူင် လေဆာ။ ဂေ ဘော နပ် ဒူအီ ခဲင် မိူင် တီ အာဝ် မိုဝ်း အီ ဒုက် အီ ညှာပ် မာဆေ။ ဂေ ဘော ကွယ် ဂတ် ယေန်၊ ဂျာမ်ဆာ။ ဂေ ဘော ပီ ဒူအီ အီ ကွယ် ခဲင် မိူင် ဆီဒူန် တွိုန်။ ဂေ ကွယ် ခဲင် မိူင် ဂေ တီ၊ ဟဲ့ မိုဝ်း ဇေ့ဇုင် တူတ့် ဒွန် မျုဝ်၊ အာဝ် မိုဝ်း ပီ စုတ် လုတ် မာဆေ။ ဂေ မိူဝ် ဟဲ့ ကွယ် ရာမ် ကာတူင့် ဒီ မိူင် ဆီဒူန်။ ဂေ မိူဝ် တူ မိုဝ်း အီ ဟဝ် အီ ဘဲန် ဂိုက် ဂေ အီ ဒွယ် ဒူပ် ဂေ။

8 ဂေ ဒူအီ ဖန် ဝီ တွိုန် ဘော ဝီ တး ဇမ် ဒီ မိူင် ဇုဝ်ရာ ဂါယ် မိူင် အေဆာတောလာ။ ဘီနွင် ဝေါဝဲ ဂေ ဘော ကာဖြူမ် ဒီ ဒီမွှတ် လွင် ပဲ့ ဟာဝ် ယိုဝ် ဟာဝ် နပ် ဂေ တွိုန်။

9 ဂေ မိူဝ် ဝီ ကာလာင် တဲး ဘီနွင် ဝေါဝဲ ဂေ ထူမ်။ ဂေ တဝ်း၊ “တဲး အေ ဟာဝ် ကာဂုဝ်း ဒီ ဒူအီ ခဲင် မိူင် လေဆာ အူ ဇေန့်။ မိူင် ပဲ့ ဟဲ့ ဟာဝ် ယိုဝ် ယေ တီ၊ န့ ဘော မုး မိူင် ဆီချာ၊ မိူင် ဒီ စှိတ်၊ အာဝ် လုဝ် ပီရိုဝ် အေ ပါယ် နီ။ တဲး အေ ဟာဝ် ကာဂုဝ်း ခြန် ခြန်၊ တဲး အေ ပွိုန် မိူင် ဂေ တီ။ 10 ဆေ ဘေ ဟီ ဟာဝ် ဇမ် ဒီ မိူင် တီ၊ ဘေ ဒီ ဘော ယိုဝ် ဒူအီ အီ ကွယ် ဒါခိုယ်၊ တူ ယုဝ် မာဆေ။ န့ ဘော မုး မိူင် တာင်၊ မိူင် ကာဝဝ်း။ ဟဲ့ မုး မိူင် အီ မိုဝ်း ဇေ့ဇုင် တူတ့် ဒွန် မျုဝ်။ ဟဲ့ မုး မိူင် ပီ ဒီ အာပ် ဇဝ်ဖြာ ဒီ ဘေ။”

11 ပါယ် တီ ဂေ ဒူအီ ခြိုဝ် အာဒါန် အာဒါ ဒဝ် မာယဝ်း ဝီ ဘော ရဲန် ဒါ ဆိုက် ဂေ၊ ဘော လေး ဒီ မိူင် ဇုဝ်ရာ ဂါယ် မိူင် အေဆာတောလာ တွိုန်။ 12 ဂေ ဘော ဟာဝ် ချ နာ လေး ဆီငဲ မိူင် ကီရီယာတ်ယာရိမ် အီ ကွယ် ခဲင် ကာဒါယ် မိူင် ယူဒါ။ ဒူင် တီ ဂေ ဘော တဲး န့ စိူဝ် ဒူင် ချ ဒူအီ ခြိုဝ် အာဒါန် ကော ဇမ် ဒေါ တီ နီ။ 13 ဂေ ပီ ဝီ ယိတ့် ဒီ တီ၊ ပီ ဝီ ဟာဝ် ဒီ နွန် အာအေဖာရိမ်၊ ဝီ ဟာဝ် ဇမ် ဒီ ကာင် အာမီခါ တွိုန်။

14 ဒေါ အန် တီ ဂေ ဒူအီ ဖန် ဝီ အီ ဟဲ့ ဟာဝ် ချွင် ဒီ ယွတ် မိူင် လေဆာ တွိုန်၊ ဂေ ဝီ ကာလာင် ဒီ ဘီနွင် ဂေ တဝ်း၊ “ဘေ နပ်၊ ခဲင် ကာင် ဂေ နီ အာဒါ အူ ကာင် န့ မိုဝ်း အာရိုပ် ရာင် ပီ ဘ့လုဝ်း ဂေ အီ မုး ဟေ။ ဂေ ဟဲ့ ဝီ လှုဝ် ဘော အာရိုပ် ရာင် တာ ရွိုန်၊ ဟဲ့ မိုဝ်း ဘော အာရိုပ် ဘဲန် မျုဝ် ဘဲန် မျုဝ် ဘော ဆီတုဝ် အေဖူတ် အူ ဖိူန်။ ဆေ ယေ နပ် ပါယ် တီ ယေ ဒီ ဘော နပ် မာဆေ ပီ လုဝ် ဘူင် ယေ။” 15 ဂေ ဘော ဟာဝ် ယွတ် ဒူင် ကွယ် အာမီခါ၊ ဂေ ဘော လိုပ် ကာင် ကာတု ဒူင် ကွယ် ကာညူမ် အီ မုး ဒူအီ အာလေဝီ တွိုန်။ ဂေ ဘော ကာလာင် ဂြုဝ်း ဒီ အန်။ 16 ဂေ ဒူအီ ခြိုဝ် အာဒါန် အာဒါ ဒဝ် မာယဝ်း ဝီ အီ ဟဲ့ ဂူင့် ခြိုင် ကာဂုဝ်း ဒွန် အီ၊ ဂေ ဝီ ကွယ် ဒီ ဘာင် မာလုဝ်း ကာင် တွိုန်။ 17 ဂေ ဒူအီ ဖန် ဝီ အီ ဟဲ့ ဟာဝ် ချွင် ဒီ ယွတ် မိူင် တွိုန်၊ ဂေ ဘော လိုပ် ဟာဝ် ခဲင် ကာင် အူ ဇေန့်။ ဂေ ဘော ဒိုဝ်း အာရိုပ် ရာင် အီ မုး ဟေ၊ ဘော ပီ လှုဝ် ဂေ တာ ရွိုန် တွိုန်၊ ဒိုဝ်း ဘော အာရိုပ် ဘဲန် မျုဝ် ဘဲန် မျုဝ် ဘော ဆီတုဝ် အေဖူတ် တွိုန်။ ဒါ အီ လှူ ဒီ ဇဝ်ဖြာ တွိုန် မိူဝ် စွင့် ဒူပ် ဂေ ဒူအီ ဒဝ် မာယဝ်း ဝီ အီ ဟဲ့ ဂူင့် ခြိုင် ကာဂုဝ်း တွိုန်။

18 ဒေါ လိုပ် ဟာဝ် ဒူအီ ဂေ တီ ခဲင် ကာင် အာမီခါ ဘော ဒိုဝ်း အာရိုပ် ရာင် ပီ ဘ့လုဝ်း ပီ လှုဝ် ဂေ၊ ဘော ဆီတုဝ် အေဖူတ် ဘော အာရိုပ် ရာင် ဘဲန် မျုဝ် ဘဲန် မျုဝ်၊ ဒါ အီ လှူ ဒီ ဇဝ်ဖြာ ဝီ ဒီမွှတ် ဂေ တဝ်း၊ “မာဆေ ပီ ဘူင် ဘေ။း”

19 ဂေ ဝီ တဝ်း ဒီ အန်၊ “ကွယ် နှိမ် နှိမ်၊ ကွဲ့ ဂြုဝ်း။ တဲး မဲ ဝီ ဟာဝ် ရိုမ် ဒူပ် ယေ၊ ဘဲန် ဒါ အီ လှူ ဒီ ဇဝ်ဖြာ အာဒါ ယေ။ မဲ ထာင် အာ မှဝ် ဒီ မွှိုမ်၊ ဆေ မဲ ဘဲန် ဒါ အီ လှူ ဒီ ဇဝ်ဖြာ အာဒါ ဒူအီ အူ ဝီ ဘော ဆေ မဲ ဘဲန် ဒါ အီ လှူ ဒီ ဇဝ်ဖြာ အာဒါ ဒူအီ အူ ခြိုဝ် အီ မုး ဒူအီ အီဆာရေလ။း” 20 ဒါ အီ လှူ ဒီ ဇဝ်ဖြာ ဘော ခူယ် ဒါခိုယ် ဘော ဒိုဝ်း ဆီတုဝ် အေဖူတ်၊ ဒိုဝ်း ဘော အာရိုပ် ရာင် ဘဲန် မျုဝ် ဘဲန် မျုဝ် ဘော အာရိုပ် ပီ ဘ့လုဝ်း ပီ လှုဝ် ဂေ တွိုန်၊ ဟာဝ် ရိုမ် ဒူပ် ဖိုင် ဂေ တီ။ 21 ဂေ ဘော ဝီ ဝိဝ်၊ ဂေ ဘော တိုယ် ဂွန် ဂေ ဘော ဒုဝ် ဆတ်ဒါဝါ ဘော ကြုဝ်ကြာမ် ဂေ ယဲတ့် ဒီ အာတ့်။

22 ဂေ ဟဲ့ လေး ဟာဝ် ရာမ် ကာတူင့် ဒီ ကာင် အာမီခါ တွိုန်၊ ဂေ ဒူအီ အီ ကွယ် ကာတတ် ကာင် အာမီခါ တွိုန်၊ ဂေ ဘော ဝီ လာယ် ဒဲ့ တး ကာဇု၊ ဝီ ခုင်ခြး ဒူပ် ဒူအီ ခြိုဝ် အာဒါန် ဂေ တွိုန်။ ဂေ ဘော ဟာဝ် ခြပ် ဂေ အူ ဇေန့်။ 23 ဒူအီ ခြိုဝ် အာဒါန် ဂေ ဘော ဝီ ကာဘတ် ယွတ်၊ ဝီ ဒီမွှတ် အာမီခါ တဝ်း၊ “မဲ မိုဝ်း ပီ လုဝ် မာဆေ၊ မဲ ကော လုဝ် ဒဲ့ ဒူအီ ကိူန် ခဲ့ တီ တး ဒူပ် ယေ။း”

24 အာမီခါ ဝီ တဝ်း ဒီ ဂေ၊ “ဘေ ဟဲ့ ဒိုဝ်း ဟာဝ် အာရိုပ် ပဲ့ ဟဲ့ ဘူင် အုန် အုဝ်၊ ဘော ဒါ အီ လှူ ဒီ ဇဝ်ဖြာ အာဒါ အုဝ်။ ဟဲ့ ဟွတ့် ဘေ ဆီ ဘော ဝီ ဒီမွှတ်၊ မာဆေ ပီ လုဝ် အုဝ်။း အုဝ် ဒီ ဘော မိုဝ်း မာဆေ ဒဲင် လွင် အန် တီ။း”

25 ဂေ ဒူအီ ခြိုဝ် အာဒါန် ဝီ တဝ်း ဒီ အန်၊ “မဲ ကွဲ့ မူတ့် ကိူန်၊ ယုဝ် န့ မိုဝ်း ဒူအီ ကာဟဝ်း၊ ဂေ ဒီ ဝီ ကာဂုဝ်း ဒီ မဲ၊ တဲး ဘော မဲ ဘော ဒူအီ ခဲင် န့ဟူမ် မဲ ဒီ ဘော စှိုမ်။” 26 ဂေ ဟဲ့ ဟွတ့် တဝ်း ပါယ် တီ၊ ဂေ ဘော ဟာဝ်။ အာမီခါ ယွတ် ဒူအီ ဂေ တီ နှဲန် ဒီ မိုဝ်း ပ့လူမ် ဂေ ဟဲန့် လွှိုမ် အန်၊ အန် ဘော ဝီ ဝေန့် ဒီ ကာင် အန်။

27 ဂေ ဒူအီ ခြိုဝ် အာဒါန် ဘော ဒိုဝ်း ကြုဝ် ပဲ့ ဟဲ့ ဘူင် အာမီခါ ဘော ဒါ အီ လှူ ဒီ ဇဝ်ဖြာ တွိုန်၊ ဂေ ဘော ဝီ ဟာဝ် ကာဂုဝ်း ဒီ ဒူအီ ခဲင် မိူင် လေဆာ ဒေါ တူ ထာင် တူ နမ်လှုဝ်း ဂေ၊ ဒေါ ကွယ် ဒါခိုယ်၊ ကွယ် ယေန် ယေန် ဂေ။ ဂေ ဘော ဒိုဝ်း မာပွါ့ လာင် ဘော ဘ့လာ လျီး၊ ငဝ်း ယမ် ဒူအီ ခဲင် မိူင် တီ၊ ဝီ ဒိုဝ်း ငဝ် ဒုဝ့် ဝဲန် မိူင် ဘော မိူင်။ 28 ဂေ ဒူအီ ခဲင် မိူင် တီ၊ ကူပ် ဟဲ့ ကွယ် ရာမ် ကာတူင့် ဂေ ဒီ မိူင် ဆီဒူန် ဘော ကူပ် တူ လာယ် လိုပ် လာယ် လေး ဂေ ဒီ အီ ဟဝ်။ ဂေ အာဝ် မိုဝ်း အီ တး စွယ် ဂေ။ မိူင် ဂေ တီ၊ န့ ဘော ကွယ် ခဲင် ဒီလယ့် အီ ကွယ် ကာတတ် မိူင် ဘေတ်ရာဟောဖ။ ဂေ ဒူအီ ခြိုဝ် အာဒါန် ဘော ဝီ မ့ပြာယ် ဘူင် ကာမာယ် မိူင် တီ။ ဟဲ့ ဟွတ့်၊ ဂေ ဘော ဝီ ဟာဝ် ကွယ် ဒီ တီ။

29 မိူင် ဂေ တီ ဂေ ဘော တဲး စိူဝ် မိူင် ဒါန် ဒူပ် စိူဝ် ဂုန့် ဒင် ဂေ အီ မုး အာဒါန်၊ အီ မုး ဂွန် အာ အီဆာရေလ တွိုန်။ စိူဝ် ဘြိမ် မိူင် တီ၊ န့ ဘော စိူဝ် မိူင် လေဆာ။ 30 ဂေ ဒူအီ ခြိုဝ် အာဒါန် ဘော ဒိုဝ်း အုန် အာရိုပ် ရာင် ပီ ဒိုဝ်း တး ဂေ ဒီ ကာင် အာမီခါ တွိုန်၊ တဲး န့ ဘဲန် ပီ ကြိုပ် ဂေ။ အာယုဝ်နာထာန် အီ မုး ဂွန် အာဂေဆူမ် ဘော မုး လှာန် အာမုဝ်ဆဲ တွိုန်၊ ဘော အန် ဘော လှုက်လှာန် အန် ဟဲ့ ဘဲန် ဒါ အီ လှူ ဒီ ဇဝ်ဖြာ ကော ဇမ် ဒေါ မှေတ့် ဟာဝ် ရန်ဆူ ဂေ ဒီ ဒူအီ ခဲင် ခြိုဝ် အာဒါန်။ 31 အာရိုပ် ရာင် ပီ ဘူင် ပီ လှုဝ် အာမီခါ တွိုန်၊ ဂေ ဘော ကြိုပ် အုန် ဘော စုဝ်၊ ဒေါ ကွယ် ဒူင် ကြိုပ် ဂေ ဇဝ်ဖြာ ဒီ မိူင် ဆီလုဝ် တွိုန်။