1 ဒေါ အန် တီ န့ မိုဝ်း ဒူအီ အူ ဝီ အီ စိူဝ် အာမီခါ။ အန် ကွယ် ဒီ နွန် အာအေဖာရိမ်။ 2 အန် ဘော ကာလာင် ဒီ မာ အန် တဝ်း၊ “ဒေါ ပြာ အီ ဒီ ရွိုန် မဲ အာဒါ အူ ဟြဲန့် ဒီ အူ မာယဝ်း ဆေခေန် တွိုန်၊ အုဝ် ဟဲ့ ယိုဝ် မဲ ဟဲ့ ဒိူင်၊ ဟဲ့ အေး ဒူအီ ပြာ တီ။ ရွိုန် တီ အုဝ် အီ ဟဲ့ ဒိုဝ်း။ န့ ဆီ ကွယ် ဒီ အုဝ်။” မာ အန် ဝီ တဝ်း ဒီ အန်၊ “အိုယ် ဂွန် အိုယ်၊ တဲး ဇဝ်ဖြာ မွင့်ကာရာ ဒွါ ဒီ မဲ။”

3 ဒေါ ဝီ ဒွါ ဝိဝ် အန် ရွိုန် အူ ဟြဲန့် ဒီ အူ မာယဝ်း ဆေခေန် ဒီ မာ အန် တီ၊ မာ အန် ဝီ တဝ်း ဒီ အန်၊ “အုဝ် ဒီ ဝီ ဒိုဝ်း ရွိုန် တီ၊ ဝီ လှူ ဒီ ဇဝ်ဖြာ။ ရွိုန် တီ တဲး မဲ လှုဝ် ဘူင် အာရိုပ် ရာင်။ အုဝ် ဒီ ဝီ အာပ် ဝိဝ် ရွိုန် တီ ဒီ မဲ၊ တဲး မဲ ပွိုန် ဒီ ဘူင် ပါယ် တီ။”

4 အန် ဘော ဒိုဝ်း ရွိုန် တွိုန် ဝီ ဒွါ ဒီ မာ အန်။ မာ အန် ဘော ဒိုဝ်း ရွိုန် အာဒါ အာ မာယဝ်း ဆေခေန် ဒွါ ဒီ ဒါ အီ နပ် ဒီ စိုမ် ရွိုန်၊ တဲး အန် ဘူင် အာရိုပ် ရာင်။ အန် ဟဲ့ ဟွတ့် လှုဝ် အာရိုပ် ရာင် တီ၊ ဂေ အုန် ဒီ ကာင် အာမီခါ။

5 အာမီခါ ဘော မိုဝ်း ဟူင် ဒူင် ကြိုပ် ဂေ အာရိုပ် ဘဲန် မျုဝ် ဘဲန် မျုဝ်။ အန် ဘော ဘူင် အာရိုပ် ရာင် မင် မျုဝ် ဘော ဆီတုဝ် အေဖူတ် အူ ဖိူန်၊ ဘ့လေး။ အန် ဘော ဒါင် ဂွန် အီမာယ် အန် အူ ဝီ၊ တဲး အန် ဘဲန် ဒါ အီ လှူ ဒီ ဇဝ် ဂေ တီ။ 6 ဒေါ အန် တီ ဂေ ဒူအီ အီဆာရေလ တူ မိုဝ်း ခုန်ဒီခမ်။ ဒွန် အီ ဘူင် ခဲ့ ပီ အိုင် အန်။

7 ဘာန် ဒေါ အန် တီ န့ ဘော မိုဝ်း ကာညူမ် ခြိုဝ် အာလေဝီ အူ ဝီ။ အန် ကွယ် ဒီ မိူင် ဘေတ်လဲမ် အီ ကွယ် ခဲင် ကာဒါယ် မိူင် ယူဒါ တွိုန်။ 8 အန် ဘော လေး ဟာဝ် နာ ရေတ့် မိူင်၊ ဝိန် ဒီ ဟြေတ့် ဒူင် ဒီ ကွယ် အန်။ ဒေါ ဟာဝ် ဝိဝ် ဟာဝ် ဝေန့် အန် တီ၊ အန် ဘော တး ဇမ် ဒီ ကာင် အာမီခါ အီ ကွယ် ဒီ နွန် အာအေဖာရိမ် တွိုန်။

9 အာမီခါ ဘော ဒီမွှတ် အန် တဝ်း၊ “မဲ တး နာ မှဝ်။း” အန် မိူဝ် ဝီ တဝ်း၊ “အုဝ် မုး ဒူအီ အာလေဝီ အီ ကွယ် ဒီ မိူင် ဘေတ်လဲမ် ခဲင် ကာဒါယ် မိူင် ယူဒါ။ အုဝ် ဟြေတ့် ဒူင် ဒီ ကွယ် ကာမာယ်။”

10 အာမီခါ ဝီ တဝ်း ဒီ အန်၊ “တဲး မဲ ကွယ် ရိုမ် ဒူပ် အုဝ် ဒီ နီ၊ ဘဲန် အီ ဒွါ အာကျာမ် အာငျာန် ဒီ အုဝ်၊ ဘဲန် ဘော ဒါ အီ လှူ ဒီ ဇဝ်ဖြာ အာဒါ အုဝ်။ အုဝ် ဒီ ဒွါ ရွိုန် ဒီ မဲ၊ အူ ဆီနမ် အာဒါ ဂိုဝ် ဆေခေန်၊ တဲး မဲ မိုဝ်း ဘော ခြိုင် တာ ဘော ပီ ဒီ ဟူမ်။” 11 ပါယ် တီ ဒူအီ အာလေဝီ တွိုန် ဘော ဖြူမ် ဒီ ကွယ် ရိုမ် ဒူပ် အာမီခါ တွိုန်၊ တဲး အန် ဘော ပီ ဂွန် အီမာယ် အာမီခါ အူ ဝီ။ 12 အာမီခါ ဘော ဒါင် တဲး အန် ဘဲန် ဒါ အီ လှူ ဒီ ဇဝ်ဖြာ အာဒါ အန်။ အန် မိူဝ် ကွယ် ဒီ ကာင် အာမီခါ တီ။ 13 အာမီခါ ဝီ တဝ်း၊ “ဒေါ တီ နီ အုဝ် ဟဲ့ နပ် ဇဝ်ဖြာ ဒီ မွင့်ကာရာ ဒွါ ဒီ အုဝ် ကူပ် ဟဲ့ မိုဝ်း ဒူအီ အာလေဝီ အီ ဟဲ့ တး ဘဲန် ဒါ အီ လှူ ဒီ ဇဝ်ဖြာ အာဒါ အုဝ်။”