1 အာဒါ အူ ဆီငဲ အာဆာမ်ဆူန် ဘော ဟာဝ် ခဲင် ကာဒါယ် မိူင် ဒူအီ ဖီလီထီ ဒီ မိူင် ဂါဆာ။ အန် ဘော ယိုဝ် ယာ မာလမ် အူ ဝီ ဘော အိတ် ရိုမ် ဒူပ် ယာ မာလမ် တီ။ 2 ဂေ ဒူအီ ခဲင် မိူင် ဂါဆာ တီ ဘော နပ် အာဆာမ်ဆူန် ဟဲ့ တး ကွယ် ဒီ တီ၊ ဂေ ဘော ဘ်ု ရူပ် ဒီ တီ။ ဂေ ဘော ဘ်ု ဒီ ဘာင် မာလုဝ်း မိူင် ဘော ဒွင် ခိူန်။ ခဲင် မှိုဝ် တီ ဂေ တူ ဟာဝ် ပေါ ပ့လုဝ့်။ ဂေ ယီ ဟဲ့ ခြာမ် တဝ်း၊ “ပြဲ ဟီ ဝး အေ ဒီ ငဝ်း ယမ် အန်။”

3 မာလဲ၊ အာဆာမ်ဆူန် ဝီ အိတ် ဇမ် ကာတဲ ဆွိုမ်။ အန် ဘော ဝီ ယိတ့် ဟာဝ်။ အန် ဘော ဂြူပ် ဟာဝ် ဘော ဘ့လ မာလုဝ်း မိူင် ဘော အာ ဘ့လ။ အန် ဘော ရိုတ့် ဘော ရွင့် အန်။ အန် ဘော ကာဝျီ့ ဒိုဝ်း ဟာဝ် ဘော ဘဲန် အန် ဘော တူတ့်။ အန် ဝီ ဂွတ် ဟာဝ် ဝဲန် ကာဒဲ့ နွန် အီ ကွယ် ကာတတ် မိူင် ဟေဘြုဝ် တွိုန်။

4 ဝါယ် အန် တီ ဟဲ့ ရာမ် လှေန့်၊ အာဆာမ်ဆူန် ပီ ဝီ အိုင် အီဘိုန့် ပေါ အူ ဝီ အီ စိူဝ် နာင် ဒေလီယာ။ အန် ကွယ် ဒီ ဒီလယ့် စောရိက်။ 5 ဂေ ဒါ တာင် ဒူအီ ဖီလီထီ ဘော ဟာဝ် ဒူင် ကွယ် အီဘိုန့် တီ ဘော ကာလာင် ဒီ အန် တဝ်း၊ “တဲး မဲ ပီလွှက့် ဒီ အာဆာမ်ဆူန်၊ ဒီမွှတ် အန်၊ တဲး အန် ကာလာင် လွင် ပ့လူမ် ဂေ ဟဲန့် အန်၊ အန် မိုဝ်း ကူပ် မာဆေ၊ တဲး အန် ဘော ကာလာင် လွင် မှဝ် အေ ဒီ ပါယ် ဒီ ပဲ အန်။ တဲး အေ ပွိုန် ဒီ ပက် အန် ဘော ဘူင် ကွဲ့ တဲး အန် ဆီ ပွိုန် ဒီ ငိုဝ်း ဂိန့် အန်။ ဟဲ့ ဟွတ့်၊ ယေ ဒွန် အီ ဒီ ဒွါ ရွိုန် အူ ဟြဲန့် ဒီ အူ မာယဝ်း ဆေခေန် ဒီ မဲ။” ^a

6 နာင် ဒေလီယာ ဝီ တဝ်း ဒီ အာဆာမ်ဆူန်၊ “အုဝ် မှာန့်၊ တဲး မဲ ကာလာင် ဒီ အုဝ်၊ ပ့လူမ် မဲ ဂေ ဟဲန့် မဲ နီ၊ မဲ မိုဝ်း ကူပ် မာဆေ ဘော ဒီ ဒိုဝ်း မာဆေ ပက် မဲ၊ တဲး န့ ကော ပဲ ဒီ အိုပ် မဲ။း”

7 အာဆာမ်ဆူန် ဝီ တဝ်း၊ “ဆေ ဂေ ဒိုဝ်း ဝန် ဟုန် ဘူ ညွင့် အီ ဆီ အိမ် အီ ညှမ် ကာဟဝ်း ဘော ပက် အုဝ်၊ ဟဲန့် အုဝ် ဂေ ပ့လူမ် အုဝ် နီ ကော ဒီ ယူမ် လူင် ပီ အီ ဟဝ်။”

8 ဂေ ဒါ တာင် ဒူအီ ဖီလီထီ မိူဝ် ဒိုဝ်း ဝန် ဟုန် ဘူ ညွင့် အီ ဆီ အိမ်၊ ဒွါ ဒီ နာင် ဒေလီလာ။ အန် မိူဝ် ပက် အုန် အာဆာမ်ဆူန်။ 9 အန် ဝီ စ်ု ဒူအီ မင် အီ၊ တဲး ဂေ ချြီင် ခဲင် ဟူင် အိတ် အန်။ အန် မိူဝ် ဝီ ဒဲ့ အာဆာမ်ဆူန် တဝ်း၊ “အိုယ် အာဆာမ်ဆူန်၊ ဂေ ဒူအီ ဖီလီထီ ဟဲ့ တး၊ တဝ်း ဒီ မှေတ့် မဲ။” အာဆာမ်ဆူန် မိူဝ် ဒိူတ် ကာဒတ် ဝန် ဂေ တွိုန်၊ တဲး န့ ပီ အန် ဒိူတ် ကာဒတ် ဝန် ကာတမ် ရေန့် အီ ဟဲ့ ကာဆိုမ် ဒီ ငဝ်။ ဂေ မိူဝ် တူ ပွိုန် ဒီ နပ် လွင် ဟဲန့် အန် တွိုန်။

10 နာင် ဒေလီယာ ဝီ တဝ်း ဒီ အာဆာမ်ဆူန်၊ “မဲ ဟဲ့ ညဝ့် အုဝ်၊ ကာလုဝ် အုဝ်။ ဒေါ တီ နီ၊ တဲး မဲ ဝီ ကာလာင် ဒီ အုဝ် ဒီ တာ မာဆေ၊ ပွိုန် ဒီ ပက် မဲ။”

11 အာဆာမ်ဆူန် ဝီ တဝ်း ဒီ အန်၊ “ဆေ မဲ ဒိုဝ်း ဝန် ကာမာယ် ပီ ညှမ် ဒွိုမ် စ်ု အီ ဘော ပက် အုဝ်၊ ပက် ဆီချာ ဆီချာ၊ ပ့လူမ် အုဝ် ဂေ ဟဲန့် အုဝ် ကော ဒီ ယူမ် လူင် ပီ အီ ဟဝ်။”

12 ပါယ် တီ နာင် ဒေလီယာ ဝီ ဒိုဝ်း ဝန် ကာမာယ်၊ ပက် ဆီချာ ဆီချာ အန်။ ပါယ် တီ ဂေ ဒူအီ အီ ဘ်ု ဒီ ယွတ် တွိုန်၊ ဂေ ဟဲ့ ဝီ ချြီင် ဂေ ခဲင် ဟူင် အိတ် အန်။ ဒေါ အန် တီ နာင် ဒေလီလာ ဝီ ဒဲ့ အန် တဝ်း၊ “အိုယ် အာဆာမ်ဆူမ်၊ ဂေ ဒူအီ ဖီလီထီ ဟဲ့ တး တဝ်း ဒီ မှေတ့် မဲ။” အာဆာမ်ဆူန် ဘော ဒိူတ် ကာဒတ် ဝန် တွိုန် ပီ အန် ဒိူတ် ကာဒတ် ဆေန့် ဒီတဲတ်။

13 နာင် ဒေလီယာ ပီ ဝီ ကာလာင် ဒီ အာဆာမ်ဆူန် တဝ်း၊ “မဲ ပီ ဆီ နဲ့ ညဝ့် အုဝ်၊ ကာလုဝ် အုဝ်။ ကာလာင် ဒီ အုဝ် လုဝ် ဒိုဝ်း မာဆေ ကော ပွိုန် ပက် မဲ။” အာဆာမ်ဆူန် ဝီ တဝ်း ဒီ အန်၊ “ဆေ ဘေ ဒိုဝ်း ဟိုက် ဂိန့် အုဝ် ဘူ ညှူမ်၊ ဝီ ဒဝ့် ဒိုက် ခဲင် ဘိက် ပီ ဒဝ့် ဂေ၊ ပီ ဝီ ဒိုဝ်း မာကာထွက် ဒွက် ဟပ် ခဲင် န့ကြိုဝ်း ဒဝ့် ဘိက်၊ ဟဲန့် အုဝ် ဂေ ပ့လူမ် အုဝ် ကော ဒီ ယူမ် လူင် ပီ အီ ဟဝ်။” 14 ဒေါ အိတ် အန် နာင် ဒေလီလာ ဝီ ဒိုဝ်း ဟိုက် ဂိန့် အန် ဘူ ညှူမ်၊ ဝီ ဒဝ့် ဟပ် ခဲင် ဘိက် ပီ ဒဝ့် ဂေ၊ ပီ ဝီ ဒိုဝ်း မာကာထွက်၊ ဒွက်။ ဟဲ့ ဟွတ့်၊ အန် ဘော ဝီ ဒဲ့ တဝ်း၊ “အိုယ် အာဆာမ်ဆူန်၊ ဒူအီ ဖီလီထီ ဟဲ့ တး၊ တဝ်း ဒီ မှေတ့် မဲ။” အာဆာမ်ဆူန် ဘော ဝီ န့ဆိုဝ်း။ အန် ဘော ဝီ ဒိူတ် လေး ဟိုက် ဂိန့် အန် ခဲင် ဒဝ့် တွိုန်။

15 နာင် ဒေလီလာ ပီ ဝီ တဝ်း ဒီ အာဆာမ်ဆူန်၊ “မှဝ် မဲ တဝ်း၊ ‘အုဝ် ရွက့် မဲ။’ န့ ယီ တူ ဘာ နဝ်း မဲ။ မဲ ဟဲ့ ညဝ့် အုဝ်၊ ဟဲ့ နုဝ့် အူယ် ဇေန့်။ မဲ ယီ တူ ကာလာင် ဒီ အုဝ် ကူပ် မာဆေ ပီ မိုဝ်း မဲ ပ့လူမ် ကိူန် ခဲ့ တီ။” 16 အီဘိုန့် တွိုန် ဘော ဒုက် အန် ဒွန် မှိုဝ် ဒွန် ညှာ၊ တဲး အန် ကာလာင်၊ တဲး အန် ကော ပိုဝ် ကော ဖဲ၊ တဲး အန် ကော ဝီ ဆီ ယမ်။

17 ပါယ် တီ အန် ဘော ကာလာင် ခဲ့ ဘော မိုဝ်း ခဲင် နဝ်း အန်။ အန် တဝ်း၊ “ဟိုက် ဂိန့် အုဝ် နီ၊ အုဝ် တူ ဒွိုမ် ဂါ့ ဆိန့် ဒေါ ဂွိုတ် အုဝ်။ အုဝ် ဟဲ့ အာပ် လှူ ဒုဝ် အုဝ် ဒီ ဇဝ်ဖြာ၊ ဘဲန် ဒူအီ နာစာရီ။ ဆေ ဟီ ဂါ့ ဟိုက် ဂိန့် အုဝ် နီ၊ ပ့လူမ် အုဝ် ဂေ ဟဲန့် အုဝ် ဒီ ဝီ ယူမ် လူင် ပီ အီ ဟဝ်။”

18 ပါယ် တီ နာင် ဒေလီယာ ဟဲ့ နပ်၊ ခါ နီ အန် ဟဲ့ ကာလာင် ဂြုဝ်း မုး ဂြုဝ်း မှာန် အာခါခ်ု။ အန် ဘော ဝီ ကာလာင် ဟာဝ် ဂြုဝ်း ဒီ ဒါ တာင် ဒူအီ ဖီလီထီ အန် တဝ်း၊ “တဲး ဘေ ဝီ တး ပေါ အူ ဇေန့်။ ခါ နီ အန် ဟဲ့ ကာလာင် အီ မုး အီ မှာန် ဒီ အုဝ်။” ဒါ တာင် ဒူအီ ဖီလီထီ မိူဝ် ဂူင့် တး ရွိုန်၊ တး ဒွါ ဒီ အီဘိုန့် တွိုန်။ 19 နာင် ဒေလီလာ ဝီ တဲး အာဆာမ်ဆူန် မာကွိုမ် ဂိုမ် အန်။ အန် ဘော မာလှိုမ် တဲး အန် ပွိုန် ဒီ အိတ်။ အန် ဘော ဝီ ဒဲ့ ဒူအီ ပေါ အူ ဝီ၊ ဝီ တး ဂါ့ ဟိုက် ဂိန့် အာဆာမ်ဆူန် ဘူ ညှူမ် တွိုန်။ ပ့လူမ် အန် ကာစုး ဒီ ယူမ် တဲး ဟဲန့် အာဆာမ်ဆူန် ကော ဟြာယ်။

20 ဟဲ့ ဟွတ့် ပါယ် တီ အန် မိူဝ် ဝီ ဒတ် တဝ်း၊ “အိုယ် အာဆာမ်ဆူန်၊ ဒူအီ ဖီလီထီ ဟဲ့ တး တဝ်း ဒီ မှေတ့် မဲ။” အာဆာမ်ဆူန် ဘော န့ဆိုဝ်း။ အန် ဝီ ကာဖာ တဝ်း၊ “အုဝ် ဒီ ဘော လွတ် ပီ အာတ့် နီ တွိုန်။” အန် ယီ တူ နပ် ဇဝ်ဖြာ ဟဲ့ ဟွတ့် ဘ့လေး ဝဲန် အန်။

21 ဂေ ဒူအီ ဖီလီထီ ဘော တး မှေတ့် အန်။ ဂေ ဘော ဂွဲ့ လေး ခေါ ငါယ် အန် ဘော အာ ဘူင့်။ ဂေ ဘော ဝီ ဒိုဝ်း လူင် အန် ဒီ မိူင် ဂါဆာ၊ ဝီ ဒိုဝ်း ဝန် ဘွင့် ဒေန့် ပက် အန်။ ဂေ ဝီ စ်ု အန် ကြိတ် ဒီဂါဝ် ခဲင် ကာပိုမ်။ 22 မာလဲ၊ ဟိုက် ဂိန့် အန် ပီ ဝီ ကြဲ ဒီ တူင့် ပေါ အူ ဇေန့်။

23 ခဲ့ ကွယ် ဂေ ဒါ တာင် ဒူအီ ဖီလီထီ ဟဲ့ တး ကာဇု ဘူင် ဘ့လွယ် လှူ ဒီ ဇဝ် ဒါဂူန် အီ မုး ဇဝ် ပီ ကြိုပ် ဂေ။ ဂေ ဘော ဘူင် တဲး ဘျုဝ် ဘျုဝ် ကျဝ် ကျဝ်။ ဂေ ဘော တဝ်း၊ “ဇဝ် ပီ ကြိုပ် အေ ဟဲ့ တဲး အေ အွင် ရန်ဆူ အေ အီ မုး အာဆာမ်ဆူန် နီ။”

24 ဒေါ ယိုဝ် ဂေ ဒူအီ ကိူန် ဒီ အာဆာမ်ဆူန်၊ ဂေ မိူဝ် အိူပ် ဇဝ် ပီ ကြိုပ် ဂေ တဝ်း၊ “ဇဝ် ပီ ကြိုပ် အေ၊ ဟဲ့ အာပ် ရန်ဆူ အေ ဒီ အေ။ အန် ဟဲ့ မုး အီ ပျာတ့် မိူင် အေ၊ ဘော ဟဲ့ ဘူင် တဲး ဒူအီ ယမ် ကြဲ ဒီ ကိူန်။”

25 ဒေါ ဟဲ့ ကျဝ် ဂေ တီ၊ ဂေ ဝီ တဝ်း၊ “ဒဲ့ အာဆာမ်ဆူန် တး ဒီ နီ၊ တဲး အန် တး ဖီလှာက် တဲး အေ ယွတ်။” ဂေ မိူဝ် ဒဲ့ လေး အန် ခဲင် ကာပိုမ် တွိုန်။ အန် မိူဝ် ဖီလှာက် တဲး န့ မွှိုမ် ကာညး။ ဂေ ဘော ဒိုဝ်း ဘ့လေး အန် ဒီ ကာတဲ ရွင့် ကာင် တာင် တွိုန်။

26 အာဆာမ်ဆူန် ဝီ ကာလာင် ဒီ ဂွန် အီမာယ် အီ ပါ ဒဲ အန် တဝ်း၊ “တဲး မဲ ဟာဝ် ဘ့လေး အုဝ် ခူပ် ရွင့် အီ ဘိုမ် ကာင် တာင် တီ၊ တဲး အုဝ် ပွိုန် ဒီ နေ ဒီ ရွင့် တီ။”

27 ခဲင် ကာင် တာင် တီ၊ ဟဲ့ မိုဝ်း ဘော အီဘိုန့် အီမာယ် ဘော ဂေ ဒါ တာင် ဒူအီ ဖီလီထီ၊ ဂေ ဟဲ့ တး ကွယ် တူတ့် ဒီ တီ။ ဒဲင် တီ၊ န့ ဘော မိုဝ်း ဘော အီဘိုန့် အီမာယ် ဝီ ကွယ် နာ ဒဲင် ကာတု ကာင် အူယ် ဟြဲန့် ဝီ၊ ဘ်ု ဒီ ယွတ် ပီ ပါယ် အာဆာမ်ဆူန် ဒီ ဖီလှာက် အန်။ 28 ဒေါ အန် တီ အာဆာမ်ဆူန် ဘော ဆာခိုဝ် ဇဝ်ဖြာ တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ တဲး မဲ လှုဝ်း အုဝ် အီ မုး ဒဲစေန့် မဲ။ အုဝ် မှာန့်၊ တဲး မဲ ဒွါ ဟဲန့် ဒီ အုဝ် မီ ပေါ ဇေန့် နီ၊ တဲး အုဝ် ပွိုန် ဒီ ဝီ ဘူင် ဝျီ့ ဒီ ဂေ မီ ပေါ အူ ဇေန့် နီ။ တဲး အုဝ် ပွိုန် ဒီ ဝီ ဘူင် ဝျီ့ ဒီ ဂေ ဒူအီ ဖီလီထီ အီ ဟဲ့ ဂွဲ့ လေး ငါယ် အုဝ် ဘော အာ ဘ့လာက် နီ။” 29 အာဆာမ်ဆူန် ဘော ပါ ရွင့် အာ ညွင့် အီ ကွယ် ဒီ ကာတဲ အီ ဘိုမ် ကာင် တာင် တွိုန်။ ဒဲ အန် ဘ့လာက် အာအး ဘော ညူ လေး အူ ညွင့်။ ဒဲ အန် ဘ့လာက် အာဂ ပီ ဝီ ညူ လေး ပေါ အူ ညွင့်။ 30 အန် မိူဝ် ဒတ် တဝ်း၊ “တဲး အုဝ် ယမ် ရိုမ် ဒူပ် ဂေ ဒူအီ ဖီလီထီ ဂေ နီ။” အန် မိူဝ် ပီလေး တူတ့် ခဲ့ မိုဝ်း အန် ဟဲန့် ဘော ဇုန် ရွင့် တီ။ ကာင် တာင် တွိုန် ဘော ကာဘက် ဒီဂြပ် လူင် ထိပ် ဒဲင် ဂေ ဒါ တာင် ဘော ဂေ ဒူအီ ဘောကာဂ့လျီတ်။ ပါယ် တီ ဂေ အီ ယမ် ရိုမ် ဒေါ ယမ် အန် တီ၊ န့ ကိူန် လွှိုမ် ဂေ အီ ယမ် ဒေါ ဆီ အိမ် အန်။

31 ဟဲ့ ဟွတ့် ပါယ် တီ ဂေ ဝါ အန် ဘော ဒူအီ ခဲင် န့ဟူမ် အန် ဘော ဝီ တး ဒိုဝ်း ဒုဝ် ယမ် အန် တီ၊ ဝီ ဟာဝ် ဒိပ် ဒီ ကာတဲ မိူင် ဇုဝ်ရာ ဂါယ် မိူင် အေဆာတောလာ ခဲင် ဘာရေဝ် ဂုန့် အန် အီ စိူဝ် အာမာနော တွိုန်။ အန် မိူဝ် ဟဲ့ ဘဲန် ဒါ တာင် အီ ဆုင်ဖျာတ် ဒါရာ ဒီ ဂေ ဒူအီ အီဆာရေလ အာဒါ အာ ဂိုဝ် ဆီနမ်။