1 ဝါယ် အန် တီ ဟဲ့ ရာမ် လှေန့် အာဆာမ်ဆူန် ဘော ဝီ ဟာဝ် စ်ု အီဘိုန့် အန် ဒေါ မုး အာခြာဝ် ဆုဝ့် ငှုဝ်။ အန် ဘော ဂူင့် ဟာဝ် ဘော မာပဲ ဒီတဲတ် အူ ဒုဝ်။ အန် ဘော တဝ်း၊ “အုဝ် ဒီ ဟာဝ် လိုပ် ခဲင် အိတ် ဒူင် ကွယ် အီဘိုန့် အုဝ်။” မာလဲ၊ ဘိုဝ် အန် ယီ တူ တဲး အန် ဟာဝ် လိုပ်။

2 ဘိုဝ် အန် ဝီ ကာလာင် ဒီ အန် တဝ်း၊ “အုဝ် ထာင်၊ မဲ ဟဲ့ ဇွင့် ကာဆဝ် အန်၊ အုဝ် မိူဝ် ဟဲ့ ဝီ အာပ် တဲး အန် ဘဲန် အီဘိုန့် ဂိုက် မဲ။ မာလဲ၊ ဝါ အန် ပီ ဆီ စှိတ် လွှိုမ် အန်။ တဲး မဲ ဝီ ဒိုဝ်း ဝါ အန် တီ ကာဒါင် အန်။”

3 ပါယ် တီ အာဆာမ်ဆူန် ဝီ တဝ်း၊ “ခါ နီ ဟာဝ်၊ ပီ ဒီ ဘူင် အုဝ် ဒီ ဂေ ဒူအီ ဖီလီထီ၊ အာဝ် ဟူ ဘဲန် မှာပ် ဒီ အုဝ်။ အုဝ် ဒီ ဘူင် နာ စာဝ် ဒီ ဂေ ပါယ် ခါခ်ု။” 4 အန် ဘော ဟာဝ် မှေတ့် မာဆုဝ် ပြဲ အူယ် မာယဝ်း ဒုဝ်။ အန် ဘော ပက် ကာဒိုက် ဆီဒါ ဂေ ဘဲန် ဂူ ဘဲန် ဂူ၊ ပီ ဝီ ဒိုဝ်း ငဝ် ရာင် ပက် ဒိုက် ဒီ ဆီဒါ ဂေ။ 5 ဟဲ့ ဟွတ့်၊ အန် ဘော ပီဒဝ့် ငဝ် ရာင် တွိုန်၊ ဝီ ဘ့လေး တဲး ဂေ ဟာဝ် ခဲင် ဒူင် နာ ဂေ ဒူအီ ဖီလီထီ။ ပါယ် တီ ငဝ် ဘော ကာဆိုမ် ငှုဝ် ဂေ၊ ဘော ကာယူင့် ဘော ဒင် အန်။ ဒဲင် တီ၊ န့ ဘော ကာဆိုမ် ဘော အူင့် ဟေ နာမန် ဂေ၊ ဘော မာန် မာငုန် ဂေ။

6 ဂေ ဒူအီ ဖီလီထီ ဘော ဝီ လာယ် ဒီမွှတ် တဝ်း၊ “အာဆေ အီ ဘူင် အာတီ။း” ဟဲ့ ဟွတ့်၊ ဂေ ဘော ဝီ နပ်၊ ဟဲ့ မုး အာဆာမ်ဆူန် အီ ဘူင် ပါယ် တီ။ ခုဝ်၊ ဘိုဝ် အန် အီ မုး ဒူအီ အာမျုဝ် ထီမာနာ တွိုန် ဟဲ့ ဒိုဝ်း အီဘိုန့် အန်၊ ဝီ အာပ် ဒွါ ဒီ ဂိုက် အန်။ ပါယ် တီ ဂေ ဒူအီ ဖီလီထီ ဘော ဝီ ဟာဝ် ဒိုဝ်း အီဘိုန့် တီ ဘော ဂုန့် အန် တွိုန်၊ ဒုဝ့် ခဲင် ငဝ်။ 7 အာဆာမ်ဆူန် ဝီ တဝ်း ဒီ ဂေ၊ “ပီ ဘူင် ဘေ နီ၊ အုဝ် ဒီ ဝီ ဘူင် ဝျီ့ ဒီ ဘေ၊ တဲး န့ ကော ဘြေ့ ဒီ နဝ်း အုဝ်။” 8 အန် ဘော ကာဂုဝ်း ဒီ ဂေ ဘော မး ကာဆဝ် ဂေ။ အန် ဘော ငဝ်း ယမ် ဂေ ကိူန်။ ဝါယ် တီ၊ အန် ဘော ဝီ ဟာဝ် ကွယ် ခဲင် ကာဒဝ် မာဝ် ဒူင် စိူဝ် အေထာမ်။

9 ဂေ ဒူအီ ဖီလီထီ ဘော ဝီ ရဲန် ဆိုက်။ ဂေ တး ချ ခဲင် ကာဒါယ် မိူင် ယူဒါ။ ဂေ ဘော ကာယဝ်း ဟာဝ် ဒွန် နာ ဒွန် ပ့လုဝ့် ခူပ် မိူင် လေဟီ။ 10 ဂေ ဒူအီ အာယူဒါ ဘော ဝီ ဟာဝ် ဒီမွှတ် ဂေ တဝ်း၊ “မှဝ် န့ ပါယ် ပီ လုဝ် တး ကာဂုဝ်း ဘေ ဒီ ယေ။း” ဂေ မိူဝ် ဝီ တဝ်း၊ “ယေ တး တဲး ယေ ပွိုန် ဒီ မှေတ့် အာဆာမ်ဆူန်၊ ခြွင့် အန် ခဲင် ကာပိုမ်၊ တဲး န့ ပီ ပဲ့ ဟဲ့ ဘူင် အန် ဒီ ယေ။”

11 ပါယ် တီ ဂေ ဒူအီ အာယူဒါ အာဒါ အူယ် မာယဝ်း ဝီ ဘော ဟာဝ် ဒီ ကာဒဝ် မာဝ် အေထာမ် တွိုန် ဘော ကာလာင် ဒီ အာဆာမ်ဆူန် တဝ်း၊ “မဲ ဟဲ့ နပ် ဆီချာ လွင် ဂေ ဒူအီ ဖီလီထီ အီ အိုပ် ယေ။ ဒေါ တီ နီ မဲ ဟဲ့ ဘူင် တဲး ယေ ဇမ် ဒုက်။” အန် ဝီ တဝ်း၊ “အုဝ် ဘူင် ဝျီ့ ဒီ ဂေ၊ ခဲ့ ပီ ဘူင် ဂေ ဒီ အုဝ်။”

12 ဂေ ပီ ဝီ တဝ်း ဒီ အန်၊ “ယေ တး ဒီ နီ၊ တဲး ယေ ပွိုန် ဒီ မှေတ့် မဲ၊ ဟာဝ် အာပ် ဒီ ဒူအီ ဖီလီထီ။” အာဆာမ်ဆူန် ဝီ တဝ်း ဒီ ဂေ၊ “တဲး ဘေ ခမ် ဂြုဝ်း ဒိူင်၊ ဘေ တူ ငဝ်း ယမ် အုဝ်။”

13 ဂေ မိူဝ် ဝီ တဝ်း ဒီ အန်၊ “ဟဲ့ မှာန်၊ ယေ တူ ငဝ်း ယမ် မဲ။ ယေ ဒီ ဒိုဝ်း ဝန်၊ ပက် မဲ၊ ဝီ ဟာဝ် အာပ် မဲ ဒီ ဂေ ဒူအီ ဖီလီထီ။” ဂေ ဘော ဒိုဝ်း ဝန် ကာမာယ် အာ ညွင့်၊ ပက် အန်၊ ဂေ ဘော ဒိုဝ်း လေး အန် နာ ရေတ့် ကာဒဝ် တွိုန်။ 14 ဒေါ တး ဇမ် ဂေ ဒီ မိူင် လေဟီ တွိုန်၊ ဂေ ဒူအီ ဖီလီထီ မိူဝ် ဟုန်ဆာ ကာဘ့လဲပ် တး ညိူဝ် အန်။ ဒေါ အန် တီ အူ ဇေန့် ပွုန် နဝ်း ဖွိုမ် ဇဝ်ဖြာ ဘော ဝီ တဲး ဟဲန့် အီ ကိူန် ကာဆဝ် ဒီ အန်။ အန် ဘော ဒိူတ် ကာဒတ် ဝန် ပီ ပက် ဂေ ဒီ အန်။ န့ ဘော ပီ၊ အန် ဒိူတ် ကာဒတ် ဝန် ကာတမ် ရေန့် အီ ဟဲ့ ကာဆိုမ် ငဝ်။ 15 ဒေါ အန် တီ အန် ဝီ ယိုဝ် ကာအာင် ကုင်ကာပ် မာလာ အီ ညှမ် အုး အမ်၊ အန် ဘော ဒိုဝ်း ကာအာင် တီ၊ မး ဒူအီ ကိူန်။ အန် ဘော ပွိုန် ဒီ ငဝ်း ယမ် ဒူအီ အူ ဟြဲန့် ဝီ၊ တာ ကာအာင် ကုင်ကာပ် မာလာ တီ။

16 အာဆာမ်ဆူန် ဘော ဝီ တဝ်း၊ “အုဝ် ဟဲ့ တာ ကာအာင် ကုင်ကာပ် မာလာ၊ တဲး ဒူအီ ဘဲန် ပီ မာလာ။ အုဝ် ဟဲ့ ပဲ ပီ ယမ် ဒူအီ ဘဲန် ဟြဲန့် ဝီ၊ တာ ကာအာင် ကုင်ကာပ် မာလာ နီ။” 17 အန် ဟဲ့ ဟွတ့် တဝ်း ပါယ် တီ အန် ဘော ဝီ ဆာဝိုန့် ဝဲန် ကာအာင် ကုင်ကာပ် မာလာ တွိုန်။ ဂေ ဘော တဲး ဒူင် တီ စိူဝ် ဟာမာတ်လေဟီ။

18 ဒေါ အန် တီ အာဆာမ်ဆူန် ဟဲ့ ဝီ ဆီ ဒျီင် ကာဆဝ် အိုမ်။ အန် ဘော ဝီ ဆာခိုဝ် ဒဲ့ ဇဝ်ဖြာ တဝ်း၊ “မဲ ဇဝ် ဟဲ့ စွယ် တဲး အုဝ် အီ မုး ဒဲစေန့် မဲ ကာဂုဝ်း အွင်။ ဒေါ တီ နီ၊ မဲ ဆီ တဲး အုဝ် ဝီ ယမ် ကူပ် တူ မိုဝ်း အုဝ် ဒီ ဒျီင် အိုမ်။း မဲ ဆီ တဲး ဂေ ဒူအီ ဖီလီထီ အီ မုး ဒူအီ အီ တူ ဒူပ် မဲ ဝီ ပဲ အုဝ်။း” 19 ဒေါ အန် တီ ဇဝ်ဖြာ ဘော ဝိုဝ်း တဲး အိုမ် တုဝ်း လေး ခဲင် ကာဒဝ် ကာဒါယ် ဒီ မိူင် လေဟီ တွိုန်။ အိုမ် တီ ဘော လေး တး အူ ဇေန့်။ အန် ဟဲ့ ဟွတ့် ဒျီင် အိုမ် တီ၊ အန် ဘော မိုဝ်း ပ့လူမ် ဂေ ဟဲန့်။ အိုမ် တုဝ်း တီ ဂေ ဘော တဲး န့ စိူဝ် အေန်ဟက်ကောရာ။ န့ ဘော ကွယ် ဒီ မိူင် လေဟီ တီ ကော ဇမ် ဒေါ တီ နီ။

20 အာဆာမ်ဆူန် ဟဲ့ ဘဲန် ဒါ တာင် အီ ဆုင်ဖျာတ် ဒါရာ ဒီ ဂေ ဒူအီ အီဆာရေလ ဒေါ မုး စုဝ် ဘာန် ဂေ ဒူအီ ဖီလီထီ တီ အာဒါ အာ ဂိုဝ် ဆီနမ်။