1 အာဒါ အူ ဆီငဲ အာဆာမ်ဆူန် ဘော လူင် ဒီ မိူင် ထီမာနာ။ အန် ဘော ယိုဝ် ဒီဘျာ ဒူအီ ဖီလီထီ အူ ဝီ ခဲင် မိူင် တီ။ 2 အန် ဘော ဝီ ဝေန့် ဒီ ကာင် အန်၊ ဝီ မှာန့် ဒီ ဂုန့် အန် ဂါယ် မာ အန် တဝ်း၊ “အုဝ် ဟဲ့ အိုင် ဒီဘျာ ဒူအီ ဖီလီထီ အူ ဝီ အီ ကွယ် ခဲင် မိူင် ထီမာနာ။ အုဝ် မှာန့်၊ တဲး အန် ဘဲန် အီဘိုန့် အုဝ်။”

3 မာလဲ၊ ဂုန့် မာ အန် ဝီ တဝ်း ဒီ အန်၊ “မှဝ် န့ ပါယ် ပီ လုဝ် ဟာဝ် ဒိုဝ်း မဲ ဒီဘျာ ဒူအီ ဖီလီထီ အီ မုး ဒူအီ အာမျုဝ် ဟဝ်။း မှဝ် န့ ပါယ် ပီ တူ နပ် မဲ ဒီ ဟြေတ့် ဒီဘျာ အီ မုး ဒူအီ အာမျုဝ် အေ၊ ခြိုဝ် အေ။း” အာဆာမ်ဆူန် ယီ တဝ်း ဒီ ဂုန့် အန်၊ “တဲး မဲ ဒီမွှတ် ဒီ အုဝ်။ အုဝ် ဟဲ့ အိုင် အန် ဒီ။” 4 ဂုန့် မာ အန် တူ နပ် န့ မုး ပီ ဘူင် ဇဝ်ဖြာ။ ခုဝ်၊ ဇဝ်ဖြာ ဟြေတ့် ပီ ဒီ ပါယ် ဒီ ကာဂုဝ်း ဒီ ဒူအီ ဖီလီထီ အီ အိုပ် ဒူအီ အီဆာရေလ ဒေါ အန် တီ။ 5 ပါယ် တီ အာဆာမ်ဆူန် ဘော ဟာဝ် လူင် ဒီ မိူင် ထီမာနာ ဒူပ် ဂုန့် အန် ဂါယ် မာ အန်။ ဒေါ တး ဇမ် ဂေ ဒီ မာန် မာငုန် အီ ကွယ် ရေတ့် မိူင် ထီမာနာ၊ ဂေ ဘော ယိုဝ် မာခြင်ဆီ အူ ဒုဝ် အီ ဟမ် ကာအိူန် ဘော တး ဆိူဝ် ဒီ အာဆာမ်ဆူန်။ 6 ဒေါ အန် တီ အူ ဇေန့် နဝ်း ဖွိုမ် ဇဝ်ဖြာ ဘော တး ပ့လိုက် အာဆာမ်ဆူန်၊ ဘော တဲး အန် မိုဝ်း ပ့လူမ် မိုဝ်း ဟဲန့် ကိူန် ကာဆဝ်။ အန် ဘော ပါ ကာယာတ့် မာခြင်ဆီ တွိုန်၊ တာ မီ ဒဲ အန်၊ တဲး န့ ပီ အန် ပါ ကာယာတ့် ဂွန် မာပဲ။ မာလဲ၊ အန် တူ ကာလာင် ပီ ဘူင် အန် တီ ဒီ ဂုန့် အန် ဂါယ် မာ အန်။ 7 အန် ဘော တး ဂြုဝ်း တး မွုန် ဒီဘျာ တွိုန်၊ အန် ဘော အိုင် ကာဆဝ် ဒီဘျာ တီ။

8 ဝါယ် အန် တီ အာဝ် လှေန့် အာဆာမ်ဆူန် ဝီ တဝ်း ဒီ ဟာဝ် ခတ် ဒိုဝ်း ဒီဘျာ တွိုန်။ ဒေါ ဟာဝ် အန် ဒူပ် န့တေန့်၊ အန် ဝီ ဝး ဟာဝ် ယွတ် မာခြင်ဆီ ပီ ငဝ်း ယမ် အန် တွိုန်။ အန် ဝီ ယိုဝ် န့လာင် မာဖျီန် ဘော ငါမ် မာဖျီန် ဟဲ့ ကွယ် ခဲင် ကာအူင့် ဒုဝ် မာခြင်ဆီ တွိုန်။ 9 အန် မိူဝ် တာ ဒဲ အန်၊ စူက် ငါမ် မာဖျီန် တွိုန်၊ ဝီ ဟပ် ခဲင် ကာတိုင် ဒဲ အန်။ အန် ဝီ ဟူမ် ဒေါ ဟာဝ် အန် ဒူပ် န့တေန့်။ အန် ဘော ဟာဝ် ဇမ် ဒူင် ကွယ် ဂုန့် အန် ဂါယ် မာ အန်၊ အန် ဒွါ ဘော ဂါယ် ဟူမ်။ ဂါယ် ဘော ဟူမ်။ မာလဲ၊ အန် တူ ကာလာင် ဒီ ဂါယ် လွင် ဟဲ့ ဒိုဝ်း အန် ငါမ် မာဖျီန် တီ ခဲင် ကာအူင့် ဒုဝ် ယမ် မာခြင်ဆီ တွိုန်။

10 ပါယ် တီ ဂုန့် အန် ဘော ဟာဝ် ဒူင် ကွယ် ဂွန် အီဘိုန့် တွိုန်။ အီ မုး အာဆာမ်ဆူန်၊ အန် ဘော ဘူင် ဘ့လွယ် ပီ လုဝ် ဘူင် ကာညူမ်၊ တဲး န့ ဒူပ် ဟိတ် ထုင်ဂျာမ် ဂေ။ 11 ဂေ ဒူအီ ဖီလီထီ ဘော ယိုဝ် အန်၊ ဂေ ဘော ရဝ်း ကာညူမ် အူယ် ဂိုဝ် ဝီ၊ တဲး ဂေ ဘဲန် ဂိုက် အန်။

12 အာဆာမ်ဆူန် ဝီ ကာလာင် ဒီ ဂေ တဝ်း၊ “အုဝ် ဒီ ကာလာင် ဂြုဝ်း လာယ် တ ဒီ ဘေ။ ဆေ ဘေ ဘော ပဲ ဒီ ဝျီ့ ကာန်ု ဘ့လွယ် အာဒါ ဘူ ဆီငဲ နီ၊ အုဝ် ဒီ ဒွါ ခြိုင် ကာတမ် လုယ် အူယ် ဂိုဝ် ဇိုမ် ဒီ ဘေ၊ ဘော ခြိုင် တာ အီ စှိတ် ကာဆဝ် အာဒါ အူယ် ဂိုဝ် ဇိုမ်။ 13 ဆေ ဘေ ယီ တူ ပဲ ဒီ ဝျီ့၊ ဘေ လုဝ် ဝီ ဒွါ ခဲ့ တီ ဒီ အုဝ်။” ဒူအီ ဂေ တွိုန် ဝီ တဝ်း ဒီ အန်၊ “အိုဝ်၊ ကာလာင် တဲး ယေ ထူမ် ဂြုဝ်း လာယ် တ မဲ တီ။”

14 အန် မိူဝ် ကာလာင် တဲး ဂေ ထူမ်။ အန် တဝ်း၊ “ခဲင် မျုဝ် အီ နပ် ဒီ ဟူမ်၊ န့ ဘော ဝီ လေး အာမျုဝ် အီ မုး ပီ ဒီ ဟူမ်။ ခဲင် မျုဝ် အီ ကျ အီ မိုဝ်း ဟဲန့် ကိူန်၊ န့ ဘော ဝီ လေး အီ ဆီငဲး အီ ငါမ်။” ဆီဖဝ် ဂြုဝ်း လာယ် တ တီ၊ ဂေ ဘော ဟြေတ့် အာဒါ အူယ် ဆီငဲ၊ ဂေ ယီ ညှမ် နပ် ပီ မုး။

15 န့ ဘော နုဝ့် ဖွုန် ဆီငဲ၊ ဂေ ဘော ကာလာင် ဒီ အီဘိုန့် အာဆာမ်ဆူန် တွိုန် တဝ်း၊ “တဲး မဲ ငျော အီမာယ် မဲ၊ တဲး အန် ကာလာင် ဆီဖဝ် ဂြုဝ်း လာယ် တ တွိုန်။ ဆေ အာဝ် ပါယ် တီ ယေ ဒီ ဒုဝ့် မဲ ဘော ဒူအီ ခဲင် န့ဟူမ် ဂုန့် မဲ ခဲင် ငဝ်။ န့ ပီ ဘာယ် အီမာယ် မဲ၊ ဟဲ့ ဘာင် တဲး ယေ တး၊ ဘာယ် ဝီ ဆီ ဇူန် ယေ။”

16 ပါယ် တီ အီဘိုန့် အာဆာမ်ဆူန် တွိုန် ဘော အိုမ် မုး အိုမ် ငါယ်၊ ဝီ တဝ်း ဒီ အီမာယ် အန်၊ “မဲ တူ ရွက့် အုဝ်၊ မဲ ဇွင့် အုဝ်။ မဲ ဟဲ့ ကာလာင် ဂြုဝ်း လာယ် တ ဒီ ဂေ ဂိုက် အုဝ်၊ မဲ ယီ တူ ကာလာင် ဆီဖဝ် အန် တဲး အုဝ် နပ်။” အန် ဝီ တဝ်း ဒီ အီဘိုန့် အန်၊ “မဲ ယွတ်၊ ဟဲ့ မုး ဂုန့် မာ အုဝ် မိူဝ်၊ အုဝ် တူ ကာလာင်။ အုဝ် ဒီ ဘော ပွိုန် ကာလာင် ဒီ မဲ။း” 17 အီဘိုန့် အန် တွိုန် ဘော ယာမ် ဒတ် ဒီ အာတ့် အန်။ အန် ဘော ငျော ဘော ဒုက် အီမာယ် အန် ဒွန် ဆီငဲ၊ ကော နုဝ့် ဘူ ဆီငဲ။ ဆီငဲ ဒီ နုဝ့် ဘူ ဆီငဲ တွိုန်၊ အီဘိုန့် အန် ဘော ဒုက် ကာဆဝ်၊ တဲး အန် ကာလာင် နှဲ ပီ ပါယ် ဆီဖဝ် ဂြုဝ်း လာယ် တ တွိုန် ဒီ အီဘိုန့် အန်။ ဟဲ့ ဟွတ့်၊ အီဘိုန့် အန် ဘော ဝီ ဟာဝ် ကာလာင် ဒီ ဂေ ဒူအီ ဖီလီထီ ဂေ တွိုန်။

18 ပါယ် တီ န့ ဘော ဇမ် ဆီငဲ မ့ဘူ၊ အာတ့် ဂေတ့် ဆီငဲ၊ ဒူအီ ဂေ တွိုန် ဘော ဟာဝ် ကာလာင် ဒီ အန် တဝ်း၊ “အာဝ် မိုဝ်း အီ ဆီ ဒီ ငါမ် လွှိုမ် ငါမ် မာဖျီန်။ အာဝ် မိုဝ်း အီ ဆီ ဒီ ဟဲန့် လွှိုမ် မာခြင်ဆီ။” အာဆာမ်ဆူန် ဝီ တဝ်း ဒီ ဂေ၊ “ဆေ ဘေ တူ ဒိုဝ်း မာမက် အုဝ်၊ ထဲ မာန် ဘေ၊ ဘေ ပီ ဘော ဟြေတ့် မိူဝ်၊ ဘေ တူ နပ် ဆီဖဝ် ဂြုဝ်း လာယ် တ တီ။”

19 ဒေါ အန် တီ အူ ဇေန့်၊ ပွုန် နဝ်း ဖွိုမ် ဇဝ်ဖြာ ဘော တဲး ဟဲန့် ကိူန် ဒီ အာဆာမ်ဆူန်။ အန် ဘော လူင် ဒီ မိူင် အာဆာခေလူန်၊ အန် ဘော ငဝ်း ယမ် ဒူအီ အူယ် ဂိုဝ် ဝီ။ အန် ဘော ဝီ ဒိုဝ်း ခြိုင် တာ ဂေ၊ ဝီ ဒွါ ဒီ ဂေ အီ ဟဲ့ ပဲ ဒီ ဝျီ့ ဂြုဝ်း ပီ လာယ် တ အန် တွိုန်။ ဝါယ် အန် တီ အန် ဘော ဝီ ရူ ကာဆဝ်။ အန် ဘော ဝီ ဝေန့် ဒီ ကာင် ဂုန့် မာ အန်။ 20 ဘိုဝ် အန် ဘော ဝီ အာပ် ဒွါ အီဘိုန့် အန် တွိုန် ဒီ ဂိုက် အန် အီ တး ဒီ ဘ့လွယ် ခတ် တွိုန်။