1 ဂေ ဒူအီ အီဆာရေလ ပီ ဝီ ဘူင် မှာပ် အီ တူ လဝ့် နဝ်း ဇဝ်ဖြာ။ ခုဝ်၊ ဇဝ်ဖြာ ဝီ တဲး ဒူအီ ဖီလီထီ အိုပ် ဂေ အာဒါ ဖွုန် ဂိုဝ် ဆီနမ်။

2 ဒေါ အန် တီ န့ မိုဝ်း ဒူအီ အူ ဝီ၊ အန် စိူဝ် အာမာနော။ အန် ဘော မုး ဒူအီ ခြိုဝ် အာဒါန် အီ ကွယ် ခဲင် မိူင် ဇုဝ်ရာ။ အီဘိုန့် အန် ဟဲ့ မှန်၊ တူ နပ် ဒီ မိုဝ်း ဂွန်။ 3 အာမူ အာမာတ် ဇဝ်ဖြာ ဘော တး ကာပ့လုး ဒီ အီဘိုန့် တီ ဘော ကာလာင် ဂြုဝ်း ဒီ အန် တဝ်း၊ “မဲ ပီ ဘော ဟဲ့ မှန်၊ တူ နပ် ဒီ မိုဝ်း ဂွန် မိူဝ်၊ မဲ ဒီ ဝီ ဒဲ ဘာဒိက် ဆန်ထေ၊ ဝီ မိုဝ်း ဂွန် အီမာယ် အူ ဝီ။ 4 ပါယ် တီ တဲး မဲ ဆာဒိက်၊ ကွဲ့ ဒျီင် ပဝ်း၊ ကွဲ့ ဒျီင် အိုမ် မာငုန် အီ ပြာင်၊ ကွဲ့ ဟူမ် ပီ ဒီ ဟူမ် အီ တူ ဆီငါ ဒူပ် ပီ ဒမ် ဒါရာ။ 5 ခုဝ်၊ မဲ ဒီ ဒဲ ဘာဒိက် ဆန်ထေ ဘော မိုဝ်း ဂွန် အီမာယ်။ ဆေ ဂွန် မဲ တီ ဟီ ဂွိုတ်၊ မဲ တူ ပွိုန် ဂါ့ ဂိန့် အန် ဒေါ မှဝ်။ ခုဝ်၊ စုး ဆိန့် ဂွိုတ် အန် တီ၊ အန် မုး ဒူအီ ပီ အိုပ် ဇဝ်ဖြာ ဆေဆေ။ အန် ဘော မုး ဒူအီ အီ ဟဲ့ လှူ အာပ် ဒုဝ် အန် ဒီ ဇဝ်ဖြာ၊ ဘဲန် ဒူအီ နာစာရီ။ အန် မိူဝ် ဘဲန် အီ ချွတ် လေး ဂေ ဒူအီ အီဆာရေလ ဒီ ဒူအီ ဖီလီထီ။”

6 အီဘိုန့် တွိုန် ဘော ဝီ ကာလာင် ဒီ အီမာယ် အန် တဝ်း၊ “ဒူအီ ပီ တိုယ် ဇဝ်ဖြာ အူ ဝီ၊ အန် ဟဲ့ တး ကာပ့လုး ဒီ အုဝ်။ အာရိုပ် အန် ပီ အာမူ အာမာတ် ဇဝ်ဖြာ အီ မွှိုမ် ယုဝ် ကာဆဝ်။ အုဝ် မိူဝ် တူ ဒီမွှတ် နာ တး အန်။ အန် မိူဝ် တူ ကာလာင် စိူဝ် အန် ဒီ အုဝ်။ 7 မာလဲ၊ အန် ဝီ တဝ်း ဒီ အုဝ်၊ “မဲ ဒီ ဒဲ ဘာဒိက် ဆန်ထေ၊ မိုဝ်း ဂွန် အီမာယ် အူ ဝီ။ ဆိန့် ဒေါ တီ နီ ဟာဝ်၊ မဲ ကွဲ့ ဒျီင် ပဝ်း၊ ကွဲ့ ဒျီင် အိုမ် မာငုန် အီ ပြာင်။ ကွဲ့ ဟူမ် ပီ ဒီ ဟူမ် အီ တူ ဆီငါ။ ခုဝ်၊ ဆိန့် ဆီငဲ ဂွိုတ် အန် ကော ဇမ် ပန် ဒီ ကတ် ယမ် အန်၊ ဂွန် အီမာယ် မဲ တီ ဒီ ဘဲန် ဒူအီ နာစာရီ အီ မုး ဒူအီ ပီ အိုပ် ဇဝ်ဖြာ ဆေဆေ။”

8 အာမာနော ဝီ ဆာခိုဝ် ဒီ ဇဝ်ဖြာ တဝ်း၊ “အိုယ် မဲ ဇဝ်ဖြာ၊ အုဝ် မှာန့်၊ ဒူအီ ပဲ့ ဟဲ့ စ်ု မဲ ဇဝ် တး တွိုန်၊ တဲး အန် ဝီ တး ပေါ အူ ဇေန့်၊ တဲး အန် တး မာနုဝ် ယေ ပီ ဒီ ပါယ် ယေ ဒီ ယွတ် လိုမ်လာ ဂွန် တီ။”

9 ဇဝ်ဖြာ မိူဝ် ထူမ် ပီ ဆာခိုဝ် အာမာနော တွိုန်။ အာမူ အာမာတ် ဇဝ်ဖြာ ပီ ဝီ တး ဒူင် ကွယ် အီဘိုန့် တွိုန် ဒေါ ကွယ် အန် ခဲင် ဒူင် နာ။ ဒေါ အန် တီ အီမာယ် အန် ယီ တူ ကွယ် ရိုမ် ဒူပ် အန်။ 10 အန် မိူဝ် ပီခြန် အန် ဟာဝ် ဒဲ့ အီမာယ် အန်၊ ဘော ကာလာင် ဒီ အီမာယ် အန် တဝ်း၊ “ယွတ်၊ ဒူအီ အီ တး ဒီ အုဝ် ဆီငဲ အာတ့် တွိုန်၊ အန် ဟဲ့ ဝီ တး ပေါ အူ ဇေန့်။” 11 အာမာနော မိူဝ် ဟာဝ် ရိုမ် ဒူပ် အီဘိုန့် အန်၊ ဇမ် ဒူင် ကွယ် ဒူအီ ဝီ တီ။ အန် ဘော ဒီမွှတ် ဒူအီ တီ တဝ်း၊ “မဲ မုး ဒူအီ အီ ဟဲ့ ကာလာင် ဂြုဝ်း ဒီ အီဘိုန့် အုဝ်။း” အန် ဝီ တဝ်း၊ “ဟဲ့ မုး။”

12 ပန် တီ အာမာနော ဘော ဒီမွှတ် တဝ်း၊ “ဆေ န့ ဒီ ဘော ဘဲန် ခဲ့ ပီ တဝ်း မဲ တီ၊ ယေ လုဝ် ဘူင် ပါယ် မှဝ် ဒီ ဂွန် ဒီတဲတ် တီ။း ယေ လုဝ် ဘူင် မာဆေ ဒီ အန်။း”

13 အာမူ အာမာတ် ဇဝ်ဖြာ တွိုန် ဝီ တဝ်း ဒီ အန်၊ “အီဘိုန့် မဲ လုဝ် ဆာဒိက်၊ လုဝ် ဘူင် ခဲ့ ပဲ့ ဟဲ့ ကာလာင် အုန် အုဝ် ဒီ အန် ဒွန် မျုဝ်။ 14 အန် တူ ပွိုန် ဟူမ် အီ လေး ဒီ ဟေ မာငုန် ခေါ အူ မျုဝ်၊ တူ ပွိုန် ဒျီင် ပဝ်း၊ တူ ပွိုန် ဒျီင် အိုမ် မာငုန် အီ ပြာင်။ အန် မိူဝ် တူ ပွိုန် ဟူမ် ပီ ဒီ ဟူမ် အီ တူ ဆီငါ အီ ဒူပ် ဒါရာ။ အန် လုဝ် ဘူင် ဒူပ် ခဲ့ ပီ ကာလာင် အုန် အုဝ် တီ ဒွန် မျုဝ်။”

15 အာမာနော ဝီ တဝ်း ဒီ အာမူ အာမာတ် ဇဝ်ဖြာ၊ “အုဝ် မှာန့်၊ တဲး မဲ ကွယ် ဘ်ု အူ ကာစန်၊ တဲး အုဝ် ကော ဟွတ့် ရဲန် ဂွန် မာပဲ အုဝ် အာဒါ မဲ ဇဝ်။”

16 အာမူ အာမာတ် ဇဝ်ဖြာ ဝီ တဝ်း၊ “မဲ ပီ ဘော မှာန့် တဲး အုဝ် ကွယ် ဘ်ု မိူဝ်၊ အုဝ် တူ ဟူမ် ပီ ဒီ ဟူမ် တီ။ မာလဲ၊ ဆေ မဲ မိုဝ်း နဝ်း ဆီ လှူ၊ တဲး မဲ လှူ ပီ ဒီ လှူ အီ ဒုဝ့် ဒီ ငဝ် ဒီ ဇဝ်ဖြာ။” အာမာနော ယီ ညှမ် နပ် ဒူအီ ဝီ တီ မုး အာမူ အာမာတ် ဇဝ်ဖြာ။

17 အန် ဝီ တဝ်း ဒီ ဒူအီ ဝီ တီ၊ “မာဆေ ပီ စိူဝ် မဲ။း ခုဝ်၊ ဆေ ဟီ ဘုဝ် ဘဲန် ဒွန် မျုဝ် ခဲ့ ပီ ကာလာင် အုန် မဲ နီ၊ အုဝ် ဆီ အိူပ် မျုက် မဲ။”

18 အာမူ အာမာတ် ဇဝ်ဖြာ တွိုန် ဝီ တဝ်း ဒီ အန်၊ “မှဝ် န့ ပါယ် ပီ ဆီ နပ် မဲ ပီ စိူဝ် အုဝ်၊ န့ မုး စိူဝ် အီ တူ နပ် ဒီ ကာလှုး ဒီ နဝ်း မဲ။” 19 ပန် တီ အာမာနော ဘော ဒိုဝ်း မာပဲ ဒီတဲတ် အူ ဒုဝ် ဘော ပီ ဒီ လှူ ဒီဂါဝ်၊ တဲး န့ ဘဲန် ပီ ဒီ လှူ ဒီ ဇဝ်ဖြာ။ အန် ဘော ဘ့လေး လှူ ဒဲင် မာဝ်။ ဒေါ ဆီ ကွယ် ယွတ် အာမာနော ဂါယ် အီဘိုန့် အန် တီ၊ ဇဝ်ဖြာ ဘော ဘူင် အီ မွှိုမ် အာမ်။ 20 န့ ဘော မိုဝ်း ငဝ် လေး ဒီ ကာစှူင့် လှူ တွိုန်၊ ဝီ ကုး ဟုဝ့် ဂါင်ဟြာဝ်။ အာမူ အာမာတ် ဇဝ်ဖြာ တွိုန် ဘော ဟုဝ့် ဒူပ် ပ့လဲ့ ငဝ် တီ။ အာမာနော ဂါယ် အီဘိုန့် အန် ဘော ယိုဝ် လွင် အန် တီ၊ ဂါယ် ဘော မုတ် ဂိုပ် ဒီ ကာဒါယ် အူ ဇေန့်။ 21 အာမူ အာမာတ် ဇဝ်ဖြာ တွိုန် မိူဝ် အာဝ် ဟူ ဝီ တး ကာပ့လုး ဒီ အာမာနော ဂါယ် အီဘိုန့် အန် ပေါ န့ ပွါ။ ပါယ် တီ အာမာနော ဘော နပ်၊ ဟဲ့ မုး အာမူ အာမာတ် ဇဝ်ဖြာ။

22 အာမာနော ဝီ တဝ်း ဒီ အီဘိုန့် အန်၊ “အာယ် နီ၊ အာယ် ဒီ ဘော ယမ် အာခါခ်ု။ ခုဝ်၊ အာယ် ဟဲ့ ယိုဝ် ဇဝ်ဖြာ။”

23 အီဘိုန့် အန် ဝီ တဝ်း၊ “ဆေ ဇဝ်ဖြာ ဆီ တဲး အာယ် ယမ်၊ အန် ဇဝ် တူ ရပ် ပီ လှူ အီ ဒုဝ့် ဒီ ငဝ် ဘော ပီ လှူ ငှုဝ် ဒီဂါဝ် ဂေ နီ။ အန် ဇဝ် မိူဝ် တူ ဘျ ဘဲန် မျုဝ် ဘဲန် မျုဝ် ပါယ် နီ။ ဘော ဒေါ တီ နီ အန် ဇဝ် မိူဝ် တူ မိုဝ်း ဒီ ကာလာင် ဂြုဝ်း မာဆေ။”

24 အီဘိုန့် တွိုန် ဘော မိုဝ်း ဂွန် အီမာယ် အူ ဝီ။ ဂေ ဘော တဲး အန် စိူဝ် အာဆာမ်ဆူန်။ ဂွန် တီ ဘော ကြဲ ဒီ တာင်၊ ဇဝ်ဖြာ ဘော မွင့်ကာရာ ဒွါ ဒီ အန်။ 25 ပွုန် ဇဝ်ဖြာ ဘော နဝ်း ဖွိုမ် ဇဝ်ဖြာ ဘော တဲး ပ့လူမ်၊ တဲး ဟဲန့် ဒီ အန် စုဝ် ကွယ် အန် ခဲင် ဒူင် ချ ဒူအီ အာဒါန် အီ ကွယ် ဒီ ကာတဲ မိူင် ဇုဝ်ရာ ဂါယ် မိူင် အေဆာတောလာ။