1 ဂေ ဒူအီ ခြိုဝ် အာအေဖာရိမ် ဘော ဝီ ရဲန် ဒါ ဆိုက်။ ဂေ ကာလုဝ်း အိုမ် ဘ့လဲင် ယောဒါန်၊ ဝီ ဟာဝ် ဒီ မိူင် စာဖူန်။ ဂေ တဝ်း ဒီ အာယေဖာဒါ၊ “မှဝ် န့ ပါယ် ပီ ဟာဝ် ကာဂုဝ်း မဲ ဒီ ဒူအီ အမ်မူန်၊ ယီ တူ ဒဲ့ ယေ။း ယေ ဒီ ဒိုဝ်း ငဝ် ဒုဝ့် ကာင် မဲ၊ တဲး န့ ဒီဂြပ် ထိပ် ယမ် မဲ။”

2 မာလဲ၊ အာယေဖာဒါ ဝီ ကာလာင် ဒီ ဂေ တဝ်း၊ “အုဝ် ဘော ဂေ ဒူအီ အုဝ်၊ ယေ ဟဲ့ လာယ် ကာလုတ့် ပါယ် ခါခ်ု ဒီ ဒူအီ အမ်မူန်။ အုဝ် ဟဲ့ ဒွိုမ် ဒဲ့ ဘေ စွယ် အုဝ်၊ ဘေ ယီ တူ ပဲ ဒီ စွယ် တဲး ယေ လွတ် ဒီ ဂေ။ 3 အုဝ် ဘော နပ်၊ ဘေ တူ ပဲ ဒီ ချွတ် လေး ယေ တီ၊ အုဝ် ဘော စုန် အာဆာက် အုဝ်၊ ကာလုဝ်း ဟာဝ် ကာဂုဝ်း ဒီ ဂေ။ ဇဝ်ဖြာ မိူဝ် ဟဲ့ တဲး အုဝ် ပဲ ဂေ။ ဒေါ တီ နီ မှဝ် မ့ပါယ် ပီ ဆီ တး ကာဂုဝ်း ဘေ ဒီ အုဝ်။း”

4 ဒေါ အန် တီ အာယေဖာဒါ ဘော ဒဲ့ ကာဇု ခဲ့ ကွယ် အီမာယ် ခဲင် မိူင် ဂီလေအာတ် ဘောကာဂ့လျီတ်၊ ကာဂုဝ်း ဒီ ဒူအီ အာအေဖာရိမ်။ ဟဲ့ ဟွတ့် အန် ဘော ပဲ ဂေ။ ဂေ ဘူင် ပါယ် တီ ခုဝ်၊ ဂေ ဒူအီ အာအေဖာရိမ် ဟဲ့ နဲန ဂေ တဝ်း၊ “ဘေ ဒူအီ အာမျုဝ် ဂီလေအာတ်၊ ဘေ မုး ဒူအီ အာအေဖာရိမ် အီ တဝ် လေး ခဲင် အာမျုဝ် အာအေဖာရိမ် ဂါယ် ဒူအီ အာမာနာဆေ။” 5 ဂေ မိူဝ် တူ တဲး ဒူအီ အာအေဖာရိမ် ပွိုန် ဒီ လွတ် ခေါ အူ ဝီ။ ဂေ ဒူအီ အာမျုဝ် ဂီလေအာတ် ဟဲ့ ဘ်ု ဒီ ဘာင် ကာလုဝ်း ဒွန် ပ့လုဝ့် ဒူပ် အိုမ် ဘ့လဲင် ယောဒါန် အီ ပွိုန် ဟာဝ် ဒီ မိူင် အာအေဖာရိမ်။ ဆေ န့ မိုဝ်း ဒူအီ အာအေဖာရိမ် တး မှာန့် ဒီ ကာလုဝ်း၊ ဂေ ဒူအီ ဂီလေအာတ် ဒီမွှတ် ဒူအီ ဝီ တီ တဝ်း၊ “မဲ မုး ဒူအီ အာအေဖာရိမ်။း” ဆေ ဒူအီ တီ ဝီ တဝ်း၊ “အုဝ် တူ မုး၊” 6 ဂေ ပီ ဝီ စ်ု တဲး အန် ကာလာင် ဂြုဝ်း တဝ်း “ဆီပေါလေတ်။” ဆေ ဒူအီ ဝီ တီ ယီ ဝီ တဝ်း “စီပေါလေတ်၊” ကူပ် တူ ဘြီ ဂြုဝ်း ပီ ကာလာင် အန်၊ ဂေ ငဝ်း ဝဲန် အန် ဒီ ဘာင် ကာလုဝ်း တီ။ ဒေါ အန် တီ ဂေ ဒူအီ အာအေဖာရိမ် ဘော ယမ် ဖွုန် မှိုန့် ဒီ အာ ဟြဲန့် ဝီ။

7 အာယေဖာဒါ အီ မုး ဒူအီ အာမျုဝ် ဂီလေအာတ်၊ အန် ဘော ဘဲန် ဒါ တာင် အီ ဆုင်ဖျာတ် ဒါရာ ဒီ ဂေ ဒူအီ အီဆာရေလ အာဒါ ဒဝ် ဆီနမ်။ ဟဲ့ ဟွတ့်၊ အန် ဘော ယမ်။ ဂေ ဘော ဟာဝ် ဒိပ် ဒုဝ် ဘူင့် အန် ဒီ မိူင် ဘြိမ် အန် ခဲင် မိူင် ဂီလေအာတ် တွိုန်။

8 ဝါယ် အာယေဖာဒါ တီ ဟဲ့ ဟွတ့် ယမ်၊ အာအီဘာစာန် အီ မုး ဒူအီ မိူင် ဘေတ်လဲမ်၊ အန် ဘော ဝီ ဘဲန် ဒါ တာင် အီ ဆုင်ဖျာတ် ဒါရာ ဒီ ဂေ ဒူအီ အီဆာရေလ။ 9 အန် မိုဝ်း ဂွန် အီမာယ် အူယ် ဂိုဝ် ဝီ ဘော ဂွန် အီဘိုန့် အူယ် ဂိုဝ် ဝီ။ အန် တဲး ဂွန် အီဘိုန့် အန် ဟာဝ် ခတ် ဒိုဝ်း အီမာယ် အီ တူ မုး ခြိုဝ် အန်။ အန် တဲး ဘော ဂွန် အီမာယ် အန် ခတ် ဒိုဝ်း ဒူအီ အူယ် ဂိုဝ် ဝီ အီ တူ မုး ခြိုဝ် အန်၊ တဲး ဂေ တး ဘဲန် အဝ် အန်။ အာအီဘာစာန် တီ ဘော ဘဲန် ဒါ တာင် အီ ဆုင်ဖျာတ် ဒါရာ ဒီ ဂေ ဒူအီ အီဆာရေလ အာဒါ ဘူ ဆီနမ်။ 10 ဟဲ့ ဟွတ့်၊ အန် ဘော ယမ်။ ဂေ ဘော ဟာဝ် ဒိပ် ဒုဝ် ဘူင့် အန် ခဲင် မိူင် ဘေတ်လဲမ်။

11 ဝါယ် အာအီဘာစာန် တီ ဟဲ့ ဟွတ့် ယမ်၊ အာအေလူန် အီ မုး ဒူအီ ခြိုဝ် အာဇေဘူလူန် ဘော ဝီ ဘဲန် ဒါ တာင် အီ ဆုင်ဖျာတ် ဒါရာ ဒီ ဂေ ဒူအီ အီဆာရေလ အာဒါ ဂိုဝ် ဆီနမ်။ 12 ဟဲ့ ဟွတ့်၊ အန် ဘော ဝီ ယမ်။ ဂေ ဘော ဟာဝ် ဒိပ် ဒုဝ် ဘူင့် အန် ဒီ မိူင် အာစာလုန် အီ ကွယ် ခဲင် ကာဒါယ် မိူင် အာဇေဘူလူန်။

13 ဝါယ် အာအေလူန် တီ ဟဲ့ ဟွတ့် ယမ်၊ အာဘာတူန် အီ မုး ဂွန် အာဟီလေလာ အီ မုး ဘော ဒူအီ အာမျုဝ် ဘီရာထူန်၊ အန် ဘော ဝီ ဘဲန် ဒါ တာင် အီ ဆုင်ဖျာတ် ဒါရာ ဒီ ဂေ ဒူအီ အီဆာရေလ။ 14 အန် ဘော မိုဝ်း ဂွန် အီမာယ် ဖွုန် ဂိုဝ် ဝီ၊ မိုဝ်း လှာန် ဂွန် အီမာယ် အူယ် ဂိုဝ် ဝီ။ ဂေ ဘော ပဝ့် မာလာ ဘူ ဂိုဝ် ဒုဝ်။ အာဘာတူန် ဘော ဘဲန် ဒါ တာင် အီ ဆုင်ဖျာတ် ဒါရာ ဒီ ဒူအီ အီဆာရေလ အာဒါ ဒါ ဆီနမ်။ 15 ဟဲ့ ဟွတ့်၊ အန် ဘော ယမ်။ ဂေ ဘော ဟာဝ် ဒိပ် ဒုဝ် ဘူင့် အန် ဒီ မိူင် ဘီရာထူန် အီ ကွယ် ခဲင် မိူင် အာအေဖာရိမ် ဒီ ကာတဲ နွန် ဒူင် မုး ကာဒါယ် မိူင် ဒူအီ အာမာလေက်။