အာယေဖာဒါ မုး ဒါ ဆိုက် အီ ယ ကာဂုဝ်း။ အန် ဘော ကွယ် ခဲင် မိူင် ဂီလေအာတ်။ အန် ဘော မုး ဂွန် ယာ မာလမ်။ ဂုန့် အန် မုး အာဂီလေအာတ်။ 2 အီဘိုန့် အာဂီလေအာတ် ပီ ဝီ မိုဝ်း ဂွန် အီမာယ် ဘဲန် ဝီ ဘဲန် ဝီ။ ဒေါ ဝီ ဒီ တာင် ဂွန် အီမာယ် အန် ဂေ တီ၊ ဂေ ဘော ဝီ ဟုဝ် တဝ် အာယေဖာဒါ တွိုန်။ ဂေ တဝ်း ဒီ အန်၊ “မဲ တူ ကာအာပ် ပွိုန် ခါဂုန် ခဲင် န့ဟူမ် ယေ နီ။ ခုဝ်၊ မာ မဲ အာဝ် မုး မာ ယေ။” 3 ပါယ် တီ အာယေဖာဒါ ဘော တဝ် ဒူင် ကွယ် အီကတ် အန် ဂေ တီ၊ ဝီ ဟာဝ် ကွယ် ဒီ မိူင် တောဖ။ အာဝ် လှေန့် ဒူင် ကွယ် အန် တီ န့ ဘော မိုဝ်း ဂေ ဒူအီ ကိူန် အီ တူ မိုဝ်း ဒီခုဝ်။ ဂေ ဟဲ့ တး ကာဇု ဒူင် ကွယ် အန် တီ၊ ဘဲန် ဒီဘဲ အန်။

4 ဝါယ် အန် တီ အာဝ် ဘော လှေန့် ဂေ ဒူအီ အမ်မူန် ဘော တး ကာဂုဝ်း ဒီ ဒူအီ အီဆာရေလ။ 5 ဟဲ့ ဟွတ့် ပါယ် တီ ဂေ ဒါ တာင် အီ အိုပ် အီ ယဲတ့် ဂေ ဒူအီ ခဲင် မိူင် ဂီလေအာတ် တွိုန်၊ ဂေ ဘော ဝီ ဟာဝ် ဒဲ့ အာယေဖာဒါ။ 6 ဂေ ဘော ကာလာင် ဒီ အန် တဝ်း၊ “တး၊ တဲး မဲ ဝီ ဘဲန် အီ ယဲတ့် ယေ ကာဂုဝ်း ဒီ ဒူအီ အမ်မူန် ဂေ တွိုန်။”

7 မာလဲ၊ အာယေဖာဒါ ဝီ တဝ်း ဒီ ဂေ၊ “ဘေ ဟဲ့ ဇွင့် အုဝ်၊ ဘေ ကော ဟုဝ် လေး အုဝ် တ ကာင် ဂုန့် အုဝ်။ ဒေါ တီ နီ ဘေ ဟဲ့ ဇမ် ဒုက်၊ မှဝ် န့ ပါယ် ပီ ဝီ တး ဒဲ့ ဘေ ဒီ အုဝ်။း”

8 ဒူအီ ဂေ တွိုန် ဝီ ကာလာင် ဒီ အန် ဘော ဒွင်ဘာန် အန် တဝ်း၊ “ယေ ဟဲ့ ဝီ တး ဒဲ့ မဲ ဒေါ တီ နီ။ ခုဝ်၊ ယေ ဆီ တဲး မဲ ဟာဝ် ရိုမ် ဒူပ် ယေ၊ ကာဂုဝ်း ဒီ ဒူအီ အမ်မူန် ဂေ တီ။ ဟဲ့ ဟွတ့် ယေ ဒီ တဲး မဲ ဘဲန် အီ အိုပ် အီ ယဲတ့် ယေ ဒူအီ မိူင် ဂီလေအာတ် ဘောကာဂ့လျီတ်။”

9 အာယေဖာဒါ ပီ ဝီ တဝ်း ဒီ ဂေ၊ “ဆေ ဘေ ဝီ ဒဲ့ အုဝ် ဝေန့် ကာဂုဝ်း ဒီ ဒူအီ အမ်မူန် ဂေ တီ၊ ဆေ ဇဝ်ဖြာ ဒီ တဲး အုဝ် ပဲ ဂေ၊ အုဝ် ဒီ ပွိုန် ဒီ ဘဲန် ဒါ အီ အိုပ် အီ ယဲတ့် ဘေ အာခ်ု မှာန်။း”

10 ဂေ ဝီ တဝ်း၊ “အိုဝ်၊ ယေ ဟဲ့ ဟွတ့် ဖြူမ်၊ တဲး ဘော ဇဝ်ဖြာ ထူမ် လွင် အန် တီ။ ယေ ဒီ ဘူင် အာခါခ်ု ဒွန် မျုဝ် ပီ တဝ်း မဲ။” 11 ပါယ် တီ အာယေဖာဒါ ဘော ဟာဝ် ဒူပ် ဂေ ဒါ တာင် ခဲင် မိူင် ဂီလေအာတ် တွိုန်။ ခဲ့ ကွယ် ဒူအီ ဘောကာဂ့လျီတ် ဘော ကာဖြူမ် ဒီ စုဝ့် ဒီ ဒါင် တဲး အန် ဘဲန် ဂိန့် ဆိုက် ဂေ။ အာယေဖာဒါ ဘော ဝီ ကာလာင် ဂြုဝ်း ပဲ့ ဟဲ့ ကာလာင် အန် ဒီ ဂေ၊ တဲး ဇဝ်ဖြာ ထူမ်။ ဒေါ အန် တီ အန် ကွယ် ခဲင် မိူင် မီဇာဖာ တွိုန်။

12 ဒေါ အန် တီ အာယေဖာဒါ ဝီ စ်ု ဒါလာမ် အန် ဟာဝ် ဒူင် ကွယ် ခုန်ဒီခမ် ဒူအီ အမ်မူန် ဘော ကာလာင် ဒီ အန် တဝ်း၊ “မဲ မိုဝ်း ဒီ လုတ့် နဝ်း မာဆေ တဲး မဲ ကော လိုပ် တး ကာဂုဝ်း ဒီ ယေ။း”

13 ခုန်ဒီခမ် ဒူအီ အမ်မူန် ဝီ ကာလာင် ဒီ ဂေ ဒါလာမ် အာယေဖာဒါ တဝ်း၊ “ဒေါ လေး ဂေ ဒူအီ အီဆာရေလ ခဲင် မိူင် အဲဂိုပ် တွိုန်၊ ဂေ ဟဲ့ ဒိုဝ်း ကာဒါယ် အုဝ်၊ န့ ဘော စုး ဒီ ဘ့လဲင် အိုမ် အာရာနုန် ကော ဝီ ဇမ် ဒီ ဘ့လဲင် အိုမ် ယာဘူက် ဘော ဒီ ဘ့လဲင် အိုမ် ယောဒါန်။ ဒေါ တီ နီ တဲး မဲ ဝီ ဒွါ ဝိဝ် ဒါခိုယ် ဒါခိုယ် ကာဒါယ် တီ။”

14 အာယေဖာဒါ ပီ ဝီ စ်ု ဒါလာမ် အန် ဟာဝ် ကာလာင် ပေါ န့ ပွါ တဝ်း၊ 15 “အာယေဖာဒါ တဝ်း ဒီ မဲ၊ အာဝ် မုး ဒူအီ အီဆာရေလ အီ ဒိုဝ်း ကာဒါယ် ဒူအီ မုဝ်အာပ် ဂါယ် ကာဒါယ် ဒူအီ အမ်မူန်။

16 လွင် အန် တီ န့ ပါယ် နီ။ ဒေါ လေး ဂေ ဒူအီ အီဆာရေလ ခဲင် မိူင် အဲဂိုပ်၊ ဂေ ဘော ကာလုဝ်း ဟာဝ် ခဲင် ပြဲ ကာဟဝ်း။ ဟဲ့ ဟွတ့်၊ ဂေ ဘော ဝီ ဇမ် ဒီ ဘာင် အိုမ် ဒီနှူင် ရေန့် ဒီ ဒူင် စိူဝ် ဆာဒေတ်။ 17 ဒေါ အန် တီ ဂေ ယီ ဝီ စ်ု ဒါလာမ် ဂေ ဟာဝ် ဒူင် ကွယ် ခုန်ဒီခမ် မိူင် အေဒူမ်၊ မှာန့် တဲး ဂေ ပွိုန် ဒီ ကာလုဝ်း ဟာဝ် ခဲင် ကာဒါယ် အန်။ မာလဲ၊ ခုန်ဒီခမ် တီ၊ အန် ယီ တူ ခ့ဝါင် ဂေ ဟာဝ်။ ဂေ ပီ ဝီ ဟာဝ် မှာန့် ဒီ ခုန်ဒီခမ် မိူင် မုဝ်အာပ်၊ ခုန်ဒီခမ် တီ မိူဝ်၊ တူ ခ့ဝါင် ဂေ ဟာဝ်။ ကူပ် န့ ပါယ် တီ ဂေ ဒူအီ အီဆာရေလ ဘော ကာဒုး ဒီ ကွယ် ဒီ ဒူင် စိူဝ် ဆာဒေတ်။

18 ဂေ ဝီ ဟာဝ် ခဲင် ပြဲ ကာဟဝ်း ဝီ ကာဒုး ဒီ လဲပ် ဟာဝ် ခူပ် မိူင် အေဒူမ် ဂါယ် မိူင် မုဝ်အာပ်၊ ကော ဝီ ဟာဝ် ဇမ် နာ လေး ဆီငဲ မိူင် မုဝ်အာပ် နာ ဒွယ် အိုမ် ဘ့လဲင် အာရာနုန်။ ဂေ ဘော ချ ဒီ တီ။ ဂေ ယီ တူ ပွိုန် ဒီ ကာလုဝ်း အိုမ် တီ၊ တူ ပွိုန် ဒီ လိုပ် ခဲင် မိူင် မုဝ်အာပ်။ ခုဝ်၊ ဘ့လဲင် တီ ဟဲ့ မုး ကာအုန် ကာဒါယ် ဒူအီ မိူင် မုဝ်အာပ်။

19 ဝါယ် အန် တီ ဂေ ဒူအီ အီဆာရေလ ပီ ဝီ စ်ု ဒါလာမ် ဂေ ဟာဝ် ဒူင် ကွယ် ခုန်ဒီခမ် အာဆီဟူန် အီ မုး ဒူအီ အာမုဝ်ရိတ် အီ အိုပ် မိူင် ဟေဆာဖူန်၊ တဲး ဂေ မှာန့် ဒီ ကာလုဝ်း ဟာဝ် ကာတဲ မိူင် ဂေ တီ၊ ဝီ ဇမ် ခဲင် မိူင် ဂေ။ 20 မာလဲ၊ ခုန်ဒီခမ် အာဆီဟူန် ယီ တူ ခ့ဝါင် တဲး ဂေ ဟာဝ်။ ဒဲင် တီ၊ အန် ဘော ဝီ ဒဲ့ ကာဇု ဒါ ဆိုက် အန်၊ ဝီ တး ချ ဒီ မိူင် ယာဟာတ်၊ ဝီ ကာဂုဝ်း ဒီ ဂေ ဒူအီ အီဆာရေလ။

21 ဇဝ်ဖြာ ပီ ကြိုပ် ဂေ ဒူအီ အီဆာရေလ ယီ ဝီ တဲး ဂေ ဒူအီ အီဆာရေလ ပဲ ခုန်ဒီခမ် အာဆီဟူန် ဂေ ဒါ ဆိုက် အန်။ ပါယ် တီ ဂေ ဒူအီ အီဆာရေလ ဘော ပွိုန် ကာဒါယ် ဒူအီ အာမုဝ်ရိတ် အီ ကွယ် ခဲင် မိူင် ဂေ တီ။

22 ကာဒါယ် ဒူအီ အာမုဝ်ရိတ် ပီ ပွိုန် ဂေ တီ၊ န့ ဘော စုး ဒီ အိုမ် ဘ့လဲင် အာရာနုန် ကော ဝီ ဟုဝ့် ဇမ် ဒီ အိုမ် ဘ့လဲင် ယာဘူက်။ န့ ဘော ဘာ ဘော ပြဲ ကာဟဝ်း၊ ဝီ လူင် ဇမ် ဒီ အိုမ် ဘ့လဲင် ယောဒါန်။ 23 လွင် အန် တီ၊ န့ ဘော မုး ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ ဟုဝ် တဝ် ဒူအီ အာမုဝ်ရိတ် အာဒါ ဒူအီ ပီ အိုပ် အန် အီ မုး ဒူအီ အီဆာရေလ။ ခုဝ်၊ မဲ တူ ပွိုန် ဒိုဝ်း ဝိဝ် ကာဒါယ် မိူင် တီ။ 24 ဆေ န့ မုး မဲ၊ မဲ ဒီ ဘော ဒိုဝ်း ခဲ့ ပီ ဒွါ ဇဝ် ခေမူဆာ ဒီ မဲ။ ယေ မိူဝ် ဘူင် ပါယ် တီ ယေ အိုပ် မီ ခဲ့ ပီ အာပ် ဒွါ ဇဝ်ဖြာ ပီ ကြိုပ် ယေ ဒီ ယေ။ 25 မဲ ထာင် မဲ ဟဲ့ ကျ ဟဲ့ မွှိုမ် လွှိုမ် ခုန်ဒီခမ် အာဘာလာက် အီ မုး ဂွန် အာစီဖော အီ အိုပ် ဒူအီ မုဝ်အာပ် တွိုန်။း အန် ဟဲ့ ဒွိုမ် လာယ် တ လာယ် ကာခဲန့် ဒီ ဒူအီ အီဆာရေလ၊ ဟဲ့ ဒွိုမ် ကာဂုဝ်း ဒီ ဂေ။ 26 အာဒါ အူယ် မာယဝ်း ဆီနမ် ဒူအီ အီဆာရေလ ဟဲ့ ပွိုန် ဒီ အိုပ် မိူင် ဟေဆာဖူန်၊ မိူင် အာရော ဘော ရဝ် ဂေ အီ ကွယ် ကာတတ် မိူင် ဂေ တီ ဘော မိူင် တာင် အီ ကွယ် ဒီ ဘာင် အိုမ် ဘ့လဲင် အာရာနုန် တွိုန်။ ဒေါ အန် တီ၊ မှဝ် န့ ပါယ် ပီ တူ ဒိုဝ်း ဝိဝ် မဲ မိူင် ဂေ တီ။း 27 ပါယ် တီ အာဝ် မုး အုဝ် အီ လုတ့်၊ မဲ အီ ဟြေတ့် ဒီ ကာလုတ့် ဒီ အုဝ် ဘော ဆီ ကာဂုဝ်း ဒီ အုဝ်။ ဇဝ်ဖြာ အီ ဒီ ဆုင်ဖျာတ် လွင် အန် တီ။ အာတိုဝ် နီ တဲး ဇဝ်ဖြာ ဆုင်ဖျာတ် အာမူ တီ ဒီ ကာတဲ ဒူအီ အီဆာရေလ ဂါယ် ဒူအီ အမ်မူန်။”

28 ခုန်ဒီခမ် ဒူအီ အမ်မူန် တွိုန်၊ အန် ယီ တူ ထူမ် ဂြုဝ်း ပီ ကာလာင် အာယေဖာဒါ ဒီ အန်။

29 ဒေါ အန် တီ နဝ်း ဖွိုမ် ဇဝ်ဖြာ ဘော တး အိုပ် အာယေဖာဒါ။ အန် ဘော ကာလုဝ်း ဟာဝ် ဒီ မိူင် ဂီလေအာတ် ဂါယ် မိူင် အာမာနာဆေ၊ ဝီ ဟာဝ် ကာပ့လုး ဒီ မိူင် မီဇာဖာ အီ ကွယ် ခဲင် ကာဒါယ် မိူင် ဂီလေအာတ် တွိုန်။ အန် ဘော ရဲန် ဒါ ဆိုက် အန်၊ ဝီ ဟုဝ့် ဒူင် ကွယ် ဒူအီ အမ်မူန်။ 30 အာယေဖာဒါ ဘော ကာဆဲန့် ဒွါ ကာဒိက် ဆတ်ဇာ ဒီ ဇဝ်ဖြာ တဝ်း၊ “ဆေ မဲ ဇဝ် တဲး ယေ အွင် ဒူအီ အမ်မူန် ဂေ နီ၊ 31 ဆေ ယေ ဟီ ဝီ လေး ဒူင် ကာဂုဝ်း ယေ ဒီ ဒူအီ အမ်မူန် တီ၊ ဝီ ဝေန့် ဒီ ကာင် ယေ၊ ဝီ အီ လေး ခဲင် ကာင်၊ တး ရွုး ယေ ဒီ အာတ့် အီ ဟဝ်၊ အုဝ် ဒီ ဒွါ ဒီ မဲ ဇဝ်၊ တဲး အန် ဘဲန် ပီ ဒီ လှူ အီ ဒုဝ့် ဒီ ငဝ်။”

32 ဟဲ့ ဟွတ့် ပါယ် တီ အာယေဖာဒါ ဘော ကာလုဝ်း အိုမ် တဲး အန် ပွိုန် ဒီ ကာဂုဝ်း ဒီ ဒူအီ အမ်မူန်။ ဇဝ်ဖြာ ဘော တဲး အန် ပဲ ဂေ။ 33 အန် ဘော ကာဂုဝ်း စုး ဒီ မိူင် အာရော ကော ဝီ ဟာဝ် ဇမ် ဒီ မိူင် မီနေတ်။ အန် ဘော ပျာတ့် မိူင် အာ ဂိုဝ် မိူင်၊ ကော ဝီ ဟာဝ် ဇမ် ဘော ဒီ မိူင် အာဘီလာခြဝ်မိမ်။ ပါယ် တီ ဂေ ဒူအီ အမ်မူန် ဘော စှိုမ် ဒီ ဂေ ဒူအီ အီဆာရေလ။

34 ဒေါ ဝီ တး ဇမ် အာယေဖာဒါ ဒီ ကာင် အန် ခဲင် မိူင် မီဇာဖာ တွိုန်၊ ဂွန် ဒီဘျာ အန် ဟဲ့ က်ု ဂြိုင် ဘော ဂါ ဟာဝ် ဘ်ု ဒီ ရွုး အန်။ 35 အန် ယီ မိုဝ်း မီ ဂွန် အီဘိုန့် အူ ဝီ တီ။ အန် ဘော ယိုဝ် ဂွန် အန် တီ၊ အန် ဘော ကာယာတ့် ခြိုင် တာ အန် တဝ်း၊ “အာလိုဝ် ဂွန် အိုယ်၊ မဲ ဟဲ့ ဘူင် တဲး နဝ်း အုဝ် ကာပျာတ့် လိုဝ် တူတ့်၊ တဲး န့ ဆဝ် ကာဆဝ် ဒီ နဝ်း အုဝ်။ အုဝ် ဟဲ့ ဟွတ့် ဒွါ ကာဒိက် ဆတ်ဇာ ဒီ ဇဝ်ဖြာ၊ အာဝ် ဟူ ပွိုန် ဝီ ကာဝိဝ် ဂြုဝ်း တီ။”

36 ဂွန် ဒီဘျာ အန် တွိုန် ဝီ တဝ်း၊ “ဆေ မဲ ဂုန့် ဟဲ့ ဒွါ ကာဒိက် ဆတ်ဇာ ဒီ ဇဝ်ဖြာ၊ တဲး မဲ ဘူင် ဒူပ် ကာဒိက် ဆတ်ဇာ ပဲ့ ဟဲ့ ဒွါ မဲ တီ။ ခုဝ်၊ ဇဝ်ဖြာ ဟဲ့ ဟွတ့် ဒမ် မှာပ် ဒီ ရန်ဆူ မဲ အီ မုး ဒူအီ အမ်မူန် တွိုန်။” 37 အန် ဝီ တဝ်း၊ “အိုယ် ဂုန့်၊ အုဝ် မှာန့် အာဒါ အူ မျုဝ် ဒီ မဲ။ အုဝ် မှာန့်၊ တဲး အုဝ် ပွိုန် ဒီ ကွယ် အာဒါ အာ မာဂျီန်၊ တဲး အုဝ် ပွိုန် ဒီ ဝိန် ဒီလဲ ဒူပ် ဂေ ဂိုက် အုဝ်၊ တဲး အုဝ် ပွိုန် ဒီ ဝိန် ဒီလဲ ဒဲင် နွန်၊ တဲး အုဝ် ပွိုန် ဒီ က့လိုဝ် ဒီ ငှဝ် ကူပ် လုဝ် ယမ် အုဝ် ဒေါ ဆီ မုး အုဝ် ဒီဘျာ ဇဲတ်။”

38 အာယေဖာဒါ မိူဝ် တဲး ဂွန် ဒီဘျာ အန် တီ ဝိန် ဒီလဲ အာဒါ အာ မာဂျီန်။ ဂွန် ဒီဘျာ အန် မိူဝ် ဟုဝ့် လဲ ဒဲင် နွန် ယူင့် ဘော ဂေ ဂိုက် အန်။ ဂေ ဘော ဟာဝ် က့လိုဝ် ဟာဝ် ငှဝ် ကူပ် လုဝ် ယမ် အန် ဒေါ ဆီ မုး အန် ဒီဘျာ ဇဲတ်၊ တူ ဒန် မိုဝ်း ဂွန်။ 39 ဒေါ ဟဲ့ နုဝ့် အာဒါ အာ မာဂျီန်၊ အန် ဘော ဝီ တး ဒူင် ကွယ် ဂုန့် အန်။ ဂုန့် အန် မိူဝ် ဘူင် ဒူပ် ခဲ့ ပီ ဒွါ အန် ကာဒိက် ဆတ်ဇာ ဒီ ဇဝ်ဖြာ။ ဂွန် အန် တီ ဘော ကာဒုး ဒီ ယမ် ဒေါ ဆီ မုး အန် ဒီဘျာ ဇဲတ်။ ဝါယ် အန် တီ န့ ဘော ဝီ ဘဲန် ထုင်ဂျာမ် ဒီ ဂေ ဒူအီ အီဆာရေလ။

40 ဒွန် ဆီနမ် ဂွန် ဒီဘျာ ဂေ လေး ဟာဝ် ဝိန် ဒီလဲ အာဒါ ဖွုန် ဆီငဲ၊ တဲး ဂေ ပွိုန် ဒီ ဟာဝ် ဘျ လွင် နဝ်း က့လိုဝ် နဝ်း ငှဝ် ဂေ၊ တဲး ဂေ လှုဝ်း ဂွန် ဒီဘျာ အာယေဖာဒါ အီ မုး ဒူအီ အာမျုဝ် ဂီလေအာတ် တွိုန်။