ဝါယ် ဟဲ့ ယမ် အာဘီမေန်၊ အာထုဝ်လာ အီ မုး ဂွန် အာဖူဝါ ဘော လှာန် အာတောတော ဘော ဝီ တး ချွတ် ဂေ ဒူအီ အီဆာရေလ။ အန် မုး ဒူအီ ခဲင် ခြိုဝ် အာအီဆာခါ အီ ကွယ် ခဲင် မိူင် ဆာမီရာ ဒီ နွန် အာအေဖာရိမ်။ 2 အန် ဘော ဘဲန် ဒါ တာင် အီ ဆုင်ဖျာတ် ဒါရာ ဒီ ဂေ ဒူအီ အီဆာရေလ အာဒါ အာ ဂိုဝ် ဒီ အူယ် ဆီနမ်။ ဒေါ ယမ် အန်၊ ဂေ ဘော ဒိပ် ဒုဝ် ဘူင့် အန် ခဲင် မိူင် ဆာမီရာ။

3 ဝါယ် ဟဲ့ ယမ် အာထုဝ်လာ တီ၊ အာယာအီရာ အီ တး မိူင် ဂီလေအာတ် ဝီ တး ဘဲန် ဒါ တာင် အီ ဆုင်ဖျာတ် ဒါရာ ဒီ ဂေ ဒူအီ အီဆာရေလ အာဒါ အာ ဂိုဝ် ဒီ အာ ဆီနမ်။ 4 အန် မိုဝ်း ဂွန် အီမာယ် အူယ် ဂိုဝ် ဝီ။ ဂေ ဘော ပဝ့် မာလာ အူယ် ဂိုဝ် ဒုဝ်။ ဂေ ဘော အိုပ် မိူင် အူယ် ဂိုဝ် မိူင် အီ ကွယ် ခဲင် ကာဒါယ် မိူင် ဂီလေအာတ် တွိုန်။ မိူင် ပီ အိုပ် ဂေ တီ ဘော စိူဝ် မိူင် ဟာဝူတ်ယာအီရာ ကော ဇမ် ဒေါ တီ နီ။ 5 အာယာအီရာ တီ ဘော ယမ်၊ ဂေ ဘော ဒိပ် ဒုဝ် ဘူင့် အန် ခဲင် မိူင် ကာမုန်။

6 ဂေ ဒူအီ အီဆာရေလ ပီ ဝီ ဘူင် မှာပ် အီ တူ လဝ့် နဝ်း ဇဝ်ဖြာ။ ဂေ ဝီ ကြိုပ် ဇဝ် ဘာလ ဘော နာင် ကာနမ် အေဆာထာရိတ်။ အာဝ် ဝန် မီ ခဲ့ တီ။ ဂေ ဝီ ကြိုပ် ဘော ဇဝ် ပီ ကြိုပ် ဒူအီ ခဲင် မိူင် အာရာမ်၊ ဒူအီ ခဲင် မိူင် ဆီဒူန်၊ မိူင် မုဝ်အာပ်၊ မိူင် အမ်မူန် ဘော ဇဝ် ပီ ကြိုပ် ဒူအီ ဖီလီထီ။ ဂေ ဝီ ဝဲန် ဇဝ်ဖြာ ပီ ကြိုပ် ဂေ၊ တူ ဝီ ဘိုင် အန် ဇဝ်။ 7 ပါယ် တီ ဇဝ်ဖြာ ဘော ရူ ကာဆဝ် ဒီ ဂေ ဒူအီ အီဆာရေလ။ အန် တဲး ဒူအီ ဖီလီထီ ဘော ဒူအီ အမ်မူန် တး ကာဂုဝ်း ဒီ ဂေ။ 8 ဆီနမ် တီ ဒူအီ ဂေ တီ ဘော ပျာတ့် ဂေ ဒူအီ အီဆာရေလ အူ ဇေန့်။ ဂေ ဘော ခါနှာပ် ဒူအီ အီဆာရေလ အီ ကွယ် ဘ့လာက် နာ လေး ဆီငဲ အိုမ် ဘ့လဲင် ယောဒါန် ခဲင် ကာဒါယ် မိူင် ဂီလေအာတ် အီ မုး ဒူင် ကွယ် ဂေ ဒူအီ အာမုဝ်ရိတ်။ 9 ဂေ ဒူအီ အမ်မူန် ဘော ကာလုဝ်း အိုမ် ဘ့လဲင် ယောဒါန်၊ တး ကာဂုဝ်း ဒီ ဒူအီ အာယူဒါ ဘော ဒီ ဒူအီ ခြိုဝ် အာဘေန်ယာမ် ဘော ခြိုဝ် အာအေဖာရိမ်။ ပါယ် တီ ဂေ ဒူအီ အီဆာရေလ ဟဲ့ ခမ် ဒုက် တာင် ကာဆဝ်။ 10 ဒေါ အန် တီ ဂေ ဒူအီ အီဆာရေလ ဘော ဝီ ဆာခိုဝ် ဒဲ့ ဇဝ်ဖြာ တဝ်း၊ “ယေ ဟဲ့ ဟွတ့် ဘူင် မှာပ် အီ ကာဘး ဒီ မဲ ဇဝ်ဖြာ။ ယေ ဟဲ့ ဝဲန် မဲ ဇဝ်ဖြာ ပီ ကြိုပ် ယေ၊ ဟဲ့ ဝီ ကြိုပ် ဇဝ် ဘာလ။”

11 ဇဝ်ဖြာ ဝီ တဝ်း ဒီ ဂေ၊ “ဒေါ မုး ဒူအီ အဲဂိုပ်၊ ဒူအီ အာမုဝ်ရိတ်၊ ဒူအီ အမ်မူန်၊ 12 ဒူအီ ဖီလီထီ၊ ဒူအီ ဆီဒူန်၊ ဒူအီ အာမျုဝ် အာမာလေက် ဘော ဒူအီ အာမျုဝ် အာမောနီ၊ ဒေါ ဟဲ့ ခါနှာပ် ဂေ ဒီ ဘေ အာတ့် နီ၊ ဘေ မိူဝ် ဟဲ့ ယာမ် ဒဲ့ အုဝ်။ ဒေါ အန် တီ အုဝ် ဟဲ့ ချွတ် ဘေ။ 13 မာလဲ၊ ဘေ ယီ ဝီ ဝဲန် အုဝ်၊ ဝီ ကြိုပ် ဇဝ် ဘဲန် မျုဝ် ဘဲန် မျုဝ် ပီ ကြိုပ် ဂေ အီ ဟဝ်။ ကူပ် န့ ပါယ် တီ အုဝ် မိူဝ် အာဝ် ဟူ ချွတ် ဘေ။ 14 တဲး ဘေ ဟာဝ် ယာမ် ဒဲ့ ဇဝ် ပဲ့ ဟဲ့ ရဝ်း ဘေ တီ၊ တဲး ဂေ ချွတ် ဘေ ပန် ဒီ ကာဒုး ဘေ ဒုက် တာင်။”

15 ဒူအီ အီဆာရေလ ဂေ နဲ့ အီ မှာန့် ဒီ ဇဝ်ဖြာ၊ တူ စူ။ ဂေ တဝ်း၊ “ယေ ဟဲ့ ဟွတ့် ကာလိုပ် ဒီ ဘူင် မှာပ်၊ တဲး မဲ ဇဝ် ဘူင် ဒီ ယေ ခဲ့ ပီ အိုင် မဲ။ မာလဲ၊ ယေ မှာန့်၊ တဲး မဲ ချွတ် လဲ ယေ ခါ နီ။” 16 ပါယ် တီ ဂေ ဘော ဝီ ဝဲန် ဇဝ် ပီ ကြိုပ် အီ ဟဝ် တွိုန်။ ဂေ ဘော ဝီ ကြိုပ် မီ ဇဝ်ဖြာ။ န့ ဘော ဝီ ဘဲန် နဝ်း ကာဝေ ဒီ ဇဝ်ဖြာ၊ အာဝ် ဟူ ခမ် ဒီ ယွတ် ဒုက် ပီ ခမ် ဂေ ဒူအီ အီဆာရေလ။

17 ဒေါ အန် တီ ဂေ ဒူအီ အမ်မူန် ဟဲ့ ရဲန် ဆိုက်၊ တး ချ ဒီ မိူင် ဂီလေအာတ်။ ဂေ ဒူအီ အီဆာရေလ မိူဝ် ဟဲ့ တး ကာဇု ဒီ မိူင် မီဇာဖာ။ 18 ဂေ အီ မုး ဒါ တာင် ခဲင် ခြိုဝ် ဒူအီ အီဆာရေလ ဘော ခဲ့ ကွယ် ဒူအီ ခဲင် မိူင် ဂီလေအာတ် ဘောကာဂ့လျီတ်၊ ဂေ ဘော တး လာယ် ကာမွုန် ဆင်ချာင်။ ဂေ တဝ်း၊ “ဝီ မှဝ် အာဝ် တဝ်း၊ အာဆေ ကာဂုဝ်း ဒီ အာတ့် အီ ဟဝ် ဒီ ဒူအီ အမ်မူန် ဂေ တီ၊ ဒူအီ ဝီ တီ ဒီ ဘဲန် ဒါ အီ အိုပ် အီ ယဲတ့် ဒူအီ ခဲင် မိူင် ဂီလေအာတ် ဘောကာဂ့လျီတ်။”