ဂွန် အာကီဒီအူန် ဝီ အီ စိူဝ် အာဘီမေန် တွိုန် ဘော ဝီ ဟာဝ် ဒီ မိူင် ဆေခေမ် ဒူင် ကွယ် ဘီနွင် မာ အန်။ အန် ဘော ကာလာင် ဒီ ဂေ ဘော ဂေ ခြိုဝ် မာ အန် ဘောကာဂ့လျီတ် တဝ်း၊ 2 “တဲး ဘေ ဝီ ကာလာင် ဒီ ဒူအီ ခဲင် မိူင် ဆေခေမ် ဒွန် အီ၊ ‘ဘေ ဒီ တဝ်း ပါယ် မှဝ်၊ ဘေ ဆီ တဲး ဂွန် အာကီဒီအူန် ဘူ ဂိုဝ် ဝီ အိုပ် မိူင် ဘေ နီ။း ဆေ အာဝ် ပါယ် တီ ဘေ ဆီ တဲး မီ ဂွန် အီမာယ် အန် အူ ဝီ အိုပ်။း အာ မှဝ် နှဲန် ဒီ မွှိုမ်။း မာလဲ၊ ဘေ ကွဲ့ ပိဝ် ဘော အုဝ် ဟဲ့ မုး ဒူအီ အာမျုဝ် ဘေ။’”

3 ဘိုဝ် အန် ဂေ တွိုန် ဟဲ့ ဝီ ကာလာင် ဂြုဝ်း တီ၊ တဲး ဒူအီ ခဲင် မိူင် ဆေခေမ် ဘော မိူင် နပ်။ ဂေ ဘောကာဂ့လျီတ် ဘော ဘဲန် နဝ်း ဆီ ဒူပ် အာဘီမေန် ကူပ် မုး အန် ဘီနွင် ဂေ။ 4 ဒူအီ ဂေ တီ ဘော ဒိုဝ်း ရွိုန် ခဲင် ဇူင် ဇဝ် ဘာလဘေရေတ် အာဒါ ဘူ ဂိုဝ် ဆေခေန် အီ ပီ ဖွုန် ဂိုဝ် ဒီ အာ ကျာပ်၊ ဒွါ ဒီ အန်။ အန် ဘော ဒိုဝ်း ရွိုန် တီ၊ ဝီ ဇာင် ဒါ ဆိုက်၊ တဲး ဂေ ဒူပ် အန်။ 5 အန် ဘော ဝီ ဟာဝ် ဒီ ကာင် ဂုန့် အန် အီ ကွယ် ခဲင် မိူင် အောဖာရ တွိုန်။ အန် ဘော ဝီ ငဝ်း ယမ် ဂေ ဘီနွင် အန် ဘူ ဂိုဝ် ဝီ အီ မုး ဂွန် အာယေရုပ်ဘာလ၊ တဲး ဂေ ယမ် ဒဲင် မာဝ် အူ ဘူင့်။ န့ ဘော ဂိတ် မီ အာယုဝ်ထာမ် အီ မုး ဂွန် တျီ့ အာယေရုပ်ဘာလ။ အန် ဟဲ့ လွတ် ယမ် ကူပ် ဟဲ့ ချြီင် အန် ဒုဝ် အန်။ 6 ဒေါ အန် တီ ဂေ ဒူအီ ခဲင် မိူင် ဆေခေမ် ဘော ဒူအီ ခဲင် ဒူင် စိူဝ် မီလော၊ ဂေ ဘောကာဂ့လျီတ် ဟဲ့ တး ကာဇု ဒူင် မိုဝ်း ဟေ ထေရေပ် ခူပ် ရွင့် အီ ကွယ် ခဲင် မိူင် ဆေခေမ် တွိုန်။ ဂေ ဟဲ့ တဝ်း ဒီ စုဝ့် အာဘီမေန် ဘဲန် ခုန်ဒီခမ်။

7 အာယုဝ်ထာမ် ဘော ယိုဝ် လွင် အန် တီ၊ အန် မိူဝ် ဝီ ဟုဝ့် ဒဲင် နွန် ဂီရာစေမ်၊ ဝီ ဒတ် တာင် တာင် တဝ်း၊ “အိုယ် ဘေ ဒူအီ ခဲင် မိူင် ဆေခေမ်၊ တဲး ဘေ ထူမ် ဂြုဝ်း အုဝ်။ ပန် တီ ဇဝ်ဖြာ မိူဝ် ဒီ ထူမ် ဂြုဝ်း ဘေ။ 8 ဒေါ မွိုန် န့ မိုဝ်း အာဒါ အူ ဇေန့် ဒေါ ဟဲ့ တး ကာဇု ဟေ ခဲင် ပြဲ၊ တဲး ဂေ ရဝ်း ဟေ အီ ဒီ ဘဲန် ခုန်ဒီခမ် အီ အိုပ် ဂေ။ ဂေ ဘော ကာလာင် ဒီ ဟေ နာမန် တဝ်း၊ ‘မှာန့် တဲး မဲ ဘဲန် ခုန်ဒီခမ် အီ အိုပ် ယေ။’

9 ဟေ နာမန် တီ ဝီ တဝ်း၊ ‘အုဝ် တူ ခမ် ဒီ ဝဲန် နာမန် အုဝ် အီ တဲး ဆာရေ ဒီ ဒူအီ ဘော ဒီ ဇဝ် ဘဲန် ကာဒင် ဘဲန် ကာဒင်။ အုဝ် တူ ခမ် ဒီ အိုပ် ဘေ အာမျုဝ် ဟေ။’

10 ဟဲ့ ဟွတ့် ပါယ် တီ ခဲ့ ကွယ် ဂေ ဟေ ပီ ဝီ ကာလာင် ဒီ ဟေ ဒီပူ တဝ်း၊ ‘မှာန့် မဲ ဘဲန် ခုန်ဒီခမ် ယေ။’

11 မာလဲ၊ ဟေ ဒီပူ ဝီ တဝ်း ဒီ ဂေ၊ ‘အုဝ် တူ ခမ် ဒီ ဝဲန် ဘ့လေ အုဝ် အီ ငါမ် အီ ဆီငဲး။ အုဝ် တူ ခမ် ဒီ အိုပ် ဘေ အာမျုဝ် ဟေ။’

12 ပါယ် တီ ခဲ့ ကွယ် ဂေ ဟေ ပီ ဝီ ကာလာင် ဒီ ဟေ မာငုန် တဝ်း၊ ‘မှာန့်၊ တဲး မဲ ဘဲန် ခုန်ဒီခမ် ယေ။’

13 မာလဲ၊ ဟေ မာငုန် ပီ ဝီ တဝ်း ဒီ ဂေ၊ ‘အုဝ် တူ ခမ် ဒီ ဝဲန် အိုမ် မာငုန် အုဝ် နီ၊ အီ ဘူင် တဲး န့ ဘဲန် နဝ်း ဒါခိုယ် ဒီ ဇဝ် ဘဲန် ကာဒင် ဘဲန် ကာဒင် ဘော ဒီ ဂေ ဒူအီ။ အုဝ် တူ ခမ် ဒီ အိုပ် ဘေ အာမျုဝ် ဟေ။’

14 ဒီ ကာဒဲ့ နီ၊ ခဲ့ ကွယ် ဟေ ဘောကာဂ့လျီတ် ဝီ တဝ်း ဒီ ဟေ မာအာတ့်၊ ‘တဲး မဲ ဘဲန် ခုန်ဒီခမ် ယေ။’

15 ဟေ မာအာတ့် တီ ဝီ တဝ်း ဒီ ဂေ၊ ‘ဆေ ဘေ ဆီ တဲး အုဝ် ဘဲန် ခုန်ဒီခမ် ဘေ၊ တဲး ဘေ တး ခြုတ် ခြိုမ် ယာပ် အုဝ် နီ။ ဆေ အာဝ် ပါယ် တီ၊ တဲး ငဝ် လေး ဒီ ရာ မာအာတ့် အုဝ် နီ၊ ဝီ ကာဆိုမ် ဟေ အာရိတ် အီ ကွယ် ဒီ နွန် လေဘာနုန်။’

16 ဒေါ တီ နီ ဘေ ဟဲ့ စုဝ့် ဟဲ့ ဒါင် အာဘီမေန် ဘဲန် ခုန်ဒီခမ်။ တဲး ဘေ ဇေန့်ဇာ ယုဝ် ဘေ မိုဝ်း နဝ်း ဆိူဝ် နဝ်း မှာန် ဒီ ဘူင် ပါယ် တီ။ တဲး ဘေ ဇေန့်ဇာ ယုဝ် ဘေ ဟဲ့ ရုဝ်ဆေ ဒီ အာယေရုပ်ဘာလ ဘော ဒီ ဘီနွင် ဝေါဝဲ အန်၊ ယုဝ် ဘေ ဟဲ့ ဝီ ဝျီ့ ဂုင် ဂေဇူ ပဲ့ ဟဲ့ ဘူင် အန် အီ ခိုက်ခမ် ကာဆဝ် တွိုန်။ 17 တဲး ဘေ လှုဝ်း လွင် ဂုန့် အုဝ် ဟဲ့ ခမ် ဒီ ကာဂုဝ်း ဒီ ဒါ ဆိုက် ဒါင် ဘေ။ အန် ဘော ခမ် ဒီ စုန် အာဆာက် အန်၊ တဲး အန် ပွိုန် ဒီ ချွတ် လေး ဘေ ဒီ ဒူအီ မီဒီအာန်။ 18 အာတိုဝ် နီ၊ ဘေ ယီ ဟဲ့ ဝီ ဘူင် ကာဘး ဒီ ဘီနွင် ဝေါဝဲ ဂုန့် အုဝ်။ ဘေ ဟဲ့ ဝီ ငဝ်း ယမ် ဂွန် အီမာယ် အန် ဘူ ဂိုဝ် ဝီ ဒဲင် မာဝ် အူ ဘူင့်။ ဟဲ့ ဟွတ့်၊ ဘေ ဟဲ့ ဝီ ဒါင် အာဘီမေန် အီ မုး ဂွန် မှာယ်၊ တဲး အန် ဝီ ဘဲန် ခုန်ဒီခမ် အီ အိုပ် ဒူအီ ခဲင် မိူင် ဆေခေမ်။ ဘေ ဟဲ့ ဘူင် ပါယ် တီ ကူပ် မုး အန် ဘီနွင် ဝေါဝဲ ဘေ။ 19 ဆေ ဘေ ဘူင် ပါယ် တီ ဒေါ မိုဝ်း ဘေ နဝ်း ဆိူဝ် နဝ်း မှာန် ဘော ဘူင် ဆိူဝ် ဆိူဝ် မှာန် မှာန် ဒီ အာယေရုပ်ဘာလ ဘော ဒီ ဂေ ဘီနွင် ဝေါဝဲ အန်၊ တဲး ဘေ ဘျုဝ် ဒါခိုယ် ဒီ ဒူပ် အာဘီမေန်။ အာဘီမေန် မိူဝ်၊ တဲး အန် ဘျုဝ် ဒါခိုယ် ဒီ ကွယ် ရိုမ် ဒူပ် ဘေ။ 20 မာလဲ၊ ဆေ အာဝ် ပါယ် တီ၊ တဲး ငဝ် လေး ဒီ အာဘီမေန်၊ တဲး န့ ကာဆိုမ် တူတ့် ဒူအီ ခဲင် မိူင် ဆေခေမ် ဘော ဒူအီ ခဲင် မိူင် မီလော။ တဲး ငဝ် ပီ ဝီ လေး ဒီ ဒူအီ ခဲင် မိူင် ဆေခေမ် ဘော ဒီ ဒူအီ မိူင် မီလော ပီ ဝီ ကာဆိုမ် အာဘီမေန်။”

21 ဟဲ့ ဟွတ့် ကာလာင် ပါယ် တီ အာယုဝ်ထာမ် ဘော ဝီ ယုဝ် အာဘီမေန် တီ အီ မုး အီကတ် အန်။ အန် ဘော ဝီ တဝ် ဟာဝ် ဒီ မိူင် ဘီရာ။ အန် ဘော ကွယ် ဒီ တီ။

22 အာဘီမေန် ဘော အိုပ် ဒူအီ အီဆာရေလ အာဒါ အူယ် ဆီနမ်။ 23 ဝါယ် အန် တီ ဇဝ်ဖြာ ဘော စ်ု ကာနမ် ဟာယ် ဘူင် တဲး အာဘီမေန် ဂေ ဒူအီ ခဲင် မိူင် ဆေခေမ် လာယ် ကာလုတ့်။ ခုဝ်၊ ဂေ ဒူအီ ခဲင် မိူင် ဆေခေမ် ဟဲ့ ကာဘး ဒီ အာဘီမေန်။ 24 ဇဝ်ဖြာ ဟဲ့ ဘူင် ပါယ် တီ တဲး န့ ဝီ ဝျီ့ မှာပ် ပီ ဘူင် အာဘီမေန် ဘော ဂေ ဒူအီ ခဲင် မိူင် ဆေခေမ် ဒေါ ငဝ်း ယမ် ဂေ ဂွန် အာယေရုပ်ဘာလ ဘူ ဂိုဝ် ဝီ တွိုန်။ 25 ဒူအီ ခဲင် မိူင် ဆေခေမ် တွိုန် ဘော ဟာဝ် ဘ်ု န့တေန့် ဒဲင် နွန် ဒွန် နွန် တဲး ဂေ ဇူန် ဘော ဒိုဝ်း ကြုဝ်ကြာမ် ဂေ ဒူအီ အီ ဝဝ့် ဒူပ် န့တေန့် တီ။ အီ ဟဝ် ဘော ဝီ ကာလာင် လွင် အန် တီ ဒီ အာဘီမေန်။

26 ဒေါ အန် တီ န့ မုး အာကာလာ အီ မုး ဂွန် အာအေဘေတ်။ ဘော အန် ဘော ဂေ ဘီနွင် ဝေါဝဲ အန် ဟဲ့ တး ကွယ် ခဲင် မိူင် ဆေခေမ် တွိုန်။ ဂေ ဒူအီ ခဲင် မိူင် ဆေခေမ် တီ မိူဝ် ရုဝ်ဆေ အန် ဘော ညှိုမ် နဝ်း အန်။ 27 ဂေ ဘော ဟာဝ် ခဲင် မာန် ဘ့လေ မာငုန် ဂေ ဘော ဘေတ့် ဘ့လေ မာငုန် ဘော ညဲတ့် တဲး န့ ဘဲန် အိုမ် မာငုန်။ ဟဲ့ ဟွတ့်၊ ဂေ ဘော လိုပ် ခဲင် ဇူင် ဇဝ်ဖြာ ဂေ၊ တဲး ဂေ ဘူင် ဘ့လွယ်။ ဂေ ဘော ဒျီင် ဘော ဟူမ် ဘျုဝ် ဘျုဝ် ကျဝ် ကျဝ် ဘော ဒိူင် ဘော အေး အာဘီမေန်။ 28 အာကာလာ အီ မုး ဂွန် အာအေဘေတ် တွိုန် ဝီ တဝ်း၊ “အာဘီမေန် တီ မုး အာဆေ။း ကူပ် မာဆေ အေ ဒူအီ ခဲင် မိူင် ဆေခေမ် နီ လုဝ် ဂူမ် အန်။း အန် မုး ဂွန် အာယေရုပ်ဘာလ။ အာဇေဘူလာ ဘော မုး ဒဲစေန့် အန်။ တဲး အေ ဝီ ခမ် ပီ အိုပ် ဒီဘဲ ဂုန့် ဒင် အေ ဒီ အေ။ န့ မုး အာဟာမုဝ်။ အန် မုး ဂုန့် ဒင် အာမျုဝ် အေ အီ ဟဲ့ မှာန် အာခါခ်ု။ 29 ဆေ ဒူအီ ခဲင် မိူင် နီ ဘောကာဂ့လျီတ် ဖြူမ် ရိုမ် ဒူပ် အုဝ်၊ အုဝ် ဒီ ဘော ပဲ ဘော အွင် အာဘီမေန် တီ။ အုဝ် ဒီ ဘော တဝ်း ဒီ အန်၊ ‘ဒဲ့ တး ဒါ ဆိုက် မဲ ဘောကာဂ့လျီတ်။’”

30 ပါယ် တီ အာဇေဘူလာ အီ မုး ဒါ ကာညာ အီ အိုပ် မိူင် တွိုန် ဘော ယိုဝ် ဂြုဝ်း ပီ ကာလာင် အာကာလာ တီ၊ အန် ဘော ရူ ကာဆဝ်။ 31 အန် ဘော ဝီ စ်ု ဒါလာမ် အန် ဟာဝ် ဒူင် ကွယ် အာဘီမေန် ကွဲ့ တဲး အီ နပ်။ အန် တဲး ဂေ ကာလာင် ဒီ အာဘီမေန် တဝ်း၊ “အာကာလာ အီ မုး ဂွန် အာအေဘေတ် ဘော ဂေ ဘီနွင် ဝေါဝဲ အန်၊ ဂေ ဟဲ့ တး ကွယ် ဒီ မိူင် ဆေခေမ်။ ဂေ ဟဲ့ ကာဆုး တဲး ဒူအီ ခဲင် မိူင် ဝီ ကာဘး ဒီ မဲ။ 32 ခုဝ်၊ ခဲင် မှိုဝ် နီ ကာတဲ ဆွိုမ်၊ ဘော မဲ ဘော ဂေ ဒူအီ အီ ဒူပ် မဲ၊ တဲး ဘေ ကာထုဝ့် လေး ချြီင် ဘေ ခဲင် ဒူင် နာ။ 33 ဟီ ဇမ် ဆိန့်ဝး စေဝ် အာတ့် လေး ဆီငဲ၊ ဒေါ တး ကာဂုဝ်း အာကာလာ ဘော ဂေ ဒူအီ အန် ဒီ မဲ တီ၊ တဲး မဲ ကာဂုဝ်း ဒီငန့် ဒေါ အန် တီ အူ ဇေန့် ဘော ဘူင် ခဲ့ ကာအာပ် ဘူင်။”

34 ပါယ် တီ အာဘီမေန် ဘော ဂေ ဒူအီ အန် ဘောကာဂ့လျီတ် ဘော ကာထုဝ့် ခဲင် မှိုဝ် တီ။ ဂေ ဘော ကာယဝ်း ဘဲန် ဖွုန် ဖိုင်၊ ဘ်ု ဒီ ကာဂုဝ်း ဒီ ဒူအီ ခဲင် မိူင် ဆေခေမ် တီ။ 35 ဒေါ ဟဲ့ လေး စွင့် အာကာလာ ဒီ ဘာင် မာလုဝ်း မိူင်၊ အာဘီမေန် ဂေ ဒူအီ အန် ဂေ ဘော လေး ဒူင် ချြီင် ဂေ အူ ဇေန့်။

36 အာကာလာ ဘော ယိုဝ် ဒူအီ ဂေ တီ၊ အန် ဘော ကာလာင် ဒီ အာဇေဘူလာ တဝ်း၊ “ယွတ်၊ ဒူအီ ကိူန် ကာဆဝ် ဟဲ့ တး လူင် ဒီ နွန် ဒွယ်။” အာဇေဘူလာ ဝီ တဝ်း ဒီ အန်၊ “ပီ ယိုဝ် မဲ အီ နှဲန် အာရိုပ် ဒူအီ တီ၊ န့ မုး ကာမိုက် နွန် ဒွယ်။”

37 အာကာလာ ပီ ဝီ ကာလာင် ပေါ အူ ဇေန့် တဝ်း၊ “တဲး မဲ ယွတ်၊ ဒူအီ ဟဲ့ တး လူင် ဒီ နွန်။ မင် အီ ဟဲ့ တး ဒူပ် န့တေန့် အီ မိုဝ်း ဟေ ထေရေပ် ဒူင် ကွယ် ဂေ ဒူအီ အီ မဲန် ဘေဒါင်။”

38 ပါယ် တီ အာဇေဘူလာ ဝီ တဝ်း ဒီ အန်၊ “မဲ ဟဲ့ ဒွိုမ် လုက်တာယ် အာဘီမေန်။ နဝ်း ပီခိုက် မဲ တီ၊ န့ ဝီ ကွယ် ဒီ မှဝ် ဒေါ တီ နီ။း မဲ ဟဲ့ တဝ်း၊ ‘အာဘီမေန် မုး အာဆေ၊ တဲး အေ ကော လုဝ် ဂူမ် အန်။’ ဒူအီ ပီ လုက်တာယ် ပီ ဆဲ့ မဲ တီ၊ မဲ လုဝ် ဟာဝ် ကာဂုဝ်း ဒီ ဂေ ဒေါ တီ နီ။”

39 အာကာလာ မိူဝ် ယဲတ့် ဟာဝ် ဂေ ဒူအီ ခဲင် မိူင် ဆေခေမ် တွိုန်၊ တဲး ဂေ ဟာဝ် ကာဂုဝ်း ဒီ အာဘီမေန် ဂေ တီ။ 40 အာကာလာ ဘော ဝီ တဝ် အန်။ အာဘီမေန် ဘော ခုင်ခြး ဒူပ် အန်။ ဒူအီ မိူဝ် ဟဲ့ ကိူန် အီ ဟဲ့ ပါ့ ဟဲ့ ကေး ယမ် ကော ဝီ ဇမ် ဒီ ဘာင် မာလုဝ်း မိူင် တွိုန်။ 41 အာဘီမေန် ဘော ဝီ ကွယ် ဒီ မိူင် အာရူမာ တွိုန်။ အာဇေဘူလာ ဘော ဟုဝ် လေး အာကာလာ ဂေ ဘီနွင် ဝေါဝဲ အန် ခဲင် မိူင် ဆေခေမ် တွိုန်။

42 ဘော ဇမ် ပါ ခဲညှာ ဒူအီ ခဲင် မိူင် ဆေခေမ် တွိုန် ဒီ လေး ဟာဝ် ဒီ မာန် ဂေ ဘော ဒီ ဒူင် နာ ဂေ။ အီ ဟဝ် ဘော တဲး အာဘီမေန် နပ် လွင် အန် တီ။ 43 ပါယ် တီ အန် ဘော ကာယဝ်း ဒူအီ အန် ဘဲန် အူယ် ဖိုင်၊ တဲး ဂေ ဟာဝ် ဘ်ု ဒီ မာန် ဂေ ဘော ဒီ ဒူင် နာ တီ။ ဒေါ လေး တး ဒူအီ ဂေ တွိုန်၊ အန် မိူဝ် ဟာဝ် ကာဂုဝ်း ဒီ ဂေ အူ ဇေန့်။ 44 အာဘီမေန် ဂေ ဒူအီ အန် အာဒါ အူ ဖိုင် ဝီ ကာဘ့လဲပ် ဟာဝ် ဘ်ု ဒီ ဘာင် မာလုဝ်း မိူင်။ ဒူအီ အန် အာဒါ အာ ဖိုင် တွိုန် ဘော ဝီ ကာဂုဝ်း ငဝ်း ယမ် တူတ့် ဒူအီ အီ ကွယ် ခဲင် မာန် ဘော ခဲင် ဒူင် နာ ဂေ။ 45 အာဘီမေန် ဘော ကာဂုဝ်း ဒီ ဒူအီ ခဲင် မိူင် တီ ဒွင် ဝန်။ အန် ဘော ပွိုန် မိူင် တီ ဘော ငဝ်း ယမ် ဒူအီ ဂေ တီ။ အန် ဘော ပျာတ့် ဝဲန် ရဲင် မိူင်၊ တဲး န့ စုဝ်း လိုဝ်။ ဟဲ့ ဟွတ့်၊ အန် ဘော ဝီ ဒိုဝ်း ဆဲ့ ဟုး ဒွန် နာ ဒွန် ပ့လုဝ့် ခဲင် မိူင် တီ။

46 ဂေ ဒူအီ အီ ဘ်ု ကာစှူင့် စာ တွိုန် ကော ယိုဝ် လွင် အန် တီ၊ ဂေ ဘော တဝ် ဟာဝ်၊ ချြီင် ခဲင် ဇူင် ဇဝ် ဘေရိတ် တွိုန်။ 47 အီ ဟဝ် အူ ဝီ ဘော ကာလာင် ဒီ အာဘီမေန် လွင် ဂေ အီ ဟဲ့ တး ကာဇု ဘ်ု ဒီ ဇူင် တွိုန်။ 48 ဒေါ အန် တီ ဘော အန် ဘော ဒူအီ အန် ဘော ဝီ ဟုဝ့် ဒီ နွန် ဆာလာမူန်။ အန် ဘော ဒိုဝ်း မိုယ်၊ ဒဲပ် ရာ ဟေ မင် ကာလဝ့်၊ ဝီ ဂွတ် ဟာဝ် ရာ ဟေ တီ။ အန် ဘော ကာလာင် ဒီ ဂေ ဒူအီ အီ ဒူပ် အန်၊ တဲး ဂေ ဒွန် အီ ဘူင် ဒူပ် ပီ ဘူင် အန်။ တဲး ဂေ ဘူင် ခြန် ခြန်၊ ဟဲ ဟဲ။ 49 ပါယ် တီ ဒူအီ အန် ဒွန် အီ ဘော ဒဲပ် ဒီ ဂူင့် ရာ ဟေ ဒူပ် အန်။ ဟဲ့ ဟွတ့်၊ ဂေ ဘော ဒိုဝ်း ရာ ဟေ ဂေ တီ၊ ဘ့လေး အုန် ဒီ ရဲင် ဒူင် ချြီင် ဂေ။ ဂေ ဘော ဝီ ဒိုဝ်း ငဝ်၊ ဒုဝ့် တဲး ဒူအီ အီ ကွယ် ဒူင် တီ ဘော ယမ် ကာဆိုမ် တူတ့်။ ဂေ ဒူအီ အီ ဟဲ့ ကွယ် ဒူင် တီ ဘော အီဘိုန့် ဘော အီမာယ်၊ ဂေ ကွယ် မွက် အူ ဟြဲန့် ဝီ။

50 ဝါယ် အန် တီ အာဘီမေန် ဘော ဝီ ဟာဝ် ဒီ မိူင် ဆေဘိတ်။ ဂေ ဘော ဟာဝ် ရူပ် ဘော ရိုပ် မိူင် တီ။ 51 ခဲင် မိူင် တီ၊ န့ ဘော မိုဝ်း ဟုဝ် စာ အီ မန် ဆီချာ။ ဒူအီ ခဲင် မိူင် တီ ဘော မိူင်၊ ဂေ ဘော ဟာဝ် ကွယ် တူတ့် ခဲင် ဟုဝ် စာ တီ။ ဂေ ဝီ ကာဘိတ် ခတ်ဆဝ် နာ ခဲင်။ ဟဲ့ ဟွတ့်၊ ဂေ ဝီ ဟုဝ့် ကွယ် ဒဲင် ကာတု ဟုဝ် တီ။ 52 အာဘီမေန် ဘော တး ကာဂုဝ်း ဒီ တီ။ အန် ဘော ဝီ ဟာဝ် ဒီ ဘာင် မာလုဝ်း ဟုဝ် စာ တီ ဘော ဒိုဝ်း ငဝ်၊ တဝ်း ဒီ ဒုဝ့် ကာဆိုမ် တူတ့်။ 53 အီဘိုန့် အူ ဝီ ဘော ဒိုဝ်း မာဝ် ပီ ကြိတ် ဂေ ခါမုန်။ အန် ဝိုန့် လူင်၊ တဲး န့ ဘော ဒိုဝ် ဂိန့် အာဘီမေန်၊ တဲး ကာအာင် ဂိန့် အန် ကော ကာလာတ့်။

54 အန် မိူဝ် ဝီ ပီခြန် အန် ဒီ ဒဲ့ ဒီဘဲ အန် အီ ဒူပ် အန် တဝ်း၊ “တဲး မဲ ထွတ် မာပွါ့ လာင် မဲ တီ ငဝ်း ယမ် အုဝ်။ အုဝ် တူ ဆီ တဲး အီ ပွိုန် တဝ်း၊ ‘အီဘိုန့် ဟဲ့ ငဝ်း ယမ် အန်။’” ခုဝ်၊ ဒဲစေန့် အန် ဘော ငဝ်း ယမ် အန်။ 55 ဂေ ဒူအီ အီဆာရေလ ဘော ယိုဝ် လွင် အာဘီမေန် ဟဲ့ ယမ်၊ ဂေ ဒွန် အီ ဘော ဝီ ဝေန့် ဒီ ကာင် ဂေ ရာင် အာဆေ ရာင် အန်။

56 ပါယ် တီ ဇဝ်ဖြာ ဝီ ဘူင် ဝျီ့ အီ ဟာယ် ကာဆဝ် ပဲ့ ဟဲ့ ဘူင် အာဘီမေန် ဒီ ဂုန့် အန် ဒေါ ဟဲ့ ငဝ်း ဝဲန် အန် ဘီနွင် အန် အာဒါ ဘူ ဂိုဝ် ဝီ တွိုန်။ 57 ဇဝ်ဖြာ မိူဝ် ဝီ တဲး ဂေ ဒူအီ ခဲင် မိူင် ဆေခေမ် ခမ် အီ ဟာယ် အီ မိူက် ပဲ့ ဟဲ့ ဒွိုမ် ဘူင် ဂေ။ ဂေ ဝီ လုဝ် ခမ် ဂြုဝ်း ပီ ဒိူင် အာယုဝ်ထာမ် အီ မုး ဂွန် အာကီဒီအူန် တွိုန်။