ဒေါ အန် တီ ဂေ ဒူအီ အာအေဖာရိမ် ဝီ ကာလာင် ဒီ အာကီဒီအူန် တဝ်း၊ “မှဝ် န့ ပါယ် ပီ တူ ဒဲ့ မဲ ဒီ ယေ ဟာဝ် ကာဂုဝ်း ဒီ ဒူအီ မီဒီအာန် ဂေ နီ။း မှဝ် န့ ပါယ် ပီ ဘူင် မဲ ပါယ် တီ။း” ဂေ ဘော ဖျာက် ကာဆဝ် အန်။

2 အန် ဝီ တဝ်း ဒီ ဂေ၊ “ပဲ့ ဟဲ့ ဟွတ့် အုဝ် ဘူင် တီ၊ အာဝ် ပွိုန် လာယ် ကာဂဝ် ဒီ ပဲ့ ဟဲ့ ဘူင် ဘေ။ ဆေ ဒူအီ အာအေဖာရိမ် ဂဲပ် ဒူမ် ဘ့လေ မာငုန် အီ ဆီ ဂိတ်၊ န့ မွှိုမ် လွှိုမ် ဒူအီ အာဘီအေစာ ဘေတ့် ဒိုဝ်း ဟာဝ် ဘ့လေ မာငုန် ဒီ အာတ့်။ 3 ဇဝ်ဖြာ ဟဲ့ အာပ် အာအောရာဖ ဂါယ် အာဇာရေပ် အီ မုး ဒါ တာင် ဒူအီ မီဒီအာန် တွိုန် ဒီ ဘေ။ ပီ ဘူင် အုဝ်၊ အာဝ် ပွိုန် လာယ် ကာဂဝ် ဒီ ပီ ဘူင် ဘေ။” အန် ဟဲ့ ဟွတ့် ကာလာင် ပါယ် တီ ဒီ ဂေ၊ နဝ်း ရူ ဂေ ဘော ဟြာယ်။

4 ဒေါ အန် တီ အာကီဒီအူန် ဂေ ဒူအီ အန် အူယ် မာယဝ်း ဝီ တွိုန် ဟဲ့ ဟွတ့် တး ဇမ် ဒီ ဘာင် အိုမ် ဘ့လဲင် ယောဒါန်၊ ဂေ ဘော ကာလုဝ်း ဟာဝ်။ ဂေ ပီ ဘော ဟဲ့ နုန် ကာဆဝ် မိူဝ်၊ ဂေ ယီ နဲ့ ဒူပ် ဒီ ခုင်ခြး ရန်ဆူ ဂေ။ 5 ဒေါ တး ဇမ် ဂေ ဒီ မိူင် ဆူခူတ်၊ အန် ဘော ကာလာင် ဒီ ဒူအီ ခဲင် မိူင် တီ တဝ်း၊ “တဲး ဘေ ဒွါ ခါမုန် ဘေ ဒီ ဒူအီ အုဝ် ခေါ အီ စဲက်။ ဂေ ဟဲ့ နုန် ကာဆဝ်။ ဒေါ တီ နီ၊ ယေ ခုင်ခြး ဒူပ် အာဇေဖ ဂါယ် အာစာလာမုန် အီ မုး ခုန်ဒီခမ် ဒူအီ မီဒီအာန်။”

6 မာလဲ၊ ဒါ တာင် ခဲင် မိူင် ဆူခူတ်၊ ဂေ ဝီ တဝ်း ဒီ အန်၊ “မှဝ် မ့ပါယ် ပီ လုဝ် ယေ ဒွါ ခါမုန် ဒီ ဒါ ဆိုက် မဲ။း မဲ ညှမ် ပွိုန် ဒီ မှေတ့် အာဇေဖ ဂါယ် အာစာလာမုန်။”

7 အာကီဒီအူန် ဝီ တဝ်း ဒီ ဂေ၊ “ဆေ ဇဝ်ဖြာ ဟဲ့ အာပ် အာဇေဖ ဂါယ် အာစာလာမုန် ဒီ အုဝ်၊ အုဝ် ဒီ ဒိုဝ်း ဟေ မာအာတ့် ခဲင် ပြဲ ကာဟဝ်း ဘော မာအာတ့် ဘဲန် မျုဝ် ဘဲန် မျုဝ် မး ကာတူ ဘေ၊ တဲး န့ ကော မာတုး။”

8 အာကီဒီအူန် ပီ ဝီ ဟာဝ် ဒီ မိူင် ပေနူအေန်၊ ပီ ဝီ မှာန့် ပီ ဒီ ဟူမ် ဒီ ဂေ ပါယ် တွိုန်။ ဒူအီ ခဲင် မိူင် တီ မိူဝ်၊ ပီ ဝီ ကာလာင် ဒီ အန် ပီ ပီ ဒွိုမ် ကာလာင် ဒူအီ ခဲင် မိူင် ဆူခူတ် တွိုန်။ 9 ပါယ် တီ အန် ဝီ တဝ်း ဒီ ဂေ၊ “ဆေ အုဝ် ဟဲ့ ဟွတ့် ပဲ ဂေ ဒူအီ မီဒီအာန်၊ အုဝ် ဒီ ဝီ တး ပျာတ့် ဝဲန် ကာစှူင့် စာ ဘေ အီ မုး ဒူင် ဘ်ု ဒါ ဆိုက် ဘေ နီ။”

10 ဒေါ အန် တီ အာဇေဖ ဂါယ် အာစာလာမုန် ဟဲ့ ကွယ် ဒီ ဒူင် စိူဝ် ကာကော။ ဂါယ် ကွယ် ရိုမ် ဒူပ် ဒါ ဆိုက် ဂါယ် အီ မုး ဒူအီ အီ ကွယ် ဘ့လာက် နာ လေး ဆီငဲ။ ဂေ ဘောကာဂ့လျီတ် ဟဲ့ ဂိတ် အူ မှိုန့် ဒီ ဖန် ဟြဲန့် ဝီ။ ခုဝ်၊ ဒါ ဆိုက် ဂေ အူ ဆဲန် ဒီ အာ မှိုန့် ဝီ အီ မိုဝ်း ဒီ ဂူင့် မာပွါ့ လာင်၊ ဂေ ဟဲ့ ဟွတ့် ယမ်။ 11 အာကီဒီအူန် ဝီ ယဲတ့် ဒါ ဆိုက် အန်၊ ဟာဝ် ဒူပ် န့တေန့် ဂေ အီ ကွယ် ခဲင် ထိုပ် ဘ့လာက် နာ လေး ဆီငဲ မိူင် နောဘ ဂါယ် မိူင် ယောဖေဟာ။ အန် မိူဝ် ကာဂုဝ်း ဒီ ဂေ ဒေါ တူ ထာင်၊ တူ နမ်လှုဝ်း ဂေ။ 12 ခုန်ဒီခမ် ဒူအီ မီဒီအာန် အာ ကာဒင် အီ စိူဝ် အာဇေဖ ဂါယ် အာစာလာမုန် တွိုန် ပီ ဘော ဟဲ့ တဝ် မိူဝ်၊ အန် ယီ နဲ့ ခုင်ခြး ဒူပ် ဂါယ်။ အန် ဘော ပွိုန် ဒီ မှေတ့် ဂါယ်။ ဟဲ့ ဟွတ့်၊ အန် ဘော ငဝ်း ဝဲန် ဒါ ဆိုက် ဂေ ဘော ပျာတ့် ဝဲန် ဒပ် ဂေ။

13 အာကီဒီအူန် အီ မုး ဂွန် အာယုဝ်အာတ် ဝီ တး ဒူင် ကာဂုဝ်း ဂေ အီ ကွယ် ဒူပ် န့တေန့် ဒီ နွန် ဟေရိတ်။ 14 ဒေါ အန် တီ၊ အန် ဝီ မှေတ့် ဂွန် ကာညူမ် ခဲင် မိူင် ဆူခူတ် တွိုန် အူ ဝီ ဘော ဒီမွှတ် ဇဲတ် ဂွန် ဝီ တီ။ ဂွန် ဝီ တီ ဘော ဒဲမ် ခဲ့ ကွယ် စိူဝ် ဂေ ဒါ တာင် အီ အိုပ် အီ ယဲတ့် ဂေ ဒူအီ ခဲင် မိူင် ဆူခူတ် အာဒါ ဘူ ဂိုဝ် ဒီ ဘူ ဝီ၊ ဒွါ ဒီ အန်။ 15 ပါယ် တီ အန် ဘော ဝီ ဟာဝ် ဒူင် ကွယ် ဂေ ဒါ တာင် ခဲင် မိူင် ဆူခူတ် တွိုန်။ အန် ဝီ တဝ်း ဒီ ဂေ၊ “ဘေ ဝီ လှုဝ်း လွင် ဟဲ့ ဝဲန် ဘေ ဒီ အုဝ် ဒေါ တူ စွယ် ဘေ ဒီ အုဝ် တွိုန်။ ဘေ မိူဝ် ဟဲ့ နဲန အုဝ် တဝ်း၊ ဘေ တူ ဒွါ ပီ ဒီ ဟူမ် ဒီ ဒါ ဆိုက် အုဝ် ဒေါ ဟဲ့ နုန် ကာဆဝ် ဂေ။ ခုဝ်၊ အုဝ် ညှမ် ပွိုန် ဒီ မှေတ့် အာဇေဖ ဂါယ် အာစာလာမုန်။ ဒေါ တီ နီ တဲး ဘေ ယွတ်၊ ဂါယ် ဟဲ့ ကွယ် ဒူပ် အုဝ်။” 16 ပါယ် တီ အန် ဘော မာနုဝ် ဂေ ဒူအီ ခဲင် မိူင် ဆူခူတ်။ အန် ဒိုဝ်း ဟေ မာအာတ့် တာင် ခဲင် ပြဲ ကာဟဝ်း ဘော ဟေ မာအာတ့် ပေါ မျုဝ် မး ဂေ ဒါ တာင် အီ အိုပ် အီ ယဲတ့် ဒူအီ ခဲင် မိူင် ဆူခူတ် တွိုန်။ 17 အန် ဘော ပျာတ့် ဝဲန် ဘော ဟုဝ် စာ အီ ကွယ် ခဲင် မိူင် ပေနူအေန် ဘော ငဝ်း ဝဲန် ဘော ဒူအီ ခဲင် မိူင် ဂေ တီ။

18 အာကီဒီအူန် ဝီ ဒီမွှတ် အာဇေဖ ဂါယ် အာစာလာမုန် တဝ်း၊ “ဒူအီ ပီ ငဝ်း ယမ် ဘာယ် ဒီ မိူင် ထာဘောရာ တွိုန်၊ ဂေ မုး ဒူအီ ပါယ် မှဝ်။း” ဂါယ် ဝီ တဝ်း ဒီ အန်၊ “ဒူအီ ဂေ တီ၊ ဂေ ပီ မဲ။ ပီ ပါယ် အာရိုပ် ဂေ၊ ဂေ နှဲန် ဒီ မုး ဂွန် ခုန်ဒီခမ် ဒွန် အီ။”

19 အာကီဒီအူန် ဝီ တဝ်း ဒီ ဂါယ်၊ “ဒူအီ ဂေ တီ၊ ဂေ မုး ဝါ အုဝ်။ ဂေ ဘော မုး ဂွန် မာ အုဝ်။ ဇဝ်ဖြာ ဟဲ့ နပ်၊ ဆေ ဘာယ် တူ ငဝ်း ယမ် ဂေ၊ အုဝ် မိူဝ် တူ ငဝ်း ယမ် ဘာယ်။” 20 ပါယ် တီ အန် ဘော ဝီ ကာလာင် ဒီ အာယေဆာ အီ မုး ဂွန် ဂိန့် အန် တဝ်း၊ “ယိတ့် ငဝ်း ယမ် ဒူအီ ဂါယ် နီ။” ဂွန် အန် ယီ တူ ထွတ် လေး မာပွါ့ လာင် အန်။ ခုဝ်၊ အန် ဆီ ဒီတဲတ် ဘော ယုဝ်။

21 ဒေါ အန် တီ အာဇေဖ ဂါယ် အာစာလာမုန် ဝီ တဝ်း ဒီ အန်၊ “တဲး မဲ ယိတ့် ငဝ်း ယမ် ယာယ် ရာင် မဲ။ မဲ ဟဲ့ မုး ဒူအီ တာင် ဘော ဟဲ့ မိုဝ်း ပ့လူမ် ဂေ ဟဲန့် ကိူန်။” ပါယ် တီ အန် ဘော ယိတ့်၊ ငဝ်း ယမ် ဂါယ် အူ ဇေန့်။ အန် ဘော ဒိုဝ်း ဘော ရာင် ဆီမန့် ခြိဝ် ပီ ဟွယ် ဂါယ် ဒီ မဲင် မင်ပြွင့် ကာဟာတ့် ဂါယ်။

22 ဝါယ် တီ၊ ဂေ ဒူအီ အီဆာရေလ ဝီ တဝ်း ဒီ အာကီဒီအူန်၊ “မဲ ဟဲ့ ချွတ် လေး ယေ ဒီ ဒူအီ မီဒီအာန်၊ တဲး မဲ ဘော ဂွန် မဲ ဘော လှာန် မဲ ဘဲန် ဒါ တာင် အီ အိုပ် ယေ။”

23 အာကီဒီအူန် ဝီ တဝ်း၊ “အာဝ် မုး အုဝ် ဒီ အိုပ် ဘေ။ ဂွန် အုဝ် မိူဝ် တူ အိုပ် ဘေ၊ ဇဝ်ဖြာ အီ ဒီ အိုပ် ဘေ။” 24 အန် ပီ ဝီ တဝ်း ဒီ ဂေ၊ “အုဝ် ဆီ မှာန့် မီ အူ မျုဝ် ဒီ ဘေ။ အုဝ် မှာန့်၊ တဲး ဘေ ဒွန် အီ ဒိုဝ်း တး ဘီဟျဝ့် ခြိဝ် ပဲ့ ဟဲ့ ဖာတ် တး ဘေ ဒီ အီ ဟဝ် အီ ဟဲ့ ယမ်၊ တဲး ဘေ တး ဒွါ ဒီ အုဝ်။” ခုဝ်၊ ရန်ဆူ ဂေ တီ၊ ဂေ မုး ဒူအီ အာမျုဝ် အာဆာမာန် အီ အိုင် ဒီ တာ ဘီဟျဝ့် ခြိဝ်။

25 ဂေ မိူဝ် ဝီ ကာဖြူမ် ဒီ တဝ်း ဒီ အန်၊ “အိုဝ်၊ ယေ ဟဲ့ ခူယ် ဟဲ့ ဇွန်ဇူမ် ဒီ ဒွါ ဒီ မဲ။” ဂေ ဘော ဒိုဝ်း ဟိုပ် ဒ ဒီ တီ။ ဂေ ဘော ဘုတ့် ဘီဟျဝ့် ပီ ဒိုဝ်း တး ဂေ ဒီ ရန်ဆူ ဂေ တွိုန်၊ ဘ့လေး ဒဲင် ဟိုပ် တီ။ 26 ဘီဟျဝ့် ပီ မှာန့် အန် ဒီ ဂေ တီ၊ ဂေ ဘော ဆ။ န့ စန် အူ ဟြဲန့် ဒီ ဘူ မာယဝ်း ဆေခေန်။ န့ ပီ မွက် ဂိုဝ် ဒီ အာ ဆ။ ဒဲင် တီ၊ ဂေ ဟဲ့ ပွိုန် ဘော ရာင် ဆီမန့် ခြိဝ်၊ မာကာဝဲ့၊ ဘော ဘိက် ရေန့် ဂဲ ပီ တာ ဂေ ခုန်ဒီခမ် ဒူအီ မီဒီအာန်။ ဂေ ဟဲ့ ပွိုန် ဘော ဝန် မဲင် မင်ပြွင့် ကာဟာတ့်။ 27 အာကီဒီအူန် ဝီ ဒိုဝ်း ခြိဝ် ဂေ တီ၊ ဝီ ဘူင် အာရိုပ် ဆီတုဝ် အေဖူတ်၊ အုန် ဒီ မိူင် အောဖာရ အီ မုး ဒူင် ကွယ် ဘြိမ် အန်။ ဂေ ဒူအီ အီဆာရေလ ဘော ဝဲန် ဇဝ်ဖြာ၊ ဝီ ဟာဝ် ကြိုပ် ဆီတုဝ် အီ ပီ အာရိုပ် ရာင် တီ။ အာတီ၊ န့ ဘော ဘဲန် ပီ ယွတ့် ဂေ ခိူမ် ဒီ အာကီဒီအူန် ဘော ဒီ ဒူအီ ခဲင် န့ဟူမ် အန်။

28 ပါယ် တီ ဂေ ဒူအီ မီဒီအာန် ဘော စှိုမ် ဒီ ဂေ ဒူအီ အီဆာရေလ။ ဂေ မိူဝ် အာဝ် ဟူ ပွိုန် ဒီ ပီခိုက် ဂေ ဒေါ မှဝ်။ မိူင် ဘော မိူင် ဘော ယေန် ဒါခိုယ် ဒေါ မုး စုဝ် အာကီဒီအူန်၊ အာဒါ ဖွုန် ဂိုဝ် ဆီနမ်။

29 အာကီဒီအူန် အီ စိူဝ် ဘော အာယေရုပ်ဘာလ၊ အီ မုး ဂွန် အာယုဝ်အာတ် ဘော ဝီ ဝိဝ် ဒီ မိူင် ဘြိမ် အန်၊ ဝီ ကွယ် ဒီ တီ။ 30 အန် မိုဝ်း ဂွန် အီမာယ် ဘူ ဂိုဝ် ဝီ ကူပ် အီဘိုန့် အန် မိူဝ် ဟဲ့ ကိူန် ကာဆဝ်။ 31 အီဘိုန့် တျီ့ အန် အီ ကွယ် ဒီ မိူင် ဆေခေမ်၊ အန် ဘော မိုဝ်း ဂွန် အီမာယ် အူ ဝီ။ အန် ဘော တဲး စိူဝ် အာဘီမေန်။ 32 အာကီဒီအူန် အီ မုး ဂွန် အာယုဝ်အာတ် တီ၊ အန် မိူဝ် ဟဲ့ ကတ် ကာဆဝ်၊ အန် ဘော ယမ်။ ဂေ ဘော ဟာဝ် ဒိပ် ဒုဝ် ဘူင့် အန် ခဲင် ဘာရေဝ် အာယုဝ်အာတ် အီ မုး ဂုန့် အန် အီ ကွယ် ဒီ မိူင် အောဖာရ အီ မုး ဒူင် ကွယ် ဂေ ဒူအီ အာဘီအေစာ တွိုန်။

33 ဝါယ် ဟဲ့ ဟွတ့် ယမ် အာကီဒီအူန်၊ ဂေ ဒူအီ အီဆာရေလ ဝီ ဝဲန် ဇဝ်ဖြာ။ ဂေ ဝီ ကြိုပ် ဇဝ် ဘာလ၊ ဝီ အိူပ် မျုက် ဘာလဘေရေတ်၊ တဝ်း န့ မုး ဇဝ်ဖြာ ပီ ကြိုပ် ဂေ။ 34 ဂေ မိူဝ် အာဝ် ဟူ နမ်လှုဝ်း ဇဝ်ဖြာ အီ မုး ဇဝ်ဖြာ ပီ ကြိုပ် ဂေ၊ အီ ဟဲ့ ချွတ် ဂေ၊ တဲး ဂေ လွတ် ဒီ ရန်ဆူ ဂေ အီ ဟဲ့ ဒွိုမ် ကွယ် ရူပ် ဂေ။ 35 ဒဲင် တီ ဂေ မိူဝ် တူ ဝီ ဘူင် ဝျီ့ ဂေဇူ ဒီ လှုက်လှာန် အာယေရုပ်ဘာလ အီ မုး အာကီဒီအူန် ကူပ် အီ မွှိုမ် ဒွန် မျုဝ် ပဲ့ ဟဲ့ ဘူင် အန် ဒီ ဒူအီ အီဆာရေလ။