1 ဆိန့်ဝး စေဝ် အာကီဒီအူန် အီ ဟဲ့ ဝီ စိူဝ် အာယေရုပ်ဘာလ ဘော ဂေ ဒူအီ အန် ဘောကာဂ့လျီတ်၊ ဂေ ဟဲ့ တး ချ ခူပ် တုဝ်း အိုမ် ဟာရွတ်။ ဂေ ဒါ ဆိုက် မီဒီအာန် ဟဲ့ ကွယ် နာ ကွာ ဂေ ဒီ နွန် မောရေ။ 2 ဇဝ်ဖြာ ဝီ ကာလာင် ဒီ အာကီဒီအူန် တဝ်း၊ “ဒူအီ အီ ကွယ် ဒူင် ကွယ် မဲ နီ၊ ဂေ ဟဲ့ ကိူန် ကာဆဝ်။ အုဝ် တူ ပွိုန် တဲး ဂေ အွင် ဒူအီ မီဒီအာန် ဂေ နီ။ အုဝ် ယုဝ် ဂေ ဒူအီ အီဆာရေလ ဒီ ဝီ ပီဖုင် ဂေ၊ ဝီ ထာင်၊ ဟဲ့ မုး ကူပ် ကျ ဂေ၊ ဂေ ဟဲ့ အွင်။

3 တဲး မဲ ဝီ ကာလာင် ဒီ ဂေ ဒူအီ ကိူန် တီ တဝ်း၊ ‘ဘေ အီ မိုဝ်း နဝ်း ယုဝ်၊ အီ ဆီမာ ကာစွာ၊ တဲး ဘေ ဝီ ဝေန့်။ တဲး ဘေ လေး ဒီ နွန် ဂီလေအာတ် နီ။’” ပါယ် တီ ဒူအီ အာဒါ အာ မှိုန့် ဒီ အာ ဟြဲန့် ဝီ ဘော ဝီ ဝေန့်။ န့ ဘော ဂိတ် အာဒါ အူ မှိုန့် ဝီ။

4 ပါယ် တီ ဇဝ်ဖြာ ပီ ဝီ တဝ်း ဒီ အာကီဒီအူန်၊ “ဒူအီ ဆီ နဲ့ ကိူန်။ အုဝ် ဒီ ကာယဝ်း ဂေ ဒီ မဲ။ ဆေ အုဝ် ဟီ တဝ်း၊ ‘ဝီ နီ လုဝ် ဟာဝ် ဒူပ် မဲ၊’ အန် လုဝ် ဟာဝ်။ ဆေ အုဝ် ယီ တဝ်း၊ ‘ဝီ နီ တူ လုဝ် ဟာဝ် ဒူပ် မဲ၊’ အန် တူ လုဝ် ဟာဝ်။”

5 ပါယ် တီ အာကီဒီအူန် ဝီ ဒဲ့ လူင် ဒူအီ ဂေ တွိုန် ဒီ ဘာင် အိုမ်။ ဇဝ်ဖြာ ဝီ တဝ်း ဒီ အန်၊ “တဲး မဲ ကာယဝ်း လေး ဒူအီ ဂေ အီ တး ဒျီင် အိုမ် အီ လျီ့ ပီ မာဆုဝ်၊ အုန် ဘဲန် အူ ဖိုင်။ ဂေ အီ တး ခြိုပ်ခြဝ်၊ ဒျီင် တဲး ဂေ ဘဲန် ပေါ အူ ဖိုင်။” 6 ဂေ အီ လျီ့ ဒျီင်၊ ဂေ ကွယ် အူယ် မာယဝ်း ဝီ။ ဒဲင် တီ ဂေ ခြိုပ်ခြဝ် ဒျီင် ဒွန် အီ။

7 ဇဝ်ဖြာ ဝီ တဝ်း ဒီ အာကီဒီအူန်၊ “အုဝ် ဒီ ဒိုဝ်း ဂေ အာဒါ အူယ် မာယဝ်း ဝီ အီ လျီ့ တီ၊ တဲး ဂေ ချွတ် မဲ၊ တဲး မဲ အွင်၊ တဲး မဲ ပဲ ဒူအီ မီဒီအာန် ဂေ တီ။ ဂေ အီ ဟဝ်၊ မဲ ဝီ စ်ု တဲး ဂေ ဒွန် အီ ဝေန့် ဒူင် ကွယ် ဂေ။” 8 ပါယ် တီ အာကီဒီအူန် ဘော စ်ု ဂေ ဒူအီ အီဆာရေလ ဝီ ဝေန့် ဒီ ထိုပ် ဂေ။ န့ ဘော ဂိတ် မီ ဂေ အူယ် မာယဝ်း ဝီ အီ ဟဲ့ ဒိုဝ်း ဂူင့် ပီ ဒီ ဟူမ် ဘော ဂူင့် ဝဝ် နိုင် ပဲ ပဲ့ ဟဲ့ ဂူင့် ဘီနွင် ဂေ။ ဒါ ဆိုက် ဂေ ဒူအီ မီဒီအာန် မိူဝ် ဟဲ့ ကွယ် စှိုင် ခြိုမ် ဒူပ် ဒီလယ့်။

9 ခဲင် မှိုဝ် တီ၊ ဇဝ်ဖြာ ဝီ တဝ်း ဒီ အာကီဒီအူန်၊ “ယိတ့်၊ ကာဂုဝ်း ဒီ ဒါ ဆိုက် ဂေ တီ။ အုဝ် ဒီ တဲး မဲ အွင်၊ မဲ ပဲ ဂေ။ 10 ဆေ မဲ တူ ယ ကာဂုဝ်း ဒီ ဂေ၊ တဲး မဲ ဒဲ့ ဒဲစေန့် မဲ အီ စိူဝ် အာဖူရာ ဒူပ် မဲ၊ လူင် ဒူင် ကွယ် ဒါ ဆိုက် ဂေ တီ။ 11 မဲ ဒီ ဘော ယိုဝ် ဂြုဝ်း ပီ လာယ် ကာမွုန် ဂေ။ န့ ဒီ ဘော တဲး မဲ ဘဲန် နဝ်း ယ ကာဂုဝ်း ဒီ ဂေ။” ပါယ် တီ အာကီဒီအူန် ဂါယ် ဒဲစေန့် အန် အာဖူရာ ဘော တး ဇမ် ဒီ ကာတုဝ့် ဒပ် ရန်ဆူ ဂေ တီ။ 12 ဒူအီ မီဒီအာန်၊ ဒူအီ အာမာလေက် ဘော ဒူအီ အီ ကွယ် ဘ့လာက် နာ လေး ဆီငဲ၊ ဂေ ဟဲ့ တး ချ ဒူပ် ဒီလယ့် တီ။ ဂေ ဟဲ့ ကိူန် ကာဆဝ် ကော နှဲန် မာ အာဇူင့်။ မင်ပြွင့် ကာဟာတ့် ဂေ မိူဝ် ဟဲ့ ကိူန် ကာဆဝ်၊ ကော ပီ ကာဟာတ့် ဒီ အိုမ် နမ်မုက်ဆာရာ အီ ဟူ နပ် ဒီ တိး။

13 အာကီဒီအူန် ဘော တး ဇမ် ဒူင် ကွယ် ဂေ၊ အန် ဘော ယိုဝ် ဒူအီ အူ ဝီ၊ အန် ဝီ ခဲ ပီ မ့ဘာဝ် အန် ဒီ ဂိုက် အန်။ အန် တဝ်း၊ “အုဝ် ဟဲ့ မ့ဘာဝ်၊ န့ မိုဝ်း ခါမုန် အူ ဒီက့လွုန် ကာလွှယ် တး ခဲင် ဒပ် အေ၊ န့ ဘော ညတ့် ထိုပ် အာဒါ အူ ကာတု။ ထိုပ် တီ ဘော ဒီဂြပ် ဘော ကေး ဒဲင် ကာဒါယ်။”

14 ဂိုက် အန် အီ ထူမ် ပီ ခဲ အန် တွိုန် ဝီ တဝ်း ဒီ အန်၊ “အာတီ နှဲန် ဒီ ဘျ လွင် မာပွါ့ လာင် ဒူအီ အီဆာရေလ အီ စိူဝ် အာကီဒီအူန်၊ အီ မုး ဂွန် အာယုဝ်အာတ် တွိုန်။ ဒဲင် တီ၊ အာဝ် မိုဝ်း ဆီဖဝ် ပေါ အူ မျုဝ်။ ဇဝ်ဖြာ ဟဲ့ တဲး အန် အွင် ဒူအီ မီဒီအာန် ဘော ဒူအီ အာမျုဝ် ဟဝ် အီ ကွယ် ခဲင် ဒပ် နီ ဘောကာဂ့လျီတ်။”

15 အာကီဒီအူန် ဟဲ့ ဟွတ့် ယိုဝ် လွင် ပီ မ့ဘာဝ် ဒူအီ ဝီ တီ ဘော ပီ ပါယ် ဂေ ဒီ ကာလာင် ဆီဖဝ် အန်၊ အန် ဘော ဝီ ခြိုပ်ခြဝ် အိူပ် ဇဝ်ဖြာ။ အန် ဘော ဝီ ဝေန့် ဒူင် ကွယ် ဂေ ဒူအီ အီဆာရေလ၊ ဝီ ကာလာင် ဒီ ဂေ တဝ်း၊ “ယိတ့်၊ ဇဝ်ဖြာ ဟဲ့ တဲး ဘေ အွင် ဒူအီ မီဒီအာန်။” 16 အာကီဒီအူန် ဘော ကာယဝ်း ဒူအီ အူယ် မာယဝ်း ဝီ တွိုန်၊ တဲး န့ ဘဲန် အူယ် ဖိုင်။ အန် ဒွါ ဂေ ဂူင့် ဝဝ် နိုင် ပဲ ဒွန် အီ၊ ဂူင့် ဘော ကာလုဝ့် အီ မိုဝ်း ငဝ် ရာင် နာ ခဲင်။

17 အန် ဝီ ဒမ် ဂြုဝ်း ဒီ ဂေ တဝ်း၊ “ဆေ အေ ဟီ ဇမ် ဒီ ခူပ် ကာတုဝ့် ဒပ် ဂေ၊ တဲး ဘေ ယွတ် အုဝ်၊ ညိုင် ပီ ဘူင် အုဝ်။ 18 ဆေ အုဝ် ဘော ဂေ ဒူအီ ဖိုင် အီ ဒူပ် အုဝ် ဘုတ် ဝဝ် နိုင် ပဲ၊ တဲး ဘော ဘေ အီ ကွယ် ရူပ် ဒပ် ဂေ ကာဖြူမ် ဒီ ဘုတ် ဒွန် အီ ဘော ဒတ် တဝ်း၊ ‘အာဒါ ဇဝ်ဖြာ ဘော အာဒါ အာကီဒီအူန်။’”

19 အာကီဒီအူန် ဂေ ဒူအီ အန် အူ မာယဝ်း ဝီ အီ ကွယ် ရိုမ် ဒူပ် အန်၊ ဂေ ဘော တး ဇမ် ခူပ် ဒပ် ရန်ဆူ ဂေ၊ ဟဲ့ မုး ဝါယ် ကာတဲ ဆွိုမ်။ အာဝ် လှေန့် ဂေ ဒူအီ အီ ဘ်ု ဒပ် ဟဲ့ ဟွတ့် လာယ် ကာပ့လု။ ဒေါ အန် တီ ဂေ ဘော ဘုတ် ဝဝ် နိုင် ပဲ ဂေ၊ ဘော မး ကာလာတ့် ဘော ကာလုဝ့် ပီ ဂူင့် ဂေ တွိုန်။ 20 ဂေ ဒူအီ ဘော အာ ဖိုင် တွိုန် မိူဝ် ဘူင် ပါယ် တီ။ ဒဲ ဂေ ဘ့လာက် အာဂ ဘော ဂူင့် ငဝ် ရာင်၊ ဘ့လာက် အာအး ဝီ ဂူင့် ဝဝ် နိုင် ပဲ ပီ ဒီ ဘုတ် ဂေ ဘော ကာဖြူမ် ဒီ ဒတ် တဝ်း၊ “မာပွါ့ လာင် ယေ အာဒါ ဇဝ်ဖြာ ဘော အာဒါ အာကီဒီအူန်။” 21 ဟဲ့ ဟွတ့်၊ ဂေ ဝီ စွင့် ဒူင် ကွယ် ဂေ တီ ဒွန် အီ ရာင် အာဆေ ရာင် အန်။ ဂေ မိူဝ် ဟဲ့ ရူပ် ဒပ် ဂေ တီ။ ဒေါ အန် တီ၊ ဂေ ဒူအီ မီဒီအာန် ဘောကာဂ့လျီတ် ဘော ကာဖြူမ် ဒီ ဒတ် တဝ်။

22 ဂေ ဒူအီ အူယ် မာယဝ်း ဝီ အီ ကွယ် ဒူပ် အာကီဒီအူန်၊ ဂေ ဘော ဘုတ် ဝဝ် ဂေ။ ဒေါ အန် တီ ဇဝ်ဖြာ ဘော ဘူင် တဲး ဂေ ဒါ ဆိုက် ရန်ဆူ ဂေ တွိုန် ဝီ လာယ် ကာဂုဝ်း လာယ် ကာငဝ်း ကာန်ု ဂေ။ ဂေ ဘော တဝ် ဟာဝ် ဒူပ် န့တေန့် အီ ဟာဝ် ဒီ မိူင် ဘေတ်ဆီဒါ၊ ကော ဝီ ဟာဝ် ဇမ် ဒီ မိူင် စေရာရာတ် ဘော ဒီ မိူင် အာဘေလမာဟာလ အီ ကွယ် ကာတတ် မိူင် ဒါဘာတ်။ 23 ဂေ ဒူအီ ခဲင် ခြိုဝ် အာနာပ်ထာလီ၊ ခြိုဝ် အာဆေန် ဘော ခြိုဝ် အာမာနာဆေ၊ ဂေ ဘောကာဂ့လျီတ် ဟဲ့ တး ကာဇု ဘော ခုင်ခြး ဒူပ် ဒူအီ မီဒီအာန် ဂေ တီ။ 24 အာကီဒီအူန် ဝီ စ်ု ဂေ ဒါလာမ် အန် ဟာဝ် ဒီ နွန် အာအေဖာရိမ်၊ တဲး ဂေ ဒဲ့ ဒူအီ တီ တဝ်း၊ “တဲး ဘေ လေး လူင်၊ ကာဂုဝ်း ဒီ ဒူအီ မီဒီအာန်၊ တဲး ဘေ အိုပ် ဘာင် အိုမ် ဘ့လဲင် ယောဒါန် အာတ့် တး ဂေ။ တဲး ဘေ အိုပ် ဘ့လဲင် တီ၊ တဲး ကော ဇမ် ဒီ မိူင် ဘေတ်ဘာရာ၊ ကွဲ့ တဲး ဂေ ဒူအီ မီဒီအာန် ပွိုန် ဒီ ကာလုဝ်း။” ပါယ် တီ ဂေ ဒူအီ အာအေဖာရိမ် ဘော တး ကာဇု၊ ဘ်ု ဒီ ဘာင် ကာလုဝ်း ဒွန် ပ့လုဝ့် ဒူပ် ဘ့လဲင် အိုမ် ယောဒါန်။ ကော ဇမ် ဒီ မိူင် ဘေတ်ဘာရာ။

25 ဂေ ဘော မှေတ့် ဒါ တာင် ဒူအီ မီဒီအာန် အာ ဝီ အီ စိူဝ် အာအောရာဖ ဘော အာဇာရေပ်။ ဂေ ဘော ဒိုဝ်း အာအောရာဖ ဟာဝ် ငဝ်း ယမ် အန် ဒူင် ကွယ် မာဝ် အာအောရာဖ။ အာဇာရေပ် ဂေ ဘော ဟာဝ် ငဝ်း ယမ် အန် ဒီ ဒူင် ကြိတ် အာဇာရေပ် ဘ့လေ မာငုန်။ ဂေ ပီ ဝီ ခုင်ခြး ဒူပ် ဂေ ဒူအီ မီဒီအာန်။ ဂေ ဘော ဝီ ဒိုဝ်း တး ဂိန့် အာအောရာဖ ဂါယ် အာဇာရေပ် ဒူင် ကွယ် အာကီဒီအူန် ခူပ် ဘ့လဲင် ယောဒါန် တွိုန်။