1 ဝါယ် အန် တီ ဂေ ဒူအီ အီဆာရေလ ပီ ဝီ ဘူင် မှာပ် အီ တူ လဝ့် နဝ်း ဇဝ်ဖြာ ပေါ န့ ပွါ။ ခုဝ်၊ အန် ဇဝ် ဘော တဲး ဂေ ဒူအီ မီဒီအာန် အိုပ် ဂေ အာဒါ ဘူ ဆီနမ်။ 2 ဂေ ဒူအီ မီဒီအာန် ဘော မိုဝ်း ပ့လူမ် တာင် ကာဆဝ် ဘော ခါနှာပ် ကာဆဝ် ဂေ ဒူအီ အီဆာရေလ။ ခုဝ်၊ ဂေ ဒူအီ အီဆာရေလ ဘော ကာဒုး ဒီ တဝ် ဟာဝ် ကွယ် ခဲင် ကာဒဝ် မာဝ် ဘော ကာဒဝ် မာဝ်။ ဂေ ဘော ဘူင် ဒူင် ဒီ ပွိုန် ချြီင် ဆီချာ၊ ကွဲ့ တဲး န့ ငှိုယ် လိုပ်။ 3 ဒွန် ဇေန့် ဒေါ ဟပ် ဂေ ဒူအီ အီဆာရေလ ခြိုင် ဆီမာ၊ ဂေ ဒူအီ မီဒီအာန် ဘော ဒူအီ အာမာလေက် ဘော ဒူအီ အီ ကွယ် ဘ့လာက် နာ လေး ဆီငဲ၊ ဂေ တး ကာဂုဝ်း ဒီ ဂေ။ 4 ဒူအီ ဂေ တီ ဘော တး ချ ခဲင် မာန် ဂေ ဒူအီ အီဆာရေလ ဘော ပျာတ့် တူတ့် ပီ ဆမ် ပီ ပိတ် ဂေ၊ တဲး န့ ကော ဇမ် ဒီ မိူင် ဂါဆာ။ ဒူအီ ဂေ တီ ဘော ဖာတ် ဒိုဝ်း မာဘူ၊ မာမက် ဘော မာလာ ဂေ ဘောကာဂ့လျီတ်၊ ကွဲ့ တဲး ဂေ ဆီ မိုဝ်း ဒုဝ် ဆတ် ခေါ အူ မျုဝ်။ 5 ဒူအီ ဂေ တီ ဘော ဒိုဝ်း တး ဒုဝ် ဆတ်ဒါဝါ ဂေ ဘော ထိုပ် ဘိက် ဂေ အီ ကိူန် ကာဆဝ် ကော ပီ မာအာဇူင့် ဘဲန် ဖိုင် ဘဲန် ဖိုင်။ ဂေ ဘော ကိူန် ကာဆဝ် ကော ဟူ နပ် ဒီ တိး ခဲ့ ကိူန် ဂေ၊ ဘော မင်ပြွင့် ကာဟာတ့် ဂေ။ ဂေ ဘော လိုပ် တး ဘော ဖာတ် ဘော ပျာတ့် တူတ့် မာန် မိူင် အီဆာရေလ။ 6 ဂေ ဒူအီ မီဒီအာန် ဟဲ့ ဘူင် တဲး ဂေ ဒူအီ အီဆာရေလ စုဝ်း တျီမ် ကာဆဝ်၊ တဲး ဂေ ဝီ ဒတ် ဒဲ့ ဇဝ်ဖြာ၊ တဲး အန် စွယ် ဂေ။

7 ဒေါ ဝီ ဆာခိုဝ် ဒဲ့ ဂေ ဒူအီ အီဆာရေလ ဒီ ဇဝ်ဖြာ၊ မှာန့် တဲး အန် စွယ် ဂေ ကူပ် ဒူအီ မီဒီအာန် ဂေ တီ၊ 8 ဇဝ်ဖြာ ဘော စ်ု ဒူအီ အီ ဘျာန် ဂြုဝ်း ဇဝ်ဖြာ အူ ဝီ တး ဒူင် ကွယ် ဂေ၊ တဲး အန် ဟာဝ် ကာလာင် ဂြုဝ်း ဒီ ဂေ တဝ်း၊ “ဇဝ်ဖြာ ပီ ကြိုပ် ဘေ ဒူအီ အီဆာရေလ ဟဲ့ တဝ်း၊ ‘အုဝ် ဟဲ့ ထုတ် လေး ဘေ ခဲင် မိူင် အဲဂိုပ်၊ ဒူင် ဟဲ့ ဘဲန် ဘေ မှာယ် အီ ဟဝ်။ 9 အုဝ် ဟဲ့ ထုတ် လေး ဘေ ဒီ ဒူအီ ခဲင် မိူင် အဲဂိုပ် ဘော ဒီ ဂေ ဒူအီ ဘောကာဂ့လျီတ် အီ ဟဲ့ ခါနှာပ် ဘေ။ အုဝ် ဟဲ့ ဟုဝ် တဝ် ဂေ ဒီ အာတ့် ဘေ၊ ဝီ ဒိုဝ်း မိူင် ဂေ၊ ဒွါ ဒီ ဘေ။ 10 အုဝ် ဟဲ့ ဟွတ့် တဝ်း ဒီ ဘေ၊ အုဝ် မုး ဇဝ်ဖြာ ပီ ကြိုပ် ဘေ၊ ကွဲ့ တဲး ဘေ ကြိုပ် ဇဝ် ပီ ကြိုပ် ဂေ ဒူအီ အာမုဝ်ရိတ် ဒေါ ကွယ် ဘေ ခဲင် မိူင် ဂေ နီ။ မာလဲ၊ ဘေ တူ ထူမ် ဂြုဝ်း အုဝ်။’”

11 ပါယ် တီ အာမူ အာမာတ် ဇဝ်ဖြာ ဘော တး ဒီ ဒူင် စိူဝ် အောဖာရ ဘော တုတ့် ကွယ် ခြိုမ် ဟေ ထေရေပ် အီ မုး ကြုဝ် အာယုဝ်အာတ် အီ မုး ဒူအီ အာဘီအေစာ တွိုန်။ ဂွန် အီမာယ် အန် အီ စိူဝ် အာကီဒီအူန် ယီ မး ငှုဝ်။ အန် ဘော ချြီင် အန် ခဲင် ကာဒဝ် ဒူင် ကြိတ် ဂေ ဘ့လေ မာငုန်၊ ကွဲ့ တဲး ဒူအီ မီဒီအာန် ယိုဝ် အန်။ 12 အာမူ အာမာတ် ဇဝ်ဖြာ ဘော တး ဒူင် ကွယ် အန် ဘော ကာလာင် ဒီ အန် တဝ်း၊ “အိုယ် မဲ အီ မုး ဒါ ဆိုက် အီ ကျ၊ အီ မိုဝ်း ပ့လူမ် ကိူန်၊ ဇဝ်ဖြာ ဟဲ့ ကွယ် ရိုမ် ဒူပ် မဲ။”

13 အာကီဒီအူန် ဝီ တဝ်း၊ “အိုယ် မဲ ဇဝ်၊ ဆေ ဇဝ်ဖြာ ကွယ် ရိုမ် ဒူပ် အုဝ် အာခါခ်ု၊ မှဝ် န့ ပါယ် န့ ပီ ဘုဝ် ဘဲန် ပါယ် နီ ဒီ ယေ။း ဂေ ဂုန့် ဒင် ယေ ဟဲ့ ဒွိုမ် ခဲ အီ မွှိုမ် အာမ် ဘဲန် မျုဝ် ဘဲန် မျုဝ် ဒီ ယေ။ လွင် အန် တီ၊ န့ ကွယ် ဒီ မှဝ်။း ဂေ မိူဝ် ဟဲ့ တဝ်း၊ ‘ဇဝ်ဖြာ ဟဲ့ ယဲတ့် လေး ယေ ခဲင် မိူင် အဲဂိုပ် တွိုန်။’ ဒေါ တီ နီ အန် ဇဝ် ယီ ဟဲ့ ဝီ ဝဲန် ယေ၊ ဝီ အာပ် ယေ ဒီ ဒူအီ မီဒီအာန်။”

14 ဇဝ်ဖြာ ဝီ မာငး ယွတ် အန်၊ ဝီ တဝ်း ဒီ အန်၊ “အုဝ် ဟဲ့ စ်ု မဲ၊ တဲး မဲ စ်ု ပ့လူမ် မဲ၊ ချွတ် လေး ဂေ ဒူအီ အီဆာရေလ။”

15 အာကီဒီအူန် ဝီ တဝ်း၊ “အိုယ် မဲ ဇဝ်၊ မှဝ် အုဝ် ဒီ ပါယ် ဒီ ချွတ် ဒူအီ အီဆာရေလ။း န့ကြိုဝ်း ယေ၊ ယေ မုး န့ကြိုဝ်း အီ ဒီတဲတ် ကာဆဝ်၊ တူ မိုဝ်း ပ့လူမ် ဂေ ဟဲန့် ကာတဲ ဂေ ခြိုဝ် အာမာနာဆေ။ အုဝ် ဘော မုး ဝီ အီ တူ ခိုက်ခမ် မာဆေ ခဲင် န့ဟူမ် ယေ။”

16 ဇဝ်ဖြာ ပီ ဝီ တဝ်း ဒီ အန်၊ “အုဝ် ဒီ ကွယ် ရိုမ် ဒူပ် မဲ။ မဲ ဒီ ဘော ပွိုန် ဒီ ကာဂုဝ်း ဒီ ဂေ ဒူအီ မီဒီအာန် ဘောကာဂ့လျီတ် ဘော ပဲ ဂေ။”

17 အာကီဒီအူန် ဝီ တဝ်း၊ “ဆေ န့ ဘော မုး ပီ အိုင် မဲ ဇဝ်၊ တဲး မဲ ဇဝ် ဘျ လက်ဆာနာ လွင် န့ မုး မဲ ဇဝ်ဖြာ အီ ကာလာင် ဒီ အုဝ်။ 18 တဲး မဲ ဇဝ် ကွယ် ဒီ နီ၊ တဲး န့ ကော ဇမ် ပန် ဒီ ဟွတ့် အုဝ် လှူ ပီ ဒီ လှူ အုဝ် ဒီ မဲ။” အန် ဇဝ် ဝီ တဝ်း ဒီ အန်၊ “အုဝ် ဒီ ကွယ် တဲး န့ ကော ဇမ် ပန် ဒီ ဝီ တး မဲ။”

19 အာကီဒီအူန် မိူဝ် ဝီ ဟာဝ် လိုပ် ခဲင် ကာင် အန်၊ ဝီ ဒိုဝ်း ယင် ဂွန် မာပဲ အူ ဒုဝ် ကွင့်။ အန် ဝီ ဒိုဝ်း ဘော ကာပဲ့ ခဝ်ချုင် အာဒါ ဘူ ဘ့လဲ၊ ဝီ ဘူင် ခါမုန် ဒီခ့လဲပ် အီ တူ ဟပ် ဆီနမ် ဘြး။ အန် ဘော ဒိုဝ်း ယင် ဂွန် မာပဲ ပီ ကွင့် အန် တီ၊ ဟပ် ခဲင် ဆီဘ့လုဝ်း။ အိုမ် ယင် တီ၊ အန် ဝီ ဟပ် ခဲင် ကာလုဝ့် ဟာဝ် လှူ ဒီ အန် ဇဝ် ခြိုမ် ဟေ ထေရေပ် တွိုန်။

20 အာမူ အာမာတ် ဇဝ်ဖြာ တီ ဝီ တဝ်း ဒီ အန်၊ “ဒိုဝ်း ယင် မာပဲ ဂေ ခါမုန် ဒီခ့လဲပ် အီ တူ မိုဝ်း ဆီနမ် ဘြး တီ၊ ဒါင် ဒဲင် မာဝ် တီ၊ ဝီ ဒိုဝ်း အိုမ် ယင် ပီ ကွင့် မဲ တီ၊ ဝီ ဟုး နာ ဒဲင်။” အာကီဒီအူန် ဘော ဘူင် ပါယ် တီ။ 21 ဒေါ အန် တီ အာမူ အာမာတ် ဇဝ်ဖြာ ဘော တာ ကာဒဲ့ န့ကြွုန် ပီ ဂူင့် အန် ဘော ဒိုဝ် ယင် ဂါယ် ခါမုန် တီ။ ပါယ် တီ ငဝ် ဘော ကုး ဒဲင် မာဝ် တီ။ န့ ဘော ကာဆိုမ် ယင် တီ အူ ဇေန့်။ ဝါယ် တီ၊ အာမူ အာမာတ် ဇဝ်ဖြာ ဘော ဟြာယ် ဒီ တီ။ 22 ပါယ် တီ အာကီဒီအူန် ဟဲ့ ဟွတ့် နပ်၊ ဟဲ့ မုး အာမူ အာမာတ် ဇဝ်ဖြာ အီ ဟဲ့ ကာလာင် ဂြုဝ်း ဒီ အန်။ အန် ဘော ဝီ ယုဝ် ကာဆဝ်။ အန် ဝီ တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် ဟဲ့ ယိုဝ် အာမူ အာမာတ် ဇဝ်ဖြာ လာယ် ဒုဝ် နာ ဒီ အုဝ်။”

23 ဇဝ်ဖြာ ယီ တဝ်း ဒီ အန်၊ “တဲး မဲ မိုဝ်း နဝ်း ဒါခိုယ်။ အာဝ် လုဝ် ယုဝ်။ မဲ တူ လုဝ် ယမ်။”

24 ဟဲ့ ဟွတ့် ပါယ် တီ အာကီဒီအူန် ဝီ ဘူင် ကာစှူင့် လှူ ဒီ ဇဝ်ဖြာ ဒီ တီ။ အန် ဘော တဲး န့ စိူဝ်၊ ဇဝ်ဖြာ တဲး နဝ်း ဒါခိုယ်။ ကာစှူင့် တီ၊ န့ ဘော ကွယ် ဒီ ဒူင် စိူဝ် အောဖာရ ဒူင် ကွယ် ဂေ ဒူအီ အာမျုဝ် အာဘီအေစာ ကော ဇမ် ဒေါ တီ နီ။

25 မှိုဝ် တီ၊ ဇဝ်ဖြာ ဝီ ကာလာင် ဒီ အာကီဒီအူန် တဝ်း၊ “ဂုန့် မဲ မိုဝ်း ဂွန် မက် အာလူင့် ပေါ အူ ဒုဝ်။ အာဆာက် အန် ဟဲ့ နုဝ့် ဘူ ဆီနမ်။ တဲး မဲ ဒိုဝ်း ဒုဝ် တီ ဘော ပျာတ့် ဝဲန် ကာစှူင့် ဇဝ် ဘာလ ပီ ဘူင် အုန် ဂုန့် မဲ။ ပျာတ့် ဝဲန် ဘော အာရိုပ် နာင် ကာနမ် အေဆူရာ အီ ကွယ် ခူပ် ကာစှူင့် ဇဝ် ဘာလ တီ။ 26 တဲး မဲ ဝီ ဘူင် ကာစှူင့် လှူ အီ ဆီချာ အာဒါ ဇဝ်ဖြာ ပီ ကြိုပ် မဲ၊ တဲး န့ ကွယ် ဒဲင် ဒူင် စာ တီ။ ဟဲ့ ဟွတ့်၊ တဲး မဲ ဝီ ဒိုဝ်း မက် အာလူင့် ဂုန့် မဲ ဒုဝ် တွိုန်၊ လှူ တဲး န့ ဘဲန် ပီ ဒီ လှူ အီ ဒုဝ့် ခဲင် ငဝ်။ တဲး မဲ ဝီ ဒိုဝ်း ဟေ အာရိုပ် နာင် ကာနမ် အေဆူရာ ပဲ့ ဟဲ့ ပျာတ့် ဝဲန် မဲ တွိုန်၊ တဲး န့ ဘဲန် ဟေ ဒုဝ့် အာဒါ ပီ ဒီ လှူ တီ။”

27 ပါယ် တီ အာကီဒီအူန် ဝီ စ်ု ဂေ ဒဲစေန့် အန် ဂိုဝ် ဝီ၊ တဲး ဂေ ဘူင် ခဲ့ ပီ ကာလာင် ဇဝ်ဖြာ ဒီ အန်။ ကူပ် ယုဝ် အန် ဒူအီ ခဲင် န့ဟူမ် ဂုန့် အန် ဘော ဒူအီ ခဲင် မိူင် ဂေ တွိုန်၊ အန် တူ ယ ဘူင် ကာတဲ ဆီငဲ။ အန် ဝီ တဲး ဂေ ဘူင် ခဲင် မှိုဝ်။

28 ဘော ဇမ် ပါ ခဲညှာ ဆိန့်ဝး စေဝ်၊ ဂေ ဒူအီ ခဲင် မိူင် တွိုန် ဘော ဝီ ယိတ့် ယိုဝ်၊ ကာစှူင့် ဇဝ် ဘာလ ဟဲ့ ဟွတ့် ကာပျာတ့်။ ရွင့် အာရိုပ် နာင် ကာနမ် အေဆူရာ ဟဲ့ ဟွတ့် ဂ်ု ကေး။ ဒဲင် တီ၊ ဘော မက် အာလူင့် ဒုဝ် ဟာအာ ဟဲ့ ဟွတ့် ဒုဝ့် ခဲင် ငဝ်၊ ဟဲ့ လှူ ဒဲင် ကာစှူင့် လှူ ကာမာယ်။

29 ဂေ ဝီ လာယ် ဒီမွှတ် ကာန်ု ဂေ တဝ်း၊ “အာဆေ ဟဲ့ ဘူင် ပါယ် နီ။း” ဂေ ဘော လာယ် ဒီမွှတ် ဝိဝ်၊ ဒီမွှတ် ဝေန့်။ ဂေ ဘော နပ် န့ မုး အာကီဒီအူန် အီ မုး ဂွန် အာယုဝ်အာတ်၊ အန် ဟဲ့ ဘူင်။

30 ဂေ ဝီ ကာလာင် ဒီ အာယုဝ်အာတ် တဝ်း၊ “ဒဲ့ တး ဂွန် မဲ တီ ဒီ နီ။ အန် လုဝ် ယမ်။ အန် ဟဲ့ ပျာတ့် ကာစှူင့် ဇဝ် ဘာလ ဘော ရွင့် အာရိုပ် နာင် ကာနမ် အေဆူရာ အီ ကွယ် ခူပ် ကာစှူင့် တီ။”

31 မာလဲ၊ အာယုဝ်အာတ် ဝီ တဝ်း ဒီ ဂေ အီ ဟဲ့ ကွယ် ရူပ် အန် တီ၊ “န့ မုး ဘေ အီ ဒီ ကာခဲန့် ဒါင် ဇဝ် ဘာလ။း ဘေ အီ ဒီ ချွတ် အန်။း အာဆေ ကွယ် ဘ့လာက် ဇဝ် ဘာလ တီ၊ အန် လုဝ် ယမ် စေဝ် ညှာ နီ။ ဆေ ဇဝ် ဘာလ ဘော မုး ဇဝ်ဖြာ၊ အန် ဒီ ဘော နပ် ဒီ ခြဲ ဒုဝ် အန် ဆေ အီ ပျာတ့် ကာစှူင့် အန် တီ။” 32 ဆီငဲ တီ၊ ဂေ ဝီ တဲး အာကီဒီအူန် တွိုန် ဝီ စိူဝ် “အာယေရုပ်ဘာလ။” ဆီဖဝ် လွင် အန် တီ၊ န့ ဘော လေး၊ “ဝီ အီ ကာခဲန့် ဒီ ဇဝ် ဘာလ။” အန် ဘော တဝ်း၊ “တဲး ဇဝ် ဘာလ တီ ဝီ ဂွင့် ရဲ ဒုဝ် ဘြိမ် အန် ကူပ် မိုဝ်း အီ ပျာတ့် ကာစှူင့် အန်။”

33 ဒေါ အန် တီ ဂေ ဒူအီ အာမျုဝ် မီဒီအာန်၊ ဒူအီ ခဲင် မိူင် အာမာလေက် ဘော ဒူအီ အီ ကွယ် ဘ့လာက် နာ လေး ဆီငဲ၊ ဂေ ဟဲ့ ရဲန် ဆိုက် ဂေ ကာလုဝ်း အိုမ် ဘ့လဲင် ယောဒါန်၊ ဝီ တး ချ ဒူပ် ဒီလယ့် ယေစာရေလ။ 34 နဝ်း ဖွိုမ် ဇဝ်ဖြာ ဘော တး ပ့လိုက် အာကီဒီအူန်၊ အန် ဘော ဘုတ် ဝဝ် နိုင် ပဲ၊ ဒဲ့ ဂေ ဒူအီ အာမျုဝ် အာဘီအေစာ တး ဒူပ် အန်။ 35 အန် ဘော စ်ု ဒါလာမ် အန် ဟာဝ် ခဲင် မိူင် အာမာနာဆေ ဒွန် ပ့လုဝ့်၊ ဒဲ့ တဲး ဂေ တး ဒူပ် အန်။ အန် ဘော စ်ု ဒါလာမ် အန် ဟာဝ် ဘော ခဲင် မိူင် ဒူင် ကွယ် ဒူအီ အာဆေန်၊ ဒူအီ အာဇေဘူလူန် ဘော ဒူအီ အာနာပ်ထာလီ၊ တဲး ဂေ တး ဒူပ် အန်။

36 ဒေါ အန် တီ အာကီဒီအူန် ဝီ ကာလာင် ဒီ ဇဝ်ဖြာ တဝ်း၊ “ဆေ ဟဲ့ မှာန်၊ မဲ ဇဝ် ဒီ စ်ု အုဝ်၊ တဲး အုဝ် ဟာဝ် ထုတ် လေး ဂေ ဒူအီ အီဆာရေလ၊ 37 အုဝ် ဒီ ဒိုဝ်း ဟိုက် မာဘူ၊ ဘ့လေး ဒီ အူင့် ကာင်နဝ်း။ ဆေ ဟီ ဇမ် ဆိန့်ဝး၊ ဆေ အိုမ် ဒီငါန် ဘော စုဝ်း မီ ဒဲင် ဟိုက် မာဘူ တီ၊ အီ မုး ဒီ ကာဒါယ် ခူပ် အန် တီ ယီ ကာဟဝ်း ဟေန့်၊ အုဝ် ဟဲ့ နပ်၊ မဲ ဇဝ် ဟဲ့ စ်ု အုဝ်၊ တဲး အုဝ် ဟာဝ် ထုတ် လေး ဒူအီ အီဆာရေလ။” အန် ဟဲ့ ဟွတ့် တဝ်း ပါယ် တီ န့ ဘော ဘဲန် ပါယ် တီ အာခါခ်ု။ 38 န့ ဘော ဇမ် ပါ ခဲညှာ ဆိန့်ဝး၊ အာကီဒီအူန် ဘော ဟာဝ် နျီ့ ဟိုက် မာဘူ တွိုန်၊ န့ ဝီ လေး အိုမ် ဒီငါန် ခဲင် ဟိုက် မာဘူ တီ၊ ကော နုဝ့် အူ ဆီလယ့်။

39 ပါယ် တီ အာကီဒီအူန် ပီ ဝီ ကာလာင် ဒီ ဇဝ်ဖြာ ပေါ အူ ဇေန့် တဝ်း၊ “အုဝ် မှာန့်၊ ကွဲ့ တဲး မဲ ဇဝ် ရူ ဒီ အုဝ်။ တဲး မဲ ခ့ဝါင် အုဝ်၊ တဲး အုဝ် မှာန့် ပေါ အူ ဇေန့် ဒီ မဲ ဇဝ်။ ခါ နီ၊ တဲး ဟိုက် မာဘူ နီ ကွယ် ဟေန့် ကာဟဝ်း၊ ဝီ တဲး မီ ကာဒါယ် အမ် ည။” 40 မှိုဝ် တီ၊ ဇဝ်ဖြာ ဘော ဘူင် ပါယ် တီ။ ဘော ဇမ် ပါ ခဲညှာ ဟိုက် မာဘူ ဟဲ့ ဟေန့် ကာဟဝ်း။ အိုမ် ဒီငါန် ဟဲ့ စုဝ်း မီ ဒီ ကာဒါယ်၊ တဲး န့ အမ် ည။