1 ဆီငဲ တီ နာင် ဒေဘုဝ်ရာ ဂါယ် အာဘာရက် အီ မုး ဂွန် အာဖီနူမ် ဝီ ပါက် မှုဝ် တဝ်း၊

2 “တဲး အေ အိူပ် ဇဝ်ဖြာ။ ခုဝ်၊ ဂေ ဒူအီ အီ ယဲတ့် ဂေ ဒူအီ အီဆာရေလ ဟဲ့ ဖြူမ် ဒီ ကာဂုဝ်း ဒီ ရန်ဆူ။ ဂေ ဘောကာဂ့လျီတ် ဟဲ့ ခမ် ဒီ စွယ် တဲး ဂေ အွင်။

3 အိုယ် ဘေ ခုန်ဒီခမ်၊ တဲး ဘေ ထူမ်။ ဘေ ဒါ တာင်၊ တဲး န့ လိုဝ်း ဒီ ဘေ။ အုဝ် ဒီ တဝ်း မှုဝ် ဘော အိူပ် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။

4 အိုယ် မဲ ဇဝ်ဖြာ၊ ဒေါ လေး ဟာဝ် မဲ ဇဝ် ဒီ နွန် ဆေအီ၊ ဒေါ ယဲတ့် လေး မဲ ဇဝ် ဒါ ဆိုက် မဲ ခဲင် ကာဒါယ် မိူင် အေဒူမ် တွိုန်၊ ကာဒါယ် ဟဲ့ ဒီယုး ဒီယေန့်။ ဂ့လာယ် မိူဝ် စုဝ်း ခဲင် ဂါင်ဟြာဝ် ဘော ခဲင် န့အု။

5 ခဲ့ ကွယ် နွန်၊ ဂေ ဘော ယုဝ် ဒီယုး ဒီယေန့် ဒီ အာတ့် ဇဝ်ဖြာ အီ မုး ဇဝ်ဖြာ အီ ဟဲ့ ဒွိုမ် လူင် ဒီ နွန် ဆီနာယ်။ ဇဝ်ဖြာ တီ ဘော မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။

6 ဒေါ မုး စုဝ် အာဆာမ်ကာ အီ မုး ဂွန် အာနာတ် ဘော ဒေါ မုး ဘာန် နာင် ယေလာ၊ အာဝ် မိုဝ်း အီ ဟာဝ် ဒူပ် န့တေန့် တာင်။ န့တေန့် တာင် ဟဲ့ ငွင့်။ ဂေ ဝီ ဟာဝ် ဒူပ် န့တေန့် ဒီတဲတ် အီ ဂုဝ့် ဂဲ့။

7 ခဲင် ရဝ် နာ ရေတ့် မိူင် ဒူအီ မိူဝ် ဟဲ့ ယေန်၊ ဟဲ့ ငွင့် တူတ့်၊ တဲး န့ ကော ဝီ ဇမ် ဒေါ တး အုဝ် အီ မုး နာင် ဒေဘုဝ်ရာ။ န့ ပီ အုဝ် ဟဲ့ ဘဲန် မာ ဂေ ဒူအီ အီဆာရေလ ဘောကာဂ့လျီတ်။

8 ဒေါ ဟဲ့ ရဝ်း ဂေ ဒူအီ အီဆာရေလ ဒီ ဝီ ကြိုပ် ဇဝ် ကာမာယ်၊ ဒူအီ ဟဝ် ဘော တး လာယ် ကာဂုဝ်း ခဲင် မိူင်။ ဒေါ အန် တီ ဂေ ဒူအီ အီဆာရေလ အာဒါ ဖွုန် မှိုန့် ဝီ အာဝ် မိုဝ်း မင် ဂွင့် ဂေ ဘ့လာ လျီး ခေါ အူ ဘ့လ။

9 နဝ်း အုဝ် ဘော အိုင် ကာဆဝ် ပီ ပါယ် ဂေ ဒါ ဘုဝ် အီ အိုပ် ဒါ ဆိုက် ဒူအီ အီဆာရေလ။ ဘော ဂေ ဒူအီ ကိူန် ဟဲ့ ခမ် ဒီ စွယ် တဲး ဂေ အွင်။ အုဝ် ဘော အိူပ် ဇဝ်ဖြာ။

10 အိုယ် ဘေ အီ ပဝ့် မာလာ အီ လုယ် အီ တုတ့် ဒဲင် ကွပ်၊ ဘော ဘေ အီ ဟာဝ် ဒူပ် န့တေန့်၊ တဲး ဘေ ဝီ ကာလာင် လွင် အန် တီ။

11 တဲး ဘေ ထူမ် ပီ ဆီနန် ဆီနိူင် ဂေ ဒူအီ ကိူန် အီ ကွယ် ခူပ် အိုမ် ခိုမ်။ ဂေ ဟဲ့ တဝ်း မှုဝ် လွင် ဇဝ်ဖြာ ဟဲ့ စွယ် ဂေ ဒူအီ အီဆာရေလ အီ ကွယ် ခဲင် ရဝ် ရေတ့် မိူင်၊ တဲး ဂေ ပဲ ဂေ အွင်။ ဒေါ အန် တီ ဂေ ဒူအီ ပီ အိုပ် ဇဝ်ဖြာ ဟဲ့ ဝီ လူင် ဒီ ဘာင် မာလုဝ်း မိူင်။

12 အိုယ် နာင် ဒေဘုဝ်ရာ၊ တဲး မဲ ယိတ့်၊ တဲး မဲ ယဲတ့် ယေ၊ တဲး မဲ ယဲတ့် ယေ တဝ်း မှုဝ်။ အိုယ် အာဘာရက် အီ မုး ဂွန် အာဖီနူမ်၊ တဲး မဲ ဒိုဝ်း ဟာဝ် ဒူအီ ပဲ့ ဟဲ့ မှေတ့် တး မဲ။

13 ဂေ အီ ဆီ ဂိတ် ဆီ ကွယ်၊ ဂေ ဘော လူင် ဒူင် ကွယ် ဂေ ဒါ တာင် အီ အိုပ် အီ ယဲတ့် ဂေ ဒူအီ ကိူန်။ ဂေ ဒူအီ ပီ အိုပ် ဇဝ်ဖြာ ဘော တး ဒူင် ကွယ် အုဝ် ဘော တိုယ် ဂေ အီ မိုဝ်း ပ့လူမ် မိုဝ်း ဟဲန့် ဘော ပွိုန် ကာဂုဝ်း။

14 ဒူအီ အီ ဒွိုမ် ကွယ် ခဲင် ကာဒါယ် ဒူအီ အာမာလေက်၊ ဂေ ဘော လေး ဒီ နွန် အာအေဖာရိမ်။ ခြိုဝ် အာဘေန်ယာမ် ဘော ဂေ ဒူအီ အန်၊ ဂေ ဘော ဒူပ် ဒီ ပန်။ ဂေ ဒါ ဘုဝ် အီ အိုပ် ဒါ ဆိုက်၊ ဂေ ဝီ လေး ခဲင် မိူင် အာမာခီရာ။ ဂေ ဒါ ကာညာ အီ ဂူင့် လျီး၊ ဂေ ဘော လေး ခဲင် ဒူအီ အာမျုဝ် အာဇေဘူလူန်။

15 ဂေ ဒါ ကာညာ အီ အိုပ် ဒူအီ အာအီဆာခါ၊ ဂေ ဘော တး ဒူပ် နာင် ဒေဘုဝ်ရာ။ ဂေ ဒူအီ အာအီဆာခါ တး ဒူပ် အာဘာရက်။ ဂေ ဘော ကာဖြူမ် ဒီ ကာဒူပ် လူင်။ ဂေ ဒူအီ ခြိုဝ် အာရူဘေန် ဘဲန် ဖိုင် ဘဲန် ဖိုင် ကော ဇေန့်ဇာ လှေန့်၊ တဲး ဂေ ဆုင်ဖျာတ် နဝ်း ဂေ။

16 မှဝ် န့ ပါယ် ပီ ကွယ် နှဝ့် ဘေ ခဲင် ကာပိုမ် မာဘူ၊ ဘ်ု ဒီ ထူမ် ဟမ် ဝဝ် ပီ ဘုတ် ဒါ အီ ဟျီင် မာဘူ။း ဟဲ့ မှာန်၊ ခြိုဝ် အာရူဘေန် ဘဲန် ဖိုင် ဘဲန် ဖိုင် ဂေ တူ နပ် ဒီ ဆုင်ဖျာတ် ခဲင် နဝ်း ဂေ ယုဝ် ဂေ ဒီ ဟာဝ် တူ ဟာဝ်။

17 ဂေ ဒူအီ အီ ကွယ် ဒဲင် နွန် ဂီလေအာတ်၊ ဂေ ဟဲ့ ကွယ် ဒါခိုယ်၊ ကွယ် ဂတ် ဂျီတ် ဒူင် ကွယ် ဂေ နာ ဒွယ် အိုမ် ဘ့လဲင် ယောဒါန်။ ဂေ ခြိုဝ် အာဒါန် မိူဝ် ဟဲ့ ကွယ် ခဲင် ရိုဝ် ဆင်ဖုဝ်။ ဂေ ဒူအီ ခဲင် ခြိုဝ် အာဆေန် ဟဲ့ ကွယ် ဒါခိုယ် ခူပ် အိုမ် နမ်မုက်ဆာရာ။

18 န့ ယီ မုး ဂေ ဒူအီ အာဇေဘူလူန် ဘော ဒူအီ အာနာပ်ထာလီ ဟဲ့ ခမ် ဒီ စုန် အာဆာက် ဂေ ဘော ဘဲန် အီ ကာဂုဝ်း ဒီ ဒါ ဆိုက်။

19 ဂေ ခုန်ဒီခမ် ဘော တး လာယ် ကာဂုဝ်း အူ ဇေန့်။ ခုန်ဒီခမ် မိူင် ကာနန့် ဘော တး ကာဂုဝ်း ဒီ မိူင် ထာနက် အီ ကွယ် ခူပ် အိုမ် မီကီတော။ မာလဲ၊ ဂေ တူ ဖာတ်၊ တူ ဒိုဝ်း ဟာဝ် ရွိုန် မာဆေ။

20 ဂေ ဆီမန့် ခဲင် ဂါင်ဟြာဝ် ဘော စွယ် ဒါ ဆိုက်။ ဂေ ဘော စွယ် ကာဂုဝ်း ဒီ အာဆီဆာလ။

21 အိုမ် ဘ့လဲင် ကီဆူန် ဘော မ့ပုန် ဘော ဇုး ဟာဝ် ဂေ။ အိုမ် ကီဆူန် အီ ဟဲ့ ဒွိုမ် မိုဝ်း ဆိန့် ဒေါ မွိုန် ဟဲ့ ပဲ ဂေ။ လွင် အန် တီ န့ ဘဲန် ပ့လူမ် ဘဲန် ဟဲန့် ဒီ နဝ်း ဖွိုမ် အုဝ်။

22 ဒေါ အန် တီ ပွိုန် ယိုဝ် ဟမ် ဂိပ် မင်ပြွင့် အီ ကိူန်၊ အီ ဟာဝ် ဟဲ ဟဲ၊ မိုဝ်း ပ့လူမ် မိုဝ်း ဟဲန့် ကိူန်။

23 ဂေ အာမူ အာမာတ် ဇဝ်ဖြာ ဘော တဝ်း၊ ‘တဲး ဘေ ဒိူင် ဒူအီ အီ ကွယ် ဒူင် စိူဝ် မဲရွတ်စာတာ။ ဒိူင် ကာဆဝ် ဂေ အီ ကွယ် ဒီ တီ။ ခုဝ်၊ ဂေ တူ တး စွယ် ဇဝ်ဖြာ။ ဂေ တူ တး စွယ် အန် ဇဝ် ဒေါ ကာဂုဝ်း အန် ဒီ ဂေ အီ မိုဝ်း ပ့လူမ် တာင်။’

24 နာင် ယေလာ အီ မုး အီဘိုန့် အာဟေဘေန် အီ မုး ဒူအီ အာကီနီ တွိုန် ဟဲ့ ပွိုန် မွင့်ကာရာ ဘွတ်။ အန် ဟဲ့ ပွိုန် မွင့်ကာရာ အီ ဘွတ် လွှိုမ် မွင့်ကာရာ အီဘိုန့် ဒွန် အီ အီ ကွယ် ခဲင် ထိုပ် ဂေ။

25 အာဆီဆာလ ဘော မှာန့် ဒီ ဒျီင် အိုမ်။ မာလဲ၊ နာင် ယေလာ ဝီ ဒွါ အန် ဒျီင် အိုမ် ပူ။ အန် ဘော ဒိုဝ်း ဆီလယ့် ပီ တာ ခုန်ဒီခမ်၊ ဝီ ဟပ် အိုမ် ပူ ပ့လူမ်။

26 ဒဲ အန် အာဒါ အူ ဘ့လာက် ဝီ ပါ လွှက့် ထိုပ်။ ဒဲ အန် ဘ့လာက် အာအး ဝီ ဒိုဝ်း မီဒဲ မျုဝ် ပီ တာ ဂေ ဒူအီ ရန့် ဂါန် စန်။ အန် ဒွက် ဒီ ဂိန့် အာဆီဆာလ၊ တဲး န့ ကော မာတုး။ အန် ဝီ ဘ့လုး ဒင် အာဟျဝ့် ဒူအီ ဝီ တီ၊ တဲး န့ ကော ကာလှုး။

27 အာဆီဆာလ ဘော ကေး စုဝ်း ခူပ် ပ့လဝ် နာင် တီ။ အန် ဘော ဝီ စုဝ်း ယမ် ဒဲင် ကာဒါယ် ခူပ် ပ့လဝ် နာင် တီ။

28 မာ အာဆီဆာလ ဘော ဘ်ု ဒီ ယွတ် ခူပ် ကာဒဝ် ပါတဲင်။ အန် ဘော ကွယ် ဘာင် ကာဒဝ် တီ တဝ်း၊ ‘မှဝ် န့ ပါယ် လက်လဝ် မ့ပြွင့် အန် ပီ ဆော နာယ် ဒီ နာန် တး။း ပီ ဆော နာယ် ဒီ ထိူင် ကာဆဝ်။’

29 ဂေ နာင် အီ မုး ဒဲစေန့် အန် အီ မိုဝ်း အာငျာန် ဘော ကာလာင် ဒီ အန်။ အန် မိူဝ် ဝီ ကာလာင် ခဲင် နဝ်း အန် တဝ်း၊

30 ‘ဂေ ဟဲ့ ဟာဝ် ကာဂုဝ်း၊ ဟဲ့ ဟွတ့် ကာတုန့် ကြုဝ်ကြာမ်၊ ဝီ လာယ် ကာဆာင် ဒီ ဂေ။ ဒါ ဆိုက် အူ ဝီ၊ ဟဲ့ ပွိုန် ဒီဘျာ အူ ဝီ အာ ဝီ။ အီ မုး အာဒါ အာဆီဆာလ၊ အန် ဒီ ဘော ပွိုန် ခြိုင် တာ အီ ဘွတ် အီ ခိုက်ခမ်၊ အီ မိုဝ်း ရာင် ဘုဝ်း ကာဇဝ်။ ဘော ဘိက် လာယ် အီ ဟွယ် ဒီ မဲင်၊ တဲး ဝီ အီ ဟဲ့ ကာဂုဝ်း အွင် မိုဝ်း ဆာရေ။ ဇိုဝ် တီ ဒွန် မျုဝ် မုး တူတ့် ပီ ဖာတ် ပွိုန် ဂေ။’

31 အိုယ် မဲ ဇဝ်ဖြာ၊ တဲး ရန်ဆူ မဲ ယမ် တူတ့် ဘောကာဂ့လျီတ်။ မာလဲ၊ အီ မုး ဂေ အီ ရွက့် မဲ ဇဝ်၊ တဲး ဂေ ပီ ဘ့လာင် ဆီငဲ အီ ဘ့လာင် ဟုဝ့် ခဲင် ဘ့လေန့် ဘော မိုဝ်း အာဖုင် ဒင်ခုဝ် တာင်။” ခဲ့ တီ ဂေ တဝ်း မှုဝ်။

ဝါယ် အန် တီ မာန် မိူင် ဂေ ဒူအီ အီဆာရေလ ဘော ယေန် ဒါခိုယ် အာဒါ ဖွုန် ဂိုဝ် ဆီနမ်။