1 ဝါယ် ယမ် အာအေဟုတ် တွိုန်၊ ဂေ ဒူအီ အီဆာရေလ ဝီ ဘူင် အီ တူ မွှိုမ် အီ တူ လဝ့် နဝ်း ဇဝ်ဖြာ ပေါ န့ ပွါ။ 2 ပါယ် တီ ဇဝ်ဖြာ ဘော တဲး ဂေ စှိုမ် ဒီ ခုန်ဒီခမ် အာယာဖိန် အီ မုး ဒူအီ အာမျုဝ် ကာနန့် အီ အိုပ် မိူင် ဟာစော။ ဒါ ဘုဝ် အီ အိုပ် ဒါ ဆိုက် ခုန်ဒီခမ် အာယာဖိန် တီ၊ န့ ဘော မုး အာဆီဆာလ အီ ကွယ် ဒီ မိူင် ဟာရောဆိက်ဟာဂေါယိမ်။ 3 ခုန်ဒီခမ် အာယာဖိန် တွိုန်၊ အန် ဘော မိုဝ်း လက်လဝ် ဟိန် ဒိမ် မာယဝ်း လှာင်။ အန် ဘော အိုပ် ဘော ခါနှာပ် ကာဆဝ် ဂေ ဒူအီ အီဆာရေလ အာဒါ အာ ဂိုဝ် ဆီနမ်။ ဒေါ အန် တီ ဂေ ဒူအီ အီဆာရေလ ဘော ဝီ ဆာခိုဝ် ဒဲ့ တဲး ဇဝ်ဖြာ စွယ် ဂေ။

4 ဒေါ အန် တီ နာင် ဒေဘုဝ်ရာ အီ မုး အီဘိုန့် အာပီတုတ် အီ ဘဲန် အီဘိုန့် အီ ဘျာန် ဂြုဝ်း ဇဝ်ဖြာ ဘော ဘဲန် အီ ဆုင်ဖျာတ် ဒါရာ ဒီ ဂေ ဒူအီ အီဆာရေလ။ 5 နာင် ဒေဘုဝ်ရာ တီ ဟဲ့ ဒွိုမ် ကွယ် ခြိုမ် ဟေ စိုက် အီ စိူဝ် ဟေ စိုက် ဒေဘုဝ်ရာ အီ ကွယ် ဒီ ကာတဲ မိူင် ရာမာ ဂါယ် မိူင် ဘေဒါအေန် အီ ကွယ် ဒီ ကာတဲ နွန် အာအေဖာရိမ် တွိုန်။ ဂေ ဒူအီ အီဆာရေလ ဝီ ဟုဝ့် ဒူင် ကွယ် အန်၊ တဲး အန် ဆုင်ဖျာတ် အာမူ ဂေ။ 6 အာဒါ အူ ဆီငဲ၊ အန် ဘော ဒဲ့ အာဘာရက် အီ မုး ဂွန် အာဖီနူမ် အီ ကွယ် ဒီ မိူင် ကေဒေဆ ခဲင် ကာဒါယ် ဂေ ဒူအီ ခြိုဝ် အာနာပ်ထာလီ။ အန် ဘော ကာလာင် ဒီ အာဘာရက် တဝ်း၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ကာလာင် ဒီ မဲ တဝ်း၊ ‘တဲး မဲ ဒဲ့ ဒူအီ အာနာပ်ထာလီ ဘော ဒူအီ အာဇေဘူလူန် အာဒါ အူ မှိုန့် ဝီ၊ တဲး ဘေ ဟုဝ့် ဒီ နွန် ထာဘောရာ။ 7 အုဝ် ဒီ တဲး ဒါ ဘုဝ် တာင် အာဆီဆာလ အီ အိုပ် ဒါ ဆိုက် ခုန်ဒီခမ် အာယာဖိန် တွိုန် တး ကာဂုဝ်း ဒီ မဲ ခူပ် အိုမ် ဘ့လဲင် ကီဆူန် တွိုန်။ အန် ဒီ ဘော ပဝ့် မ့ပြွင့် လက်လဝ် ဟိန်။ ဘော ဒါ ဆိုက် အန် ဘောကာဂ့လျီတ် ဒီ တး ဒူပ် အန်။ အုဝ် ယီ တဲး မဲ အွင်၊ မဲ ပဲ အန်။’”

8 ပါယ် တီ အာဘာရက် ဝီ တဝ်း၊ “ဆေ မဲ ဘော ဟာဝ် ရိုမ် ဒူပ် အုဝ်၊ အုဝ် ဒီ ဟာဝ်။ ဆေ မဲ ယီ တူ ဟာဝ်၊ အုဝ် မိူဝ် တူ ဟာဝ်။”

9 နာင် ဒေဘုဝ်ရာ တွိုန် ဝီ တဝ်း၊ “အိုဝ်၊ ဟဲ့ မုး။ ဘော အုဝ် ဒီ ဟာဝ် ရိုမ် ဒူပ် မဲ။ မာလဲ၊ အီ ဒီ ကာဂုဝ်း အွင် တီ၊ အာဝ် ဘဲန် ဆာရေ မဲ။ ခုဝ်၊ ဇဝ်ဖြာ ဒီ တဲး ဒါ ဘုဝ် တာင် အာဆီဆာလ တီ စှိုမ် ဒီ အီဘိုန့်။” ပါယ် တီ နာင် ဒေဘုဝ်ရာ ဘော ဟာဝ် ရိုမ် ဒူပ် အာဘာရက် ဇမ် ဒီ မိူင် ကေဒေဆ တွိုန်။ 10 အာဘာရက် ဘော ဒဲ့ ဒူအီ အာဇေဘူလူန် ဘော ဒူအီ အာနာပ်ထာလီ ဟာဝ် ဒူပ် အန် ဒီ မိူင် ကေဒေဆ တွိုန်။ န့ ဘော မိုဝ်း ဒူအီ အူ မှိုန့် ဝီ အီ ဟာဝ် ရိုမ် ဒူပ် အန်။

11 ဒေါ အန် တီ န့ မုး အာဟေဘေန် အီ မုး ဒူအီ အာမျုဝ် ခေနိတ်။ အာကီနီ မုး လှုက်လှာန် အာဟေဘာ အီ မုး ဘိုဝ် အာမုဝ်ဆဲ တွိုန်။ အန် ဟဲ့ လေး ဒူင် ကွယ် အာမျုဝ် အန် ဘော ဆမ် ထိုပ် ဘိက် အန် ခူပ် ဟေ တာင် ဒီ ဒူင် စိူဝ် စာနာနိမ် အီ ကွယ် ကာတတ် မိူင် ကေဒေဆ တွိုန်။

12 ဒေါ ဝီ ယိုဝ် အာဆီဆာလ လွင် အာဘာရက် အီ မုး ဂွန် အာဖီနူမ် ဟဲ့ ဟုဝ့် ဒီ နွန် ထာဘောရာ တွိုန်၊ 13 အန် ဘော ဒဲ့ ခဲ့ ကွယ် ဒါ ဆိုက် အန် အီ ပဝ့် လက်လဝ် ဟိန် အာဒါ ဒိမ် မာယဝ်း လှာင်၊ ဘော ဂေ ဒါ ဆိုက် အန် ဘောကာဂ့လျီတ်၊ တဲး ဂေ လေး ဒီ မိူင် ဟာရောဆိက်ဟာဂေါယိမ်၊ ဝီ ဟာဝ် ဒီ ဘ့လဲင် အိုမ် ကီဆူန်။

14 ဒေါ အန် တီ နာင် ဒေဘုဝ်ရာ ဘော ဝီ ကာလာင် ဒီ အာဘာရက် တဝ်း၊ “တဲး မဲ ဟာဝ်၊ ဇဝ်ဖြာ အီ ဒီ ယဲတ့် ဟာဝ် မဲ။ ဇဝ်ဖြာ ဒီ တဲး မဲ ပဲ မဲ အွင် ဒါ ဆိုက် အာဆီဆာလ အာတိုဝ် နီ။” ပါယ် တီ အာဘာရက် ဘော ယဲတ့် လူင် ဒါ ဆိုက် အာဒါ အူ မှိုန့် ဝီ တွိုန်၊ တဲး ဂေ လူင် ဒီ နွန် ထာဘောရာ။ 15 ဒေါ လာယ် ကာဂုဝ်း အာဘာရက် ဒီ ဒါ ဆိုက် အာဆီဆာလ တွိုန်၊ ဇဝ်ဖြာ ဘော တဲး အာဆီဆာလ ဘော ဒါ ဆိုက် အန် အီ ပဝ့် မ့ပြွင့် လက်လဝ် ဟိန် ဘော ဒူအီ အန် ဘောကာဂ့လျီတ် စှိုမ် တူတ့်။ အာဆီဆာလ ဘော ဒဲန် လေး ဒီ လက်လဝ် ပီ ပဝ့် အန်၊ ဝီ ကာဘ့လဲပ် တဝ်။ 16 အာဘာရက် ဘော ခုင်ခြး ဒူပ် ဂေ ဒါ ဆိုက် အန် အီ ပဝ့် လက်လဝ် ဟိန်၊ ကော ဇမ် ဒီ မိူင် ဟာရောဆိက်ဟာဂေါယိမ်။ အန် ဘော ဒိုဝ်း မာပွါ့ လာင် ဂေ ဘ့လာ လျီး အန်၊ ငဝ်း ယမ် တူတ့် ဒူအီ ဂေ တီ။ အူ ဝီ မိူဝ် အာဝ် ဟူ မိုဝ်း။

17 အာဆီဆာလ ဘော ကာဘ့လဲပ် တဝ် ဟာဝ် လိုပ် ခဲင် ထိုပ် နာင် ယေလာ အီ မုး အီဘိုန့် အာဟေဘေန် အီ မုး ဒူအီ အာမျုဝ် အာကီနီ။ အန် ဟာဝ် ဒီ တီ ခုဝ်၊ ခုန်ဒီခမ် အာယာဖိန် အီ အိုပ် မိူင် ဟာစော တွိုန် ဟဲ့ ဒွိုမ် ဘဲန် ဂိုက် အီ ကာလဝ့် ဒီ ဒူအီ အာဟုဝ်ဘာ တီ။

18 နာင် ယေလာ ဘော ဟာဝ် ဘ်ု ဒီ ရွုး အာဆီဆာလ ဘော ဒဲ့ အန် တဝ်း၊ “တး၊ တဲး မဲ တး လိုပ် ခဲင် ထိုပ် နီ၊ အာဝ် လုဝ် ယုဝ် မာဆေ။” အာဆီဆာလ ဘော လိုပ် ခဲင် ထိုပ် တီ။ နာင် ယေလာ ဘော ဒိုဝ်း ဟိုပ် ပ့လိုက် ဒီ အန်။

19 အန် ပီ ဝီ တဝ်း၊ “အုဝ် မှာန့် ဒီ ဒျီင် အိုမ် ခေါ အီ စဲက်၊ အုဝ် ဟဲ့ ဆီ ဒျီင် ကာဆဝ် အိုမ်။” နာင် ယေလာ ဘော ဒိုဝ်း ကာပဝ် အိုမ် ပူ၊ ဝိုဝ်း တဲး အန် ဒျီင်။ ဟဲ့ ဟွတ့်၊ အန် ဘော ဝီ ဒိုဝ်း ဟိုပ် ပ့လိုက် ဒီ အန်။

20 အန် ပီ ဝီ တဝ်း ဒီ နာင် ယေလာ၊ “တဲး မဲ စွင့် ခူပ် ဘာင် မာလုဝ်း နီ၊ ဆေ အီ ဘော တး ဒီမွှတ် တဝ်း၊ ‘န့ မိုဝ်း ဒူအီ အီ ကွယ် ဒီ နီ။း’ တဲး မဲ တဝ်း၊ ‘အာဝ် မိုဝ်း အာဆေ ကွယ် ဒီ နီ။’”

21 အာဆီဆာလ တွိုန် မိူဝ် ဟဲ့ နုန် ကာဆဝ်။ အန် ဘော ပွိုန် ဒီ အိတ် ပိဝ် အူ ဇေန့်။ ပါယ် တီ နာင် ယေလာ ဘော ဒိုဝ်း လွှက့် ထိုပ် ဘော မီဒဲ၊ ဝီ ကြဲ ဒီ ဟာဝ် ဒူင် ကွယ် အာဆီဆာလ၊ ဝီ ဒွက် ဒီ ဒင် ဟျုဝ့် အန်၊ တဲး န့ ကော ကာလှန် ဒိုက် ဒီ ကာဒါယ်။

22 ဝါယ် တီ အာဘာရက် ဘော ဝီ တး ဟြေတ့် အာဆီဆာလ။ နာင် ယေလာ ဘော ဝီ လေး ရွုး အာဘာရက် ဘော ကာလာင် ဒီ အန် တဝ်း၊ “တဲး မဲ တး လိုပ် ဒီ နီ၊ အုဝ် ဒီ နှဲ ဒီ မဲ ဝီ ပီ ဟြေတ့် မဲ တီ။” အန် မိူဝ် ဒူပ် ဟာဝ် နာင် ယေလာ တွိုန်၊ အန် ဘော ဝီ ယိုဝ် အာဆီဆာလ ဟဲ့ ဟွတ့် ယမ်။ ကာဘ့လ ဒွက် ထိုပ် တွိုန် မိူဝ်၊ ဟဲ့ ဒွက် ဒီ ဒင် ဟျုဝ့် အန်။

23 ဆီငဲ တီ၊ ဇဝ်ဖြာ ဟဲ့ တဲး ဂေ ဒူအီ အီဆာရေလ အွင် ဒါ ဆိုက် ခုန်ဒီခမ် အာယာဖိန် အီ အိုပ် ဒူအီ အာမျုဝ် ကာနန့်။

24 ဟဲန့် ဂေ ဒူအီ အီဆာရေလ ကြဲ ဒီ ကိူန်၊ တဲး ကော ဇမ် အာခြာဝ် ဒီ ကာဂုဝ်း ပဲ ဂေ ခုန်ဒီခမ် ဒူအီ ကာနန့် အီ မုး အာယာဖိန် တွိုန်။