1 ဇဝ်ဖြာ အုန် ဒူအီ အာမျုဝ် ဟဝ် မင် မျုဝ်၊ တဲး ဂေ ဂိတ်၊ တဲး ဂေ ကွယ်။ အန် တဲး ဂေ ဘဲန် အီ ဒီ ထေဝ် ဒီ ယွတ် ဂေ ဒူအီ အီဆာရေလ အီ ညှမ် ဒွိုမ် ကာဂုဝ်း ဒေါ ပွိုန် ဂေ မိူင် ကာနန့်။ 2 အန် ဇဝ် ဘူင် ပါယ် တီ တဲး န့ မာနုဝ် ဂေ ဒူအီ အီဆာရေလ ဒွန် စုဝ် ဒွန် ဘာန်၊ တဲး ဂေ အီ ညှမ် ဒွိုမ် ကာဂုဝ်း နပ် ပီ ဒီ ပါယ် ဒီ ကာဂုဝ်း။ 3 ဂေ ဒူအီ အီ ဆီ ဂိတ် ခဲင် မိူင် တီ ဘော မုး ခုန်ဒီခမ် ဒူအီ ဖီလီထီ ဖန် ကာဒင် ဘော ဒူအီ အာမျုဝ် ကာနန့်၊ အာမျုဝ် ဆီဒူန် ဘော အာမျုဝ် ဟီဝိတ်။ ဂေ ကွယ် ဒီ ကာတဲ နွန် လေဘာနုန် စုး ဒီ ဘာလဟေရာမူန် ကော ဝီ ဇမ် ဒီ ဘာင် န့တေန့် အီ ဟာဝ် ဒီ မိူင် လေဘုဝ်ဟာမာတ်။ 4 ဒူအီ ဂေ တီ၊ ဂေ ဒီ ကာဆုး ဒူအီ အီဆာရေလ၊ တဲး န့ လိုဝ်း ဆီချာ ယုဝ် ဂေ ဘူင် ဒူပ် တူ ဘူင် ဒူပ် ဒါရာ ဇဝ်ဖြာ ပဲ့ ဟဲ့ ဒွိုမ် ကာလာင် အုန် အာမုဝ်ဆဲ ဒီ ဂုန့် ဒင် ဂေ။

5 ပါယ် တီ ဂေ ဒူအီ အီဆာရေလ ဘော ကွယ် ရိုမ် ဒူပ် ဒူအီ အာမျုဝ် ကာနန့်၊ အာမျုဝ် ဟေထိတ်၊ အာမုဝ်ရိတ်၊ ဒူအီ ဖေရေဆိတ်၊ ဒူအီ အာမျုဝ် ဟီဝိတ် ဘော ဒူအီ အာမျုဝ် ယေဘူဆိတ်။ 6 ဂေ ဘော ဒိုဝ်း ဂွန် အီဘိုန့် ဒူအီ အာမျုဝ် ဟဝ် တီ၊ တဲး န့ ဘဲန် အီဘိုန့် ဂေ၊ ပီ ဝီ ဒိုဝ်း ဂွန် ဒီဘျာ ဂေ ဝီ အာပ် တဲး ဂွန် အီမာယ် ဒူအီ အာမျုဝ် ဟဝ် တီ ဝီ ဒိုဝ်း။ ဂေ ဘော ကြိုပ် ဇဝ် ပီ ကြိုပ် ဒူအီ ဟဝ် တီ။

7 ဂေ ဒူအီ အီဆာရေလ ဟဲ့ ပိဝ် ဇဝ်ဖြာ ပီ ကြိုပ် ဂေ။ ဂေ ဝီ ဘူင် အီ တူ မွှိုမ်၊ အီ တူ လဝ့် နဝ်း ဇဝ်ဖြာ။ ဂေ ဝီ ကြိုပ် အာရိုပ် ဇဝ် ဘာလ ဘော ဂေ အာရိုပ် နာင် ကာနမ် အေဆူရာ။ 8 ကူပ် န့ ပါယ် တီ ဇဝ်ဖြာ ဘော ရူ ကာဆဝ် ဒီ ဂေ ဒူအီ အီဆာရေလ။ အန် ဇဝ် ဘော တဲး ခုန်ဒီခမ် အာကူဆန်ရီမီလိမ် အီ အိုပ် မိူင် အာရာမ်နာရာဟမ် ကာဂုဝ်း ပဲ ဂေ။ ခုန်ဒီခမ် တီ ဘော အိုပ် ဂေ အာဒါ ဒါ ဆီနမ်။ 9 ဒေါ အန် တီ ဂေ ဒူအီ အီဆာရေလ ဘော ဝီ ဆာခိုဝ် ဒဲ့ ဇဝ်ဖြာ။ ဇဝ်ဖြာ ဘော စ်ု ဒူအီ အူ ဝီ၊ ဟာဝ် စွယ် ဂေ၊ တဲး အန် ချွတ် ဂေ။ ဒူအီ ဝီ တီ မုး အာအောဆန်ယေလာ။ အန် မုး ဂွန် အာခေနာတ် အီ မုး ဝါ အာဂါလိပ် တွိုန်။ 10 နဝ်း ဖွိုမ် ဇဝ်ဖြာ ဘော ကွယ် ရိုမ် ဒူပ် အန်၊ တဲး အန် ဘဲန် ဒါ တာင် အီ ဆုင်ဖျာတ် ဒါရာ ဒီ ဂေ ဒူအီ အီဆာရေလ။ အန် ဘော ရဲန် ဒါ ဆိုက် အန်။ ဇဝ်ဖြာ ဘော တဲး အန် အွင် ပဲ ခုန်ဒီခမ် အာခူဆန် ရီမီလိမ် အီ အိုပ် မိူင် အာရာမ်နာဟာရာစိမ် တွိုန်။ 11 ပါယ် တီ မိူင် ဘော မိူင် ဘော ဝီ ယေန် ဒါခိုယ် အာဒါ ဖွုန် ဂိုဝ် ဆီနမ်။ ဟဲ့ ဟွတ့် ပါယ် တီ အာအောဆန်ယေလာ အီ မုး ဂွန် အာခေနာတ် ဘော ယမ်။

12 ဝါယ် အန် တီ၊ ဂေ ဒူအီ အီဆာရေလ ပီ ဝီ ဘူင် အီ တူ မွှိုမ် အီ တူ လဝ့် နဝ်း ဇဝ်ဖြာ ပေါ န့ ပွါ။ ပါယ် တီ ဇဝ်ဖြာ ဘော တဲး ပွုန် ဒီ ခုန်ဒီခမ် အာအေကာလွန် အီ အိုပ် မိူင် မုဝ်အာပ်၊ တဲး အန် အိုပ် ဂေ ဒူအီ အီဆာရေလ။ 13 ခုန်ဒီခမ် တီ ဘော လာယ် ဖြူမ် ရိုမ် ဒီ ဒူအီ အမ်မူန် ဘော ဒူအီ အာမာလေက်၊ တဲး ဂေ ကာဂုဝ်း ပဲ ဒူအီ အီဆာရေလ။ ဂေ ဘော ပွိုန် မိူင် အီ စိူဝ် မိူင် ဟေ စိုက်။ 14 ဂေ ဒူအီ အီဆာရေလ ဘော ကာဒုး ဒီ ဘဲန် မှာယ် ခုန်ဒီခမ် အာအေကာလွန် တီ အာဒါ ဂိုဝ် ဒီ ဒါ ဆီနမ်။

15 ပါယ် တီ ဂေ ဒူအီ အီဆာရေလ ဝီ ယာမ် ဒဲ့ ဇဝ်ဖြာ။ ဇဝ်ဖြာ ဘော စ်ု ဒူအီ အူ ဝီ တဲး အန် ဟာဝ် ချွတ် ဂေ၊ တဲး ဂေ လွတ်။ ဒူအီ ဝီ တီ၊ အန် စိူဝ် အာအေဟုတ်။ အန် မုး ဒူအီ စ်ု ဒဲ ဂ။ အန် ဘော မုး ဂွန် အာဂီရာ အီ မုး ခြိုဝ် အာဘေန်ယာမ်။ ဂေ ဒူအီ အီဆာရေလ ဘော ဒွါ အန် ဂူင့် လက်ဆွင် ဟာဝ် ဒူင် ကွယ် ခုန်ဒီခမ် အာအေကာလွန် အီ အိုပ် မိူင် မုဝ်အာပ် တွိုန်။ 16 အာအေဟုတ် မိူဝ် စ်ု အီ ဘူင် အာတိုမ် အီ မိုဝ်း ဘ့လာ အာ ဘ့လာက် ဘော တူင့် အူ ကာနိး။ အန် ဘော ပက် ဒိုက် ဒီ ညွယ် အန် ဘ့လာက် အာအး၊ ဝီ ချြီင် ခဲင် ခြိုင် တာ အန်။ 17 ပါယ် တီ အန် ဘော ဒိုဝ်း ဒီ ဂူင့် လက်ဆွင် ဂေ၊ ဟာဝ် အာပ် ဒီ ခုန်ဒီခမ် အာအေကာလွန် တွိုန် အီ မုး ဒူအီ ဂ့လန့် ကာဆဝ်။ 18 အန် ဟဲ့ ဟွတ့် အာပ် ဒွါ လက်ဆွင် တီ ဒီ ခုန်ဒီခမ် အာအေကာလွန်၊ အန် ဘော ဝီ စ်ု ဂေ အီ ကာဂွတ် တး လက်ဆွင် တီ၊ တဲး ဂေ ဝေန့်။ 19 အီ မုး အန်၊ အန် ဘော ဝီ ယိတ့် ဒူင် မိုဝ်း မာဝ် ပီ ဒွက် ဂေ အာရိုပ် ရာင် အီ ကွယ် ဒီ မိူင် ဂီလဂါ တွိုန်။ အန် ဝီ ဟာဝ် ဒူင် ကွယ် ခုန်ဒီခမ် အာအေကာလွန် တဝ်း၊ “အိုယ် မဲ ခုန်ဒီခမ် တာင်၊ အုဝ် မိုဝ်း ပီ ဆီ ပြာ ဒီ ကာလာင် ဒီ မဲ အာဒါ အူ မျုဝ်။” ခုန်ဒီခမ် မိူဝ် ဝီ ကာလာင် ဒီ ဂေ ဒဲစေန့် အန် တဝ်း၊ “တဲး န့ ယေန်။ တဲး မီ ယာယ် အာ ဝီ ကွယ် ဒီ နီ။” အန် ဟဲ့ ဟွတ့် တဝ်း ပါယ် တီ ဂေ မိူဝ် လေး ဟာဝ် အူ ဇေန့်။

20 ဒေါ အန် တီ ခုန်ဒီခမ် အာအေကာလွန် ကွယ် ခဲင် ဟုဝ် အန် ခြွင့် ဒဲင်။ အာအေဟုတ် မိူဝ် ဟာဝ် ဒူင် ကွယ် အန် ဘော ကာလာင် ဒီ အန် တဝ်း၊ “အုဝ် ဟဲ့ တး ကာလာင် အာမိင် ဇဝ်ဖြာ ဒီ မဲ။” ဟဲ့ ဟွတ့်၊ ခုန်ဒီခမ် တွိုန် ဘော ယိတ့် အူ ဇေန့်။ 21 အာအေဟုတ် ဘော တာ ဒဲ အန် ဘ့လာက် အာဂ၊ ဝီ ထွတ် အာတိုမ် ဒီ ညွယ် အန် ဘ့လာက် အာအး၊ ဝီ ဆတ် ဘိုမ် ခုန်ဒီခမ် တီ။

22 အာတိုမ် အန် တီ၊ န့ ဘော လိုပ် ဟာဝ် ဘော ဂ့လွင့် အန်၊ ကွဲ့ တဲး န့ ဆီ လိုဝ်း။ ဘျြီင် အန် ဟဲ့ ဟွတ့် ဝီ ဆီဘ့လိုက် တူတ့်။ အန် မိူဝ် တူ ထွတ် လေး အာတိုမ် တီ။ ဟဲ့ ကာလှန် ဇမ် နာ ကာတု အန်၊ န့ ဘော ဟဝ့် ပါယ် တီ။ 23 ဟဲ့ ဟွတ့်၊ အာအေဟုတ် ဝီ ကာဘိတ် တူတ့် မာလုဝ်း ခဲင် ဟူင် တီ၊ ဝီ ခတ် ဆဝ် အန်။ ဝီ လေး ဒီ ဂြး ဟုဝ် တွိုန်။ 24 အန် ဟဲ့ ဟွတ့် လေး ဟာဝ်၊ ဂေ ဒဲစေန့် ခုန်ဒီခမ် ဝီ ယိုဝ် မာလုဝ်း ဟဲ့ ကာဘိတ် တူတ့်။ ဟဲ့ ခတ် ဘော ခတ်ဆဝ်။ ဂေ ထာင်၊ ခုန်ဒီခမ် ဆီ အျီင် ခဲင် ဟူင် အီ ယေန် ဒါခိုယ်။ 25 ဂေ ဝီ ဘ်ု ဒီ ယွတ် ကော လှေန့် ကာဆဝ်။ ဂေ တူ ဆီ ယ ဝိုဝ်း မာလုဝ်း။ ပါယ် တီ န့ ဘော ဂဲ့ ဒီ နဝ်း ဂေ။ ဟဲ့ ဟွတ့် ဂေ ဘော ဒိုဝ်း လခတ်ဆဝ်၊ ဝိုဝ်း မာလုဝ်း။ ဂေ ဝီ ယိုဝ် ခုန်ဒီခမ် ဟဲ့ ဟွတ့် ကေး၊ ဟဲ့ ဟွတ့် ယမ် ခဲင် ဟုဝ် တီ။

26 ဒေါ ဆီငျာ လာယ် ဘ်ု ဂေ တီ၊ အာအေဟုတ် မိူဝ် လေး ဟာဝ် ကာလုဝ်း ဒူင် ကွယ် မာဝ် ပီ ဒွက် ဂေ အာရိုပ် ရာင် တွိုန်။ အန် ဘော လေး ဟာဝ် ဇမ် ဒီ ဒူင် စိူဝ် စီရာပ်။ 27 အန် ဘော တး ဇမ် ဒီ နွန် အာအေဖာရိမ် ဘော ဘုတ် ဝဝ် နိုင် ပဲ၊ တဲး န့ ဒဲ့ ကာဇု ဂေ ဒူအီ အီဆာရေလ အီ မုး ဒါ ဆိုက် အန်။ အန် ဘော ဝီ ယဲတ့် ဂေ လေး လူင် ဒီ နွန် တီ။

28 အန် ဝီ တဝ်း ဒီ ဂေ၊ “တဲး ဘေ တး ဒူပ် အုဝ်။ ဇဝ်ဖြာ ဟဲ့ တဲး ဘေ အွင် ရန်ဆူ ဘေ အီ မုး ဒူအီ အာမျုဝ် မုဝ်အာပ် တွိုန်။” ပါယ် တီ ဂေ ဘော လူင် ဒူပ် အာအေဟုတ် ဘော ဟာဝ် အိုပ် ဘာင် ကာလုဝ်း အိုမ် ဘ့လဲင် ယောဒါန် ဒူင် ကာလုဝ်း ဂေ ဒူအီ မုဝ်အာပ်။ ဂေ မိူဝ် တူ တဲး အာဆေ ကာလုဝ်း။ 29 ဆီငဲ တီ၊ ဂေ ဘော ငဝ်း ယမ် ဒူအီ မုဝ်အာပ် အီ မိုဝ်း ပ့လူမ် မိုဝ်း ဟဲန့် အာဒါ အူ မှိုန့် ဝီ။ ဂေ မိူဝ် တူ တဲး ဂေ လွတ် ခေါ အူ ဝီ။ 30 ပါယ် တီ ဂေ ဒူအီ အီဆာရေလ ဘော ပဲ ဘော အိုပ် ဂေ ဒူအီ မုဝ်အာပ် ဆီငဲ တီ။ ဝါယ် အန် တီ မိူင် ဘော မိူင် ဘော ယေန် ဒါခိုယ် ကော နုဝ့် ဒါ ဂိုဝ် ဆီနမ်။

31 ဝါယ် အန် တီ အာဆာမ်ကာ အီ မုး ဂွန် အာနာတ် ဘော ဝီ ဘဲန် ဒါ တာင် အီ ဆုင်ဖျာတ် ဒါရာ ဒီ ဂေ။ အန် ဘော ငဝ်း ယမ် ဒူအီ ဖီလီထီ ဒဝ် မာယဝ်း ဝီ။ အန် ဘော တာ မ့ဖျီ့ ဘတ့် ပီ ဆတ် ဂေ မာမက်၊ ငဝ်း ယမ် ဒူအီ ဂေ တီ၊ တဲး န့ ချွတ် ဂေ ဒူအီ အီဆာရေလ။