1 အာမူ အာမာတ် ဇဝ်ဖြာ အူ ကာဒင် ဘော လေး ဒီ မိူင် ဂီလဂါ ဟာဝ် ဒီ မိူင် ပေါခေမ်။ အန် ဘော ကာလာင် ဒီ ဂေ ဒူအီ အီဆာရေလ တဝ်း၊ “အုဝ် ဟဲ့ ဒိုဝ်း လေး ဘေ ခဲင် မိူင် အဲဂိုပ်၊ ပီ ဝီ တိုယ် ဘေ ဟာဝ် ဒီ မိူင် ပဲ့ ဟဲ့ ဒွါ အုဝ် ကာဒိက် ဆတ်ဇာ ဒီ ဂုန့် ဒင် ဘေ။ အုဝ် မိူဝ် ဟဲ့ တဝ်း၊ ‘အုဝ် တူ ပျာတ့် ဝဲန် ဘေ ဘော ပဲ့ ဟဲ့ လာယ် ကာဆဲန့် အုဝ် ဒေါ မှဝ်။ 2 ဘေ မိူဝ် တူ ပွိုန် လာယ် ကာဆဲန့် ခေါ အူ မျုဝ် ဒီ ဒူအီ ဂေ နီ။ ဘေ လုဝ် ပျာတ့် ဝဲန် ကာစှူင့် လှူ ဂေ ဒီ ဇဝ် ပီ ကြိုပ် ဂေ။’ မာလဲ၊ ဘေ ယီ တူ ဘူင် ဒူပ် ပီ ကာလာင် အုန် အုဝ် တီ။ မှဝ် န့ ပါယ် ပီ ဘူင် ဘေ ပါယ် တီ။း 3 ဒေါ တီ နီ အုဝ် ဒီ ဝီ တဝ်း ဒီ ဘေ၊ ‘ခါ နီ ဟာဝ် အုဝ် အာဝ် ဟူ ဟုဝ် တဝ် ဂေ ဒီ အာတ့် ဘေ။ ဂေ ဒီ ယဲတ့် ဘေ၊ တဲး ဘေ ဘူင် ကာလိုပ်၊ တဲး န့ ပီ ဒီခွင့် အီ ဆတ် ဘြေတ့် ဘေ။ ဇဝ် ပီ ကြိုပ် ဂေ မိူဝ် ဒီ ဘော ပီ ယွတ့် ဂေ ခိူမ် ဒီ ဘေ။’”

4 အာမူ အာမာတ် ဇဝ်ဖြာ ဟဲ့ ဟွတ့် ကာလာင် ဒီ ဂေ ပါယ် တီ ခဲ့ ကွယ် ဂေ ဒူအီ အီဆာရေလ ဘော ကာဖြူမ် ဒီ ယာမ် ဒတ် အူ ဇေန့်။ 5 ဒူင် တီ၊ ဂေ ဘော တဲး န့ စိူဝ် ပေါခေမ်။ ဂေ ဘော လှူ ပီ ဒီ လှူ ဒီ ဇဝ်ဖြာ။

6 ဒေါ အန် တီ အာယုဝ်ဆူအာ ဘော ဘ့လေး တဲး ဂေ ဒူအီ အီဆာရေလ ဝေန့်။ ဂေ ဘော ဝေန့် ဒူင် ကွယ် ကာဒါယ် ခါဂုန် ဂေ ဝီ မှဝ် ဝီ အန်၊ တဲး ဂေ ဘိုင် ဒူင် တီ။ 7 ဒေါ မုး စုဝ် ဘာန် အာယုဝ်ဆူအာ တီ၊ ဂေ ဒူအီ အီဆာရေလ ဟဲ့ ဒူပ် ဆီချာ ဇဝ်ဖြာ။ ဝါယ် ဟဲ့ ဟွတ့် ယမ် အန် မိူဝ်၊ ဒေါ ဆီ အိမ် ဂေ ဒါ တာင် အီ ဟဲ့ ယိုဝ် အီ မွှိုမ် အာမ် ကာဆဝ် ပဲ့ ဟဲ့ ဘူင် ဇဝ်ဖြာ ဒီ ဒူအီ အီဆာရေလ၊ ဂေ ဆီ ဒူပ် ဆီချာ ဇဝ်ဖြာ။

8 ဝါယ် အန် တီ အာယုဝ်ဆူအာ အီ မုး ဂွန် အာနုန် တွိုန် ဘော ယမ်။ အန် ဘော မုး ဒဲစေန့် ဇဝ်ဖြာ။ ဒေါ ယမ် အန်၊ အာဆာက် အန် ဟဲ့ ပွိုန် အူ မာယဝ်း ဒီ ဂိုဝ် ဆီနမ်။ 9 ဂေ ဘော ဟာဝ် ဒိပ် ဒုဝ် ဘူင့် အန် ခဲင် ကာဒါယ် အီ မုး ခါဂုန် အန် အီ ကွယ် ဒီ ဒူင် စိူဝ် ထီမာနာဟေရိတ် ကာတဲ နွန် အာအေဖာရိမ် အီ ကွယ် နာ ကွာ နွန် ကာအာတ်။

10 စုဝ် ဒူအီ ဘာန် တီ၊ ဂေ ဟဲ့ ဟွတ့် ယမ် တူတ့်။ ဂေ အီ ဝီ ဂွိုတ် တး ကာမာယ်၊ ဂေ အာဝ် ဟူ ဝီ နပ် ဇဝ်ဖြာ။ ဂေ အာဝ် ဟူ နပ် ပဲ့ ဟဲ့ ဘူင် ဇဝ်ဖြာ အာဒါ ဒူအီ အီဆာရေလ။

11 ဒေါ အန် တီ ဂေ ဒူအီ အီဆာရေလ ဘော ဝီ ဘူင် အီ တူ မွှိုမ် ပီ တူ အိုင် ဇဝ်ဖြာ။ ဂေ ဘော ဝီ ကြိုပ် ဇဝ် ဘာလ။ 12 ဂေ ဝဲန် ဇဝ်ဖြာ ပီ ကြိုပ် ဂုန့် ဒင် ဂေ အီ မုး ဇဝ်ဖြာ အီ ဟဲ့ ချွတ် လေး ဂေ ခဲင် မိူင် အဲဂိုပ် တွိုန်။ ဂေ ဘော ဝီ ကြိုပ် ဇဝ် ပေါ ကာဒင် အီ မုး ဇဝ် ပီ ကြိုပ် ဒူအီ ဟဝ် အီ ကွယ် ရိုမ် ဒူပ် ဂေ တီ။ ဂေ ဝီ ဂူမ် ဂိုပ် ကြိုပ် ဇဝ် ဂေ တီ၊ ဘူင် တဲး ဇဝ်ဖြာ ရူ ကာဆဝ် ဒီ ဂေ။ 13 ဂေ အာဝ် ဟူ ဝီ ကြိုပ် ဇဝ်ဖြာ၊ ဂေ ဘော ဝီ ကြိုပ် ဇဝ် ဘာလ ဘော နာင် ကာနမ် အေဆာထာရိတ်။ 14 ပါယ် တီ ဇဝ်ဖြာ ဘော ရူ ကာဆဝ် ဒီ ဂေ ဒူအီ အီဆာရေလ။ အန် ဘော တဲး ဒူအီ ဟာယ် ဒူအီ မိူက် တး ဖာတ် ဒိုဝ်း ဟာဝ် ကြုဝ်ကြာမ် ဂေ။ ဇဝ်ဖြာ ဘော တဲး ရန်ဆူ အိုပ် ဂေ၊ ကွဲ့ တဲး ဂေ ဆီ ပွိုန် ကာခဲန့် ဒီ ရန်ဆူ ဂေ။ 15 ဆေ ဂေ လေး ကာဂုဝ်း ဒီ အီ ဟဝ်၊ ဇဝ်ဖြာ တဲး ဂေ စှိုမ် ဒွန် ဇေန့်၊ တဲး န့ ဘော ဒူပ် ပဲ့ ဟဲ့ ဒွိုမ် ဒိူင် အုန် ဇဝ်ဖြာ။ ပါယ် တီ ဂေ ကော ခမ် ဒုက် ကာဆဝ်။

16 ဒေါ အန် တီ ဇဝ်ဖြာ ဝီ တဲး န့ မိုဝ်း ဒါ တာင် အီ ဆုင်ဖျာတ် ဒါရာ ဒီ ဂေ။ တဲး ဂေ စွယ်၊ တဲး ဂေ ဒူအီ အီဆာရေလ ပွိုန် ဒီ လွတ် ဒီ ဒူအီ ဟာယ် ဒူအီ မိူက် အီ ဖာတ် ဒိုဝ်း ကြုဝ်ကြာမ် ဂေ။ 17 ပီ ဘော ဟဲ့ ပါယ် တီ မိူဝ်၊ ဂေ တူ ထူမ် ဂြုဝ်း ဂေ ဒါ တာင် အီ ဆုင်ဖျာတ် ဒါရာ တီ။ ဂေ ဝီ ကြိုပ် ဇဝ် ပေါ ကာဒင်။ စုဝ် ဂုန့် ဒင် ဂေ ပီ ဘော ဟဲ့ ဘူင် ဒူပ် ဒါရာ ဇဝ်ဖြာ မိူဝ်၊ စုဝ် ဂေ ဒူအီ ဒေါ အန် တီ ဂေ ယီ ဝဲန် ဇဝ်ဖြာ ခြန် ခြန်၊ တူ ဘူင် ပဲ့ ဟဲ့ ဘူင် ဂုန့် ဒင် ဂေ ဘော တူ ထူမ် ဒါရာ ဇဝ်ဖြာ။ 18 ဒေါ မှဝ် အာဝ် တဝ်း၊ ဆေ ဇဝ်ဖြာ ဟီ တဲး န့ မိုဝ်း ဒါ တာင် အီ ဆုင်ဖျာတ် ဒါရာ ဒီ ဂေ၊ ဇဝ်ဖြာ ဘော ကွယ် ရိုမ် ဒူပ် ဒါ တာင် ဂေ တီ ဘော ချွတ် ဂေ၊ တဲး ဂေ လွတ် ဒီ ရန်ဆူ ဂေ၊ တဲး န့ ကော နုဝ့် စုဝ် ဒါ တာင် ဂေ တီ။ ခုဝ်၊ ဇဝ်ဖြာ ဘော ဝီ ကာဝေ ဂေ ကူပ် ဟဲ့ ခမ် ဂေ ပီ ခါနှာပ် အီ ဟဝ်။ 19 မာလဲ၊ ဝါယ် ဟဲ့ ယမ် ဂေ ဒါ တာင် အီ ဆုင်ဖျာတ် ဒါရာ တီ မိူဝ်၊ ဂေ ဒူအီ ကိူန် ပီ ဝီ ဘူင် ပီ ဘြိမ်၊ ဘော ဝီ ဟာယ် လွှိုမ် စုဝ် ဒါ ဒါ ဂေ တီ။ ဂေ ဘော ဝီ ကြိုပ် ဇဝ် ပေါ ကာဒင် ဘော တူ ဝဲန် အီ တူ ဘွတ် တူ မွှိုမ် ပီ ဒွိုမ် ဘူင် ဂေ။

20 ကူပ် န့ ပါယ် တီ ဇဝ်ဖြာ ဘော ရူ ကာဆဝ် ဒီ ဂေ ဒူအီ အီဆာရေလ။ အန် တဝ်း၊ “ဒူအီ ဂေ နီ ဟဲ့ ပျာတ့် ဝဲန် ကာဒိက် ဆတ်ဇာ ပဲ့ ဟဲ့ ဘူင် အုဝ် ဘော ဂုန့် ဒင် ဂေ။ ဂေ မိူဝ် တူ ထူမ် ဂြုဝ်း အုဝ်။ 21 အုဝ် မိူဝ် အာဝ် ဟူ ဟုဝ် တဝ် ဒူအီ အီ ဆီ ဂိူတ် ခဲင် မိူင် ဘေ နီ ဝါယ် ဟဲ့ ယမ် အာယုဝ်ဆူအာ။ 22 အုဝ် ဒီ တဲး ဒူအီ အာမျုဝ် ဂေ တီ ကာဆုး ဂေ ဒူအီ အီဆာရေလ ဘူင် မှာပ်၊ တဲး အုဝ် နပ် ယုဝ် ဂေ ဒီ ဘူင် တူ ဘူင် ဒူပ် ပီ ကာလာင် အုဝ်၊ ယုဝ် ဂေ ဒီ ဘူင် ပီ ပဲ့ ဟဲ့ ဒွိုမ် ဘူင် ဂုန့် ဒင် ဂေ ဒေါ မွိုန်။” 23 ပါယ် တီ ဇဝ်ဖြာ ဘော တဲး ဒူအီ အာမျုဝ် ဟဝ် ဂေ တီ ကွယ် ခဲင် မိူင် တီ။ အန် ဇဝ် မိူဝ် တူ ဟုဝ် တဝ် ဂေ အူ ဇေန့်။ အန် တူ အာပ် ဂေ ဒီ အာယုဝ်ဆူအာ ဒေါ ဆီ ကွယ် အန်။