1 ဝါယ် ဟဲ့ ဟွတ့် ယမ် အာယုဝ်ဆူအာ၊ ဂေ ဒူအီ အီဆာရေလ ဝီ ဒီမွှတ် ဇဝ်ဖြာ တဝ်း၊ “ခဲင် ခြိုဝ် ဒဲစေန့် မဲ ဇဝ် နီ၊ ခြိုဝ် မှဝ် အီ ဒီ ပွိုန် ဒီ ကာဂုဝ်း ဒီ ဒူအီ ကာနန့် ဒီ အာတ့် ခြိုဝ် ဟဝ်။း”

2 ဇဝ်ဖြာ ဝီ တဝ်း ဒီ ဂေ၊ “ခြိုဝ် အာယူဒါ အီ လုဝ် ယဲတ့် ဒီ အာတ့် ခြိုဝ် ဟဝ်။ အုဝ် ဟဲ့ ဟွတ့် အာပ် ကာဒါယ် မိူင် တီ ဒီ ဂေ။”

3 ပါယ် တီ ဂေ ဒူအီ အာယူဒါ ဝီ ကာလာင် ဒီ ဂေ ဒူအီ ခြိုဝ် အာဆီမေအူန် အီ မုး ဘီနွင် ဂေ တဝ်း၊ “တဲး ဘေ ဟာဝ် ဒူပ် ယေ၊ တဲး အေ ဟုဝ့် ဒီ ကာဒါယ် မိူင် ပဲ့ ဟဲ့ ပွက့် ဇဝ်ဖြာ ဒီ ဒွါ ဒီ ယေ။ တဲး ယေ ကာဂုဝ်း ဒီ ဒူအီ ကာနန့်။ ဟဲ့ ဟွတ့်၊ ယေ ပီ ဒီ ဝီ ဟာဝ် ရိုမ် ဒူပ် ဘေ၊ ဟာဝ် ဒီ မိူင် ပဲ့ ဟဲ့ ပွက့် ဇဝ်ဖြာ ဒီ ဒွါ ဒီ ဘေ။” ပါယ် တီ ဂေ ဒူအီ အာဆီမေအူန် ဘော ဒူအီ အာယူဒါ ဘော ကာဒူပ် ဟာဝ်။

4 ဒေါ ဟာဝ် ကာဂုဝ်း ဂေ၊ ဇဝ်ဖြာ မိူဝ် တဲး ဂေ ပဲ ဒူအီ အာမျုဝ် ကာနန့် ဘော ဒူအီ အာမျုဝ် ဖေရေဆိတ်။ ဂေ ဘော ငဝ်း ဒူအီ တီ အူ မှိုန့် ဝီ ဒီ မိူင် ဘေစိက် တွိုန်။ 5 ဒီ တီ ဂေ ဘော ကာတုန့် ခုန်ဒီခမ် အာတောနီဖေရေဆိက် ဘော ကာဂုဝ်း ဒီ အန်။ 6 အန် ပီ ဘော ဟဲ့ တဝ် ဂေ မိူဝ်၊ ဂေ ယီ နဲ့ ခုင်ခြး ဒူပ် ဒီ မှေတ့် အန်။ ဂေ ဟဲ့ ဟွတ့် မှေတ့် အန်၊ ဂေ ဘော ဒဲပ် ဝဲန် ကာနူ မာ ဒဲ ဘော ကာနူ မာ ပ့လဝ် အန်။

7 ခုန်ဒီခမ် အာတောနီဘေစိက် ဝီ တဝ်း၊ “ခုန်ဒီခမ် ဘူ ဂိုဝ် ဝီ အုဝ် ဟဲ့ ကာဒုး ဒီ ဒဲပ် ဝဲန် ကာနူ မာ ပ့လဝ် ဘော ကာနူ မာ ဒဲ ဂေ။ ဂေ ဘော ကာဒုး ဒီ ထွန် ဒီ ဟူမ် ဘူမ် ဘြတ် အီ စုဝ်း ဒီ မာတိန့် အုဝ်။ ခဲ့ ပီ ဘူင် အုဝ် တီ၊ ဇဝ်ဖြာ ဟဲ့ ဝီ တဲး အုဝ် ခမ် ဒေါ တီ နီ။” ပါယ် တီ ဂေ ဘော ဒိုဝ်း ဟာဝ် အန် ဒီ မိူင် ယေရူဆာလဲမ်။ အန် ဘော ဟာဝ် ယမ် ဒီ တီ။

8 ဂေ ဒူအီ အာယူဒါ ဟဲ့ ကာဂုဝ်း ပွိုန် မိူင် ယေရူဆာလဲမ်။ ဂေ ဘော ငဝ်း ယမ် ဒူအီ ဘော ဒိုဝ်း ငဝ် ဒုဝ့် ကာဆိုမ် မိူင် တာင် တီ။

9 ဝါယ် အန် တီ ဂေ ပီ ဝီ ကာဂုဝ်း ဒီ ဒူအီ ကာနန့် အီ ကွယ် ဒီ ကာတဲ နွန် ဘော ဒီ ဒင် နွန်။ ဂေ ကာဂုဝ်း ဘော ဒီ ဂေ အီ ကွယ် ဘ့လာက် နာ တေတ့်။ 10 ဂေ ဝီ ဟာဝ် ကာဂုဝ်း ဒီ ဒူအီ ကာနန့် အီ ကွယ် ဒီ မိူင် ဟေဘြုဝ် အီ စိူဝ် ဘော မိူင် ကီရီယာတ်အာဘာ။ ဂေ ဘော ကာဂုဝ်း ဘော ပျာတ့် ဂေ ဒူအီ အာဆေမ်ဆေ၊ အာဟီမာန် ဘော အာတာလာမ်။

11 ဟဲ့ ဟွတ့်၊ ဂေ ပီ ဝီ လေး ဒီ တီ၊ ပီ ဝီ တဝ်း ဒီ ဟာဝ် ကာဂုဝ်း ဒီ မိူင် တာင် ဒေဘီရာ အီ ဟဲ့ ဒွိုမ် စိူဝ် ကီရီယာတ်ဆောဖာ။ 12 ဒေါ အန် တီ အာဂါလိပ် ဝီ တဝ်း၊ “အုဝ် ဒီ ဒိုဝ်း ဂွန် ဒီဘျာ အုဝ် အီ စိူဝ် နာင် အေဆော၊ အာပ် ဒွါ ဒီ ဝီ အီ ကာဂုဝ်း ပွိုန် မိူင် ကီရီယာတ်ဆောဖာ။” 13 န့ ယီ မုး အာအောဆန်ယေလာ အီ မုး ဂွန် အာခေနာတ် အီ မုး ဝါ အာဂါလိပ် တွိုန်။ အန် ဘော ကာဂုဝ်း ပွိုန် မိူင် တာင် တီ။ အာဂါလိပ် ဘော အာပ် ဂွန် ဒီဘျာ အန် အီ စိူဝ် နာင် အေဆော တွိုန် ဒီ အန်။

14 အူ ဆီငဲ အာအောဆန်ယေလာ ဘော ကာဆုး အီဘိုန့် အန်၊ တဲး အန် မှာန့် ကာဒါယ် ဒီ ဂုန့် အန်။ အီဘိုန့် အန် တီ ဘော ဟာဝ် အူ ဇေန့်။ ဒေါ လေး အန် ဒဲင် ကာတု မာလာ အန်၊ အာဂါလိပ် ဘော ဒီမွှတ် အန် တဝ်း၊ “မာဆေ ပီ ဆီ ပွိုန် မဲ။း”

15 အန် ဝီ တဝ်း၊ “အုဝ် မှာန့်၊ တဲး မဲ ဒွါ ခေါဆွင် ခေါ အူ မျုဝ် ဒီ အုဝ်။ ကာဒါယ် ပဲ့ ဟဲ့ ဒွါ မဲ ဂုန့် ဒီ အုဝ် တွိုန် အီ ကွယ် နာ တေတ့်၊ န့ မုး ဒူင် ကာဟဝ်း ကာဆဝ်။ အုဝ် မှာန့်၊ တဲး မဲ ဒွါ ဘော ဒူင် မိုဝ်း အိုမ် တုဝ်း ဒီ အုဝ်။” ပါယ် တီ အာဂါလိပ် ဘော ဒွါ ကာဒါယ် ဒီ အန် အီ မိုဝ်း အိုမ် တုဝ်း၊ အီ ကွယ် ဘ့လာက် နာ တေတ့် ဘော နာ ကွာ။

16 ဂေ လှုက်လှာန် အာကီနီ အီ မုး ဘိုဝ် အာမုဝ်ဆဲ တွိုန်၊ ဂေ ဘော လေး ဒီ မိူင် ယေရီခုဝ် အီ စိူဝ် ဘော မိူင် ဟေ စိုက်၊ ဝီ ဟာဝ် ရိုမ် ဒူပ် ဂေ ဒူအီ အာယူဒါ၊ ဟာဝ် ဒီ ကာဒါယ် မိူင် ယူဒါ ဘ့လာက် နာ တေတ့် ဘော ကာတတ် မိူင် အာရာတ်။ ဂေ ဘော ကွယ် ရိုမ် ဒူပ် ဂေ ဒူအီ အီ ကွယ် ခဲင် ပြဲ ကာဟဝ်း တီ။

17 ဝါယ် အန် တီ ဂေ ဒူအီ အာယူဒါ ပီ ဝီ ဟာဝ် ရိုမ် ဒူပ် ဂေ ဒူအီ အာဆီမေအူန် အီ မုး ဘီနွင် ဝေါဝဲ ဂေ။ ဂေ ဘော ကာဂုဝ်း ဘော ပဲ ဒူအီ ကာနန့် အီ ကွယ် ဒီ မိူင် စေဖာတ်။ ဂေ ဘော ပျာတ့် ဝဲန် တူတ့် မိူင် ဂေ တီ။ မိူင် တီ ဂေ ဘော တဝ်း တဲး န့ စိူဝ် မိူင် ဟောမ။ 18 ဂေ ဒူအီ အာယူဒါ ဘော ကာဂုဝ်း ပွိုန် မိူင် ဂါဆာ၊ မိူင် အာဆာခေလူန် ဘော ကာဒါယ် အီ ကွယ် ရေတ့် မိူင် ဂေ တီ။

19 ဇဝ်ဖြာ ဘော ကွယ် ရိုမ် ဒူပ် ဂေ ဒူအီ အာယူဒါ။ ဂေ ပွိုန် မိူင် အီ ကွယ် ကာတဲ နွန် ဘောကာဂ့လျီတ်။ မာလဲ၊ ဂေ ယီ တူ ဟုဝ် တဝ် ဒူအီ အီ ကွယ် ခဲင် ဂ့လင် ဂေ တွိုန်၊ တဲး ဂေ လေး တူတ့်။ ခုဝ်၊ ဒူအီ ဂေ တီ မိုဝ်း လက်လဝ် ဟိန်။ 20 ပါယ် တီ ဂေ ဘော အာပ် မိူင် ဟေဘြုဝ် တွိုန် ဒီ အာဂါလိပ်၊ တဲး န့ ဒူပ် ပီ ဒွိုမ် ကာလာင် အုန် အာမုဝ်ဆဲ။ အာဂါလိပ် ဘော ဟုဝ် တဝ် ဂေ ဂွန် အာနာက် အူယ် ဝီ။ 21 ဂေ ဒူအီ အာဘေန်ယာမ် ယီ တူ ပဲ ဒီ ဟုဝ် တဝ် ဒူအီ ယေဘူဆိတ် အီ ကွယ် ခဲင် မိူင် ယေရူဆာလဲမ်။ ဂေ ဒူအီ ယေဘူဆိတ် ဘော ကွယ် ရိုမ် ဒူပ် ဒူအီ အာဘေန်ယာမ် ကော ဇမ် ဒေါ တီ နီ။

22 ဝါယ် အန် တီ ဂေ ဒူအီ ခြိုဝ် အာယုဝ် ဝီ ဟာဝ် ကာဂုဝ်း ဒီ မိူင် ဘေဒါအေန်။ ဇဝ်ဖြာ မိူဝ် စွယ် ဂေ။ 23 ဂေ ဘော စ်ု ဒူအီ ဟာဝ် ချွင် ဒီ ယွတ် ခဲင် မိူင် ဘေဒါအေန် တီ။ မိူင် တီ၊ အာတ့် နီ န့ စိူဝ် မိူင် လူဆာ။ 24 ဒေါ ဟာဝ် ချွင် ဒူအီ ဂေ တွိုန်၊ ဂေ ဘော ကာတုန့် ဒူအီ အူ ဝီ လေး တး ခဲင် မိူင် တီ။ ဂေ ဘော တဝ်း ဒီ အန်၊ “တဲး မဲ ကာလာင် နှဲ န့တေန့် ဒီ ပွိုန် လိုပ် ယေ ခဲင် မိူင် နီ။ ယေ ဒီ တဲး မဲ ဂျာမ်ဆာ။” 25 ဒူအီ ဝီ တီ ဟဲ့ ဟွတ့် ကာလာင် နှဲ န့တေန့် ဒီ လိုပ် မိူင် တီ ဒီ ဂေ၊ ဒူအီ ခြိုဝ် အာယုဝ် ဘော ကာဂုဝ်း ဘော ငဝ်း ယမ် တူတ့် ဒူအီ ခဲင် မိူင် တီ ဘော မိူင်။ ဂေ ဘော အုန် မီ ဒူအီ ဝီ တွိုန် ဘော ဒူအီ ခဲင် န့ဟူမ် အန်၊ တဲး ဂေ လွတ်။ 26 ဒူအီ ဝီ တွိုန် ဘော ဟာဝ် ဒီ ကာဒါယ် ဒူင် ကွယ် ဂေ ဒူအီ ဟေထိတ်။ ဒီ တီ ဂေ ဘော ဒဲ မိူင် ဘော တဲး မိူင် တီ စိူဝ် မိူင် လူဆာ။ စိူဝ် တီ ဂေ ဘော တဝ်း ကော ဇမ် ဒေါ တီ နီ။

27 ဂေ ဒူအီ ခြိုဝ် အာမာနာဆေ ယီ တူ ဟုဝ် တဝ် ဂေ ဒူအီ အီ ကွယ် ခဲင် မိူင် ဘေတ်ဆဲအန်၊ မိူင် ထာနက်၊ မိူင် ဒေါရာ၊ မိူင် အီပါလမ်၊ မိူင် မီကီတော ဘော ရဝ် အီ ကွယ် ရေတ့် မိူင် ဂေ တီ။ ဂေ ဒူအီ အာမျုဝ် ကာနန့် တူ ဂူမ် တူ ယူမ် ဂေ ဘော ကွယ် ဟာဝ် ပါယ် တီ။ 28 ဂေ ဒူအီ အီဆာရေလ ယီ ကြဲ ဒီ မိုဝ်း ဟဲန့်။ ဒေါ အန် တီ ဂေ ဘော ကာနှာပ် ဒူအီ၊ တဲး ဂေ ဘဲန် မှာယ် ပီ ဆုတ့် ပီ စ်ု ဂေ။ ဂေ ယီ တူ ဟုဝ် တဝ် ဒူအီ ဂေ တီ ဒူင် ကွယ် ဂေ။ 29 ဂေ ဒူအီ ခြိုဝ် အာအေဖာရိမ် မိူဝ် တူ ဟုဝ် တဝ် ဒူအီ ကာနန့် လေး ဒူင် ကွယ် ဂေ ခဲင် မိူင် ကေစာ။ ဒူအီ ဂေ တီ ဘော ကွယ် ဟာဝ် ဒူပ် ဒူအီ အီဆာရေလ ပါယ် တီ။ 30 ဂေ ဒူအီ ခြိုဝ် အာဇေဘူလူန် မိူဝ် တူ ဟုဝ် လေး တဝ် ဒူအီ ခဲင် မိူင် ကီတာရုန် ဘော ခဲင် မိူင် နာဟာလုဝ်လာ။ ခုဝ် အန် တီ ဒူအီ အာမျုဝ် ကာနန့် ဘော ကွယ် ဟာဝ် ဒူပ် ဂေ ဒူအီ အီဆာရေလ ဘော ခမ် ဒီ ဘဲန် မှာယ် ပီ ဆုတ့် ပီ စ်ု ဂေ။ 31 ဒူအီ ခြိုဝ် အာဆေန် မိူဝ် တူ ဟုဝ် တဝ် ဒူအီ အီ ကွယ် ခဲင် မိူင် အာခုဝ်၊ မိူင် ဆီဒူန်၊ မိူင် အာလပ်၊ မိူင် အာခါစိပ်၊ မိူင် ဟေလာဘာ၊ မိူင် အာဖဲက် ဘော ခဲင် မိူင် ရေဟူပ်၊ တဲး ဂေ လေး ဒူင် ကွယ် ဂေ။ 32 ကူပ် န့ ပါယ် တီ ဘော ဂေ ဒူအီ ခြိုဝ် အာဆေန် ကွယ် ရိုမ် ဒူပ် ဒူအီ အာမျုဝ် ကာနန့်၊ တူ ဟုဝ် တဲး ဂေ တဝ်။ 33 ဂေ ဒူအီ ခြိုဝ် အာနာပ်ထာလီ မိူဝ် တူ ဟုဝ် တဝ် ဒူအီ ခဲင် မိူင် ဘေတ်ဆာနာတ်၊ တဲး ဂေ လေး တဝ်။ ဂေ ဒူအီ အာနာပ်ထာလီ ဘော ကွယ် ရိုမ် ဒူပ် ဒူအီ အာမျုဝ် ကာနန့် တီ၊ ယီ ခါနှာပ် ဂေ၊ စ်ု ဂေ ဘဲန် မှာယ် ဂေ။ 34 ဂေ ဒူအီ အာမုဝ်ရိတ် ဘော ကာဂုဝ်း ဒီ ဒူအီ ခြိုဝ် အာဒါန် ဘော တဲး ဂေ ကွယ် ဒီ နွန်၊ တူ တဲး ဂေ ကွယ် အီ ခြိုမ် ဒီ ဒူင် ဂ့လင်။ 35 ဒူအီ အာမုဝ်ရိတ် ဂေ တီ ဒိူန် တူ တဝ်။ ဂေ တဝ်း ဒီ ကွယ် ဒီ မိူင် အာစာလုန်၊ မိူင် ဆာဘာဘိမ် ဘော ဒီ နွန် ဟေရိတ်။ မာလဲ၊ ဂေ ဒူအီ အာအေဖာရိမ် ဘော ဒူအီ ခြိုဝ် အာမာနာဆေ ကြဲ ဒီ မိုဝ်း ဟဲန့်။ ပန် တီ ဂေ ဘော ခါနှာပ် ဒူအီ ဟဝ် ဂေ တီ၊ စ်ု ဂေ ဘူင် ဂါန် စန်။ 36 ကာအုန် ကာဒါယ် မိူင် ဒူအီ အာမုဝ်ရိတ်၊ န့ ဘော စုး ဒီ နာ ကွာ မိူင် ဆီလ ဘော ကာလုဝ်း ဟုဝ့် ဒီ န့တေန့် ကာတဲ နွန် အာကာရိမ်ဘိင်။^a