1 အာယုဝ်ဆူအာ ဝီ တဲး ဂေ ဒူအီ အီဆာရေလ တး ကာဇု ဒီ မိူင် ဆေခေမ်။ အန် မိူဝ် ဒဲ့ ဂေ အီ မုး ဒါ တာင် အီ အိုပ် အီ ယဲတ့် ဂေ ဘော ဒါ တာင် အီ ဆုင်ဖျာတ် ဒါရာ ဘော ဒါ တာင် အီ အိုပ် မိူင် ဘော ခဲ့ ကွယ် ဂေ ဒူအီ အီဆာရေလ ဘောကာဂ့လျီတ်၊ တဲး ဂေ တး ကွယ် ဒီ အာတ့် ဇဝ်ဖြာ။

2 အာယုဝ်ဆူအာ ဘော ကာလာင် ဒီ ဂေ တဝ်း၊ “ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ အန် တဝ်း၊ ‘ဒေါ မွိုန် ဒေါ ကွယ် ဂုန့် ဒင် ဘေ နာ ဒွယ် ဘ့လဲင် အူဖာရာတ်၊ ဂေ ဟဲ့ ကြိုပ် ဇဝ် ပေါ ကာဒင်။ ဂုန့် ဒင် ဘေ တီ ဘော မုး အာထေရာ အီ မုး ဂုန့် အာဘြာဟမ် ဂါယ် အာနာဟုဝ်။ 3 ဒေါ အန် တီ အုဝ် ဟဲ့ ဒဲ့ အာဘြာဟမ် အီ မုး ဂုန့် ဒင် ဘေ ဒေါ ကွယ် အန် နာ ဒွယ် အိုမ် ဘ့လဲင် အူဖာရာတ်၊ ပီ ဝီ ယဲတ့် ဟာဝ် အန် ဒီ မိူင် ကာနန့် ဒွန် ပ့လုဝ့်။ အုဝ် မိူဝ် ဟဲ့ တဲး လှုက်လှာန် အန် ဘြဲ ကိူန်၊ တဲး အန် မိုဝ်း ဂွန် အီ စိူဝ် အာဆဲက်။ 4 အာဆဲက် တီ ပီ ဝီ မိုဝ်း ဂွန် အီ စိူဝ် အာကူပ် ဂါယ် အာဆုဝ်။ အာဆုဝ် တီ၊ အုဝ် ဘော တဲး အန် ကွယ် ဒီ နွန် ဆေအီ။^a အီ မုး အာကူပ် ဂေ လှုက်လှာန် အာကူပ်၊ ဂေ ဟဲ့ လူင် ဒီ မိူင် အဲဂိုပ်။

5 ဝါယ် အန် တီ အုဝ် ပီ ဝီ စ်ု အာမုဝ်ဆဲ ဂါယ် အာရူန်၊ တဲး ဂါယ် စွယ် ဂုန့် ဘေ။ အုဝ် ဘော ဘူင် ဘော ဒုက် တာင် ကာဆဝ် ခဲင် မိူင် အဲဂိုပ်၊ တဲး န့ ပွိုန် ဒီ ချွတ် လေး ဂုန့် ဘေ။ 6 အုဝ် ဟဲ့ ဟွတ့် ဒိုဝ်း လေး ဘေ ခဲင် မိူင် အဲဂိုပ် တီ၊ တဲး ဂေ တး ဇမ် ဒီ အိုမ် ဒီနှူင် ရေန့်။ ဂေ ဒူအီ အဲဂိုပ် တီ ဝီ ပဝ့် လက်လဝ် ဘော မ့ပြွင့်၊ ဝီ ခုင်ခြး ဒူပ် ဒီ ပန် ဂေ။ 7 ဂေ ဂုန့် ဘေ ဘော ဆာခိုဝ် ဒဲ့ အုဝ်၊ တဲး အုဝ် စွယ် ဂေ။ အုဝ် မိူဝ် ဘူင် တဲး န့ အပ် ဝွင့် ဒီ ကာတဲ ဘေ ဂါယ် ဒူအီ အဲဂိုပ် ဂေ တီ။ အုဝ် ဘော တဲး အိုမ် နမ်မုက်ဆာရာ ဆီလွယ် ဆီလွယ်၊ တဲး န့ ပုန် ယမ် တူတ့် ဂေ ဒူအီ အဲဂိုပ်။ လွင် ပဲ့ ဟဲ့ ဘူင် အုဝ် ခဲင် မိူင် အဲဂိုပ် တီ၊ ဘေ ဟဲ့ ဟွတ့် ယိုဝ်။ ဝါယ် အန် တီ၊ ဘေ မိူဝ် ဟဲ့ ကာဒုး ဒီ ကွယ် ခဲင် ပြဲ ကာဟဝ်း ဘဲန် ဆီနမ် ဘဲန် ဆီနမ်။

8 ဒေါ အန် တီ အုဝ် ဝီ တိုယ် ဘေ ဟာဝ် ဒီ မိူင် အာမုဝ်ရိတ် အီ ကွယ် ဘ့လာက် နာ လေး ဆီငဲ အိုမ် ဘ့လဲင် ယောဒါန်။ ဒူအီ ဂေ တီ ပီ ဘော ဟဲ့ ကာဂုဝ်း ဒီ ဘေ မိူဝ်၊ အုဝ် ယီ ဟဲ့ တဲး ဘေ ပဲ ဂေ၊ တဲး ဘေ ပွိုန် ကာဒါယ် ဂေ။ အုဝ် မိူဝ် ဟဲ့ ညွန် တဝ် ဂေ ဒီ အာတ့် ဘေ။ 9 ဒေါ အန် တီ ခုန်ဒီခမ် အာဘာလာက် အီ ကွယ် ခဲင် မိူင် မုဝ်အာပ် အီ မုး ဂွန် အာစီဖော၊ အန် ဝီ ကာဂုဝ်း ဒီ ဘေ။ အန် ဘော စ်ု အီ ဟဝ် ဟာဝ် ဒဲ့ အာဘာလာအမ် အီ မုး ဂွန် အာပေါဆော၊ တဲး အန် တး ဒိူင် ဘေ။ 10 မာလဲ၊ အုဝ် ယီ တူ ထူမ် ဂြုဝ်း အာဘာလာအမ်။ ပါယ် တီ အန် ဘော ဝီ မွင့်ကာရာ ဒွါ ဒီ ဘေ၊ တဲး ဘေ လွတ် ဒီ အာဘာလာက်။

11 ဝါယ် အန် တီ ဘေ ဘော ဝီ ကာလုဝ်း အိုမ် ဘ့လဲင် ယောဒါန်၊ ဝီ ဟာဝ် ဇမ် ဒီ မိူင် ယေရီခုဝ်။ ဒူအီ ခဲင် မိူင် ယေရီခုဝ် မိူဝ် ကာဂုဝ်း ဒီ ဘေ။ ဒူအီ ဟဝ် အီ ကာဂုဝ်း ဒီ ဘေ၊ န့ ဘော မုး ဒူအီ အာမျုဝ် အာမုဝ်ရိတ်၊ ဒူအီ အာမျုဝ် ဖေရေဆိတ်၊ ဒူအီ အာမျုဝ် ကာနန့်၊ ဒူအီ အာမျုဝ် ဟေထိတ်၊ ဒူအီ အာမျုဝ် ဂီဂါဆိတ်၊ ဒူအီ အာမျုဝ် ဟီဝိတ် ဘော ဒူအီ အာမျုဝ် ယေဘူဆိတ်။ ဒေါ ကာဂုဝ်း ဂေ ဒီ ဘေ တီ၊ အုဝ် ယီ ဝီ တဲး ဘေ ပဲ ဂေ ဘောကာဂ့လျီတ်။ 12 အုဝ် ဘော စ်ု မာကာအာန့် ယဲတ့် ဒီ အာတ့် ဘေ၊ တဲး န့ ဟုဝ် တဝ် ခုန်ဒီခမ် ဒူအီ အာမုဝ်ရိတ် အာ ကာဒင်၊ တဲး ဂေ တဝ် ဒီ အာတ့် ဘေ။ ဘေ ယီ တူ လုဝ် ကာဂုဝ်း တာ မာပွါ့ လာင် ဂေ အ ဘေ။ 13 အုဝ် ဝီ ဒိုဝ်း ကာဒါယ် ပီ တူ ကာဒုး ဘေ ဒီ ဒုဝ်း ယး မာဆေ၊ ဘော မာန် မိူင် ပီ တူ ကာဒုး ဘေ ဒီ ဒဲ။ အုဝ် ဝီ အာပ် တူတ့် တဲး ဘေ ပွိုန် ဒီ ကွယ်။ ဒေါ တီ နီ ဘေ မိူဝ် ဟဲ့ ပွိုန် ဒီ ဟူမ် ဘ့လေ မာငုန် ဂေ ဘ့လေ ဟေ နာမန် ပီ တူ ကာဒုး ဘေ ဒီ ဆမ်။’” ဇဝ်ဖြာ တဲး အာယုဝ်ဆူအာ ကာလာင် ပါယ် တီ။

14 အာယုဝ်ဆူအာ ပီ ဝီ ကာလာင် ပေါ န့ ပွါ တဝ်း၊ “ဒေါ တီ နီ၊ တဲး ဘေ မိုဝ်း နဝ်း မှာန် ဆေဆေ၊ တဲး ဘေ ရုဝ်ဆေ ဇဝ်ဖြာ ဘော ဘူင် ဂါန် အန် ဇဝ်။ တဲး ဘေ ဝဲန် ဇဝ် ပီ ဒွိုမ် ကြိုပ် ဂုန့် ဒင် ဘေ ဒေါ ကွယ် ဂေ နာ ဒွယ် အိုမ် ဘ့လဲင် တာင်၊ ဘော ခဲင် မိူင် အဲဂိုပ် တွိုန်။ တဲး ဘေ ဝီ ကြိုပ် မီ ဇဝ်ဖြာ။ 15 ဆေ ဘေ ယီ တူ မိုဝ်း နဝ်း ဆီ ကြိုပ် ဇဝ်ဖြာ၊ တဲး ဘေ ရဝ်း အာတိုဝ် နီ၊ ဘေ ဒီ ကြိုပ် ဇဝ်ဖြာ ကာဒင် မှဝ်။ ဘေ ဒီ ကြိုပ် ဇဝ် ပီ ဒွိုမ် ကြိုပ် ဂုန့် ဒင် ဘေ အီ ကွယ် ခဲင် မိူင် နာ ဒွယ် အိုမ် ဘ့လဲင် တာင် တွိုန်။း ဆေ အာဝ် ပါယ် တီ မိူဝ်၊ ဘေ ဒီ ကြိုပ် ဇဝ် ပီ ကြိုပ် ဒူအီ အာမုဝ်ရိတ် အီ ကွယ် ခဲင် မိူင် ဒူင် ကွယ် ဘေ နီ။း အီ မုး အုဝ် ဘော ဒူအီ ခဲင် န့ဟူမ် အုဝ်၊ ယေ ယီ ဒီ ကြိုပ် မီ ဇဝ်ဖြာ အူ ကာဒင် နီ။”

16 ဂေ ဒူအီ ကိူန် ဝီ တဝ်း၊ “ယေ တူ ဝဲန် ဇဝ်ဖြာ ဒေါ မှဝ်။ ယေ မိူဝ် တူ ဝီ ဟာဝ် ကြိုပ် ဇဝ် ပီ ကြိုပ် အီ ဟဝ်။ 17 ဇဝ်ဖြာ အီ မုး ဇဝ်ဖြာ ပီ ကြိုပ် ယေ၊ အန် ဟဲ့ ထုတ် လေး ယေ ဘော ဂုန့် ယေ ခဲင် မိူင် အဲဂိုပ် အီ မုး ဒူင် ဟဲ့ ဘဲန် ယေ မှာယ် အီ ဟဝ်။ အန် ဇဝ် ဟဲ့ ဝီ ဘူင် အီ မွှိုမ် အာမ် ကာဆဝ် တဲး ယေ ယိုဝ်။ အန် ဘော ဂွင့် ရဲ ယေ၊ တဲး ယေ ကော ပွုန် တူတ့် မိူင် ဒူင် ဟဲ့ တး ယေ။ 18 ဒေါ လိုပ် တး ယေ ခဲင် မိူင် နီ မိူဝ်၊ ဇဝ်ဖြာ ဟဲ့ ဟုဝ် တဝ် ဒူအီ အာမုဝ်ရိတ် အီ ကွယ် ဒီ နီ။ ကူပ် န့ ပါယ် တီ ယေ ဒီ ကြိုပ် မီ ဇဝ်ဖြာ။ ခုဝ်၊ အန် ဇဝ် မုး ဇဝ်ဖြာ ပီ ကြိုပ် ယေ။”

19 မာလဲ၊ အာယုဝ်ဆူအာ ဝီ တဝ်း ဒီ ဂေ၊ “ဘေ တူ ပွိုန် ဒီ ကြိုပ် ဇဝ်ဖြာ။ ဇဝ်ဖြာ တီ၊ အန် မုး ဇဝ်ဖြာ အီ ဆီငါ ဘွတ်။ ဆေ ဘေ ကာဘး ဒီ ဇဝ်ဖြာ၊ အန် ဇဝ် တူ ခမ်။ အန် မိူဝ် တူ ဂဝ်း ဝဲန် မှာပ် ဘေ။ 20 ဆေ ဘေ ဝဲန် အန် ဇဝ် ဝီ ကြိုပ် ဇဝ် ပေါ ကာဒင်၊ ဇဝ်ဖြာ မိူဝ် ဒီ ဝဲန် ဘေ၊ တူ ယွတ် မဲန် ဘေ။ အန် ဇဝ် ပီ ဘော ဟဲ့ ဒွိုမ် ဂေဇူ ဘေ မိူဝ်၊ အန် ဒီ ဝီ ပျာတ့် ဝဲန် ဘေ။”

21 ဟဲ့ ဟွတ့် ဂေ ဒူအီ ကိူန် ပီ ဝီ တဝ်း ဒီ အာယုဝ်ဆူအာ၊ “အာဝ် မုး ပါယ် တီ ယေ ဒီ ကြိုပ် မီ အန် ဇဝ် အီ မုး ဇဝ်ဖြာ ပီ ကြိုပ် ယေ။”

22 အာယုဝ်ဆူအာ ပီ ဝီ တဝ်း ဒီ ဂေ၊ “ဘေ ဟဲ့ ဝီ ဘဲန် ဆက်ဆေ လွင် ဟဲ့ ရဝ်း ဘေ ဒီ ကြိုပ် မီ ဇဝ်ဖြာ ပီ ကြိုပ် အေ။” ဂေ မိူဝ် ဝီ တဝ်း၊ “ဟဲ့ မှာန်၊ ယေ ဟဲ့ ဘဲန် ဆက်ဆေ။ ယေ ဟဲ့ ရဝ်း ဒီ ကြိုပ် မီ ဇဝ်ဖြာ အူ ကာဒင် တီ။”

23 အာယုဝ်ဆူအာ မိူဝ် ဝီ ဘ့လေး အာမိင် တဝ်း၊ “ဆေ န့ ပါယ် တီ တဲး ဘေ ဝဲန် ဇဝ် ပီ ကြိုပ် အီ ဟဝ် အီ ဆီ ကွယ် ကာတဲ ဘေ နီ။ တဲး နဝ်း ဘေ ဝီ ဂူမ် ဂိုပ် ကြိုပ် မီ ဇဝ်ဖြာ ပီ ကြိုပ် ဒူအီ အီဆာရေလ။”

24 ဒေါ အန် တီ ဂေ ဒူအီ ကိူန် ဝီ ကာဖြူမ် ဒီ ကာလာင် ဒီ အာယုဝ်ဆူအာ တဝ်း၊ “ယေ ဒီ ကြိုပ် မီ ဇဝ်ဖြာ ပီ ကြိုပ် ယေ။ ယေ ဒီ ဘော ထူမ် ဂြုဝ်း အန် ဇဝ် တီ။”

25 ဆီငဲ တီ ဒေါ ကွယ် ဂေ ဒီ မိူင် ဆေခေမ် တွိုန်၊ အာယုဝ်ဆူအာ ဘော တဲး ဒူအီ ကိူန် ဒွါ ကာဒိက် ဆတ်ဇာ ဒီ ဇဝ်ဖြာ။ 26 အာယုဝ်ဆူအာ ဘော ဒဲမ် အုန် ဂြုဝ်း ဂေ တီ ခဲင် ဘပ် ဒါရာ ဇဝ်ဖြာ။ အန် ဘော ဒိုဝ်း မာဝ် တာင်၊ ဘ့လေး ကာစွင့် ခြိုမ် ဟေ ထေရေပ် အီ ကွယ် ကာတတ် ဒူင် ဆီငါ ဘွတ် ဒူင် ကြိုပ် ဂေ ဇဝ်ဖြာ။

27 အန် ဝီ ကာလာင် ဒီ ဂေ ဒူအီ ကိူန် တဝ်း၊ “မာဝ် တာင် နီ ဟဲ့ ဘဲန် ဆက်ဆေ လွင် ပဲ့ ဟဲ့ ဘူင် အေ အာတိုဝ် နီ။ အန် ဟဲ့ ဟွတ့် ယိုဝ် ဂြုဝ်း ပီ ကာလာင် ဇဝ်ဖြာ ဒွန် မျုဝ်။ ပါယ် တီ အန် ဒီ ဘော တဲး ဘေ လှုဝ်း မှာပ် ဘေ၊ ဆေ ဘေ ဘူင် ကာဘး ဒီ ဇဝ်ဖြာ ပီ ကြိုပ် ဘေ တီ။”

28 ဟဲ့ ဟွတ့်၊ အာယုဝ်ဆူအာ ဘော တဲး ဒူအီ ကိူန် ဝေန့် ဒူင် ကွယ် ဂေ အီ မုး ခါဂုန် ဂေ ရာင် အာဆေ ရာင် အန်။

29 ဝါယ် အန် တီ အာယုဝ်ဆူအာ အီ မုး ဂွန် အာနုန် တွိုန် ဘော ယမ်။ အန် မုး ဒဲစေန့် ဇဝ်ဖြာ။ ဒေါ ယမ် အန် အာဆာက် အန် ဟဲ့ ပွိုန် အူ မာယဝ်း ဒီ ဂိုဝ် ဆီနမ်။ 30 ဂေ ဘော ဟာဝ် ဒိပ် ဒုဝ် ဘူင့် အန် ခဲင် ကာဒါယ် အီ မုး ခါဂုန် အန် အီ ကွယ် ခဲင် မိူင် ထီမာနာဆေရာ ဒီ နွန် အာအေဖာရိမ် ဘ့လာက် နာ ကွာ နွန် ကာအာတ်။

31 ဒေါ မုး စုဝ် ဘာန် အာယုဝ်ဆူအာ၊ ဂေ ဒူအီ အီဆာရေလ ဒူပ် ဆီချာ ဇဝ်ဖြာ။ ဝါယ် အန် တီ မိူဝ်၊ ဂေ ဘော ဒူပ် ဆီချာ ဇဝ်ဖြာ ဒေါ မုး စုဝ် ဘာန် ဂေ ဒါ တာင် အီ အိုပ် အီ ယဲတ့် ဂေ၊ အီ ဟဲ့ ယိုဝ် တူတ့် ပဲ့ ဟဲ့ ဘူင် ဇဝ်ဖြာ ဒီ ဂေ ဒူအီ အီဆာရေလ။

32 ကာအာင် အာယုဝ် တွိုန် ပီ ဒိုဝ်း တး ဂေ ဒူအီ အီဆာရေလ ခဲင် မိူင် အဲဂိုပ်၊ ဂေ ဘော ဒိပ် ခဲင် မိူင် ဆေခေမ်။ န့ မုး ကာဒါယ် ပီ စိုဝ်း အာကူပ် တွိုန် ဒီ ဂွန် အာဟာမုဝ် အီ မုး ဂုန့် အာဆေခေမ်။ ဒေါ အန် တီ အန် ဟဲ့ ဒွါ ရွိုန် အူ မာယဝ်း ဘူင့်။ ကာဒါယ် တီ ဟဲ့ ဘဲန် ခါဂုန် ဂေ ဒူအီ ခြိုဝ် အာယုဝ်။

33 အာလေအာဆာ အီ မုး ဂွန် အာရူန် တွိုန် မိူဝ် ဟဲ့ ဟွတ့် ယမ်။ ဂေ ဘော ဒိပ် ဒုဝ် ဘူင့် အန် ခဲင် မိူင် ဂီဘီယာ အီ ကွယ် ဒဲင် နွန် အာအေဖာရိမ်။ န့ မုး ကာဒါယ် ပဲ့ ဟဲ့ ကာဆာင် ဒွါ ဂေ ဒီ ဂွန် အီမာယ် အာရူန် အီ စိူဝ် အာဖီနေဟာတ်။