1 ဇဝ်ဖြာ ဝီ မွင့်ကာရာ ဒွါ ဒီ ဂေ ဒူအီ အီဆာရေလ၊ တဲး ဂေ ကွယ် ဂတ် ဂျီတ်၊ ကွဲ့ တဲး န့ မိုဝ်း ရန်ဆူ ဂေ အီ ဟဲ့ ဒွိုမ် ကွယ် ရူပ် ဂေ ဒွန် ဘ့လာက်။ ဒေါ အန် တီ အာယုဝ်ဆူအာ မိူဝ် ဟဲ့ ကတ် ကာဆဝ်။ 2 အန် ဘော ဒဲ့ တး ဂေ အီ မုး ဒါ တာင်၊ ဂေ အီ အိုပ် အီ ယဲတ့် ဂေ၊ ဂေ ဒါ တာင် အီ ဆုင်ဖျာတ် ဒါရာ ဘော ဂေ ဒါ တာင် အီ အိုပ် မိူင်။ အန် ဘော ကာလာင် ဒီ ဂေ တဝ်း၊ 3 “အုဝ် ဟဲ့ ကတ် ကာဆဝ်။ ဒေါ ကွယ် အုဝ် ဒူပ် ဘေ၊ ဘေ မိူဝ် ဟဲ့ ဟွတ့် ယိုဝ် ဒွန် မျုဝ် ပဲ့ ဟဲ့ ဘူင် ဇဝ်ဖြာ ပီ ကြိုပ် ဘေ ဒီ ဒူအီ အီဆာရေလ၊ တဲး န့ ဘော ဘဲန် အာဂျိုဝ် ဒီ ဘေ။ အန် ဇဝ် မိူဝ် ဟဲ့ စွယ် ဒါ ဆိုက် ဘေ ကာဂုဝ်း။ 4 အုဝ် မိူဝ် ဟဲ့ ဒိုဝ်း ကာဒါယ် ဒူအီ အီ ဆီ ဂိတ် ဆီ ကွယ် ဘော ကာဒါယ် ဒူအီ ပဲ့ ဟဲ့ ပဲ ဟဲ့ အွင် ယေ၊ တဲး အုဝ် ကာယဝ်း ဒွါ ဒီ ဘေ၊ တဲး န့ ဘဲန် ခါဂုန် ဘေ။ န့ ဘော စုး ဒီ အိုမ် ဘ့လဲင် ယောဒါန် အီ ကွယ် ဘ့လာက် နာ လေး ဆီငဲ၊ ကော ဝီ ဇမ် ဒီ အိုမ် နမ်မုက်ဆာရာ အီ ကွယ် ဘ့လာက် နာ ဂေတ့် ဆီငဲ။ 5 ဇဝ်ဖြာ ပီ ကြိုပ် ဘေ ဒီ ဘော ဆုတ့် တဝ် ရန်ဆူ ဘေ၊ တဲး ဂေ တဝ် ဟာဝ် ဒီ အာတ့် ဘေ။ ဂေ ဒီ ဘော တဝ်၊ ကွဲ့ တဲး ဘေ ဆီ ယိုဝ် ဂေ။ ဘေ ဒီ ဘော ပွိုန် ဒီ အိုပ် ကာဒါယ် ဂေ။ ဇဝ်ဖြာ ပီ ကြိုပ် ဘေ ဟဲ့ ဒွိုမ် ကာလာင် အုန် ပါယ် တီ ဒီ ဘေ။ 6 ကူပ် န့ ပါယ် တီ တဲး ဘေ ဆာဒိက် ဆီချာ ဒီ ဘူင် ဒူပ် ခဲ့ ပီ ဒဲမ် အုန် ခဲင် ဘပ် ဒါရာ ပဲ့ ဟဲ့ ဒဲမ် အုန် အာမုဝ်ဆဲ။ ကွဲ့ တဲး ဘေ ဝး ဒါရာ တီ ခေါ အီ စဲက်။ 7 ဘေ မိူဝ် တူ ပွိုန် လာယ် ကာဂိုက် ဒီ ဒူအီ ဟဝ် အီ ဆီ ကွယ် ကာတဲ ဘေ။ ဘေ တူ ပွိုန် ဂါဝ် ဇဝ် ပီ ကြိုပ် ဂေ။ ဘေ တူ ပွိုန် ဒဲ့ ဂေ ဒေါ ဒိူင် ကာဆဲန့် ဘေ ဘော တူ ပွိုန် ဂူမ် ဂိုပ် ဒီ အာတ့် ဇဝ် ပီ ကြိုပ် ဂေ တီ။ 8 တဲး ဘေ မိုဝ်း နဝ်း ကာဒိုက် ကာဒဝ့် ဒီ ဇဝ်ဖြာ ပီ ကြိုပ် ဘေ၊ တဲး န့ ပီ ပဲ့ ဟဲ့ ဒွိုမ် ဘူင် ဘေ အာတ့် နီ ကော ဇမ် အာတိုဝ် နီ။

9 ဇဝ်ဖြာ ဟဲ့ ဟွတ့် ဟုဝ် တဝ် ဒူအီ အီ မိုဝ်း ပ့လူမ် တာင် ဘော ဟဲန့် ကိူန်၊ တဲး ဂေ လေး ဟာဝ် ဒီ အာတ့် ဘေ။ ကော ဇမ် အာတိုဝ် နီ၊ အာဝ် မိုဝ်း အီ ပွိုန် ခမ် ဘေ ဒေါ မှဝ်။ 10 ဒူအီ ဘေ အူ ဝီ ဒီ ဘော ပဲ ရန်ဆူ အူ ဟြဲန့် ဝီ။ ခုဝ်၊ ဇဝ်ဖြာ ပီ ကြိုပ် ဘေ ဟဲ့ ကွယ် ရိုမ် ဒူပ် ဘေ။ အန် ဇဝ် စွယ် ဘေ ကာဂုဝ်း၊ တဲး န့ ဘော ဒူပ် ဂြုဝ်း ပီ ဒွိုမ် ကာဆဲန့် အန် ဒီ ဘေ။ 11 ကူပ် န့ ပါယ် တီ တဲး ဘေ ဆာဒိက် ဆီချာ ဆီချာ၊ တဲး ဘေ ရွက့် ဇဝ်ဖြာ ပီ ကြိုပ် ဘေ။

12 ဆေ ဘေ ယီ ဝဲန် ဇဝ်ဖြာ၊ ဝီ ဘဲန် ဂိုက် ဒူအီ ဟဝ် အီ ဆီ ဂိတ် ဆီ ကွယ် ကာတဲ ဘေ တီ၊ ဆေ ဘေ ဝီ ခတ် ဒိုဝ်း ဂေ၊ ဝီ လိုပ် လိုပ် လေး လေး ကာတဲ ဂေ၊ ဆေ ဂေ မိူဝ် လိုပ် လိုပ် လေး လေး ကာတဲ ဘေ၊ 13 ဘေ လုဝ် နပ် ဆီချာ၊ နာ အာတ့် နီ ဟာဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် အာဝ် ဟူ ဟုဝ် တဝ် ဒူအီ ဂေ တီ ကာတဲ ဘေ။ အာဝ် ဝန် မီ ခဲ့ တီ။ န့ ဒီ ဘဲန် အာဖေ ဒီ ဘေ အီ ပီ အီ ဒိန့် ယွတ့် ဂေ ခိူမ် ဘော ဂိုဝ်း ကာဒဝ်။ န့ ဒီ ပီ ဘော မ့ဖျီ့ အီ မး ကာတု ဘေ၊ တဲး န့ ဆဝ် ကာဆဝ်။ ဆေ အာဝ် ပါယ် တီ န့ ဒီ ဘော ပီ ကာအး အီ ဟဲ့ လိုပ် ခဲင် ငါယ် ဘေ။ အာမျုဝ် တီ၊ န့ ဒီ ဘော ဘုဝ် ဘဲန် ဒီ ဘေ၊ ကွဲ့ တဲး န့ ဆီ မိုဝ်း ဘေ ခေါ အူ ဝီ ခဲင် မိူင် ဘွတ်၊ မိူင် မွှိုမ် ပဲ့ ဟဲ့ ဒွါ ဇဝ်ဖြာ ပီ ကြိုပ် ဘေ ဒီ ဘေ။

14 ဒေါ တီ နီ၊ အုဝ် နှဲန် အာဝ် ဟူ ကွယ် လှေန့်။ ဘေ ယီ ဟဲ့ နပ် ဆီချာ ခဲင် နဝ်း ဘေ လွင် ပဲ့ ဟဲ့ ကာဆဲန့် ဇဝ်ဖြာ နာ ဘွတ် နာ မွှိုမ် ပီ ဒီ မွင့်ကာရာ ဒွါ အန် ဒီ ဘေ၊ န့ တူ ယူမ် တူ ဂါတ် ခေါ အူ မျုဝ်။ န့ ယီ ဆီ ဇေ့ဇုင် တူတ့် ဒွန် မျုဝ်။ 15 ပါယ် တီ အန် ဇဝ် ဟဲ့ တဝ်း ဒီ ဒွါ နာ ဘွတ် နာ မွှိုမ် ဒီ ဘေ ဘောကာဂ့လျီတ်။ ပါယ် တီ အန် ဇဝ် မိူဝ် ပီ ဒီ ဝီ ဒွါ အာဖေ အာရေ ဒီ ဘေ တဲး ဘေ ခမ် ခဲ့ ပီ ဒမ် အန် ဆာဒိက် ဒီ ဘေ၊ တဲး ဘေ ကော စှိုမ် တူတ့်၊ ကွဲ့ တဲး ဘေ ပွိုန် ဒီ ကွယ် ခဲင် ကာဒါယ် မိူင် ဘွတ် ပဲ့ ဟဲ့ ဒွါ အန် ဇဝ် ဒီ ဘေ နီ။ 16 ဆေ ဘေ တူ ဘူင် ဒူပ် ပီ ကာဆဲန့် ဇဝ်ဖြာ ပီ ကြိုပ် ဘေ ဒီ ဘေ၊ ဆေ ဘေ ဝီ ဟာဝ် ကြိုပ် ဇဝ် ပေါ ကာဒင်၊ အန် ဇဝ် ဒီ ဘော ရူ ကာဆဝ် ဒီ ဘေ ဘော ဒမ် မှာပ် ဒီ ဘေ၊ ဘူင် တဲး ဘေ လိုဝ် စှိုမ် ခြန် ခြန်။ ကွဲ့ တဲး ဘေ ဆီ ဂိတ် ခေါ အူ ဝီ ခဲင် မိူင် ဘွတ်၊ မိူင် မွှိုမ် ပဲ့ ဟဲ့ အာပ် ဇဝ်ဖြာ ပီ ကြိုပ် ဘေ ဒီ ဘေ။”