1 ဘပ် ဖိူန် နီ ဟဲ့ ဒဲမ် ဂြုဝ်း ပီ ကာလာင် အာမုဝ်ဆဲ ဒီ ဂေ ဒူအီ အီဆာရေလ ဒေါ ကွယ် ဂေ ခဲင် ပြဲ ကာဟဝ်း အီ ကွယ် နာ လေး ဆီငဲ ဘ့လဲင် ယောဒါန်။ ဒူင် ကွယ် ဂေ တီ ဘော စိူဝ် အာရာဖ။ န့ ကွယ် လာယ် ကာဆိူဝ် ဒီ မိူင် ဆူဖာ အီ ကွယ် ကာတဲ မိူင် ဖာရာန်၊ မိူင် တောဖေလ၊ မိူင် လာပါန်၊ မိူင် ဟာစာရုတ် ဘော မိူင် ဒီစဟပ်။ 2 စုး ဒီ နွန် ဟုဝ်ရေပ်၊^a ဟာဝ် ဒူပ် န့တေန့် အီ ကာလုဝ်း နွန် ဆေအီ၊^b တဲး န့ ကော ဝီ ဇမ် မိူင် ကာဒေဘာနာ။ အာခြာဝ် န့တေန့်၊ န့ တူင့် ဂိုဝ် ဒီ အူ ဆီငဲ။

3 ဆိန့် လေး ဂေ ခဲင် မိူင် အဲဂိုပ် ဒေါ ဟဲ့ နုဝ့် ဖွုန် ဂိုဝ် ဆီနမ် ဘော ဇမ် မာဂျီန် ဂိုဝ် ဒီ လှေး၊ ဆီငဲ လှေး၊ အာမုဝ်ဆဲ ဟဲ့ ဝီ ကာလာင် ဒီ ဂေ ဒူအီ အီဆာရေလ။ အန် ဝီ ခဲ ဒီ ဂေ ဒွန် မျုဝ် ပီ ဒမ် အုန် ဇဝ်ဖြာ ဒီ အန် လွင် ဂေ ဒူအီ အီဆာရေလ။ 4 အာခြာဝ် အန် တီ မုး ဝါယ် ကာဂုဝ်း အွင် ဇဝ်ဖြာ ဒီ ခုန်ဒီခမ် အာဆီဟူန် အီ မုး ဒူအီ အာမုဝ်ရိတ် အီ အိုပ် မိူင် ဟေဆာဖူန်။ န့ ဘော မုး ဝါယ် ကာဂုဝ်း အွင် ဂေ ဒီ ခုန်ဒီခမ် အာအောခ အီ အိုပ် မိူင် ဘာဆန် ဘော ကွယ် ခဲင် မိူင် အာဆာတာရုတ် ဘော ခဲင် မိူင် အေတာရီ။

5 အာမုဝ်ဆဲ ဟဲ့ ဟုဝ် ဒါရာ တီ ဒေါ ကွယ် ဂေ နာ လေး ဆီငဲ ဘ့လဲင် ယောဒါန် အီ မုး ခဲင် ကာဒါယ် ဒူအီ မုဝ်အာပ်။ အန် တဝ်း၊

6 “ဒေါ ကွယ် အေ ဒီ ဒင် နွန် ဆီနာယ် တွိုန်၊ ဇဝ်ဖြာ အီ မုး ဇဝ်ဖြာ ပီ ကြိုပ် အေ၊ အန် ဟဲ့ တဝ်း၊ ‘ဘေ ဟဲ့ ကွယ် ဒီ နီ ဟဲ့ လှေန့် ကာဆဝ်။ 7 တဲး ဘေ ယဝ်း ထိုပ် ဘိက် ဘေ ဘော ကာထုဝ့် ဟာဝ် ပေါ ပ့လုဝ့်။ တဲး ဘေ ဝီ ဟုဝ့် ဒီ နွန် ဒူင် ကွယ် မိူင် ဒူအီ အာမုဝ်ရိတ် ဘော ဒီ မိူင် ဒွန် မိူင် အီ ကွယ် ကာတတ် ဂ့လင် အာရာဖ။ တဲး ဘေ ပီ ဝီ ဟုဝ့် ဘော ဒီ နွန် အီ ကွယ် နာ ဂေတ့် ဆီငဲ၊ ပီ ဝီ လူင် ဒီ မိူင် အီ ကွယ် ဘ့လာက် နာ တေတ့်၊ တဲး ဘေ ကော ဇမ် ဒီ အိုမ် နမ်မုက်ဆာရာ ဘော ဒီ မိူင် ကာနန့်။ တဲး ဘေ ဝီ ဇမ် ဘော ဒီ နွန် လေဘာနုန် ဘော ဒီ ဘ့လဲင် အိုမ် အူဖာရာတ်။ 8 မိူင် ဂေ တီ ဘောကာဂ့လျီတ် အုဝ် ဟဲ့ ဟွတ့် ဒွါ ဒီ ဘေ။ တဲး ဘေ ဟာဝ် ဒိုဝ်း။ အုဝ် ဇဝ်ဖြာ ဟဲ့ ဒွိုမ် ဒွါ ကာဒိက် ဆတ်ဇာ ဒီ ဂုန့် ဒင် ဘေ အီ မုး အာဘြာဟမ်၊ အာဆဲက် ဘော အာကူပ် ဘော ဒီ လှုက်လှာန် ဂေ။’”

9 အာမုဝ်ဆဲ ဝီ တဝ်း၊ “ဒေါ အန် တီ အုဝ် ဟဲ့ တဝ်း ဒီ ဘေ၊ ‘အုဝ် အူ ဝီ တူ ပဲ ဒီ ယဲတ့် ဟာဝ် ဘေ။ 10 ဇဝ်ဖြာ အီ မုး ဇဝ်ဖြာ ပီ ကြိုပ် ဘေ၊ အန် ဟဲ့ တဲး ဘေ ဘြဲ ကိူန် ကာဆဝ်၊ တဲး န့ ကော ပီ ဆီမန့် ခဲင် ဘ့လေန့်။ 11 တဲး ဇဝ်ဖြာ အီ မုး ဇဝ်ဖြာ ပဲ့ ဟဲ့ ကြိုပ် ဂုန့် ဒင် ဘေ တီ ဝဲ မွင့်ကာရာ ဒွါ ဒီ ဘေ၊ တဲး ဘေ ဝဲ ဘြဲ ကိူန် ကာပွါ ပေါ အူ ဟြဲန့် ဘုန်၊ တဲး န့ ဒူပ် ပဲ့ ဟဲ့ ကာဆဲန့် အန် ဇဝ် ဒီ ဘေ။ 12 အုဝ် အူ ဝီ ယီ တူ ပဲ ဒီ ယွတ် မဲန် ဘေ ဘောကာဂ့လျီတ် ဘော ဆုင်ဖျာတ် အာမူ ပီ လာယ် ကာအေး ကာထဲန့် ဘေ။ 13 တဲး ဘေ ရဝ်း ဒူအီ ကာတဲ ဘေ အီ မိုဝ်း အာငျာန်၊ အီ နပ် ဒီ ကာဒွါ့ ကာဖာ ခြိုဝ် မှဝ် ခြိုဝ် အန်။ အုဝ် ဒီ ဒါင် တဲး ဂေ ဝီ ဘဲန် ဒါ တာင် အီ အိုပ် အီ ယဲတ့် ဘေ။’

14 ဘေ မိူဝ် ဟဲ့ ဝီ ဝျီ့ ဂြုဝ်း အုဝ် တီ တဝ်း၊ ‘ဟဲ့ မုး ဟဲ့ မှာန်။ ပီ တဝ်း မဲ တီ၊ န့ ဟဲ့ ကာအာပ် ဘူင် ပါယ် တီ။’

15 အုဝ် မိူဝ် ဟဲ့ ရဝ်း ဒူအီ ကာတဲ ဘေ ဒွန် ခြိုဝ်၊ တဲး ဂေ မုး ဒူအီ အီ မိုဝ်း အာငျာန်၊ မိုဝ်း ဆာရေ၊ တဲး ဂေ ဘဲန် ဒါ တာင် အီ အိုပ် ဘေ၊ တဲး ဂေ အိုပ် အူ ဟြဲန့် ဝီ၊ အူ မာယဝ်း ဝီ၊ ဖန် ဂိုဝ် ဝီ ဘော ဂိုဝ် ဝီ၊ ပီ ဝီ တဲး ဂေ ဇဲတ် ဒီ ယွတ် ဂါန် ဒွန် မျုဝ် ခဲင် ခြိုဝ် ဘေ။ 16 ဒေါ အန် တီ အုဝ် ဟဲ့ ကာလာင် ဒီ ဒါ တာင် ဂေ တီ တဝ်း၊ ‘ဆေ ဘေ ဆုင်ဖျာတ် အာမူ အီ၊ တဲး ဘေ ကာဖာ ဆီချာ။ န့ ဘော မုး အာမူ ဘီနွင် ဘေ၊ ဘော မုး ဒူအီ အာမျုဝ် ဟဝ် အီ တး ကွယ် ဒူပ် ဘေ၊ တဲး ဘေ ဆုင်ဖျာတ်၊ တဲး န့ ကာရမ်။ 17 ဆေ ဘေ ဆုင်ဖျာတ် အာမူ အီ၊ ကွဲ့ တဲး ဘေ မိုဝ်း ဒူင် ရွက့် ဒူင် ဇွင့်။ န့ ဘော မုး ဒါ တာင်၊ ဘော မုး ဒူအီ ရဝ် ဒူအီ ကာင်၊ တဲး ဘေ ဆုင်ဖျာတ် ဆိူဝ် ဆိူဝ် မှာန် မှာန်။ ဘေ မိူဝ် တူ လုဝ် ယုဝ် အာဆေ။ ခုဝ်၊ န့ မုး ဇဝ်ဖြာ အီ ဆုင်ဖျာတ် ဒါရာ။ ဆေ န့ ယီ မုး အာမူ ပီ တူ ပဲ ဘေ ဒီ ဆုင်ဖျာတ်၊ တဲး ဘေ တး ဒူင် ကွယ် အုဝ်။ အုဝ် ဒီ ဆုင်ဖျာတ် အာမူ တီ။’ 18 လွင် ပီ ဒီ လုဝ် ဘူင် ဘေ ဒွန် မျုဝ်၊ အုဝ် ဟဲ့ ဟွတ့် ကာလာင် ဒီ ဘေ ဒေါ အန် တီ။”

19 အာမုဝ်ဆဲ ဝီ တဝ်း၊ “အေ မိူဝ် ဘူင် ခဲ့ ပီ ကာလာင် ဇဝ်ဖြာ ပီ ကြိုပ် အေ ဒီ အေ။ အေ မိူဝ် ဟဲ့ လေး ဒီ နွန် ဟုဝ်ရေပ်၊^c ဝီ လတ် ဟာဝ် ခဲင် ပြဲ ကာဟဝ်း အီ တာင် အီ မွှိုမ် ယုဝ် ကာဆဝ် ပဲ့ ဟဲ့ ကာတုန့် ဘေ။ အေ ပီ ဝီ ဟုဝ့် ဒီ နွန် ဒူင် ကွယ် မိူင် ဒူအီ အာမုဝ်ရိတ် တွိုန် ဒေါ တး ဇမ် အေ ဒီ ဒူင် စိူဝ် ကာဒေဘာနာ တွိုန်။ 20-21 အုဝ် မိူဝ် ဟဲ့ တဝ်း၊ ‘ဘေ ဟဲ့ ဟွတ့် ဇမ် ဒီ နွန် ဒူင် ကွယ် ဂေ ဒူအီ အာမုဝ်ရိတ်။ ဇဝ်ဖြာ ပီ ကြိုပ် အေ၊ အန် ဟဲ့ တဝ်း ဒီ ဒွါ မိူင် တီ ဒီ အေ။ တဲး ဘေ ယွတ်၊ ဇဝ်ဖြာ ဟဲ့ ဒွါ ဒီ အေ။ တဲး အေ ဟာဝ် ဒိုဝ်း၊ တဲး န့ ဒူပ် ပီ ကာလာင် ဇဝ်ဖြာ ဒီ အေ။ ဘေ ကွဲ့ ယုဝ်၊ ကွဲ့ နဝ်း တျီ့။’

22 မာလဲ၊ ဘေ ဘောကာဂ့လျီတ် ပီ ဝီ တး ဒူင် ကွယ် အုဝ်၊ ဝီ ကာလာင် ဒီ အုဝ် တဝ်း၊ ‘တဲး ယေ စ်ု ဒူအီ မင် အီ ဟာဝ် ချွင် ဒီ ယွတ် ဒီ အာတ့်၊ တဲး ဂေ ဝီ တး ကာလာင် ဒီ အေ လွင် အေ လုဝ် ဝဝ့် န့တေန့် မှဝ် ဘော ပီ ပါယ် ခဲင် မိူင် ပီ ဒီ ကာဒုး အေ ဒွန် ပ့လုဝ့်။’

23 အုဝ် ဟဲ့ ထူမ် ဂြုဝ်း ပီ ကာလာင် ဘေ တီ၊ န့ နှဲန် ဟဲ့ မွှိုမ်။ အုဝ် ဘော ရဝ်း ဒူအီ ကာတဲ ဘေ ဂိုဝ် ဒီ အာ ဝီ၊ အူ ခြိုဝ် အူ ဝီ။ 24 ဒူအီ ဂေ တီ ဘော ဟာဝ် လဲပ် ဒီ ယွတ်။ ဂေ ဘော ဟာဝ် မင် ပ့လုဝ့် အီ ကွယ် ဒီ နွန်၊ ကော ဝီ ဇမ် ဒီ ဒီလယ့် အီ စိူဝ် အေခူန်။ ဂေ ဘော ချွင် ဒီ ယွတ် ခဲင် မာန် မိူင် တီ။ 25 ဂေ ဘော ဘေတ့် တး ဘ့လေ မင် မျုဝ် ပီ ဆမ် ဒူအီ ခဲင် မိူင် တီ။ ဂေ ဘော ကာလာင် လွင် ပီ ပါယ် မိူင် ပီ ဒီ အာပ် ဇဝ်ဖြာ ဒီ ဂေ တီ၊ န့ မုး ကာဒါယ် ဘွတ် ကာဒါယ် မွှိုမ်။”

26 အာမုဝ်ဆဲ ဝီ တဝ်း၊ “မာလဲ၊ ဘေ ယီ တူ ဟာဝ်။ ဘေ ဝီ ဘူင် ကာဘး ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ 27 ဘေ ကွယ် ခဲင် ထိုပ် ဘေ ဘော ပိုန့် တဝ်း၊ ‘ဇဝ်ဖြာ ဇွင့် အေ။ အန် ဟဲ့ ယဲတ့် လေး အေ ခဲင် မိူင် အဲဂိုပ်၊ တဲး အန် ဝီ အာပ် အေ ဒီ ဒူအီ အာမုဝ်ရိတ်၊ တဲး ဂေ ငဝ်း ယမ် အေ။ 28 အေ တူ နပ်၊ အေ ဒီ ဟာဝ် ဒီ မှဝ်။ ပီ ကာလာင် ဂေ ဘီနွင် အေ ဟဲ့ မွှိုမ် ယုဝ် ကာဆဝ်။ ဂေ ဟဲ့ တဝ်း၊ ဒူအီ အီ ကွယ် ခဲင် မိူင် တီ၊ ဂေ ဘော ပ့လူမ် ဘော စာ လွှိုမ် အေ။ မိူင် ဂေ တီ မိူဝ် မုး မိူင် တာင်၊ မိူင် အီ မိုဝ်း ရဲင် စာ ကော ဒုး ဘ့လေန့်၊ ဒုး န့အု။ ဂေ ဟဲ့ ယိုဝ် ဘော ဒူအီ ဒီ တူင့် ဒီ တာင် အီ မုး လှုက်လှာန် အာနာခိမ်။’

29 မာလဲ၊ အုဝ် ဝီ တဝ်း ဒီ ဘေ၊ ‘အာဝ် လုဝ် ယုဝ်၊ အာဝ် လုဝ် ကျွက့် ဒူအီ ဂေ တီ။ 30 ဇဝ်ဖြာ ပီ ကြိုပ် ဘေ၊ အန် ဇဝ် အီ ဒီ ယဲတ့် န့တေန့် ဘေ။ အန် ဇဝ် အီ ဒီ စွယ် ဘေ ကာဂုဝ်း၊ တဲး န့ ပီ ပဲ့ ဟဲ့ စွယ် အန် ဒီ ဘေ ဒေါ ကွယ် ဘေ ခဲင် မိူင် အဲဂိုပ် ဘော ခဲင် ပြဲ ကာဟဝ်း။ 31 ဘေ ဟဲ့ ယိုဝ်၊ အန် ဇဝ် ပါယ် မှဝ် ဒီ စွယ် ဘေ၊ တဲး ဘေ ကော ပွိုန် ဒီ ဇမ် ဆီချာ ဒူင် ကွယ် ဘေ နီ။ အန် ဟဲ့ လိုမ်လာ ဘေ၊ ဟဲ့ ပီ ဂုန့် အီ စုဝ့် ဒီ ဂူင့် ဂွန် အန်။’

32 အုဝ် ပီ ဘော ဟဲ့ ကာလာင် ပါယ် တီ မိူဝ်၊ ဘေ ယီ တူ ညှိုမ် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ တီ။ 33 အန် ဇဝ် ဟဲ့ ယဲတ့် န့တေန့် ဘေ ဘော ဟြေတ့် ဘော ဒူင် ဒီ ချ၊ ဒွါ ဒီ ဘေ။ ခဲင် မှိုဝ် အန် ဟဲ့ တဲး န့ မိုဝ်း ငဝ် အီ ပီ ရွင့်၊ တဲး ဘေ နပ် န့တေန့် ပီ လုဝ် ဟာဝ် ဘေ။ ကာတဲ ဆီငဲ န့ ယီ မိုဝ်း န့အု အီ ပီ ရွင့်။”

34 အာမုဝ်ဆဲ ဝီ တဝ်း၊ “ဇဝ်ဖြာ ဘော ယိုဝ် ဂြုဝ်း ပီ ပိုန့် ပီ အေး ဘေ တီ၊ အန် ဘော ရူ ကာဆဝ် ဘော ဒိူင် တဝ်း၊ 35 ‘စုဝ် ဘေ ဒူအီ ဟာယ် ဒူအီ မိူက် နီ၊ ဘေ တူ ပွိုန် ဒီ လိုပ် ခဲင် မိူင် ဘွတ် မိူင် မွှိုမ် ပဲ့ ဟဲ့ ကာဆဲန့် အုဝ် ဒီ ဒွါ ဒီ ဂေ ဂုန့် ဘေ တွိုန်။ အူ ဝီ မိူဝ် တူ ပွိုန် ဒီ လိုပ်။ 36 န့ မိုဝ်း မီ အာဂါလိပ် အီ မုး ဂွန် အာယေဖုဝ်နာ အီ ပွိုန် ဒီ လိုပ်။ အန် ဟဲ့ ဒူပ် ဆီချာ အုဝ်။ အုဝ် ဒီ အာပ် ကာဒါယ် မိူင် ပဲ့ ဟဲ့ ဟာဝ် ယွတ် အန် တီ ဒီ အန် ဘော ဒီ ဂေ လှုက်လှာန် အန်။’

37 ကူပ် ပိုန့် ဘေ၊ ဇဝ်ဖြာ ဟဲ့ ဝီ ရူ ဘော ဒီ အုဝ်။ အန် ဇဝ် ဟဲ့ တဝ်း ဒီ အုဝ်၊ ‘ဘော မဲ တူ ပွိုန် ဒီ လိုပ် ခဲင် မိူင် တီ။ 38 မဲ လုဝ် ဝီ ကာဆုး နဝ်း အာယုဝ်ဆူအာ အီ မုး ဂွန် အာနုန်၊ အီ ဟဲ့ စွယ် မဲ ဘော ဘဲန် ဒဲစေန့် မဲ။ အန် ဒီ ဝီ ယဲတ့် ဂေ ဒူအီ အီဆာရေလ ဟာဝ် ဒိုဝ်း မိူင် တီ၊ တဲး န့ ဘဲန် ခါဂုန် ဂေ။ 39 ဘေ ဟဲ့ ပိုန့် တဝ်း၊ ယုဝ် အီ ဟဝ် ခဲင် မိူင် တီ ဒီ မှေတ့် ဟာဝ် ဂွန် ယေ။’ န့ ယီ မုး ဂွန် ဒီရွယ် ဘော ဂွန် အာင ဂေ အီ ညှမ် နပ် အီ မွှိုမ် ဘော အီ တူ မွှိုမ် ပီ တဝ်း ဘေ တီ၊ ဂေ ဒီ ဝီ ပွိုန် ဒီ လိုပ် ခဲင် မိူင် တီ။ အုဝ် ဒီ ဝီ အာပ် မိူင် တီ ဒီ ဂေ။ 40 အီ မုး ဘေ၊ တဲး ဘေ ဝီ ဝိဝ်၊ ဝီ ဟာဝ် ခဲင် ပြဲ ကာဟဝ်း၊ ဝီ ဒူပ် န့တေန့် အီ ဟာဝ် ဒီ နှူင် ရေန့် တွိုန်။

41 ဒေါ အန် တီ ဘေ ဝီ ဝျီ့ ဂြုဝ်း အုဝ် တီ တဝ်း၊ ‘အိုယ် အာမုဝ်ဆဲ၊ ယေ ဟဲ့ ဟွတ့် လုတ့် ဇဝ်ဖြာ။ ယေ ဒီ ဟာဝ် ကာဂုဝ်း ပီ ကာလာင် အုန် ဇဝ်ဖြာ ဒီ ယေ။’ ဘေ ဟဲ့ ဟွတ့် တဝ်း ပါယ် တီ ဘေ ဘော ရဲန် ခြိုင် ကာဂုဝ်း ဘေ၊ တဲး ဘေ ပွိုန် ဒီ ဟုဝ့် ကာဂုဝ်း ဒဲင် နွန် တီ။

42 မာလဲ၊ ဇဝ်ဖြာ ဝီ ကာလာင် ဒီ အုဝ် တဝ်း၊ ‘ကွဲ့ တဲး ဂေ ဟာဝ် ကာဂုဝ်း၊ အုဝ် တူ ကွယ် ရိုမ် ဒူပ် ဂေ။ ဂေ ဒီ စှိုမ် ဒီ ရန်ဆူ ဂေ။’

43 အုဝ် ပီ ဘော ကာလာင် ဒီ ဘေ မိူဝ်၊ ဘေ ယီ တူ ထူမ် ဂြုဝ်း အုဝ်။ ဘေ ဘော ဝဲန် ဂြုဝ်း ဇဝ်ဖြာ ဘော ပီကျ ကာဆဝ် ဘေ ဘော ဟုဝ့် ကာဂုဝ်း ဒဲင် နွန် တီ။ 44 ဒေါ အန် တီ ဒူအီ အာမုဝ်ရိတ် အီ ကွယ် ခဲင် မိူင် တီ၊ ဂေ ဘော လေး တး ကာဂုဝ်း ဒီ ဘေ ခဲင် မိူင် ဆေအီ၊ ကော နှဲန် ဖိုင် မာဖျီန်။ ဂေ ဘော ခုင်ခြး ဘေ ကော ဇမ် ဒီ မိူင် ဟောမ။ 45 ပါယ် တီ ဘေ ဘော ဝီ တး ယာမ် ဒီ အာတ့် ဇဝ်ဖြာ။ မာလဲ၊ ဇဝ်ဖြာ တူ ထူမ် ဂြုဝ်း ဘေ၊ တူ ညိုင်ရာင် ယိုဝ် ဘေ။ 46 ဘေ ဘော ဝီ ကာဒုး ဒီ ကွယ် ဒူင် စိူဝ် ဆာဒေတ် ရာမ် လှေန့်။”