1 အေ ဝီ ဟာဝ် ခဲင် ပြဲ ကာဟဝ်း၊ ဟာဝ် ဒူပ် န့တေန့် အီ ဟာဝ် ဒီ နှူင် ရေန့်။ ဇဝ်ဖြာ ဟဲ့ ကာလာင် ဒီ အုဝ် ပါယ် တီ။ အေ ဘော ဟာဝ် ဝိဝ် ဟာဝ် ဝေန့် ဒီ ဒင် နွန် ဆေအီ၊^a န့ ကော လှေန့် ကာဆဝ်။

2-3 ဇဝ်ဖြာ ဘော ဝီ ကာလာင် ဒီ အုဝ် တဝ်း၊ “ဘေ ဟဲ့ ဟာဝ် ဝိဝ် ဟာဝ် ဝေန့် ဒီ ဒင် နွန် နီ၊ ဟဲ့ လှေန့် ကာဆဝ်။ ဘေ ဝီ လူင် ဝီ ကာဘတ် ဟုဝ့် နာ ကွာ။ 4-5 တဲး မဲ ကာလာင် ဘော ဒီ ဂေ ဒူအီ ကိူန် တဝ်း၊ ‘ဘေ လုဝ် ကာလုဝ်း ဟာဝ် ခဲင် ကာဒါယ် ဘီနွင် ဘေ အီ မုး ဒူအီ အာမျုဝ် အာဆုဝ် အီ ကွယ် ခဲင် မိူင် ဆေအီ တွိုန်။ ဒူအီ ဂေ တီ၊ ဂေ ဒီ ဘော ယုဝ် ဘေ။ ခုဝ်၊ တဲး ဘေ ဆာဒိက်၊ ကွဲ့ တဲး ဘေ ကာဂုဝ်း ဒီ ဂေ ဒေါ မှဝ်။ ကာဒါယ် ခဲင် မိူင် ဂေ တီ၊ အူ ကာဆာန် မိူဝ် အုဝ် တူ ဒွါ ဒီ ဘေ။ ခုဝ်၊ ကာဒါယ် ခဲင် မာန် မိူင် ဆေအီ တီ၊ အုဝ် ဟဲ့ ဒွါ ဒီ ဂေ ဒူအီ အာမျုဝ် အာဆုဝ်။ 6 ဘေ လုဝ် ဒိုဝ်း ရွိုန် ဘေ၊ စိုဝ်း ပီ ဒီ ဟူမ် ဘော ပီ ဒီ ဒျီင် ဒီ ဂေ။’”

7 တဲး ဘေ ဘော လှုဝ်း ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ အန် ဇဝ် ဟဲ့ မွင့်ကာရာ ဒွါ ဂါန် ပီ ဘူင် ဘေ ဒွန် မျုဝ်။ အန် ဇဝ် မိူဝ် ဟဲ့ ယွတ် မဲန် ဘေ ဒေါ ဟာဝ် ဘေ ခဲင် ပြဲ တာင် တွိုန် ကော နုဝ့် ဖွုန် ဂိုဝ် ဆီနမ်။ ဒေါ အန် တီ ဘေ မိူဝ် တူ ဇုတ် လုတ် မာဆေ။

8 ပါယ် တီ အေ ဘော ဝီ ဝဝ့် ဟာဝ် ခူပ် ဒူင် ကွယ် ဘီနွင် အေ အီ မုး ဒူအီ အာမျုဝ် အာဆုဝ် ဒဲင် နွန် ဆေအီ တွိုန်။ အေ ဘော ဝီ ဝး န့တေန့် အီ ဟာဝ် ခဲင် ဂ့လင် အာရာဖ၊ ဝီ တး ခဲင် မိူင် အေလာတ် ဘော မိူင် အေစာယူန်ကာဘာ။ အေ ပီ ဝီ ဟာဝ် ဒူပ် န့တေန့် အီ ဟာဝ် ခဲင် ပြဲ ကာဟဝ်း ခဲင် မိူင် မုဝ်အာပ် တွိုန်။

9 ဇဝ်ဖြာ ပီ ဝီ ကာလာင် ဒီ အုဝ် တဝ်း၊ “ဘေ ကွဲ့ ပျာတ့် ဒူအီ မုဝ်အာပ် အီ မုး လှုက်လှာန် အာလူတ် တွိုန်။ ဘေ ကွဲ့ ကာဂုဝ်း ဒီ ဂေ။ အုဝ် ဟဲ့ အာပ် တဲး ဒူအီ အာလူတ် ကွယ် ခဲင် မိူင် တာင် အီ မုး မိူင် အာရာ တီ။ အုဝ် ယီ တူ အာပ် ဒီ ဘေ။”

10 ဒူအီ အာမျုဝ် အေမိတ် အီ မုး ဒူအီ ဒုဝ် တူင့် ဒုဝ် တာင် ဘော မိုဝ်း ပ့လူမ် ကိူန်၊ ဂေ ဟဲ့ ဒွိုမ် ကွယ် ခဲင် မိူင် အာရာ တီ။ ဒူအီ ဂေ တီ ဟဲ့ တာင် စာ ပီ ဒူအီ အာမျုဝ် အာနာခိမ် တွိုန်။ 11 အီ ဟဝ် ဘော တဝ်း၊ ဂေ မုး ဒူအီ ရာဖာတ် ပီ ဒူအီ အာမျုဝ် အာနာခိမ် တွိုန်။ ဂေ ဒူအီ မုဝ်အာပ် ယီ တဝ်း၊ ဂေ မုး ဒူအီ အေမိတ်။ 12 ဒေါ မွိုန် ဒူအီ အာမျုဝ် ဟုဝ်ရိတ် ဟဲ့ ဒွိုမ် ကွယ် ခဲင် မိူင် ဆေအီ။ မာလဲ၊ ဂေ ဒူအီ အာမျုဝ် အာဆုဝ် ဟဲ့ ပျာတ့် ဂေ၊ ဟဲ့ ဟုဝ် တဝ် ဂေ၊ တူ တဲး ဂေ ပွိုန် ဒီ ကွယ် ခဲင် မိူင် တီ။ န့ ဟဲ့ ပီ ဒေါ ဟဲ့ ဟုဝ် လေး ဂေ ဒူအီ အီဆာရေလ ရန်ဆူ ဂေ ခဲင် မိူင် ပီ အာပ် ဇဝ်ဖြာ ဒီ ဂေ။

13 ဇဝ်ဖြာ ဘော ကာလာင် ဟာဝ် ပေါ မ့ပွါ တဝ်း၊ “ဝါယ် အန် တီ တဲး ဘေ ဘော ဝီ ကာလုဝ်း ဒီလယ့် စာရိတ်။” ဟဲ့ ဟွတ့်၊ အေ ဘော ဘူင် ခဲ့ ပီ ကာလာင် ဇဝ်ဖြာ ဒီ အေ။

14 ဝါယ် ဟဲ့ လေး အေ ဒူင် စိူဝ် ကာဒေဘာနာ၊ ကော ဇမ် ဆီငဲ ဒီ ကာလုဝ်း အေ ဒီလယ့် အီ စိူဝ် စာရိတ်၊ ဟဲ့ နုဝ့် အူယ် ဂိုဝ် ဒီ ဒါ ဆီနမ်။ ဒေါ အန် တီ၊ ဂေ ဒူအီ အီ ဟဲ့ ကာဘး ဒီ ဇဝ်ဖြာ၊ ဂေ ဟဲ့ ဟွတ့် ယမ် တူတ့်။ န့ ဟဲ့ ဘုဝ် ဘဲန် ပီ ပီ ဒွိုမ် ဒိူင်၊ ဒွိုမ် ကာဆဲန့် ဇဝ်ဖြာ ဒီ ဂေ။ 15 န့ ယီ မုး ဇဝ်ဖြာ အီ ဘူင် တဲး ဂေ လိုဝ် စှိုမ် တူတ့် ပါယ် တီ ကွဲ့ တဲး န့ ဆီ မိုဝ်း ဒူအီ အီ ကာဘး ဒီ ဇဝ်ဖြာ ကာတဲ ဂေ ဒူအီ အီဆာရေလ။

16 ဝါယ် ဟဲ့ ဟွတ့် ယမ် တူတ့် ဒူအီ ဂေ တီ၊ 17 ဇဝ်ဖြာ ဝီ တဝ်း ဒီ အုဝ်၊ 18 “အာတိုဝ် တဲး ဘေ လိုပ် ဟာဝ် ခဲင် မိူင် မုဝ်အာပ်၊ တဲး ဘေ ကာလုဝ်း ဟာဝ် ခဲင် မိူင် အာရာ။ 19 ဆေ ဘေ ဟီ တး ခူပ် ကာအုန် ကာဒါယ် ဒူအီ အမ်မူန် အီ မုး ဒူအီ အာလူတ် တွိုန်၊ ဘေ တူ ပွိုန် ဘူင် နာ စာဝ် ဒီ ဂေ၊ အာဝ် ပွိုန် ပီရူ ဒီ ဂေ ဒေါ မှဝ်။ မိူင် ဒူင် ကွယ် ဂေ တီ၊ အုဝ် တူ အာပ် ဒီ ဘေ။”

20 ဒေါ မွိုန် ဟဲ့ လှေန့် ကာဆဝ်၊ ခဲင် မိူင် တီ ဂေ ဒူအီ အာမျုဝ် ရာဖာတ် ဟဲ့ ဒွိုမ် ကွယ်။ ဂေ ဒူအီ အမ်မူန် ဘော ဒဲ့ ဂေ တဝ်း ဒူအီ စန်စူမဲမ်။ 21 ဒူအီ အာမျုဝ် တီ၊ ဂေ ကိူန် ကာဆဝ်။ ဂေ မုး ဒူအီ အာမျုဝ် ဒုဝ် တူင့် ဒုဝ် တာင် စာ ပီ ဒူအီ အာမျုဝ် အာနာခိမ် တွိုန်။ မာလဲ၊ ဇဝ်ဖြာ ဟဲ့ ပျာတ့် ဝဲန် ဂေ၊ ဟဲ့ ဝီ အာပ် တဲး ဒူအီ အမ်မူန် ကွယ် ခဲင် မိူင် တီ။ 22 ဇဝ်ဖြာ ဟဲ့ ဒွိုမ် ဘူင် ပါယ် တီ ဒီ ဂေ လှုက်လှာန် အာဆုဝ် တွိုန်၊ တဲး ဂေ ပွိုန် ဒီ ကွယ် ခဲင် မိူင် ဆေအီ။ ဒေါ အန် တီ အန် ဇဝ် ဟဲ့ ပျာတ့် ဝဲန် ဒူအီ ဟုဝ်ရိတ်၊ ဝီ တဲး ဂေ လှုက်လှာန် အာဆုဝ် ပွိုန် ဒီ ကွယ် ကော ဇမ် ဒေါ တီ နီ။ ^b 23 ဘော ဂေ ဒူအီ အာဝေမ် ဟဲ့ ခမ် ပါယ် တီ။ ဂေ ဟဲ့ ဒွိုမ် ကွယ် ဘဲန် ပ့လုဝ့် ဘဲန် ပ့လုဝ့် ကော ဇမ် မိူင် ဂါဆာ။ မာလဲ၊ ဒူအီ အာမျုဝ် ကပ်တောရိန် အီ ဟဲ့ ကွယ် ခဲင် မိူင် ကပ်တော ဟဲ့ ဝီ တး ပျာတ့် ဂေ၊ ဝီ ကွယ် ခဲင် မိူင် ဂေ တီ။

24 ဝါယ် ဟဲ့ ဟွတ့် ကာလုဝ်း အေ မိူင် မုဝ်အာပ် တီ၊ ဇဝ်ဖြာ ပီ ဝီ တဝ်း၊ “ခါ နီ တဲး ဘေ ကာလုဝ်း အိုမ် ဘ့လဲင် အာရာနုန်။ အုဝ် ဒီ ဒိုဝ်း ခုန်ဒီခမ် အာဆီဟူန် အီ မုး ဒူအီ အာမျုဝ် အာမုဝ်ရိတ် အီ အိုပ် မိူင် ဟေဆာဖူန် တွိုန်၊ အာပ် ဒီ ဘေ။ တဲး ဘေ ကာဂုဝ်း ဒီ အန်၊ ဒိုဝ်း ကာဒါယ် ဒူင် ကွယ် အန် တီ။ 25 စုး ဆိန့် အာတိုဝ် နီ အုဝ် ဒီ တဲး ဒူအီ အာမျုဝ် ဟဝ် ယုဝ် ဘေ ဒွန် ပ့လုဝ့် ဒွန် နာ။ ဂေ ဟီ ယိုဝ် မီ ခဲ့ စိူဝ် ဘေ၊ ဂေ ဒီ ယုဝ် ကာဆဝ် ဘော ဒီယုး ဒီယေန့်။ ဂေ ဒီ ဘော ပီ အီဘိုန့် အီ ဆဝ် ဒီ မိုဝ်း ဂွန်။”

26 ဒေါ အန် တီ အုဝ် ဟဲ့ စ်ု ဂေ ဒါလာမ် အုဝ် လေး ခဲင် ပြဲ ကာဟဝ်း ဒူင် စိူဝ် ကေဒါမုတ်၊ ဝီ ဟာဝ် ဒူင် ကွယ် ခုန်ဒီခမ် အာဆီဟူန် အီ အိုပ် မိူင် ဟေဆာဖူန် တွိုန်၊ တဲး ဂေ ဟာဝ် ကာမွုန် ဒီ အန်၊ တဲး အေ လာယ် ဘဲန် အူ ဂိုက်။ အုဝ် စ်ု ဂေ ကာလာင် ဒီ အန် တဝ်း၊ 27 “ယေ မှာန့် ဒီ ကာလုဝ်း ဟာဝ် ကာတဲ မိူင် မဲ ခုန်ဒီခမ် တာင်။ ယေ ဒီ ဟာဝ် မီ ဒူပ် န့တေန့်၊ ယေ တူ ဝး နာ မှဝ်၊ တူ ဝး နာ ဂ နာ အး။ 28 ပီ ဒီ ဟူမ် ယေ၊ ယေ ဒီ စိုဝ်း ဒီ မဲ တာ ရွိုန်။ ပီ ဒီ ဒျီင် ယေ၊ ယေ မှာန့်၊ တဲး ယေ ပွိုန် ဒီ စိုဝ်း ဒီ မဲ။ တဲး မဲ ခုန်ဒီခမ် တာင် ခ့ဝါင် မီ ယေ ကာလုဝ်း မိူင် မဲ၊ 29 တဲး ယေ ဟာဝ် ကာလုဝ်း ဘ့လဲင် အိုမ် ယောဒါန်။ ပန် တီ ယေ ဒီ ဘော ဇမ် ခဲင် မိူင် ပီ ဒီ ဒွါ ဇဝ်ဖြာ ပီ ကြိုပ် ယေ ဒီ ယေ။ ဒူအီ အာဆုဝ် အီ ကွယ် ခဲင် မိူင် ဆေအီ၊ ဘော ဒူအီ မုဝ်အာပ် အီ ကွယ် ခဲင် မိူင် အာရာ၊ ဂေ ဟဲ့ ခ့ဝါင် ယေ ကာလုဝ်း ဟာဝ် ခဲင် မိူင် ဂေ ပါယ် တီ။” 30 မာလဲ၊ ခုန်ဒီခမ် အာဆီဟူန် တူ ခ့ဝါင် အေ ကာလုဝ်း ဟာဝ် ကာတဲ မိူင် အန်။ ခုဝ်၊ န့ မုး ဇဝ်ဖြာ ပီ ကြိုပ် ဘေ၊ အန် ဟဲ့ ဘူင် တဲး ခုန်ဒီခမ် ပီဒိူဝ် ပီပ့လူမ် ဒီဂတ့် နဝ်း အန်။ အန် ဇဝ် ဒီ ဒွါ ဒီ အေ မိူင် အန် တီ။ န့ ဘော မုး မိူင် ပီ ကွယ် အေ ဒေါ တီ နီ။

31 ဇဝ်ဖြာ ဝီ တဝ်း ဒီ အုဝ်၊ “ဘ်ု မဲ ယွတ်၊ အုဝ် ဒီ ဒိုဝ်း ခုန်ဒီခမ် အာဆီဟူန် ဘော မိူင် ပီ အိုပ် အန်၊ အာပ် ဒွါ ဒီ မဲ၊ တဲး ဘေ လိုပ် ကွယ် ခဲင် မိူင် တီ။”

32 ပါယ် တီ ခုန်ဒီခမ် အာဆီဟူန် ဘော ဂေ ဒါ ဆိုက် အန် ဘော လေး တး ကာဂုဝ်း ဒီ အေ ခူပ် မိူင် ယာဟာတ်။ 33 ဇဝ်ဖြာ ဘော အာပ် အန် ဒီ အေ။ အေ ဘော ကာဂုဝ်း ဒီ အန် ဘော ပွိုန် ဒီ ငဝ်း ယမ် အန် ဘော ဂွန် အန် ဘော ဂေ ဒါ ဆိုက် အန် ဘောကာဂ့လျီတ်။ 34 ဒေါ အန် တီ အေ ဘော ပျာတ့် ဝဲန် မိူင် ပီ အိုပ် အန် ဒွန် မိူင်။ အေ ဘော ငဝ်း ယမ် ဒူအီ ပီ အိုပ် အန်၊ ဘော အီဘိုန့်၊ အီမာယ် ဘော ဂွန် ဒီရွယ် ဘောကာဂ့လျီတ်၊ န့ ကော ဟူ ဂိူတ် ခေါ အူ ဝီ။ 35 အေ ဒိုဝ်း မီ ဒုဝ် ဆတ်ဒါဝါ ဘော ကြုဝ်ကြာမ် ခဲင် မိူင် ပဲ့ ဟဲ့ ပဲ အေ တီ။ 36 ဇဝ်ဖြာ ဟဲ့ တဲး အေ ကာဂုဝ်း၊ ဟဲ့ တဲး အေ အွင် မိူင် ဘဲန် မိူင် ဘဲန် မိူင်။ န့ ဘော စုး ဒီ မိူင် အာရော အီ ကွယ် နာ တေတ့် ဒီလယ့် အာရာနုန် ဘော မိူင် အီ ကွယ် ဒီ ကာတဲ ဂ့လင် တွိုန်၊ ဝီ လူင် ဇမ် မိူင် ဂီလေအာတ်။ မိူင် ပီ တူ ပဲ အေ အာဝ် မိုဝ်း ခေါ အူ မိူင်၊ ဘော မိူင် အီ မိုဝ်း ရဲင်၊ အီ ဟဲ့ မန် ဆီချာ ဟဲ့ ပဲ တူတ့်။ ဇဝ်ဖြာ ဟဲ့ တဲး အေ ပဲ ဂေ ဘောကာဂ့လျီတ်။ 37 မာလဲ၊ ဘေ တူ ဒိုဝ်း ဒူင် ကွယ် ဂေ ဒူအီ အမ်မူန် ဘော ဒွန် မိူင် အီ ကွယ် ခူပ် ဘာင် အိုမ် ယာဘူက်။ မိူင် ဂေ တီ ဇဝ်ဖြာ ဟဲ့ ခြဲ၊ ကွဲ့ တဲး အေ ဟာဝ်။