1 ဝါယ် ဟဲ့ ယမ် အာမုဝ်ဆဲ အီ မုး ဒဲစေန့် ဇဝ်ဖြာ၊ ဇဝ်ဖြာ ဝီ ကာလာင် အုန် ဒီ ဝီ အီ စွယ် အာမုဝ်ဆဲ အီ စိူဝ် အာယုဝ်ဆူအာ၊ အီ မုး ဂွန် အာနုန် တွိုန်။ အန် တဝ်း၊ 2 “ဒဲစေန့် အုဝ် အီ စိူဝ် အာမုဝ်ဆဲ ဟဲ့ ဟွတ့် ယမ်။ ဘော မဲ ဘော ဂေ ဒူအီ အီဆာရေလ ဘောကာဂ့လျီတ် တဲး ဘေ ရဲန် ဒုဝ် ဘေ၊ တဲး ဘေ ဟာဝ် ကာလုဝ်း အိုမ် ဘ့လဲင် ယောဒါန်၊ တဲး ဘေ ဇမ် ခဲင် မိူင် ပီ ဒီ ဒွါ အုဝ် ဒီ ဘေ အီ မုး ဒူအီ အီဆာရေလ။ 3 ကာဒါယ် ဒူင် ဒီ ညဲတ့် ဟာဝ် ဘေ အုဝ် ဒီ ဒွါ ဒီ ဘေ၊ တဲး န့ ဒူပ် ပီ ဒွိုမ် ကာဆဲန့် အုဝ် ဒီ အာမုဝ်ဆဲ တွိုန်။ 4 ကာအုန် ကာဒါယ် ဘေ တီ၊ န့ ဒီ ဘော စုး ဒီ ပြဲ ကာဟဝ်း ဘ့လာက် နာ တေတ့်၊ ဝီ ဟုဝ့် ဇမ် ဒီ နွန် လေဘာနုန် ဘ့လာက် နာ ကွာ။ နာ လေး ဆီငဲ န့ ဒီ စုး ဘော ဒီ အိုမ် ဘ့လဲင် အူဖာရာတ်၊ အီ မုး ကာဒါယ် ဂေ ဒူအီ ဟေထိတ်။ န့ ဘော ဟာဝ် တဲး န့ ကော ဝီ ဇမ် ဒီ အိုမ် နမ်မုက်ဆာရာ ဘ့လာက် နာ ဂေတ့် ဆီငဲ။ 5 အိုယ် အာယုဝ်ဆူအာ၊ အာဝ် မိုဝ်း အီ ပွိုန် ခမ် အီ ပွိုန် ကာခဲန့် ဒီ မဲ ဘော စုဝ် မဲ။ အုဝ် ဒီ ကွယ် ရိုမ် ဒူပ် မဲ ပီ ပီ ဒွိုမ် ကွယ် ရိုမ် အုဝ် ဒူပ် အာမုဝ်ဆဲ တွိုန်။ အုဝ် ဒီ ကွယ် ရိုမ် ဒူပ် မဲ ဆေဆေ၊ တူ ဝဲန် မဲ ဒေါ မှဝ်။

6 တဲး မဲ မိုဝ်း ပ့လူမ် ဘော မိုဝ်း နဝ်း ယ။ ခုဝ်၊ မဲ လုဝ် ဘူင် တဲး ဒူအီ ဂေ တီ ပွိုန် ဒီ ဘိုင် ခါဂုန် ခဲင် မိူင် ပဲ့ ဟဲ့ ကာဆဲန့် အုန် အုဝ် ဒီ ဂေ ဂုန့် ဒင် ဘေ။ 7 တဲး မဲ မိုဝ်း နဝ်း ပ့လူမ် ဘော မိုဝ်း နဝ်း ယ အာခါခ်ု။ တဲး ဘေ ပီ ဝီ ခတ် နဝ်း ဒီ ဘူင် ဒူပ် ဆီချာ ဒါရာ ပဲ့ ဟဲ့ ကာလာင် ဒဲစေန့် အုဝ် ဒီ ဘေ အီ မုး အာမုဝ်ဆဲ။ တဲး န့ ပီ ဘေ ဟာဝ် ဆိူဝ် ဒူပ် န့တေန့်၊ ကွဲ့ တဲး ဘေ ဝး နာ ဂ နာ အး။ ဆေ မဲ ဘူင် ပါယ် တီ မဲ ဘော ဟာဝ် ဒီ မှဝ်၊ မဲ ဒီ အွင် ဆေဆေ။ 8 တဲး မဲ ကာလာင် ဒါရာ တီ ဆေဆေ။ တဲး မဲ ကာဒွါ့ ကာဖာ ဒါရာ ပီ ဒဲမ် အုန် ခဲင် ဘပ် နီ ဒွင် ဝန် ဒွင် ခိူန်။ တဲး န့ တဲး ဘေ ပွိုန် ဒီ ဒူပ် ဆီချာ။ ဆေ မဲ ဘူင် ပါယ် တီ မဲ ဒီ ဘော အွင်။ န့ ဘော ဘဲန် ခဲ့ ပီ ဘူင် မဲ။ 9 တဲး မဲ လှုဝ်း ပီ ဒမ် အုန် အုဝ် ဒီ မဲ။ အုဝ် တဝ်း၊ တဲး မဲ မိုဝ်း နဝ်း ယ ဘော ပီကျ မဲ။ အာဝ် လုဝ် ယုဝ်၊ အာဝ် လုဝ် နဝ်း တျီ့။ ခုဝ်၊ အုဝ် အီ မုး ဇဝ်ဖြာ ပီ ကြိုပ် မဲ ဒီ ဘော ကွယ် ရိုမ် ဒူပ် မဲ ဒွန် နာ ဒွန် ပ့လုဝ့်။”

10 ဟဲ့ ဟွတ့် ပါယ် တီ အာယုဝ်ဆူအာ ဝီ စ်ု ဂေ အီ မုး ဒါ တာင် အီ အိုပ် ဒူအီ ကိူန် တဝ်း၊ 11 “တဲး ဘေ ဟာဝ် ဒူင် ကွယ် ဂေ ဒူအီ ကိူန်၊ ကာလာင် ဒီ ဂေ တဝ်း၊ ‘တဲး ဘေ ရဲန် အုန် ကြုဝ်ကြာမ် ဘေ။ ခုဝ်၊ ဝါယ် အူယ် ဆီငဲ ဘေ လုဝ် ကာလုဝ်း အိုမ် ဘ့လဲင် ယောဒါန်၊ ဟာဝ် ဒိုဝ်း မိူင် ပီ ဒီ အာပ် ဇဝ်ဖြာ ဒီ ဘေ။’”

12 ဒေါ အန် တီ အာယုဝ်ဆူအာ ဘော ကာလာင် ဂြုဝ်း ဒီ ခြိုဝ် အာရူဘေန်၊ ခြိုဝ် အာဂတ် ဘော ခြိုဝ် အာမာနာဆေ အာဒါ အူ ကာတဲ။ 13 အန် တဝ်း၊ “တဲး ဘေ လှုဝ်း ဂြုဝ်း ပီ ကာလာင် အုန် အာမုဝ်ဆဲ အီ မုး ဒဲစေန့် ဇဝ်ဖြာ တွိုန်။ အန် ဟဲ့ တဝ်း၊ ‘ဇဝ်ဖြာ ပီ ကြိုပ် ဘေ ဟဲ့ တဲး ဘေ ပွိုန် ဒီ ဒီလှဝ်၊ ဟဲ့ ဒွါ ကာဒါယ် နီ ဒီ ဘေ။’ 14 အီဘိုန့် ဘေ ဂေ ဂွန် ဘေ ဘော ဒုဝ် ဆတ်ဒါဝါ ဘေ ပွိုန် ကွယ် ဘ့လာက် နာ လေး ဆီငဲ အိုမ် ဘ့လဲင် ယောဒါန်။ အီ မုး ဂေ ဒါ ဆိုက် ဘေ၊ ဂေ လုဝ် ဂူင့် ခြိုင် ကာဂုဝ်း ဂေ၊ ယဲတ့် ဒီ အာတ့်၊ စွယ် ဘီနွင် ဝေါဝဲ ဘေ ကာလုဝ်း အိုမ် တီ။ 15 ဂေ လုဝ် စွယ် တဲး န့ ကော ဇမ် ပန် ဒီ ပွိုန် ဘေ မိူင် အီ ကွယ် နာ ဂေတ့် ဆီငဲ အိုမ် ဘ့လဲင် ယောဒါန်၊ မိူင် ပဲ့ ဟဲ့ တဝ်း ဇဝ်ဖြာ ပီ ကြိုပ် ဘေ ဒီ ဒွါ ဒီ ဘေ တီ။ ဆေ အန် ဇဝ် ဟဲ့ ဟွတ့် တဲး ဂေ ဒူအီ အီဆာရေလ ကွယ် ဒါခိုယ်၊ ကွယ် ဒီလှဝ် ပီ ဘေ ဟဲ့ ဒီလှဝ်၊ ဘေ ပွိုန် ဒီ ဝီ တး ဒူင် ကွယ် ဘေ တီ၊ အီ မုး မိူင် အီ ကွယ် နာ လေး ဆီငဲ အိုမ် ဘ့လဲင် ယောဒါန် ပဲ့ ဟဲ့ ဒွါ အာမုဝ်ဆဲ အီ မုး ဒဲစေန့် ဇဝ်ဖြာ ဒီ ဘေ။”

16 ဟဲ့ ဟွတ့်၊ ဂေ မိူဝ် ဝီ ကာလာင် ဒီ အာယုဝ်ဆူအာ တဝ်း၊ “ယေ ဒီ ဘူင် ဒူပ် ပီ ကာလာင် အုန် မဲ တီ။ ယေ ဒီ ဟာဝ် ဒူင် စ်ု မဲ ယေ ဟာဝ်။ 17 ယေ မိူဝ် ဒီ ထူမ် ဂြုဝ်း မဲ ဆေဆေ၊ တဲး န့ ပီ ဒေါ ဟဲ့ ထူမ် ယေ ဂြုဝ်း အာမုဝ်ဆဲ တွိုန်။ တဲး ဇဝ်ဖြာ ပီ ကြိုပ် အေ ကွယ် ရိုမ် ဒူပ် မဲ ဆေဆေ၊ တဲး န့ ပီ ဒေါ ဟဲ့ ကွယ် ရိုမ် အန် ဇဝ် ဒူပ် အာမုဝ်ဆဲ တွိုန်။ 18 အာဆေ ဝီ ထဲန့် ဂြုဝ်း မဲ ဘော တူ ဆီ ထူမ် ဂြုဝ်း ပီ ကာလာင် မဲ၊ ဒူအီ ဝီ တီ လုဝ် ခမ် ဒီ ယမ်။ မာလဲ၊ တဲး မဲ မိုဝ်း ဟဲန့် ဘော မိုဝ်း နဝ်း ယ။”