1 ပန် အန် တီ အာယုဝ်ဆူအာ အီ မုး ဂွန် အာနုန် ဝီ စ်ု ဒူအီ အာ ဝီ၊ တဲး ဂါယ် လေး ဒူင် စိူဝ် ဆီဒိမ်၊ ဝီ ဟာဝ် ချွင် ဒီ ယွတ် ခဲင် မိူင် ကာနန့် ဘော မိူင် ယေရီခုဝ်၊ တဲး ဂါယ် နပ် ပီ ပါယ် ဂေ။ ဒူအီ ဂါယ် တီ ဘော ဇမ် ခဲင် မိူင် ယေရီခုဝ်၊ ဂါယ် ဘော ဟာဝ် လိုပ် တမ် ခဲင် ကာင် ယာ မာလမ် အူ ဝီ အီ စိူဝ် နာင် ရာဟာပ်။

2 ခုန်ဒီခမ် ခဲင် မိူင် တီ ဘော ယိုဝ် အီ တဝ်း၊ “ဟဲ့ မိုဝ်း ဒူအီ အီဆာရေလ မင် အီ အီ ဟဲ့ ပြာ ဒီ တး ချွင် ဒီ ယွတ် မိူင် အေ။” 3 ခုန်ဒီခမ် တီ မိူဝ် တိုယ် ဒါလာမ် အန် ဟာဝ် ကာလာင် ဒီ နာင် ရာဟာပ် တဝ်း၊ “ဒူအီ အီ တး ကွယ် ခဲင် ကာင် မဲ နီ၊ ဂေ ပြာ ဒီ တး ချွင် ဒီ ယွတ် ခဲင် မိူင် နီ။ တဲး မဲ ဒိုဝ်း လေး ဂေ။”

4 နာင် ရာဟာပ် ဟဲ့ ဟွတ့် ချြီင် ဂါယ်၊ အန် ဝီ တဝ်း၊ “ဟဲ့ မှာန်၊ န့ ဟဲ့ မိုဝ်း ဒူအီ အီ တး ဒူင် ကွယ် အုဝ် နီ။ မာလဲ၊ အုဝ် တူ နပ် နာ တး ဂေ။ 5 ဘာ ဒီ အပ် အာတ့် ကာဘိတ် အီ မာလုဝ်း မိူင်၊ ဂေ ဟဲ့ ဝီ လေး ဟာဝ်။ ဂေ ဟာဝ် နာ မှဝ်၊ အုဝ် မိူဝ် တူ နပ်။ တဲး ဘေ ခုင်ခြး ဒူပ် ဂေ ခြန် ခြန်၊ ယုဝ် ဘေ ပီ ဆော ခြပ်။” 6 မာလဲ၊ အန် ယီ ဟဲ့ ယဲတ့် ဟုဝ့် ဂါယ် နာ ဒဲင် ကာတု ကာင်၊ ဝီ ချြီင် ဂါယ် ခြိုမ် ဒူင် ရာယ် အန် ခဲင် ကာတမ်။ 7 ဒါလာမ် ခုန်ဒီခမ် ဂေ တွိုန် ဝီ ဒူပ် ဒီ ယွတ် ဟာဝ် ဒူပ် န့တေန့် အီ ဟာဝ် ဒီ ဘ့လဲင် အိုမ် ယောဒါန်၊ တဲး ဂေ ကော ဇမ် ဒီ ဘာင် ကာလုဝ်း။ ဂေ ဟဲ့ ဟွတ့် လေး နာ ရေတ့် မိူင်၊ ဒါ အီ ဘ်ု မာလုဝ်း ဟဲ့ ဝီ ကာဘိတ် မာလုဝ်း မိူင်။

8 အာတ့် အိတ် ဒူအီ ဂါယ် တွိုန်၊ နာင် ရာဟာပ် ဟဲ့ ဟုဝ့် ဒူင် ကွယ် ဂါယ် ဒဲင် ကာတု ကာင် တွိုန်။ 9 အန် ဟဲ့ ကာလာင် ဒီ ဂါယ် တဝ်း၊ “အုဝ် ဟဲ့ နပ်၊ ဇဝ်ဖြာ ဒီ အာပ် မိူင် နီ ဒွါ ဒီ ဘေ။ ဒူအီ ဘော မာန် ဘော မိူင် ဒွန် အီ ဘော ယုဝ် ကာဆဝ် ဘေ။ 10 ယေ ဟဲ့ ယိုဝ် လွင် ပဲ့ ဟဲ့ ဘူင် ဇဝ်ဖြာ၊ တဲး အိုမ် ဒီနှူင် ရေန့် ဟိတ် ဒီ အာတ့် ဘေ ဒေါ လေး ဘေ ခဲင် မိူင် အဲဂိုပ် တွိုန်။ ယေ မိူဝ် ဟဲ့ ယိုဝ် ဘော လွင် ပဲ့ ဟဲ့ ဘူင် ဘေ ဒီ ခုန်ဒီခမ် ဒူအီ အာမုဝ်ရိတ် အာ ကာဒင် အီ စိူဝ် ခုန်ဒီခမ် အာဆီဟူန် ဂါယ် ခုန်ဒီခမ် အာအောခ။ ဘေ ဟဲ့ တဲး ဂေ စှိုမ် တူတ့်။ 11 ဒေါ ယိုဝ် ယေ လွင် အန် တီ၊ ယေ ဘော ယုဝ် ကာဆဝ် ကူပ် ဘေ။ နဝ်း ယ နဝ်း ကျ အီမာယ် ယေ၊ န့ ဘော ဟြာယ် တူတ့် အူ ဇေန့်။ ခုဝ်၊ ဇဝ်ဖြာ ပီ ကြိုပ် ဘေ၊ အန် ဘော မုး ဇဝ်ဖြာ အီ အိုပ် ဘော ခဲင် ဂါင်ဟြာဝ် ဘော ဒဲင် ကာဒါယ်။ 12 ပါယ် တီ ဒေါ တီ နီ အုဝ် မှာန့်၊ တဲး ဘာယ် ကာဆဲန့် ဒီ အုဝ်၊ ဒိူင် ဘော ဂါဝ် ပွုန် ဇဝ်ဖြာ တီ၊ တဲး အန် ဂေဇူ ဒူအီ ခဲင် န့ဟူမ် အုဝ်၊ တဲး န့ ပီ ပဲ့ ဟဲ့ ဂေဇူ အုဝ် ဒီ ဘာယ်။ တဲး ဘာယ် ဘူင် ဘျ လက်ဆာနာ ခေါ အူ မျုဝ် အူ မျုဝ်၊ တဲး အုဝ် နပ် ဆီချာ ဘာယ် တူ ကာလုဝ် အုဝ်။ 13 တဲး ဘာယ် ကာဆဲန့် ဒီ အုဝ်၊ ဘေ ဒီ ချွတ် ဘော ဂုန့် မာ အုဝ် ဘော န့ဟူမ် အီကတ် ဝါ အုဝ် ဂေ ဒွန် အီ၊ ကွဲ့ တဲး ယေ ယမ်။”

14 ဂါယ် မိူဝ် ဝီ တဝ်း ဒီ အန်၊ “ဆေ ယာယ် တူ ဘူင် ဒူပ် ဂြုဝ်း ပီ ကာလာင် ယာယ် ဒေါ တီ နီ၊ တဲး ဇဝ်ဖြာ ငဝ်း အာဆာက် ယာယ်၊ တဲး န့ ကာဒါင် ဘေ ဘော န့ဟူမ်။ ဆေ မဲ တူ ကာလာင် ဘျ ဒီ အီ ဟဝ် လွင် ဟဲ့ တး ယာယ် ဒီ ကာင် မဲ၊ ယေ ဒီ ဂေဇူ န့ဟူမ် မဲ ပန် ဒီ အာပ် ဇဝ်ဖြာ မိူင် နီ ဒီ ယေ။ ယာယ် ကာဆဲန့် ဒီ မဲ ပါယ် တီ။”

15 ကာင် နာင် ရာဟာပ် တွိုန် ကွယ် ဒိုက် ဒီ ရဲင် မိူင်။ ခုဝ်၊ အန် ဝီ ဒိုဝ်း ဝန်၊ ဘျွာ လူင် ခဲင် ကာဒဝ် ပါတဲင်၊ တဲး ဂါယ် ပွိုန် ဒီ လေး။ 16 အန် ဝီ ကာလာင် ဒီ ဂါယ် တဝ်း၊ “တဲး ဘာယ် ဟာဝ် ဆိူဝ် ဒီ နွန် ဒွယ်။ ယုဝ် ဂေ ဒူအီ ခုန်ဒီခမ် ဝီ ယိုဝ် ဘာယ်။ တဲး ဘာယ် ချြီင် ဘာယ် ဒီ နွန် တီ အာဒါ အူယ် ဆီငဲ၊ တဲး န့ ကော ဇမ် ပန် ဒီ ဝီ တး ဂေ။ ဂေ ဟဲ့ ဟွတ့် ဝီ တး၊ ဘာယ် ဘော ဝီ ဟာဝ်။”

17 ဂါယ် မိူဝ် ဝီ တဝ်း ဒီ အန်၊ “ဂြုဝ်း ပီ တဝ်း မဲ တဲး ယာယ် ကာဆဲန့် တွိုန်၊ န့ တူ မိုဝ်း ဒီခုဝ်၊ ဆေ မဲ တူ ဘူင် ဒူပ် ပီ တဝ်း ယာယ် နီ။ 18 ဆေ ယေ ဟီ တး တိုက် မိူင် နီ၊ မဲ လုဝ် ဒိုဝ်း ဆေန့် ရေန့် အူ ဇွင့်၊ ပက် ဒိုက် ဒီ ကာဒဝ် ပါတဲင် ဒူင် ဘ့လေး လူင် မဲ ဒီ ယာယ် တွိုန်။ မဲ ဘော လုဝ် ဝီ ဒဲ့ ဂုန့် မာ မဲ ဘော အီကတ် မဲ၊ ဝါ မဲ အီ မုး ဒူအီ ခဲင် န့ဟူမ် ဘေ ဘောကာဂ့လျီတ်၊ တဲး ဘေ တး ကွယ် ကာဇု တူတ့် ခဲင် ကာင် မဲ တီ။ 19 မာလဲ၊ ဝီ အီ လေး ဟာဝ် တ ကာင်၊ ဟာဝ် ဒူပ် န့တေန့်၊ ဆေ အန် ကာဒုး ဒီ ယမ်၊ န့ တူ မုး မှာပ် ယေ ကူပ် ဟဲ့ ကာလိုပ် အန်။ ဝီ အီ ကွယ် ခဲင် ကာင် ဒူပ် မဲ၊ ဆေ အန် ယီ ယမ်၊ တဲး ယာယ် ဝီ ခမ် မှာပ် တီ။ 20 ဆေ မဲ မိူဝ် ဝီ ကာလာင် ဘျ ဒီ အီ ဟဝ် လွင် ပီ ဘူင် ယာယ် နီ၊ ယာယ် မိူဝ် တူ လုဝ် ခမ် ဂြုဝ်း ပီ ဒိူင် ပီ လာယ် ကာဆဲန့် ယာယ် နီ။”

21 အန် မိူဝ် ဝီ တဝ်း၊ “တဲး န့ ဘဲန် ဒူပ် ဂြုဝ်း ဘာယ် တီ။” အန် ဟဲ့ ဟွတ့် တဝ်း ပါယ် တီ အန် ဘော တဲး ဂါယ် ဟာဝ်။ ဂါယ် ဟဲ့ ဟွတ့် ဟာဝ်၊ အန် ဝီ ဒိုဝ်း ဆေန့် ရေန့် ဟွယ် လူင် ဒီ ကာဒဝ် ပါတဲင် တွိုန်။

22 ဂါယ် အာ ဝီ တွိုန် မိူဝ် ဟာဝ် ဒီ နွန် တွိုန်၊ ဟာဝ် ချြီင် ဂါယ် ဒီ တီ အာဒါ အူယ် ဆီငဲ။ ဝါယ် အန် တီ၊ ဒဲစေန့် ခုန်ဒီခမ် မိူဝ် ဝီ တး။ ဂေ ဟဲ့ ဟြေတ့် ဂါယ် ဒွန် နာ ဒွန် ပ့လုဝ့်၊ ယီ တူ ယိုဝ် ဂါယ်။ 23 ဂါယ် မိူဝ် ဝီ လူင် ဒီ နွန် တွိုန်၊ ဝီ ကာလုဝ်း အိုမ် ဘ့လဲင် ယောဒါန်၊ ဟာဝ် ဒူင် ကွယ် အာယုဝ်ဆူအာ။ ဂါယ် မိူဝ် ကာလာင် ခဲ လွင် ပဲ့ ဟဲ့ ကာဒုး တး ဂါယ်။ 24 ဂါယ် ဝီ ကာလာင် ဒီ အာယုဝ်ဆူအာ တဝ်း၊ “ဇဝ်ဖြာ ဟဲ့ အာပ် ဒွါ မိူင် တီ ဒီ အေ အာခါခ်ု။ နဝ်း ဒူအီ ခဲင် မိူင် တီ ဘောကာဂ့လျီတ် ဟဲ့ န့စမ် တူတ့် ကူပ် ယုဝ် ကာဆဝ် ဂေ ဒီ အေ။”