1 ပါ ခဲညှာ ဆိန့်ဝး စေဝ်၊ အာယုဝ်ဆူအာ ဘော ဂေ ဒူအီ အီဆာရေလ ဘောကာဂ့လျီတ် ဘော ယိတ့်၊ ဝီ လေး ဒူင် ချ ဂေ ဒီ မိူင် ဆီဒိမ် တွိုန်၊ ဝီ ဟာဝ် ချ ဒီ ခူပ် ဘ့လဲင် အိုမ် ယောဒါန် အာတ့် ပွိုန် ဂေ ဒီ ကာလုဝ်း အိုမ် တီ။ 2 ဝါယ် ဟဲ့ နုဝ့် အူယ် ဆီငဲ၊ ဂေ ဒါ တာင် ဘော ဟာဝ် လိုပ် ခဲင် ဒူင် ချ ဂေ ဒွန် ပ့လုဝ့်။ 3 ဘော ကာလာင် ဒီ ဒူအီ ကိူန် တဝ်း၊ “ဆေ ဘေ ဟီ ယိုဝ် ဂေ ဒါ အီ လှူ ဒီ ဇဝ်ဖြာ အီ မုး ဒူအီ အာလေဝီ၊ ဆေ ဂေ ဟဲ့ ကာဂွတ် ဟာဝ် ဇီဒိူက် ဇဝ်ဖြာ ပီ ကြိုပ် ဘေ၊ တဲး ဘေ ဘောကာဂ့လျီတ် ယိတ့် လေး ဒူင် ကွယ် ဘေ ဘော ဟာဝ် ဒူပ် ဂေ။ 4 ပါယ် တီ ဘေ ဒီ နပ် န့တေန့် ဒူင် လုဝ် ဟာဝ် ဘေ။ ခုဝ်၊ ဘေ ညှမ် ဒွိုမ် ဇမ် ဒီ တီ ဒေါ မှဝ်။ ဘေ ယီ တူ ပွိုန် ဟာဝ် ကာတတ် ဇီဒိူက် ဇဝ်ဖြာ၊ တဲး ဘေ ကွယ် ယာန်၊ တဲး န့ တူင့် အာ ဟြဲန့် ကာနိး။”

5 အာယုဝ်ဆူအာ ပီ ဝီ ကာလာင် ဒီ ဂေ ဒူအီ အီဆာရေလ တဝ်း၊ “တဲး ဘေ ဘူင် တဲး ဒုဝ် ဘေ ဆီငါ။ ခုဝ်၊ ခဲညှာ ဇဝ်ဖြာ ဒီ ဘူင် အီ မွှိုမ် အာမ် ကာဆဝ် ကာတဲ ဘေ။”

6 ဝါယ် တီ၊ အာယုဝ်ဆူအာ ပီ ဝီ ကာလာင် ဒီ ဂေ ဒါ အီ လှူ ဒီ ဇဝ်ဖြာ တဝ်း၊ “တဲး ဘေ ကာဂွတ် ဟာဝ် ဇီဒိူက် ဇဝ်ဖြာ ဘော ယဲတ့် ဟာဝ် ဘော ဂေ ဒူအီ ဘောကာဂ့လျီတ်။” အန် ဟဲ့ ဟွတ့် တဝ်း ပါယ် တီ ဂေ မိူဝ် ဘူင် ဒူပ် ပီ တဝ်း အန် တီ။

7 ဇဝ်ဖြာ ဝီ ကာလာင် ဒီ အာယုဝ်ဆူအာ တဝ်း၊ “အာတိုဝ် နီ အုဝ် ဒီ စုး ဒီ စုဝ့် မျုက် မဲ ဒီ အာတ့် ဂေ ဒူအီ အီဆာရေလ၊ တဲး ဂေ နပ်၊ အုဝ် ဟဲ့ ကွယ် ရိုမ် ဒူပ် မဲ၊ တဲး န့ ပီ အုဝ် ဟဲ့ ကွယ် ရိုမ် ဒူပ် အာမုဝ်ဆဲ အာတ့် နီ။ 8 တဲး မဲ ကာလာင် ဒီ ဂေ ဒါ အီ လှူ ဒီ ဇဝ်ဖြာ အီ ကာဂွတ် ဇီဒိူက် ဇဝ်ဖြာ တွိုန် တဝ်း၊ ‘ဆေ ဘေ ဟီ တး ဇမ် ခူပ် ဘ့လဲင် အိုမ် ယောဒါန် တီ၊ တဲး ဘေ လိုပ် စွင့် ဂိူတ် ခဲင် အိုမ် တီ။’”

9 ပါယ် တီ အာယုဝ်ဆူအာ ဘော ဝီ ကာလာင် ဒီ ဂေ ဒူအီ ကိူန် တဝ်း၊ “တဲး ဘေ တး ဒီ နီ၊ ထူမ် ဂြုဝ်း ဇဝ်ဖြာ ပီ ကြိုပ် ဘေ။ 10 ဇဝ်ဖြာ ဒီ တဲး ဘေ နပ်၊ အန် မိုဝ်း အာဆာက် ဘော မုး ဇဝ်ဖြာ အီ အိမ်။ အန် ဘော ကွယ် ကာတဲ ဘေ၊ တူ တဲး ဘေ စှိုမ်။ ခုဝ်၊ အန် ဇဝ် ဒီ ဟုဝ် တဝ် ဂေ ဒူအီ ကာနန့်၊ ဒူအီ ဟေထိတ်၊ ဒူအီ ဟီဝိတ်၊ ဒူအီ ဖေရေဆိတ်၊ ဒူအီ ဂီဂါဆိတ်၊ ဒူအီ အာမုဝ်ရိတ် ဘော ဒူအီ ယေဘူဆိတ် တဲး ဂေ လေး တဝ် ဒီ အာတ့် ဘေ အာခါခ်ု။ 11 ဘ်ု ဘေ ယွတ်၊ ဇီဒိူက် ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒဲင် ကာဒါယ် နီ၊ န့ ဒီ ယဲတ့် ဘေ ကာလုဝ်း အိုမ် ဘ့လဲင် ယောဒါန်။ 12 ပါယ် တီ တဲး ဘေ ရဝ်း ဒူအီ ဂိုဝ် ဒီ အာ ဝီ ကာတဲ ဘေ ဒူအီ အီဆာရေလ ဂိုဝ် ဒီ အာ ခြိုဝ်၊ အူ ခြိုဝ် အူ ဝီ။ 13 ဆေ ဂေ ဒါ အီ လှူ ဒီ ဇဝ်ဖြာ ဟဲ့ ကာဂွတ် ဇီဒိူက် ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒဲင် ကာဒါယ်၊ ဆေ ဂေ ဇာပ် ဟာဝ် ခဲင် အိုမ် ယောဒါန် တီ၊ အိုမ် တီ ဒီ ဘော ဂိူတ် အူ ဇေန့်၊ အာဝ် ဟူ လှဲ။ အိုမ် အီ လှဲ တး နာ တုဝ်း အန် မိူဝ်၊ န့ ဒီ ဘော ကာဇု မ့ပိုမ် အူ ပ့လုဝ့်။”

14 အန် ဟဲ့ ဟွတ့် ကာလာင် ပါယ် တီ ဂေ ဒူအီ ကိူန် ဘော လေး ခဲင် ဒူင် ချ ဂေ၊ ဟာဝ် ကာလုဝ်း အိုမ် ဘ့လဲင် ယောဒါန်။ ဂေ ဒါ အီ လှူ ဒီ ဇဝ်ဖြာ မိူဝ် ကာဂွတ် ဇီဒိူက် ဇဝ်ဖြာ ယဲတ့် ဒီ အာတ့် ဂေ။ 15 ဒေါ အန် တီ န့ မုး အာခြာဝ် ဆုဝ့် အီ ဒီ ငှုဝ်။ အိုမ် ဘ့လဲင် ယောဒါန် ပီ ဘော ဟဲ့ တာင် ကော နုဝ့် လုတ့် မိူဝ်၊ ဂေ ဒါ အီ လှူ ဒီ ဇဝ်ဖြာ အီ ကာဂွတ် ဇီဒိူက် ဇဝ်ဖြာ၊ ဒေါ ညဲတ့် ဟာဝ် ဂေ ခဲင် အိုမ် တီ၊ 16 အိုမ် အီ လှဲ တး တွိုန်၊ န့ ဘော ဂိူတ် အူ ဇေန့်။ အိုမ် အီ လှဲ တး နာ တုဝ်း အန် မိူဝ်၊ န့ ဘော နပ် ဒီ ဝီ ဆုတ် ဝိဝ် နာ ပန် ကော တူင့် ကာဆဝ်၊ ကော ဝီ ဇမ် ဒီ မိူင် အာထမ် အီ ကွယ် ခူပ် မိူင် စာတာန။ အိုမ် အီ လှဲ ဟာဝ် နာ အာတ့် အီ လူင် ဒီ အိုမ် ဒိုင် ဆယ့် ဆွင့် မိူဝ်၊ န့ ဘော ဟိတ် တူတ့် ဒွန် ပ့လုဝ့်။ ဒူအီ ဂေ တွိုန် ဘော ကာလုဝ်း ဟာဝ် ဇမ် ဘ့လာက် နာ ကွယ် မိူင် ယေရီခုဝ်။ 17 ဒေါ ကာလုဝ်း ဟာဝ် ဂေ ဒူအီ ကိူန် ဒီ ကာဒါယ် ဟေန့် တွိုန်၊ ဂေ ဒါ အီ လှူ ဒီ ဇဝ်ဖြာ အီ ကာဂွတ် ဇီဒိူက် ဇဝ်ဖြာ တွိုန်၊ ဂေ မိူဝ် စွင့် ကာတဲ ဘ့လဲင် ယောဒါန် ဒဲင် ကာဒါယ် ဟေန့်၊ တဲး ဒူအီ ဂေ တွိုန် ကော ကာလုဝ်း တူတ့်၊ ဇမ် ဘ့လာက် နာ ဒွယ်။