1 ဒေါ ဟဲ့ ဟွတ့် ကာလုဝ်း ဂေ ဒူအီ ဘောကာဂ့လျီတ် ဒီ အိုမ် ဘ့လဲင် ယောဒါန် တွိုန်၊ ဇဝ်ဖြာ ဝီ ကာလာင် ဒီ အာယုဝ်ဆူအာ တဝ်း၊ 2 “တဲး မဲ ရဝ်း ဒူအီ ဂိုဝ် ဒီ အာ ဝီ ကာတဲ ဂေ ဒူအီ အီဆာရေလ၊ ရဝ်း ဒွန် ခြိုဝ် အူ ခြိုဝ် အူ ဝီ။ 3 စ်ု ဂေ ဒိုဝ်း မာဝ် ဂိုဝ် ဒီ အာ ဘူင့် ကာတဲ အိုမ် ယောဒါန် ဒူင် စွင့် ဂေ ဒါ အီ လှူ ဒီ ဇဝ်ဖြာ တွိုန်။ တဲး ဂေ ဂွတ် ဟာဝ် မာဝ် တီ၊ ဟာဝ် အုန် ဒူင် ဒီ ချ ဘေ မှိုဝ် အာတိုဝ် နီ။”

4 ဟဲ့ ဟွတ့်၊ အာယုဝ်ဆူအာ ဝီ ဒဲ့ ဂေ ဒူအီ ဂိုဝ် ဒီ အာ ဝီ ပဲ့ ဟဲ့ ရဝ်း အုန် အန် တွိုန်၊ အီ မုး အူ ခြိုဝ် အူ ဝီ။ 5 အန် တဝ်း ဒီ ဂေ၊ “တဲး ဘေ လိုပ် လူင် ခဲင် ဘ့လဲင် တီ၊ ဝီ ဟာဝ် နာ ဒွယ် ဇီဒိူက် ဇဝ်ဖြာ ပီ ကြိုပ် ဘေ။ တဲး ဘေ ဒိုဝ်း ဒီ ဂွတ် မာဝ် အူ ဝီ အူ ဘူင့် အာဒါ ဒူအီ အီဆာရေလ ဒွန် ခြိုဝ်။ 6 မာဝ် တီ၊ တဲး န့ ဘဲန် အီ ဒွါ ဆာဒိက် ဒီ ဘေ၊ တဲး ဘေ လှုဝ်း ပဲ့ ဟဲ့ ဒွိုမ် ဘူင် ဇဝ်ဖြာ။ နာ အာတ့် ဟာဝ်၊ ဆေ လှုက်လှာန် ဘေ ဘော ဒီမွှတ် ဘေ တဝ်း၊ ‘မာဝ် နီ မုး လွင် မာဆေ။း’ ဆေ ဂေ ဘော ဒီမွှတ် ပါယ် တီ 7 ဘေ လုဝ် တဝ်း ဒီ ဂေ၊ ‘ဒေါ ဒိုဝ်း ယေ ဇီဒိူက် ဇဝ်ဖြာ၊ ကာလုဝ်း အိုမ် ဘ့လဲင် ယောဒါန် နီ၊ အိုမ် နီ ဟဲ့ ဟိတ် အူ ဇေန့်။’ ပါယ် တီ မာဝ် ဂေ နီ ဘဲန် အီ ဒွါ ဆာဒိက်၊ တဲး ဂေ ဒူအီ အီဆာရေလ လှုဝ်း ဆေဆေ အီ ဟဲ့ ဘုဝ် ဘဲန် ဒီ နီ။”

8 ဂေ ဒူအီ အီဆာရေလ မိူဝ် ဘူင် ဒူပ် ပီ ကာလာင် ဇဝ်ဖြာ ဒီ အာယုဝ်ဆူအာ တီ။ ဂေ မိူဝ် ဒိုဝ်း မာဝ် ဂိုဝ် ဒီ အာ ဘူင့် ကာတဲ ဘ့လဲင် အိုမ် ယောဒါန် တွိုန်၊ တဲး န့ ဒူပ် ခြိုဝ် ဒူအီ အီဆာရေလ ဂိုဝ် ဒီ အာ မျုဝ်။ ဂေ မိူဝ် ဒိုဝ်း ဟာဝ် ဘ့လေး ကာဇု အုန် ဒူင် ချ ဂေ။ 9 အာယုဝ်ဆူအာ ဝီ ဒိုဝ်း မာဝ် ဂိုဝ် ဒီ အာ ဘူင့် တီ၊ ဝီ ဘ့လေး ကာစွင့် ကာတဲ အိုမ် ဒူင် ညဲတ့် ဂေ ဒါ အီ လှူ ဒီ ဇဝ်ဖြာ အီ ကာဂွတ် ဇီဒိူက် ဇဝ်ဖြာ တွိုန်။ မာဝ် ဂေ တီ ဆီ ကွယ် ဒီ တီ ကော ဇမ် အာတိုဝ် နီ။

10 ဂေ ဒါ အီ လှူ ဒီ ဇဝ်ဖြာ အီ ဟဲ့ ကာဂွတ် ဇီဒိူက် ဇဝ်ဖြာ၊ ဂေ ဟဲ့ စွင့် ကာတဲ ဘ့လဲင် အိုမ် ယောဒါန် တီ၊ တဲး န့ ကော ဟွတ့် တူတ့် ပဲ့ ဟဲ့ ကာလာင် ဇဝ်ဖြာ ဒီ အာယုဝ်ဆူအာ လွင် ပီ ဒီ လုဝ် ဝီ ကာလာင် အန် ဒီ ဂေ ဒူအီ ကိူန်။ လွင် အန် တီ န့ ဘော ဒူပ် ပီ ကာလာင် အုန် အာမုဝ်ဆဲ ဒီ အာယုဝ်ဆူအာ။ ပါယ် တီ ဂေ ဒူအီ ကိူန် ဟဲ့ ပီခြန် ဂေ ဒီ ကာလုဝ်း အိုမ် တီ ဒွန် အီ။ 11 ဂေ ဒူအီ ဘောကာဂ့လျီတ် ဟဲ့ ဟွတ့် ကာလုဝ်း ဟာဝ် ပွုန် တူတ့်၊ ဇီဒိူက် ဇဝ်ဖြာ ဘော ဂေ ဒါ အီ လှူ ဒီ ဇဝ်ဖြာ ဘော ဝီ ဟာဝ်၊ တဲး ဘော ဂေ ဇမ် ဘ့လာက် နာ ဒွယ်၊ တဲး ဂေ ဒူအီ ကိူန် ပွိုန် ဒီ ယိုဝ်။ 12 အီ မုး ခြိုဝ် အာရူဘေန်၊ ခြိုဝ် အာဂတ် ဘော ခြိုဝ် အာမာနာဆေ အာဒါ အူ ကာတဲ အီ ဂူင့် ခြိုင် ကာဂုဝ်း တွိုန်၊ ဂေ ဘော ကာလုဝ်း ယဲတ့် ဒီ အာတ့် ဒူအီ အီဆာရေလ၊ တဲး န့ ဒူပ် ပီ ဒွိုမ် ကာလာင် အုန် အာမုဝ်ဆဲ။ 13 ဂေ ဒါ ဆိုက် အီ ဟဲ့ ရဲန် ဒုဝ် ဘော ဂူင့် ခြိုင် ကာဂုဝ်း၊ အီ ဟဲ့ ကာလုဝ်း၊ ဂေ ကွယ် ဖွုန် မှိုန့် ဝီ။ ဂေ ဟဲ့ ကာလုဝ်း ဒီ အာတ့် ဇဝ်ဖြာ၊ ဇမ် ခဲင် ဂ့လင် နာ ရေတ့် မိူင် ယေရီခုဝ်။

14 ဆီငဲ တီ၊ ဇဝ်ဖြာ ဟဲ့ တဲး ဂေ ဒူအီ အီဆာရေလ ရီမာတ် အာယုဝ်ဆူအာ၊ တဲး အန် မိုဝ်း အာဖုင် ဒင်ခုဝ် တာင်။ ဂေ မိူဝ် ရုဝ်ဆေ အန် ဘော စုဝ် အန်၊ ပီ ဒေါ ရုဝ်ဆေ ဂေ အာမုဝ်ဆဲ တွိုန်။

15 ဒေါ အန် တီ ဇဝ်ဖြာ ဝီ ကာလာင် ဒီ အာယုဝ်ဆူအာ တဝ်း၊ 16 “တဲး မဲ စ်ု ဂေ ဒါ အီ လှူ ဒီ ဇဝ်ဖြာ အီ ကာဂွတ် ဇီဒိူက် ဇဝ်ဖြာ တွိုန်၊ တဲး ဂေ လေး ခဲင် အိုမ် ဘ့လဲင် ယောဒါန် တီ။”

17 အာယုဝ်ဆူအာ မိူဝ် ကာလာင် ဒီ ဂေ ဒါ အီ လှူ ဒီ ဇဝ်ဖြာ အူ ဇေန့် တဝ်း၊ “တဲး ဘေ လေး တး ခဲင် အိုမ် တီ။”

18 ဒေါ ဟဲ့ ဟုဝ့် ဂေ ဒါ အီ လှူ ဒီ ဇဝ်ဖြာ အီ ကာဂွတ် ဇီဒိူက် ဇဝ်ဖြာ၊ ဇမ် ဒီ ဘာင် ဘ့လဲင် အိုမ် ဒဲင် ကာဒါယ် ဟေန့် တီ၊ ဒေါ အန် တီ အူ ဇေန့်၊ အိုမ် မိူဝ် ဝီ လှဲ တး ကော နုဝ့် လုတ့်၊ ဇမ် ဒီ ခူပ် အန် ပီ ဘြိမ်။

19 ဂေ ဒူအီ အီဆာရေလ ဟဲ့ ကာလုဝ်း အိုမ် ဘ့လဲင် ယောဒါန် တီ ဒေါ ဇမ် မာဂျီန် ဒေါ ဂုဝ်၊ ဆီငဲ ဂိုဝ်။ ဂေ မိူဝ် လေး ဒူင် ကွယ် ဂေ ခူပ် ဘာင် အိုမ် ဘ့လဲင် ယောဒါန်၊ ဝီ ချ ဒီ ဒူင် စိူဝ် ဂီလဂါ အီ ကွယ် ဒီ ကာအုန် ကာဒါယ် နာ လေး ဆီငဲ မိူင် ယေရီခုဝ် တွိုန်။ 20 မာဝ် ဂိုဝ် ဒီ အာ ဘူင့် ပီ ဒိုဝ်း လေး ဂေ ခဲင် ဘ့လဲင် အိုမ် ယောဒါန် တွိုန်၊ အာယုဝ်ဆူအာ ဝီ ကာစွင့် အုန် ဒီ ဒူင် စိူဝ် ဂီလဂါ တီ။ 21 အန် ဝီ ကာလာင် အုန် ဒီ ဂေ ဒူအီ အီဆာရေလ တဝ်း၊ “နာ အာတ့် နီ ဟာဝ်၊ ဆေ လှုက်လှာန် ဘေ ဘော ဒီမွှတ် တဝ်း၊ ‘မာဝ် နီ၊ န့ မုး လွင် မာဆေ။း’ 22 ဘေ ဝီ လုဝ် ကာလာင် ဒီ ဂေ တဝ်း၊ ‘ဒေါ ကာလုဝ်း ဂေ ဒူအီ အီဆာရေလ ဒီ အိုမ် ဘ့လဲင် ယောဒါန် နီ၊ ဂေ ဟဲ့ ဟာဝ် ဒဲင် ကာဒါယ် ဟေန့်။ 23 ခုဝ်၊ ဇဝ်ဖြာ ပီ ကြိုပ် ဘေ ဟဲ့ ဘူင် တဲး အိုမ် ဘ့လဲင် ယောဒါန် နီ ဟိတ်၊ တဲး ယေ ဒွန် အီ ကော ပွိုန် ဒီ ကာလုဝ်း ဆီချာ ဟွတ့် တူတ့်။ န့ ဟဲ့ ပီ ဒေါ ဟဲ့ ဘူင် အန် ဇဝ် တဲး အိုမ် ဒီနှူင် ရေန့် ဟိတ် အာဒါ အေ တွိုန်။ 24 ပါယ် တီ တဲး ဒူအီ ဒဲင် ကာဒါယ် နီ နပ် ဘောကာဂ့လျီတ် ခဲ့ တာင် အာဖုင် ဒင်ခုဝ် ဇဝ်ဖြာ၊ တဲး ဘော ဘေ နပ် ဒီ ရုဝ်ဆေ ဇဝ်ဖြာ ပီ ကြိုပ် ဘေ ဆေဆေ။’”