ခဲ့ ကွယ် ခုန်ဒီခမ် ဒူအီ အာမုဝ်ရိတ် အီ ကွယ် နာ ဂေတ့် ဆီငဲ အိုမ် ဘ့လဲင် ယောဒါန် ဘော ဂေ ခုန်ဒီခမ် ဒူအီ အာမျုဝ် ကာနန့် အီ ကွယ် ခူပ် အိုမ် နမ်မုက်ဆာရာ ဘောကာဂ့လျီတ်၊ ဂေ ဘော ယိုဝ် လွင် ဇဝ်ဖြာ ဟဲ့ ဘူင် တဲး အိုမ် ဘ့လဲင် ယောဒါန် ဟိတ်၊ တဲး ဂေ ဒူအီ အီဆာရေလ ကော ပွိုန် ဒီ ကာလုဝ်း တူတ့်၊ ဂေ ဘော ယုဝ် ကာဆဝ်။ နဝ်း ယ နဝ်း ကျ ဂေ ဘော ဟြာယ် ကူပ် ဂေ ဒူအီ အီဆာရေလ တီ။

2 ဒေါ အန် တီ ဇဝ်ဖြာ ဝီ ကာလာင် ဒီ အာယုဝ်ဆူအာ တဝ်း၊ “တဲး မဲ ဒိုဝ်း မာဝ်၊ ဘူင် တဲး န့ လမ် ပီ အာတိုမ်၊ ဝီ တဲး ဘေ ဆွာ့ ဝဲန် ဟုန် လခါနာ အီမာယ် ဒူအီ အီဆာရေလ အီ ညှမ် ဒွိုမ် ဆွာ့။” 3 ပါယ် တီ အာယုဝ်ဆူအာ ဘော ဘူင် ဒူပ် ပီ ကာလာင် ဇဝ်ဖြာ ဒီ အန်။ အန် ဘော ဆွာ့ ဝဲန် ဟုန် လခါနာ အီမာယ် ဂေ ဒူအီ အီဆာရေလ ဒေါ ကွယ် ဂေ ဒီ နွန် ကီပါတ်ဟာရလွတ်။

4 အာယုဝ်ဆူအာ လုဝ် ဝီ ဆွာ့ ဝဲန် ဟုန် လခါနာ အီမာယ် ဂေ။ ခုဝ်၊ ဂေ အီမာယ် အီ လေး တး ခဲင် မိူင် အဲဂိုပ် တွိုန်၊ ဂေ ဟဲ့ ဟွတ့် ယမ် တူတ့် ခဲင် ပြဲ ကာဟဝ်း ဒေါ ဟာဝ် ဂေ ဒူပ် န့တေန့်။ 5 ဂေ အီမာယ် အီ လေး တး ခဲင် မိူင် အဲဂိုပ်၊ ဂေ ဟဲ့ ဟွတ့် ဆွာ့ ဝဲန် ဟုန် လခါနာ ဂေ။ ဂေ အီ ဂွိုတ် ကာမာယ်၊ အီ ဂွိုတ် ဒေါ ဟာဝ် ဂေ ဒူပ် န့တေန့် တီ၊ ဂေ ဘောကာဂ့လျီတ် ညှမ် မိုဝ်း ဒီ ဆွာ့ ဝဲန် ဟုန် လခါနာ ဂေ။ 6 ခုဝ်၊ ဂေ ဒူအီ အီဆာရေလ ဟဲ့ ဟာဝ် ဒူပ် န့တေန့် အာဒါ ဖွုန် ဂိုဝ် ဆီနမ်။ ဒေါ အန် တီ ဂေ ဒါ ဆိုက် အီ တူ ထူမ် ဂြုဝ်း ဇဝ်ဖြာ ဟဲ့ ယမ် တူတ့် ခဲင် ပြဲ ကာဟဝ်း တီ။ ဇဝ်ဖြာ မိူဝ် ဟဲ့ ဟွတ့် ကာလာင် အုန်၊ ဂေ တူ ပွိုန် ဒီ ယိုဝ် မိူင် ဘွတ်၊ မိူင် မွှိုမ်၊ အီ မုး ကာဒါယ် ဆီချာ၊ အီ မုး မိူင် ပဲ့ ဟဲ့ ဒွိုမ် ကာဆဲန့် အန် ဇဝ် ဒီ ဒွါ ဒီ ဂုန့် ဒင် ဂေ တွိုန်။ 7 လှုက်လှာန် ဒူအီ ဂေ တီ ညှမ် ဒွိုမ် ဆွာ့ ဝဲန် ဟုန် လခါနာ အီမာယ်။ ခုဝ်၊ အာယုဝ်ဆူအာ လုဝ် ဝီ ဆွာ့ ဝဲန် ဟုန် ဂေ ဘော ဂွန် ဂေ အီ ဂွိုတ် ကာမာယ်။ 8 ဝါယ် ဟဲ့ ဟွတ့် ဆွာ့ ဝဲန် အန် ဟုန် လခါနာ အီမာယ် ဂေ တီ၊ ဒူအီ ဂေ တီ ဘောကာဂ့လျီတ် ဘော ကွယ် ဒူင် ချ ဂေ တီ၊ တဲး ဒိမ် ဂေ ကော ကဲန်။

9 ဇဝ်ဖြာ ဝီ တဝ်း ဒီ အာယုဝ်ဆူအာ၊ “အာတိုဝ် နီ၊ အုဝ် ဟဲ့ ဒိုဝ်း ဝဲန် ပဲ့ ဟဲ့ နဲန အီ ဟဝ် ဘော ပဲ့ ဟဲ့ ခမ် ဘေ ဒီ ဘဲန် မှာယ် ခဲင် မိူင် အဲဂိုပ် တွိုန်။” ပါယ် တီ ဒူင် တီ ဂေ ဘော တဝ်း၊ တဲး န့ စိူဝ် ဂီလဂါ^a ကော ဇမ် အာတိုဝ် နီ။

10 ဒေါ ကွယ် ဂေ ဒူအီ အီဆာရေလ ဒီ ဒူင် စိူဝ် ဂီလဂါ တီ၊ ဂေ ဘော ဘူင် ဘ့လွယ် ခဲင် ဂ့လင် အီ ကွယ် ခူပ် မိူင် ယေရီခုဝ် ဒေါ မုး မာဂျီန် တီ၊ ဟဲ့ ဇမ် ဆီငဲ ဂိုဝ် ဒီ မ့ဖွုန်။ ဘ့လွယ် တီ ဂေ ဘူင် ခဲင် မှိုဝ်။ န့ ဘော မုး ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ။ 11 ဆီငဲ ဝါယ် ဘ့လွယ် တီ၊ ဂေ ဝီ ဟူမ် ပီ ဆမ် အီ ခဲင် မိူင် တီ ဘော ခါမုန် အီ တူ ဟပ် ဆီနမ် ဘြး ဘော ငှုဝ် မာတုး။ 12 ခါမုန် မာနာ တွိုန်၊ န့ ဘော ဟြာယ် ဆီငဲ တီ၊ အာဝ် ဟူ မိုဝ်း။ ဝါယ် တီ ဂေ ဒူအီ အီဆာရေလ အာဝ် ဟူ မိုဝ်း ဒီ ဟူမ် ခါမုန် မာနာ တီ။ ဆီနမ် တီ ဂေ ဝီ ဟူမ် ငှုဝ် ဒီဂါဝ် အီ လေး တး ခဲင် မိူင် ကာနန့်။

13 ဒေါ ကွယ် အာယုဝ်ဆူအာ ခူပ် မိူင် ယေရီခုဝ် တီ၊ အန် ဝီ ယိုဝ် ဒူအီ အူ ဝီ အီ ဟဲ့ ဟွတ့် ထွတ် ဒီ ဂူင့် မာပွါ့ လာင် အန်၊ ဝီ စွင့် ဒီ အာတ့် အာယုဝ်ဆူအာ။ အာယုဝ်ဆူအာ ဘော ဟာဝ် ဒူင် ကွယ် အန် ဘော ဒီမွှတ် အန် တဝ်း၊ “မဲ မုး ဒူအီ ဘ့လာက် ယေ။း ဆေ အာဝ် ပါယ် တီ မဲ မုး ဘ့လာက် ရန်ဆူ ယေ။း”

14 ဒူအီ တီ ဝီ တဝ်း၊ “အာဝ် မုး ပါယ် တီ အုဝ် အီ မုး ဒါ ဘုဝ် တာင် အီ အိုပ် ဒါ ဆိုက် ဇဝ်ဖြာ၊ အုဝ် ဟဲ့ တး ဒီ နီ။” အာယုဝ်ဆူအာ ဘော ဝီ မုတ် ဂိုပ် ဒီ ကာဒါယ် ဝီ ကြိုပ် အန် ဘော ဒီမွှတ် အန် တဝ်း၊ “မဲ ဇဝ် ဆီ ကာလာင် မာဆေ ဒီ အုဝ်။း” 15 အန် ဟဲ့ ဟွတ့် တဝ်း ပါယ် တီ ဒါ ဘုဝ် တာင် အီ အိုပ် ဒါ ဆိုက် ဇဝ်ဖြာ တွိုန် ဝီ တဝ်း၊ “တဲး မဲ ဘုတ့် ခူဒိန့် မဲ။ ခုဝ်၊ ဒူင် စွင့် မဲ တီ၊ န့ မုး ဒူင် ဆီငါ ဘွတ်။” အာယုဝ်ဆူအာ မိူဝ် ဘူင် ဒူပ် ပီ တဝ်း အန် တီ။