ဒေါ အန် တီ မာလုဝ်း မိူင် ယေရီခုဝ် တွိုန် ဟဲ့ ကာဘိတ် တူတ့် ဒွန် ပ့လုဝ့်။ ဂေ ဘော ဘ်ု ဆီချာ၊ ကွဲ့ တဲး ဂေ ဒူအီ အီဆာရေလ ပွိုန် ဒီ လိုပ်။ ဒူအီ လိုပ် ဒူအီ လေး အူ ဝီ မိူဝ် အာဝ် မိုဝ်း။

2 ဇဝ်ဖြာ ယီ ကာလာင် ဒီ အာယုဝ်ဆူအာ တဝ်း၊ “ဘ်ု မဲ ယွတ်၊ အုဝ် ဒီ ဒိုဝ်း မိူင် ယေရီခုဝ် ဘော ခုန်ဒီခမ် ခဲင် မိူင် တီ ဘော ဂေ ဒါ ဆိုက် အန် အီ ဟဲန့် ကာဆဝ်၊ ဝီ အာပ် ဒီ မဲ။ 3 ဘော မဲ ဘော ဂေ ဒါ ဆိုက် မဲ၊ ဘေ လုဝ် ဟာဝ် ရူပ် မိူင် တီ အူ ဆီငဲ အူ ဇေန့်၊ တဲး န့ ကော နုဝ့် ဒဝ် ဆီငဲ။ 4 ဒါ အီ လှူ ဒီ ဇဝ်ဖြာ အာဒါ ဘူ ဝီ လုဝ် ဂူင့် ဝဝ် နိုင် ပဲ၊ အူ ဝီ အူ ဘူင့်၊ ယဲတ့် ဒီ အာတ့် ဇီဒိူက် ဇဝ်ဖြာ။ ဟီ ဇမ် ဆီငဲ မ့ဘူ၊ ဘေ လုဝ် ဟာဝ် ရူပ် မိူင် တီ အာဒါ ဘူ ရူပ်။ ဒေါ ဟာဝ် ဘေ၊ ဂေ ဒါ အီ လှူ ဒီ ဇဝ်ဖြာ လုဝ် ဘုတ် ဝဝ် နိုင် ပဲ တီ။ 5 ပါယ် တီ ဂေ လုဝ် ဘုတ် နိုင် ပဲ တီ၊ တဲး န့ ဟမ် တူင့် ကာဆဝ်။ ဒေါ ယိုဝ် ဘေ ဟမ် တီ၊ ခဲ့ ကွယ် ဒူအီ ဘောကာဂ့လျီတ်၊ တဲး ဘေ ဒတ် တာင် တာင်၊ ဒတ် ဆီနန် ဆီနိူင်။ ရဲင် မိူင် တီ ဒီ ဒီဂ့လဝ်း စုဝ်း အူ ဇေန့်။ ပါယ် တီ ခဲ့ ကွယ် ဂေ ဒူအီ၊ ဂေ ဒီ ဟာဝ် ဟုဝ့် ဆိူဝ် ခဲင် မိူင် ရာင် အာဆေ ရာင် အန်။”

6 အာယုဝ်ဆူအာ အီ မုး ဂွန် အာနုန် မိူဝ် ဒဲ့ ဂေ ဒါ အီ လှူ ဒီ ဇဝ်ဖြာ၊ ကာလာင် ဒီ ဂေ တဝ်း၊ “တဲး ဘေ ကာဂွတ် ဟာဝ် ဇီဒိူက် ဇဝ်ဖြာ၊ တဲး ဂေ ဒါ အီ လှူ ဒီ ဇဝ်ဖြာ အာဒါ ဘူ ဝီ ဒိုဝ်း ဝဝ် နိုင် ပဲ၊ ဟာဝ် ယဲတ့် ဒီ အာတ့် ဇီဒိူက် ဇဝ်ဖြာ။” 7 အန် မိူဝ် ကာလာင် ဒီ ဂေ ဒူအီ ကိူန် တဝ်း၊ “တဲး ဘေ ဟာဝ် ရူပ် မိူင် တီ။ တဲး ဂေ ဒါ ဆိုက် အီ ဂူင့် ခြိုင် ကာဂုဝ်း၊ တဲး ဂေ ယဲတ့် နာ အာတ့် ဇီဒိူက် ဇဝ်ဖြာ။”

8 အာယုဝ်ဆူအာ ဟဲ့ ဟွတ့် ကာလာင် ပါယ် တီ ဒီ ဂေ ဒူအီ ကိူန်၊ ဂေ ဒါ အီ လှူ ဒီ ဇဝ်ဖြာ ဘူ ဝီ မိူဝ် ဒိုဝ်း ဒီ ဂူင့် ဝဝ် နိုင် ပဲ ဘူ ဘူင့် ဘော ဘုတ် ဘော ဟာဝ်။ ဒူအီ အီ ကာဂွတ် ဇီဒိူက် ဇဝ်ဖြာ ဘော ဒူပ် ဒီ ပန် ဂေ။ 9 နာ အာတ့် ဂေ ဒါ အီ လှူ ဒီ ဇဝ်ဖြာ အီ ဘုတ် ဝဝ် နိုင် ပဲ တွိုန် မိူဝ်၊ ဟဲ့ မိုဝ်း ဂေ ဒါ ဆိုက် အီ ဂူင့် ခြိုင် ကာဂုဝ်း။ ဂေ ယဲတ့် ဒီ အာတ့် ဒွန် အီ။ နာ ပန် ဇီဒိူက် ဇဝ်ဖြာ တွိုန် မိူဝ်၊ န့ ဟဲ့ ဝီ မိုဝ်း ဒါ ဆိုက် အီ ဘ်ု နာ ပန်။ ဂေ အီ လုဝ် ဘုတ် ဝဝ်၊ ဂေ ဘော ဘုတ် ဆေဆေ။ 10 အာယုဝ်ဆူအာ ဘော ကာလာင် ဒီ ဂေ ဒူအီ ကိူန် တဝ်း၊ “အာတ့် ဇမ် အာခြာဝ် ဒီ စ်ု အုဝ် ဘေ ဒတ်၊ ဘေ ကွဲ့ ဒတ် ဒေါ မှဝ်။ ဂြုဝ်း မိူဝ်၊ ဘေ ကွဲ့ ဂြုဝ်း။ ဆေ အုဝ် ယီ စ်ု ဘေ ဒတ်၊ တဲး ဘေ ဒတ် တာင် တာင်။” 11 ပါယ် တီ အန် မိူဝ် စ်ု ဂေ ကာဂွတ် ဟာဝ် ဇီဒိူက် ဇဝ်ဖြာ တွိုန်၊ ဟာဝ် ရူပ် မိူင် တီ အာဒါ အူ ရူပ်၊ ပီ ဝီ တဲး ဂေ လိုပ် ကွယ် ခဲင် ဒူင် ချ ဂေ အူ မှိုဝ်။

12 ပါ ခဲညှာ အာယုဝ်ဆူအာ မိူဝ် ယိတ့် ဆိန့် ဆိန့်ဝး စေဝ်။ 13 အာဒါ ဆီငဲ တီ မိူဝ်၊ ဂေ ဒါ အီ လှူ ဒီ ဇဝ်ဖြာ ဘော ဒါ ဆိုက် ဂေ တွိုန် ဟာဝ် ရူပ် မိူင် တီ၊ ဟာဝ် လာယ် ဒါမ် ပီ ဆီငဲ အာတ့် တွိုန်။ ဂေ ဒါ ဆိုက် အီ ဂွင့် အီ ရဲ ဂေ တွိုန် မိူဝ်၊ ဟဲ့ ယဲတ့် ဒီ အာတ့်။ ဂေ ဒါ အီ လှူ ဒီ ဇဝ်ဖြာ အာဒါ ဘူ ဝီ အီ ဂူင့် ဝဝ် နိုင် ပဲ ဘူ ဘူင့် တွိုန် မိူဝ် ဟာဝ် ဒီ အာတ့် ဇီဒိူက် ဇဝ်ဖြာ ဘော ဘုတ် ဝဝ်။ နာ ပန် ဂေ တီ၊ ပဲ့ ဟဲ့ ဝီ မုး ဂေ ဒါ အီ လှူ ဒီ ဇဝ်ဖြာ အီ ကာဂွတ် ဇီဒိူက် ဇဝ်ဖြာ ဘော ဂေ ဒါ ဆိုက် အီ ဂွင့် အီ ရဲ ဟဲ့ ဝီ ဟာဝ် ဒါမ် ဂေ တီ။ ခါ နီ မိူဝ်၊ ဂေ ဘုတ် ဝဝ် နိုင် ပဲ တီ အာဒါ အူ ရူပ်။ 14 ဆီငဲ ဟာအာ နီ မိူဝ်၊ ဂေ ဟာဝ် ရူပ် မိူင် တီ အာဒါ အူ ရူပ်။ ဟဲ့ ဟွတ့် ဂေ ပီ ဝီ လိုပ် ကွယ် ခဲင် ဒူင် ချ ဂေ တွိုန်။ ဂေ ဘူင် ပါယ် တီ အာဒါ ဒဝ် ဆီငဲ။

15 ဟီ ဇမ် ဆီငဲ မ့ဘူ၊ ဂေ မိူဝ် ယိတ့် ဆိန့် ဆိန့်ဝး စေဝ်၊ ဆိန့် ဒေါ ကာစုး ပြဲ ဒီ ဘ့လာင်။ ဂေ ဟာဝ် ရူပ် မိူင် တီ ဘူ ရူပ် ပီ ဆီငဲ အာတ့် တွိုန်။ န့ ယီ မုး ဆီငဲ တီ၊ ဂေ ပွိုန် ဒီ ဟာဝ် ရူပ် မိူင် တီ အာဒါ ဘူ ရူပ်။ 16 ဒေါ ဇမ် ရူပ် န့ ဘူ၊ ဂေ ဒါ အီ လှူ ဒီ ဇဝ်ဖြာ မိူဝ် ဟဲ့ ခြိုင် ဒီ ဘုတ် ဝဝ် နိုင် ပဲ။ ဒေါ အန် တီ အာယုဝ်ဆူအာ ဝီ စ်ု ဂေ ဒူအီ ကိူန် တဝ်း၊ “တဲး ဘေ ဒတ် တာင် တာင်။ ဇဝ်ဖြာ ဟဲ့ အာပ် မိူင် နီ ဒီ ဘေ။ 17 မိူင် တီ ဘော ဂေ ဒူအီ အီ ကွယ် ခဲင် မိူင် တီ၊ ဘေ လုဝ် ပျာတ့် ဝဲန် တူတ့်၊ တဲး န့ ပီ ကြုဝ် ပီ လှူ ဒီ ဇဝ်ဖြာ။ မာလဲ၊ အီ မုး နာင် ရာဟာပ် ဘော ဒူအီ ခဲင် န့ဟူမ် အန်၊ ဘေ လုဝ် အုန် အာဆာက် ဂေ၊ တဲး ဂေ လွတ် ယမ် ကူပ် ဟဲ့ စွယ်၊ ဟဲ့ ပြာ အန် ဒီ ဒိုဝ်း ချြီင် ဒူအီ အီ ဟဲ့ ဒွိုမ် တး ပြာ ဒီ ချွင် ဒီ လိုပ် ခဲင် မိူင် နီ။ 18 ဘော ကြုဝ် ပီ လုဝ် ပျာတ့် ဝဲန် တီ၊ ဘေ တူ ပွိုန် ဒိုဝ်း အုန် ခေါ အူ မျုဝ်။ ဆေ ဘေ ပြာ ဒီ ဒိုဝ်း အုန်၊ ဘေ လုဝ် ခမ် ဒုက်။ ဘေ ဒီ ဘော တဲး ဘော ဒူင် ချ ဘေ လိုဝ် စှိုမ် တူတ့်။ 19 ဘော မုး ရွိုန်၊ ဘော မုး ခြိဝ်၊ ဘော မုး ကြုဝ်ကြာမ် ဘွင့် ဒေန့် ဘော ဒွန် မျုဝ် အီ မုး ဟိန် ဟဲ့ ဘဲန် အီ ဆီငါ ဘွတ် ဒီ ဇဝ်ဖြာ။ ဘေ လုဝ် ဒိုဝ်း အုန် တူတ့် ခဲင် ဒူင် အုန် ဘေ ကြုဝ် ဇဝ်ဖြာ။”

20 ပါယ် တီ ဂေ ဒါ အီ လှူ ဒီ ဇဝ်ဖြာ ဘော ဘုတ် ဝဝ် နိုင် ပဲ ဂေ တွိုန်။ ဒေါ ယိုဝ် ဂေ ဒူအီ ကိူန် ဟမ် ဝဝ် နိုင် ပဲ တီ၊ ဂေ ဘော ကာဖြူမ် ဒီ ဒတ် ရျီင် အူ ဇေန့်။ ရဲင် မိူင် တီ ဘော ဒီဂ့လဝ်း စုဝ်း အူ ဇေန့်။ ခဲ့ ကွယ် ဂေ ဒါ ဆိုက် ဘောကာဂ့လျီတ်၊ ဂေ ဘော ကာဖြူမ် ဒီ လိုပ် ဟာဝ် ဆိူဝ် ခဲင် မိူင် တီ။ ဂေ ဘော ဟာဝ် ရိုပ် မိူင် တီ။ 21 ဂေ ဘော တာ မာပွါ့ လာင် ဂေ ဘော ဘ့လာ လျီး ဂေ၊ ငဝ်း ယမ် ဒူအီ ခဲင် မိူင် တီ။ ဂေ ဘော ငဝ်း ဝဲန် ဘော အီဘိုန့် ဘော အီမာယ် ဘော ဒူအီ ကတ် ဒူအီ နှိုမ် ဘောကာဂ့လျီတ်၊ တဲး န့ ကော တူတ့်။ ဂေ ဘော ငဝ်း ယမ် ဘော မာမက်၊ မာဘူ ဘော မာလာ ဂေ။ ဂေ တဲး မိူင် တီ ဘော မိူင် ဘဲန် ပီ လှူ ဒီ ဇဝ်ဖြာ။

22 ဒေါ အန် တီ အာယုဝ်ဆူအာ ဝီ ကာလာင် ဒီ ဂါယ် အာ ဝီ အီ ဟဲ့ ဟာဝ် ပြာ ဒီ ချွင် ဒီ ယွတ် မိူင် တွိုန်။ အန် တဝ်း၊ “တဲး ဘာယ် ဟာဝ် ဒီ ကာင် ယာ မာလမ် တွိုန်၊ ဟာဝ် ဒဲ့ အန် ဘော ဒူအီ ခဲင် န့ဟူမ် အန်၊ တဲး ဂေ လေး တး။ တဲး ဘာယ် ဘူင် ဒူပ် ပဲ့ ဟဲ့ ဒိူင် ဟဲ့ ကာဆဲန့် ဘာယ် ဒီ အန်။” 23 ဂါယ် ဘော ဟာဝ် ဒဲ့ နာင် ရာဟာပ် ဘော ဂုန့် မာ အန် ဘော အီကတ် ဝါ အန် ဘော ဒူအီ ခဲင် န့ဟူမ် အန် ဒွန် အီ၊ တဲး ဂေ လေး တး။ ဂေ ဘော ဝီ ဒိုဝ်း ဟာဝ် အုန် ဂေ ခူပ် ဒူင် ချ ဂေ ဒူအီ အီဆာရေလ။

24 ဟဲ့ ဟွတ့် ပါယ် တီ ဂေ ဘော ဒိုဝ်း ငဝ်၊ ဒုဝ့် မိူင် တီ ဘော အီ ကွယ် ခဲင် မိူင် တီ။ မာလဲ၊ အီ မုး ရွိုန် ဂေ ခြိဝ်၊ ဘွင့် ဒေန့် ဂေ ဟိန်၊ ဂေ ဝီ ဒိုဝ်း အုန် ခဲင် ဒူင် အုန် ဂေ ကြုဝ် ဇဝ်ဖြာ။ 25 အီ မုး ယာ မာလမ် အီ စိူဝ် နာင် ရာဟာပ် တီ ဘော ဘီနွင် ဝေါဝဲ အန် ဒွန် အီ၊ အာယုဝ်ဆူအာ တဲး ဂေ ကွယ် ဂျာမ်ဆာ ကူပ် ဟဲ့ ဒိုဝ်း ချြီင် အန် ဒူအီ အာ ဝီ အီ ဟဲ့ တး ပြာ ဒီ ချွင် ဒီ ယွတ် မိူင် ယေရီခုဝ် တွိုန်။ လှုက်လှာန် နာင် ရာဟာပ် တီ၊ ဂေ ဘော ပွိုန် ဒီ ကွယ် ကာတဲ ဂေ ဒူအီ အီဆာရေလ ကော ဇမ် ဒေါ တီ နီ။

26 ဒေါ အန် တီ အာယုဝ်ဆူအာ ဝီ ဒိူင် တဝ်း၊ “အာဆေ ဝီ ဆမ် ဝီ မ့ပြာယ် မိူင် ယေရီခုဝ် နီ၊ တဲး အန် ခမ် ကာဆမ် ဒိူင် ဇဝ်ဖြာ။ အာဆေ ဝီ ဘူင် ဝီ ဆမ် စေန့် ရွင့်၊ တဲး အန် စှိုမ် ဂွန် ဂိန့် အန်။ အာဆေ ဝီ ပျိတ့် ရွင့် မာလုဝ်း မိူင်၊ တဲး အန် စှိုမ် ဂွန် တျီ့ အန်။”

27 ပါယ် တီ ဇဝ်ဖြာ မိူဝ် ကွယ် ရိုမ် ဒူပ် အာယုဝ်ဆူအာ။ ဆာဒါင် လွင် အန် ဘော လိုဝ်း ဟာဝ် ဒွန် နာ ဒွန် ပ့လုဝ့်၊ ဒွန် မာန် ဒွန် မိူင်။