1 ဇဝ်ဖြာ ဟဲ့ ဟွတ့် ကာလာင် ဒီ ဂေ ဒူအီ အီဆာရေလ လွင် တူ ပွိုန် ဂေ ဒိုဝ်း အုန် ကြုဝ် ပီ လုဝ် ပျာတ့် ဝဲန် ဂေ တွိုန်။ ဂေ ယီ တူ ထူမ်။ န့ မိုဝ်း ဒူအီ အူ ဝီ၊ အန် စိူဝ် အာခါန်။ အန် မုး ဂွန် အာခါမီ အီ မုး လှာန် အာဇာဘာဒီ။ အာဇာဘာဒီ ဘော မုး ဂွန် အာဇေန်ရာ အီ တး ခဲင် ခြိုဝ် အာယူဒါ တွိုန်။ အန် ဟဲ့ လှိုဝ် ဂြုဝ်း ဇဝ်ဖြာ၊ ဘူင် တဲး ဇဝ်ဖြာ ရူ ကာဆဝ် ဒီ ဂေ ဒူအီ အီဆာရေလ ဘောကာဂ့လျီတ်။

2 အာယုဝ်ဆူအာ ဝီ စ်ု ဒူအီ မင် အီ တဲး ဂေ လေး ဒီ မိူင် ယေရီခုဝ်၊ ဝီ ဟာဝ် ယွတ် မိူင် အာယီ၊ မိူင် အီ ကွယ် ကာချြီ့ ဒီ မိူင် ဘေတ်အာဝေန် အီ ကွယ် နာ လေး ဆီငဲ မိူင် ဘေဒါအေန်။ အန် မိူဝ် တဝ်း ဒီ ဂေ၊ “တဲး ဘေ ဟုဝ့်၊ ချွင် ဒီ ယွတ် ဒူင် တီ။” ဟဲ့ ဟွတ့်၊ ဒူအီ ဂေ တီ ဘော ဟာဝ် ယွတ် အူ ဇေန့်။

3 ဂေ ဘော ဝီ တး၊ ကာလာင် ဒီ အာယုဝ်ဆူအာ တဝ်း၊ “အာဝ် လုဝ် တဲး ဒူအီ အေ ဘောကာဂ့လျီတ် ဟာဝ် တိုက် မိူင် အာယီ တီ။ ဒူအီ မွက် အာ ဟြဲန့် အူယ် ဟြဲန့် မိူဝ် ဟဲ့ ဟွတ့် ပွိုန်။ အာဝ် လုဝ် တဲး ဒူအီ အေ ဘောကာဂ့လျီတ် ဟာဝ်၊ ကွဲ့ တဲး ဂေ လုဝ် ညှာပ် ဘော နုန် ပီယေန့်။ ဒူအီ ဂေ တီ ဟဲ့ ပြေတ့် ကာဆဝ်။ 4 ပါယ် တီ ဂေ ဒူအီ အီဆာရေလ မွက် အူယ် ဟြဲန့် ဝီ ဘော ဟာဝ်။ ဂေ ဘော ဝီ ကာဒုး ဒီ တဝ် ဝိဝ် နာ ပန်။ ခုဝ်၊ ဂေ အီမာယ် ခဲင် မိူင် အာယီ ဟဲ့ ပဲ ဂေ။ 5 ဂေ ဒူအီ ခဲင် မိူင် အာယီ ဘော ငဝ်း ယမ် ဒူအီ အီဆာရေလ အူယ် ဂိုဝ် ဒီ ဒဝ် ဝီ။ ဂေ ခုင်ခြး ဒူအီ အီဆာရေလ စုး ဒီ ဘာင် မာလုဝ်း မိူင် ကော ဇမ် ဒီ ဒူင် ဘ့လုဝ်း ဂေ မာဝ်။ ဂေ ဘော ငဝ်း ဂေ ဒေါ လူင် ဂေ ဒူပ် နွန်။ ပါယ် တီ နဝ်း ဂေ ဒူအီ အီဆာရေလ ဘော န့စမ် အူ ဇေန့်၊ အာဝ် ဟူ မိုဝ်း ပ့လူမ်။ ဂေ ဘော ယုဝ် ကာဆဝ်။

6 ဝါယ် အန် တီ၊ အာယုဝ်ဆူအာ ဘော ကာယာတ့် ခြိုင် ပီ တာ အန်၊ တဲး န့ လိုဝ်း ခဲ့ ဟဲ့ က့လိုဝ် အန်။ အန် ဘော မုတ် ဂိုပ် ဒီ ကာဒါယ် ဒီ အာတ့် ဇီဒိူက် ဇဝ်ဖြာ။ ဘော ကွယ် ဒီ တီ ကော ဇမ် ဘာ ဒီ အပ်။ ဂေ ဒါ တာင် အီ ယဲတ့် ဂေ ဒူအီ အီဆာရေလ၊ ဂေ ဘော ဘူင် ပါယ် တီ။ ဂေ ဘော ဒိုဝ်း ကာပုး ဟပ် ဒဲင် ဂိန့် ဂေ။ 7 အာယုဝ်ဆူအာ ဝီ တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ မှဝ် န့ ပါယ် ပီ တဲး မဲ ဒူအီ ဂေ နီ ကာလုဝ်း အိုမ် ဘ့လဲင် ယောဒါန်၊ ဝီ အာပ် ဂေ ဒီ ဒူအီ အာမုဝ်ရိတ်၊ တဲး ဂေ ပွိုန် ဒီ ပျာတ့် ယေ။း ဒေါ ကွယ် ယေ နာ ဒွယ် အိုမ် ဘ့လဲင် ယောဒါန် တွိုန်၊ ဆေ န့ ဟဲ့ ဘြေ့ ဒီ နဝ်း ယေ၊ န့ ဟဲ့ မွှိုမ် ကာဆဝ် ဒီ ယေ။ 8 အိုယ် မဲ ဇဝ်ဖြာ၊ ဆေ ဒူအီ အီဆာရေလ ဟီ စှိုမ် ဒီ ရန်ဆူ ပါယ် နီ၊ ယေ ဒီ တဝ်း မာဆေ ဒီ အီ ဟဝ်။ 9 ဒူအီ အာမျုဝ် ကာနန့် ဘော ဒူအီ ခဲင် မိူင် နီ ဒွန် အီ ဟဲ့ ဟွတ့် ယိုဝ် လွင် အန် တီ။ ဂေ ဒီ ဘော တး ဝဲင် ရူပ် ယေ ဘော ငဝ်း ဝဲန် တူတ့် ယေ ဘောကာဂ့လျီတ်၊ ကွဲ့ တဲး ဂေ ဆီ နမ်လှုဝ်း ယေ။ အီ မုး အာဖုင် ဒင်ခုဝ် မဲ ဇဝ်၊ မဲ ဒီ ဝီ ဘူင် ပါယ် မှဝ် တဲး န့ လိုဝ်း။း”

10 ဇဝ်ဖြာ ဝီ ကာလာင် ဒီ အာယုဝ်ဆူအာ တဝ်း၊ “ယိတ့်၊ မှဝ် န့ ပါယ် ပီ မုတ် ဂိုပ် မဲ ဒဲင် ကာဒါယ် နီ။း 11 ဒူအီ အီဆာရေလ ဟဲ့ ဟွတ့် လုတ့်။ ဂေ ဟဲ့ လှိုဝ် ဂြုဝ်း ပီ ဒမ် အုန် အုဝ် ဒီ ဂေ။ ဂေ ဟဲ့ ဒိုဝ်း အုန် ကြုဝ် ပီ တဝ်း အုဝ် လုဝ် ပျာတ့် ဝဲန်။ ဂေ ဟဲ့ ပြာ၊ ဟဲ့ ကာလုဝ်၊ ဟဲ့ ဝီ ဒိုဝ်း အုန် ခဲင် ကြုဝ်ကြာမ် ဂေ။ 12 ကူပ် လွင် အန် တီ၊ ဂေ ဒူအီ အီဆာရေလ တူ ပွိုန် ပဲ ရန်ဆူ ဂေ။ ခုဝ်၊ ဂေ လုဝ် ဝီ ကာဘတ် တဝ် ရန်ဆူ ဂေ။ ဒုဝ် ဘူင့် ဂေ ဟဲ့ ကာအာပ် လိုဝ် စှိုမ်။ ဆေ မဲ ယီ တူ ပျာတ့် ဝဲန် ကြုဝ် အီ လုဝ် ပျာတ့် ဝဲန် တီ၊ အုဝ် အာဝ် ဟူ ကွယ် ရိုမ် ဒူပ် မဲ ဒေါ မှဝ်။

13 ယိတ့်၊ တဲး မဲ ကာလာင် ဒီ ဒူအီ ဂေ နီ တဝ်း၊ “တဲး ဘေ ဝီ ပီဆီငါ ဘေ အာဒါ ခဲညှာ။ အုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ ဟဲ့ တဝ်း၊ ‘ဘေ ဒူအီ အီဆာရေလ၊ ဆေ ကြုဝ် ပီ တဝ်း အုဝ် လုဝ် ပျာတ့် ဝဲန် တွိုန် ယီ ဆီ ကွယ် ဒူင် ကွယ် ဘေ၊ ဆေ ဘေ မိူဝ် တူ ပျာတ့် ဝဲန် ကြုဝ် တီ၊ ဘေ တူ နပ် ဒီ ပဲ ရန်ဆူ ဘေ။’

14 ကာလာင် ဒီ ဂေ၊ တဲး ဂေ တး ခဲညှာ စေဝ် ညှာ။ တဲး ဂေ တး ဒူပ် ခြိုဝ် မှဝ် ခြိုဝ် အန်။ ခြိုဝ် ပီ ရဝ်း အုဝ် တီ၊ ဂေ လုဝ် တး ဒူပ် န့ကြိုဝ်း မှဝ်၊ န့ကြိုဝ်း အန်။ န့ကြိုဝ်း ပီ ရဝ်း အုဝ် တီ၊ ဂေ ဒီ လုဝ် တး န့ဟူမ် မှဝ်၊ န့ဟူမ် အန်။ ဒူအီ ခဲင် န့ဟူမ် ပီ ရဝ်း အုဝ် တီ၊ ဂေ ဒီ လုဝ် တး ဝီ မှဝ်၊ ဝီ အန်။ 15 ဆေ ဟီ ကာတုန့် ကြုဝ် ပီ ဒိူင် တီ ဒီ ဝီ ပဲ့ ဟဲ့ ရဝ်း အုဝ် ဂေ တီ၊ ဘော မုး ဝီ မှဝ် မိူဝ်၊ ဘေ လုဝ် ဒိုဝ်း ဒူအီ ဝီ တီ ဒုဝ့် ခဲင် ငဝ် ဘော အန် ဘော ဒူအီ ခဲင် န့ဟူမ် အန်။ ဘော ကြုဝ်ကြာမ် အန် ဘော ဒွန် မျုဝ် ဘေ လုဝ် ဒုဝ့် ဝဲန် တူတ့် ခဲင် ငဝ် ဒူပ် အန်။ ခုဝ်၊ ဒူအီ ဝီ တီ ဟဲ့ လှိုဝ် ဂြုဝ်း ပီ ကာဆဲန့် ဇဝ်ဖြာ။ အန် မိူဝ် ဟဲ့ ဘူင် တဲး ဒူအီ အီဆာရေလ မွှိုမ် ဆာယ် ကာဆဝ်။”

16 ပါ ခဲညှာ ဆိန့်ဝး စေဝ် အာယုဝ်ဆူအာ တဲး ဂေ ဒူအီ အီဆာရေလ တး ဒီ အန် ခြိုဝ် မှဝ် ခြိုဝ် အန်။ အန် ဇဝ် ဘော ရဝ်း ခြိုဝ် အာယူဒါ။ 17 အန် မိူဝ် ဒဲ့ ခြိုဝ် အာယူဒါ န့ကြိုဝ်း မှဝ် န့ကြိုဝ်း အန်။ အန် ဇဝ် ဘော ဝီ ရဝ်း န့ကြိုဝ်း အာဇေန်ရာ။ ပါယ် တီ အန် မိူဝ် ဒဲ့ န့ကြိုဝ်း အာဇေန်ရာ ဒူပ် န့ဟူမ် မှဝ် န့ဟူမ် အန်။ အန် ဇဝ် ဘော ဝီ ရဝ်း န့ဟူမ် အာဇာဘာဒီ။ 18 ပါယ် တီ အန် ဘော ဒဲ့ ဒူအီ ခဲင် န့ဟူမ် အာဇာဘာဒီ၊ ခဲ့ မိုဝ်း အီမာယ် ဒွန် ဝီ။ အန် ဇဝ် ဘော ရဝ်း အီ စိူဝ် အာခါန် အီ မုး ဂွန် အာခါမီ အီ မုး လှာန် အာဇာဘာဒီ တွိုန်။

19 အာယုဝ်ဆူအာ ဝီ တဝ်း ဒီ အာခါန်၊ “အိုယ် ဂွန် အိုယ်၊ တဲး မဲ ရုဝ်ဆေ ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ တဲး မဲ ဘော အိူပ် အန် ဇဝ်။ မဲ လုဝ် ကာလာင် ဆိူဝ် ဆိူဝ် မှာပ် မဲ။ မဲ ကာလာင် တူတ့် ဒီ အုဝ် လွင် ပဲ့ ဟဲ့ ဘူင် မဲ။ မဲ ကွဲ့ ချြီင် မာဆေ။”

20 အာခါန် ဝီ ကာလာင် ဒီ အာယုဝ်ဆူအာ တဝ်း၊ “ဟဲ့ မှာန်၊ အုဝ် ဟဲ့ ဟွတ့် လုတ့် ဇဝ်ဖြာ ပီ ကြိုပ် အေ ဒူအီ အီဆာရေလ။ အုဝ် ဟဲ့ ဘူင် ပါယ် နီ။ 21 ခဲင် ကြုဝ် ပဲ့ ဟဲ့ ဒိုဝ်း တး အေ တွိုန်၊ အုဝ် ဟဲ့ ယိုဝ် ဆီတုဝ် တုန် အူ ဖိူန် အီ ဘွတ် ကာဆဝ်၊ အီ တး မိူင် ဘာဘဲ ဘော ရွိုန် အာ မာယဝ်း ဘူင့် ဘော တဲင် ခြိဝ် အီ စန် ဖန် ဂိုဝ် ဆေခေန်။^a အုဝ် မိူဝ် ဟဲ့ ဆီ ပွိုန် ကာဆဝ်၊ အုဝ် ဘော ဝီ ပြာ ချြီင် ဒီ အုဝ်။ အုဝ် ဟဲ့ ဝီ ဒိပ် အုန် ခြိုမ် ထိုပ် အုဝ်။ အီ မုး ရွိုန် တီ၊ အုဝ် ဟဲ့ ဘ့လေး ဒီ ကာဒမ် အန် နာ ခြိုမ် ဆိူတ်။”

22 ပါယ် တီ အာယုဝ်ဆူအာ ဘော စ်ု ဂေ ဒူအီ မင် အီ ဟာဝ် လိုပ် ယွတ် ခဲင် ထိုပ် အန် တီ။ ဂေ ဘော ယိုဝ် ကြုဝ် တီ ဟဲ့ ဒိပ် အုန်။ ဘော ရွိုန် ဟဲ့ ကွယ် ဒီ ကာဒမ် အန်။ 23 ဂေ ဘော ဒိုဝ်း လေး ကြုဝ် တီ နာ ရေတ့် ထိုပ်၊ ဝီ ဟာဝ် တိုယ် ဒီ အာယုဝ်ဆူအာ ဘော ဒီ ဂေ ဒူအီ အီဆာရေလ ဘောကာဂ့လျီတ်၊ ဝီ ဘ့လေး တူတ့် နာ အာတ့် ဇဝ်ဖြာ။

24 အာယုဝ်ဆူအာ ဘော ဂေ ဒူအီ အီဆာရေလ ဘောကာဂ့လျီတ် တဲး အီ မှေတ့် အာခါန် အီ မုး ဂွန် အာဇေန်ရာ။ ဂေ ဘော ဒိုဝ်း ဘော ရွိုန် ဘော ဆီတုဝ် တုန် ဘော တဲင် ခြိဝ် တွိုန်၊ ဒိုဝ်း ဘော ဂွန် အီဘိုန့်၊ ဂွန် အီမာယ် အန်၊ ဘော မာဘူ မာမက် ဘော မာလာ အန်၊ ဒိုဝ်း ဘော ထိုပ် ဒူင် ကွယ် အန် ဘော ကြုဝ်ကြာမ် ဘော ခြိုင် တာ အန်၊ ဝီ ဟာဝ် ဒီ ဒီလယ့် အာခေါ။ 25 အာယုဝ်ဆူအာ ဝီ တဝ်း ဒီ အန်၊ “မှဝ် န့ ပါယ် ပီ တဲး မဲ ဒုက် ဒီ ယေ။း ဒေါ တီ နီ၊ ဇဝ်ဖြာ ဒီ ဝီ တဲး ဒုက် ဒီ မဲ။”

ပါယ် တီ ခဲ့ ကွယ် ဒူအီ ဘောကာဂ့လျီတ် ဘော ကာဖြူမ် ဒီ ဒိုဝ်း မာဝ်၊ ဝိုန့် အန်၊ တဲး အန် ကော ယမ်။ ဂေ ဘော ဝိုန့် ယမ် ဘော ဒူအီ ခဲင် န့ဟူမ် အန်။ ဟဲ့ ဟွတ့်၊ ဂေ ဘော ဒိုဝ်း ငဝ် ဒုဝ့် ကာဆိုမ် ဂေ ဘော ကြုဝ်ကြာမ် ဂေ ဒွန် မျုဝ်။ 26 ဂေ ပီ ဝီ ဒိုဝ်း မာဝ် ကိူန်၊ ဝီ ဘ့လေး ဒဲင် ဒုဝ် ဂေ၊ တဲး န့ ကော ဘဲန် မ့ပိုမ် တာင်။ န့ ဘော ကွယ် ကော ဇမ် အာတိုဝ် နီ။ ကူပ် န့ ပါယ် တီ ဒီလယ့် တီ၊ ဂေ ဘော တဲး န့ စိူဝ် ဒီလယ့် အာခေါ။^b ဂေ ဟဲ့ ဟွတ့် ဘူင် ပါယ် တီ ဇဝ်ဖြာ ဘော စူ ရူ အူ ဇေန့်။