1 ဇဝ်ဖြာ ဝီ ကာလာင် ဒီ အာယုဝ်ဆူအာ တဝ်း၊ “ကွဲ့ ယုဝ်၊ ကွဲ့ တဲး မဲ မိုဝ်း နဝ်း တျီ့။ တဲး မဲ ဒဲ့ ဒူအီ မဲ ဘောကာဂ့လျီတ်၊ တဲး ဘေ ဝီ ဟုဝ့် ကာဂုဝ်း မိူင် အာယီ။ အုဝ် ဟဲ့ တဲး မဲ ပဲ ခုန်ဒီခမ် မိူင် အာယီ ဘော ဒူအီ အန် ဘော မိူင် အန် ဘော ကာဒါယ် အန်။ န့ ဒီ ဘဲန် တူတ့် ကြုဝ် မဲ။ 2 မဲ လုဝ် ဘူင် ဒီ မိူင် အာယီ ဘော ဒီ ခုန်ဒီခမ် ခဲင် မိူင် တီ၊ တဲး န့ ပီ ပီ ဘူင် မဲ ဒီ မိူင် ယေရီခုဝ် ဘော ဒီ ခုန်ဒီခမ် အန် တွိုန်။ ခါ နီ ဘေ ဟဲ့ ပွိုန် ဒိုဝ်း ကြုဝ်ကြာမ် ဂေ ဘော ဒုဝ် ဆတ်ဒါဝါ ဂေ ဒီ ဘေ။ တဲး ဘေ ရဲန် ဒါ ဆိုက် ဘေ ဟာဝ် ဘ်ု ဒီ တိုက် နာ ပန် မိူင် တီ။”

3 ပါယ် တီ အာယုဝ်ဆူအာ ဘော ဂေ ဒါ ဆိုက် အန် ဘော ရဲန် ဒုဝ် ဂေ၊ တဲး ဂေ တိုက် မိူင် အာယီ တီ။ အာယုဝ်ဆူအာ ဘော ရဝ်း ဒူအီ အီ ကျ လွှိုမ် အီ ဟဝ် အာဒါ အူယ် မှိုန့် ဝီ။ အန် စ်ု ဂေ ဟာဝ် ခဲင် မှိုဝ် တီ။ 4 အန် တဝ်း၊ “တဲး ဘေ ထူမ် ဆီချာ။ ဘေ လုဝ် ဟာဝ် ဘ်ု နာ ဒွယ် မိူင်၊ ကွဲ့ တဲး ဘေ ဘော ကွယ် တူင့် ကာဆဝ်။ တဲး ဘေ ဒန် ကာဂုဝ်း ဒွန် အီ။ 5 ဘော အုဝ် ဘော ဂေ ဒူအီ အီ ဒူပ် အုဝ်၊ ယေ ဒီ ဝီ ဟာဝ် ညိူဝ် မိူင် တီ။ ဆေ ဂေ ဒူအီ ခဲင် မိူင် အာယီ ဟီ လေး တး ကာဂုဝ်း ဒီ ယေ ပီ ခါ အာတ့် တွိုန်၊ အုဝ် ဒီ တဲး ယေ ဝီ တဝ် ဝိဝ် နာ ပန်။ 6 ယေ ဒီ တဲး ဂေ ခုင်ခြး ယေ၊ တဲး န့ ကော ရာမ် ကာတူင့် ဒီ မိူင် ဂေ။ ဂေ ဒီ ဘော ထာင်၊ ယေ ဟဲ့ တဝ် ဂေ ပီ ခါ အာတ့် တွိုန်။ 7 ပန် တီ ဘေ အီ ကွယ် ဘ့လာက် နာ ဒွယ် မိူင် ဘော လုဝ် ဝီ လေး တး၊ ကာဂုဝ်း ဒိုဝ်း မိူင် တီ။ ခုဝ်၊ ဇဝ်ဖြာ ပီ ကြိုပ် ဘေ ဒီ ဒိုဝ်း မိူင် တီ ဒွါ ဒီ ဘေ။ 8 ဆေ ဘေ ဟဲ့ ဟွတ့် ပွိုန် မိူင် တီ၊ ဘေ လုဝ် ဒိုဝ်း ငဝ် ဒုဝ့် ကာဆိုမ်၊ တဲး န့ ပီ ပီ ကာလာင် အုန် ဇဝ်ဖြာ။ အုဝ် မိူဝ် ဟဲ့ ဒွါ အာမိင် ဒီ ဘေ ပါယ် တီ။”

9 ဟဲ့ ဟွတ့်၊ အာယုဝ်ဆူအာ ဘော စ်ု ဂေ ဟာဝ်။ ဂေ မိူဝ် ဟာဝ် ဘ်ု နာ ဂေတ့် ဆီငဲ မိူင် အာယီ ဒီ ကာတဲ မိူင် အာယီ ဂါယ် မိူင် ဘေဒါအေန်။ မှိုဝ် တီ၊ အာယုဝ်ဆူအာ ဘော တမ် ခဲင် ဒူင် ချ ဂေ တီ ဒူပ် ဂေ ဒူအီ ကိူန်။

10 အာယုဝ်ဆူအာ ဘော ယိတ့် ဆိန့် ဆီဇ ဝး စေဝ်၊ ဘော ယွတ် ဆီချာ ခဲ့ ကွယ် ဂေ ဒါ ဆိုက် အန်။ ဘော အန် ဘော ဂေ ဒါ တာင် အီ ယဲတ့် ဂေ ဒူအီ အီဆာရေလ၊ ဂေ ဘော ယဲတ့် ဒါ ဆိုက် ဟုဝ့် ဒီ မိူင် အာယီ။ 11 ဒါ ဆိုက် အီ ဒူပ် အန် ဂေ ဘော ဟာဝ် ဆိူဝ် ဒီ မာလုဝ်း မိူင်။ ဂေ ဘော ချ နာ ကွာ မိူင် တီ။ ဒီ ကာတဲ ဂေ ဂါယ် မိူင် တီ၊ န့ ဘော မိုဝ်း ဒီလယ့် ကာခန်။ 12 အန် ဟဲ့ ဒိုဝ်း ဒူအီ ဖန် ဟြဲန့် ဝီ၊ တဲး ဂေ ဝီ ဟာဝ် ဘ်ု ဒီ ကာဂုဝ်း နာ ဂေတ့် ဆီငဲ ဒီ ကာတဲ မိူင် အာယီ ဂါယ် မိူင် ဘေဒါအေန် တွိုန်။ 13 ဒါ ဆိုက် ဒွန် အီ အီ ကွယ် ခဲင် ဒပ် ဟဲ့ ဟွတ့် ဇမ် ဒူင် ဒီ လုဝ် ကွယ် ဂေ။ ဂေ ဒါ ဆိုက် အီ ကိူန် ဟဲ့ ကွယ် နာ ကွာ မိူင် တီ။ ဂေ ဒါ ဆိုက် အီ ဘ်ု အီ ချြီင်၊ ဂေ ဘော ကွယ် နာ ဂေတ့် ဆီငဲ မိူင် တီ။ ခဲင် မှိုဝ် တီ အာယုဝ်ဆူအာ ဘော ဟာဝ် ခဲင် ဒီလယ့် တီ။

14 ခုန်ဒီခမ် အီ အိုပ် မိူင် အာယီ ဘော ယိုဝ် ဒူအီ အာယုဝ်ဆူအာ၊ ဘော အန် ဘော ဂေ ဒူအီ အန် ဘောကာဂ့လျီတ် ဘော ပီခြန် ဂေ၊ ရဲန် ဆိုက် ဂေ၊ ဟာဝ် ဒူင် လိုဝ်း ဂ့လင် အာရာဖ၊ တဲး ဂေ ပွိုန် ဒီ ကာဂုဝ်း ဒီ ဒူအီ အီဆာရေလ။ မာလဲ၊ အန် တူ နပ် လွင် ဂေ ဒါ ဆိုက် ဟဲ့ ဝီ ဘ်ု နာ ပန် မိူင်။ 15 အာယုဝ်ဆူအာ ဘော ဂေ ဒူအီ အန် ဘော ညိုင်ရာင် ဟဲ့ စှိုမ်၊ ညိုင်ရာင် ဝီ တဝ် ဟာဝ် ဒူပ် န့တေန့် အီ ဟာဝ် နာ ခဲင် ပြဲ ကာဟဝ်း။ 16 ပါယ် တီ ခုန်ဒီခမ် ဂေ ဒူအီ အန် မိူဝ် ဒဲ့ ခဲ့ ကွယ် အီမာယ် ခဲင် မိူင်၊ တဲး ဂေ ဘောကာဂ့လျီတ် ခုင်ခြး၊ ဒူပ် ဒီ ပန် အာယုဝ်ဆူအာ ဂေ။ ဂေ မိူဝ် ဟဲ့ ခုင်ခြး၊ ဟဲ့ ဇမ် ရာမ် ကာတူင့် ဒီ မိူင် ဂေ။ 17 ခဲ့ ကွယ် အီမာယ် ခဲင် မိူင် အာယီ ဘော ခဲင် မိူင် ဘေဒါအေန်၊ အာဝ် မိုဝ်း ခေါ အူ ဝီ အီ တူ ခုင်ခြး ဒူပ် ဂေ ဒူအီ အီဆာရေလ။ ဂေ ဘော ဘ့လေး ဝဲန် မိူင် ဂေ၊ အာဝ် ဟူ မိုဝ်း အီမာယ် ခေါ အူ ဝီ အီ ဆီ ကွယ် ခဲင် မိူင် ဂေ။

18 ဒေါ အန် တီ ဇဝ်ဖြာ ဝီ ကာလာင် ဂြုဝ်း ဒီ အာယုဝ်ဆူအာ တဝ်း၊ “တဲး မဲ ဒိုဝ်း ဘ့လာ လျီး ပီ ဂူင့် မဲ၊ ငှာ ဒီ မိူင် အာယီ။ အုဝ် ဒီ ဒိုဝ်း မိူင် တီ၊ အာပ် ဒွါ ဒီ မဲ။” အာယုဝ်ဆူအာ မိူဝ် ဘူင် ဒူပ် ပီ တဝ်း ဇဝ်ဖြာ တီ။ 19 ဒေါ စုဝ့် အန် ဒဲ အန် တီ၊ ဂေ ဒါ ဆိုက် အီ ဟဲ့ ချြီင် ဂေ တွိုန် မိူဝ် ယိတ့် တး၊ ကာဘ့လဲပ် ဟာဝ် လိုပ် ခဲင် မိူင် တီ အူ ဇေန့်။ ဂေ မိူဝ် ပီခြန် ဂေ ဒိုဝ်း ငဝ် ဒုဝ့် မိူင် တီ။

20 ဒေါ ဝီ ယိုဝ် ဂေ ဒူအီ မိူင် အာယီ လွင် ဒက် ငဝ် ဟဲ့ ဝီ လေး ဟုဝ့် ခဲင် ဘ့လေန့်၊ ဂေ အာဝ် ဟူ ပွိုန် တဝ် ဟာဝ် နာ မှဝ်၊ တဲး ဂေ လွတ် ယမ်။ ဒေါ အန် တီ ဂေ ဒူအီ အီဆာရေလ အီ ဟဲ့ ညိုင်ရာင် တဝ် ဟာဝ် ခဲင် ပြဲ ကာဟဝ်း တွိုန် ဘော ဝီ ကာဘတ် ဝိဝ် တး ကာဂုဝ်း ဒီ ဂေ။ 21 အာယုဝ်ဆူအာ ဘော ဂေ ဒူအီ အန် ဟဲ့ ဟွတ့် ယိုဝ် ဒါ ဆိုက် အီ ဘ်ု နာ ပန် တွိုန်၊ ဟဲ့ ဟွတ့် ပွိုန် ဒီ လိုပ် ခဲင် မိူင် တီ။ ဒက် ငဝ် မိူဝ် ဟဲ့ လေး ခဲင် မိူင် တီ။ ခုဝ်၊ ဂေ မိူဝ် ဝီ ကာဖြူမ် ဒီ ကာဘတ် ဝိဝ်၊ ဝီ ကာဂုဝ်း ငဝ်း ယမ် ဒူအီ မိူင် အာယီ ဂေ တီ။ 22 ဂေ ဒူအီ အီဆာရေလ အီ ဟဲ့ ကွယ် နာ ပန် ဘော လေး တး ခဲင် မိူင်၊ စွယ် ဂေ ကာဂုဝ်း။ ပါယ် တီ ဒူအီ မိူင် အာယီ ဟဲ့ ကွယ် ဒီ ကာတဲ ဒူအီ အီဆာရေလ အီ ဟဲ့ တး ကာဂုဝ်း ဒီ ဂေ ဘော နာ ပန် နာ အာတ့်။ ဂေ ဒူအီ အီဆာရေလ ဘော ငဝ်း ယမ် တူတ့် ဂေ ဘောကာဂ့လျီတ်။ ကွဲ့ တဲး န့ ဆီ ဂိူတ် ခေါ အူ ဝီ။ 23 အီ မုး ခုန်ဒီခမ် မိူင် အာယီ တီ၊ ဂေ ဘော မှေတ့် ဒုဝ် အိမ် အန်၊ ဝီ တး တိုယ် ဒီ အာယုဝ်ဆူအာ။

24 ဂေ ဒူအီ အီဆာရေလ ဟဲ့ ဟွတ့် တာ မာပွါ့ လာင် ဂေ၊ ငဝ်း ဝဲန် တူတ့် ရန်ဆူ ဂေ ဒီ ပြဲ ကာဟဝ်း ဒူင် ခုင်ခြး ဂေ ဒီ ဒူအီ အာယီ တွိုန်၊ ဂေ ပီ ဝီ ဝေန့် လိုပ် ခဲင် မိူင် အာယီ တွိုန်၊ ပီ ဝီ ဝေန့် ငဝ်း တူတ့် ဂေ အီ ဆီ ဂိူတ် ဒီ တီ။ 25 ဂေ ဒူအီ မိူင် အာယီ ဘောကာဂ့လျီတ် အီ ယမ် ဆီငဲ တီ ဘော အီဘိုန့် ဘော အီမာယ် ဂေ ကွယ် အူ မှိုန့် ဒီ အာ ဟြဲန့် ဝီ။ 26 အာယုဝ်ဆူအာ မိူဝ် တူ ဘ့လေး လူင် ဒဲ အန်၊ အန် မိူဝ် ငှာ ဘ့လာ လျီး အန်၊ တဲး ဂေ ကော ပွိုန် ဒီ ငဝ်း ဝဲန် တူတ့် ဒူအီ ခဲင် မိူင် အာယီ တီ။ 27 မာလဲ၊ အီ မုး ဒုဝ် ဆတ်ဒါဝါ ဘော ကြုဝ်ကြာမ် ပီ ဖာတ် ဒိုဝ်း ဂေ ခဲင် မိူင် တီ၊ ဂေ ဟဲ့ ပွိုန် ဒိုဝ်း တူတ့် ဒီ ဂေ၊ တဲး န့ ဒူပ် ပီ ကာလာင် အုန် ဇဝ်ဖြာ ဒီ အာယုဝ်ဆူအာ။

28 အာယုဝ်ဆူအာ ဘော ဒုဝ့် ကာဆိုမ် မိူင် အာယီ တီ။ န့ ဘော ရာမ် ဘော ဘဲန် မ့ပိုမ် မာဝ် ကော ဇမ် အာတိုဝ် နီ။ 29 အီ မုး ဒုဝ် ခုန်ဒီခမ် အာယီ တွိုန်၊ အန် ဘော ပက် ဟွယ် ဒီ ဟေ ကော ဇမ် ဘာ ဒီ အပ်။ ဆီငဲ ဟဲ့ ဟွတ့် ဂေတ့်၊ အန် ဘော ဝီ စ်ု ဂေ ဒိုဝ်း လူင် ဒုဝ် ယမ် အန်၊ ဝီ ဘ့လေး အုန် ဘာင် မာလုဝ်း မိူင်။ ဂေ ဘော ဝီ ဒိုဝ်း မာဝ် ဘ့လေး နာ ဒဲင်၊ တဲး န့ ကော ဘဲန် မ့ပိုမ် တာင်။ န့ ဘော ကွယ် ပါယ် တီ ကော ဇမ် အာတိုဝ် နီ။

30 ဝါယ် အန် တီ အာယုဝ်ဆူအာ ဝီ ဘူင် ကာစှူင့် လှူ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။ အန် ဝီ ဘ့လေး အုန် ကာစှူင့် တီ ဒီ နွန် အေဘာန် တွိုန်။ 31 အန် ဘူင် ဒူပ် ပီ ဒွိုမ် ကာလာင် အုန် အာမုဝ်ဆဲ အီ မုး ဒဲစေန့် ဇဝ်ဖြာ အီ ဟဲ့ ကာလာင် အုန် ဒီ ဂေ ဒူအီ အီဆာရေလ။ အန် ဘော ဘူင် ဒူပ် ပဲ့ ဟဲ့ ဒဲမ် အုန် ခဲင် ဘပ် ဒါရာ အာမုဝ်ဆဲ။ ဂေ ဒိုဝ်း မာဝ် အီ တူ ဒဲပ်၊ တူ ဒဝ်း တာ ခြိုင် ဟိန်၊ ဘူင် ကာစှူင့် တီ။ ဘော ပီ ဒီ လှူ အီ ဒုဝ့် ဒီ ငဝ်၊ ပီ ဒီ လှူ အီ ကွယ် ကာဇု ဟူမ် ရိုမ်၊ ဂေ ဘော လှူ ဒီ ဇဝ်ဖြာ ဒဲင် ကာစှူင့် လှူ တီ။ 32 ဒဲင် နွန် တီ၊ အာယုဝ်ဆူအာ ဝီ ထုတ် လေး၊ ဝီ ဒဲမ် ဒါရာ ပီ ဒွိုမ် ဒဲမ် အုန် အာမုဝ်ဆဲ ဒဲင် မာဝ် ဂေ တီ။ အန် ဘူင် တူတ့် ဒီ အာတ့် ဂေ ဒူအီ အီဆာရေလ။ 33 ခဲ့ ကွယ် ဂေ ဒူအီ အီဆာရေလ ဘောကာဂ့လျီတ်၊ ဘော ဒါ တာင် အီ ယဲတ့် ဂေ ဘော ဒါ ဘုဝ် အီ အိုပ် ဒါ ဆိုက် ဘော ဂေ ဒါ ဆိုက် ဘော ဒါ တာင် အီ ဆုင်ဖျာတ် ဒါရာ၊ ဂေ အီ မုး ဒူအီ အီဆာရေလ အာခါခ်ု ဘော ဂေ ဒူအီ အာမျုဝ် ဟဝ်၊ ဂေ ဟဲ့ စွင့် အာ ဘ့လာက် ဇီဒိူက် ဇဝ်ဖြာ။ ဂေ ကွယ် မာငး ယွတ် ဂေ ဒါ အီ လှူ ဒီ ဇဝ်ဖြာ အီ မုး ဒူအီ အာလေဝီ၊ အီ ကာဂွတ် ဇီဒိူက် ဇဝ်ဖြာ တွိုန်။ ဂေ ဒူအီ အာဒါ အူ ကာတဲ၊ ဂေ ဝီ ဒိန့် ကာတု ဂေ ဒီ နွန် ဂီရာစေမ်။ ပေါ အူ ကာတဲ၊ ဂေ ဝီ ဒိန့် ကာတု ဂေ ဒီ နွန် အေဘာန်။ ဂေ ဘူင် ဒူပ် ပဲ့ ဟဲ့ ဒွိုမ် ကာလာင် အာမုဝ်ဆဲ အီ မုး ဒဲစေန့် ဇဝ်ဖြာ ဒေါ စ်ု အန် ဂေ ဒါ အီ လှူ ဒီ ဇဝ်ဖြာ၊ တဲး ဂေ မွင့်ကာရာ ဒွါ ဒီ ဒူအီ အီဆာရေလ။

34 ဟဲ့ ဟွတ့်၊ အာယုဝ်ဆူအာ ဘော တိး ဘပ် ဒါရာ ဇဝ်ဖြာ အီ မုး ဂြုဝ်း မွင့်ကာရာ ဘော ဂြုဝ်း ဒိူင်။ အန် မိူဝ် တိး ပဲ့ ဟဲ့ ဒဲမ် အုန် ခဲင် ဘပ် ဒါရာ ဒွန် ဒုဝ် ဒွန် ဒဲ။ 35 ခဲ့ ဘော မိုဝ်း ဒါရာ ပီ ဒဲမ် အုန် အာမုဝ်ဆဲ ဒွန် ဒုဝ် ဒွန် ဒဲ၊ အာယုဝ်ဆူအာ မိူဝ် ဟဲ့ တိး တူတ့်၊ တဲး ဂေ ဒူအီ အီဆာရေလ အီ တး ကာဇု ဒီ တီ ပွိုန် ဒီ ထူမ်။ န့ ဘော မိုဝ်း ဘော အီဘိုန့် ဘော ဂွန် ဘော ဒူအီ အာမျုဝ် ဟဝ်၊ အီ ဟဲ့ တး ထူမ်။