1 လွင် ဂေ ဒူအီ အီဆာရေလ ဟဲ့ ကာဂုဝ်း ဟဲ့ အွင် တွိုန်၊ န့ ဘော လိုဝ်း ဟာဝ် ဇမ် ဒူင် ကွယ် ဂေ ခုန်ဒီခမ် အီ ကွယ် နာ ဂေတ့် ဆီငဲ အိုမ် ဘ့လဲင် ယောဒါန် ဒွန် ပ့လုဝ့်။ န့ မုး ခုန်ဒီခမ် အီ ကွယ် ဒီ နွန် ဘော ခဲင် ဂ့လင် အီ ကွယ် ခူပ် အိုမ် နမ်မုက်ဆာရာ ကော ဇမ် ဒီ မိူင် လေဘာနုန် ဘ့လာက် နာ ကွာ။ ခုန်ဒီခမ် ဂေ တီ ဘော မုး ခုန်ဒီခမ် ဒူအီ ဟေထိတ်၊ ဒူအီ အာမုဝ်ရိတ်၊ ဒူအီ ကာနန့်၊ ဒူအီ ဖေရေဆိတ် ဒူအီ ဟီဝိတ် ဘော ဂေ ဒူအီ ယေဘူဆိတ်။ 2 ဂေ ဘော ဝီ တး ကာဇု၊ ဝီ ကာဖြူမ် ဒီ ကာဂုဝ်း ဒီ အာယုဝ်ဆူအာ ဘော ဂေ ဒူအီ အီဆာရေလ။

3 မာလဲ၊ ဂေ ဒူအီ ခဲင် မိူင် ကီပွင် အီ မုး ဒူအီ ဟီဝိတ်၊ ဂေ ဟဲ့ ယိုဝ် ပီ ဘူင် အာယုဝ်ဆူအာ ဒီ မိူင် ယေရီခုဝ် ဘော ဒီ မိူင် အာယီ တွိုန်။ 4 ဂေ ဘော ဝီ ပီလွှက့် ဂေ ဒီ အာယုဝ်ဆူအာ။ ဂေ ဘော ဒိုဝ်း ပီ ဒီ ဟူမ်၊ ဟပ် ခဲင် ဟူ ဘြိမ်၊ ဟူ ကာပျာတ့်။ ဂေ ဘော ဒိုဝ်း အိုမ် မာငုန်၊ ဟပ် ခဲင် ဟူ ဟုန် အီ ဟဲ့ ဘြိမ်၊ ဟဲ့ လှုး၊ ဟဲ့ ဝီ ကာပါင်။ ဂေ ဘော ဝီ ဒါင် ဒဲင် ကွပ် မာလာ ဂေ။ 5 ဂေ ဘော စှိုပ် ဒီ တာ ခြိုင် ဘြိမ် ဘော ခူဒိန့် အီ ဟဲ့ ကာပျာတ့် ဟဲ့ ဝီ ကာပါင်။ ပီ ဒီ ဟူမ် ဂေ မိူဝ် ဟဲ့ ကာဟဝ်း ဟဲ့ ကာဒိး။ 6 ဂေ ဘော ဟာဝ် ဒူင် ကွယ် အာယုဝ်ဆူအာ ခဲင် ဒပ် ဒူင် ချ ဂေ ဒီ မိူင် ဂီလဂါ တွိုန်။ ဂေ ဘော ကာလာင် ဒီ အာယုဝ်ဆူအာ ဘော ဂေ ဒူအီ အီဆာရေလ တဝ်း၊ “ယေ ဟဲ့ တး မိူင် အီ တူင့် ကာဆဝ်။ ယေ တး မှာန့် ဒီ လာယ် ကာဆဲန့်၊ တဲး အေ ဘဲန် အူ ဂိုက်။”

7 ဂေ ဒူအီ အီဆာရေလ ဝီ တဝ်း ဒီ ဂေ၊ “မှဝ် ယေ ဒီ ပါယ် ဒီ လာယ် ဘဲန် အူ ဂိုက် ဒီ ဘေ။း ယုဝ် ဘေ ကွယ် ကာတတ် ယေ၊ တူ ကွယ် ကာတတ် ယေ၊ ယေ တူ နပ်။း”

8 ဂေ မိူဝ် ဝီ တဝ်း ဒီ အာယုဝ်ဆူအာ၊ “ယေ မှာန့် ဒီ ဘဲန် မှာယ် မဲ။” အာယုဝ်ဆူအာ ဝီ ဒီမွှတ် ဂေ တဝ်း၊ “ဘေ မုး အာဆေ။း ဘေ တး နာ မှဝ်။း”

9 ဂေ ဝီ ကာလာင် ဒီ အာယုဝ်ဆူအာ တဝ်း၊ “ယေ ဟဲ့ တး မိူင် အီ တူင့် ကာဆဝ်။ ခုဝ်၊ ယေ ဟဲ့ ယိုဝ် လွင် ဇဝ်ဖြာ ပီ ကြိုပ် ဘေ ဘော လွင် ပဲ့ ဟဲ့ ဘူင် အန် ဇဝ် ဒွန် မျုဝ် ခဲင် မိူင် အဲဂိုပ် တွိုန်။ 10 ယေ ဟဲ့ ယိုဝ် ဘော လွင် ပဲ့ ဟဲ့ ဘူင် အန် ဇဝ် ဒီ ခုန်ဒီခမ် ဒူအီ အာမုဝ်ရိတ် အာ ကာဒင် အီ ဟဲ့ ကွယ် နာ လေး ဆီငဲ အိုမ် ဘ့လဲင် ယောဒါန်။ န့ မုး ခုန်ဒီခမ် အာဆီဟူန် အီ အိုပ် မိူင် ဟေဆာဖူန် ဘော ခုန်ဒီခမ် အာအောခ အီ အိုပ် မိူင် ဘာဆန် အီ ကွယ် ခဲင် ကာဒါယ် မိူင် အာဆာတာရုတ် တွိုန်။ 11 ကူပ် န့ ပါယ် တီ ဂေ ဒါ တာင် အီ အိုပ် အီ ယဲတ့် ယေ ဘော ဂေ ဒူအီ ရဝ် ဒူအီ ကာင် ခဲင် မိူင် ယေ ဘောကာဂ့လျီတ်၊ ဂေ ဝီ ကာလာင် ဒီ ယေ တဝ်း၊ ‘တဲး ဘေ ဒိုဝ်း ဒီ ဂူင့် ပီ ဒီ ဟူမ်၊ တဲး န့ ဘဲန် စာရိ စာခ ဘေ။ ဟာဝ် တဲး ဘေ ကော ကာတုန့် ဂေ ဘော တဝ်း၊ “ယေ အီ မုး မှာယ် ဘေ မှာန့် ဒီ လာယ် ကာဆဲန့် လာယ် ဘဲန် အူ ဂိုက် ဒီ ဘေ။” 12 တဲး ဘေ ယွတ်၊ ခါမုန် ယေ မိူဝ်။ ဒေါ လေး ဟာဝ် ယေ တ ကာင်၊ တဝ်း ဒီ ဟာဝ် ဒူင် ကွယ် ဘေ၊ န့ ဆီ ဆီအုန့် ဆီဒါ့။ ဒေါ တီ နီ ဟဲ့ ဟွတ့် ဝီ ကာဟဝ်း ဝီ ကာဒိး။ 13 ဟူ ဟုန် ပီ ဟပ် ယေ အိုမ် မာငုန် နီ မိူဝ် ဆီ ကာမာယ်။ ယွတ်၊ ဒေါ တီ နီ ဟဲ့ ဟွတ့် ဝီ ကာယာတ့် ကာပျာတ့် တူတ့်။ ခြိုင် ပီ တာ ယေ ဘော ခူဒိန့် ပီ စှိုပ် ယေ မိူဝ် ဟဲ့ ဟွတ့် ဘြိမ်၊ ဟဲ့ ဟွတ့် ဝီ ကာယာတ့် တူတ့်။ ခုဝ်၊ အာခြာဝ် န့တေန့် ယေ ဟဲ့ တူင့် ကာဆဝ်။’”

14 ဒူအီ အီဆာရေလ မိူဝ် တူ ဒီမွှတ် ဇဝ်ဖြာ။ ဂေ ဘော ထေဝ် ဒီ စိမ် ပီ ဒီ ဟူမ် ဒူအီ ဂေ တီ။ 15 အာယုဝ်ဆူအာ မိူဝ် ဟဲ့ လာယ် ကာဆဲန့် ဒီ ဂေ၊ တူ ကာဂုဝ်း တူ ငဝ်း ယမ် ဂေ။ အန် ဘော ခ့ဝါင် တဲး ဂေ ကွယ် ဒါခိုယ်၊ ကွယ် ဂတ် ဂျီတ်။ ဂေ ဒါ တာင် ခဲင် ဖိုင် ဒူအီ အီဆာရေလ မိူဝ် ဖြူမ် ဒူပ် ဘော လာယ် ဒိူင် ဒီ ဂေ။

16 ဝါယ် ဟဲ့ ဟွတ့် လာယ် ကာဆဲန့် ဂေ အာဒါ အူယ် ဆီငဲ၊ ဂေ ဒူအီ အီဆာရေလ ဘော ဝီ နပ်၊ ဒူအီ ဂေ တီ မုး ဒူအီ မိူင် ကီပွင် အီ ကွယ် ချြီ့၊ ကွယ် ကာတတ် ဂေ။ 17 ပါယ် တီ ဂေ ဒူအီ အီဆာရေလ ဘော ဝီ ရဲန် ဆိုက်၊ ဝီ ဟုဝ့် ဇမ် ဒီ မိူင် ဒူင် ကွယ် ဂေ။ မိူင် ဒူင် ကွယ် ဂေ တီ၊ န့ ဘော မုး မိူင် ကီပွင်၊ မိူင် ခေဖီရာ၊ မိူင် ဘေရောဆီ ဘော မိူင် ကီရီယာတ်ယာရိမ်။ 18 မာလဲ၊ ဂေ ဒူအီ အီဆာရေလ အာဝ် ဟူ ကာဂုဝ်း ဒီ ဂေ။ ခုဝ်၊ ဂေ ဒါ တာင် ဟဲ့ ဟွတ့် လာယ် ဒိူင် လာယ် ကာဆဲန့် ဒီ ဘဲန် အူ ဂိုက် ဒီ ဂေ ဘော ဟဲ့ တဲး ဇဝ်ဖြာ ပီ ကြိုပ် ဒူအီ အီဆာရေလ ထူမ် လွင် အန် တီ။ ဂေ ဒူအီ ကိူန် ယီ ဝီ အေး ဝီ ပိုန့် ဒီ ဂေ ဒါ တာင် တီ။

19 ဒါ တာင် ဂေ တီ ယီ ဝီ တဝ်း၊ “ယေ ဟဲ့ ဟွတ့် ဒွါ ကာဒိက် ဆတ်ဇာ ဒီ ဂေ။ ယေ မိူဝ် ဟဲ့ ဒိူင်၊ ဟဲ့ တဲး ဘော ဇဝ်ဖြာ ပီ ကြိုပ် အေ ဒူအီ အီဆာရေလ ထူမ် လွင် အန် တီ။ အေ အာဝ် ဟူ ပွိုန် ဘ့လတ့်၊ အာဝ် ဟူ ပွိုန် ပျာတ့် ဂေ။ 20 ယေ ဒီ ဘူင် ဒီ ဂေ ပါယ် နီ။ ယေ လုဝ် ဘ့လေး တဲး ဂေ ကွယ် ဒါခိုယ်၊ ကွယ် ဂတ် ဂျီတ် ကူပ် ဟဲ့ ဒွါ ယေ ကာဒိက် ဆတ်ဇာ တီ။ ဆေ ယေ ဘူင် တဲး ကာဒိက် ဆတ်ဇာ ယေ လိုဝ်၊ ယုဝ် ဇဝ်ဖြာ ဒီ ဝီ ဒမ် မှာပ် ဒီ ယေ။ 21 တဲး ဘော ဘေ ဘ့လေး၊ တဲး ဂေ ကွယ် ဒါခိုယ် ကွယ် ဂျာမ်ဆာ။ မာလဲ၊ ဂေ လုဝ် ကေတ် ဟေ ဘော တဝ့် အိုမ် ဒွါ ဒီ အေ ဒွန် အီ။” ဂေ ဒါ တာင် ဟဲ့ ဒွါ ကာဒိက် ဆတ်ဇာ ပါယ် တီ ဂေ မိူဝ် ဘူင် ဒူပ် ပါယ် တီ။

22 ဝါယ် အန် တီ၊ အာယုဝ်ဆူအာ ဝီ ဒဲ့ တး ဒူအီ ကီပွင်၊ တဝ်း ဒီ ဂေ၊ “မှဝ် န့ ပါယ် ပီ ကာလုဝ် ဘေ ဒီ ယေ တဝ်း၊ ဘေ ဟဲ့ တး တူင့် ကာဆဝ်။း ဘေ ယီ မုး ဒူအီ အီ ကွယ် ချြီ့၊ ကွယ် ကာတတ် ယေ။ 23 ကူပ် ဘူင် ဘေ ပါယ် တီ ဇဝ်ဖြာ ဟဲ့ ဒိူင် ဘေ။ ဒူအီ ဘေ ဘောကာဂ့လျီတ် လုဝ် ဘဲန် မှာယ် အီ ကေတ် ဟေ၊ အီ တဝ့် အိုမ် ဒွါ ဒီ ဒူအီ ခဲင် ကာင် ဒူင် ကြိုပ် အုဝ် ဇဝ်ဖြာ။”

24 ဂေ မိူဝ် ဝီ ဝျီ့ ဂြုဝ်း အာယုဝ်ဆူအာ တဝ်း၊ “ယေ ဟဲ့ နပ် လွင် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ အန် ဟဲ့ ဒွိုမ် ကာလာင် အုန် ဒီ ဒဲစေန့် အန် အီ မုး အာမုဝ်ဆဲ တွိုန်။ အန် ဟဲ့ တဝ်း၊ အန် ဒီ ဒိုဝ်း တူတ့် မိူင် နီ ဘောကာဂ့လျီတ် ဝီ အာပ် ဒွါ ဒီ ဘေ၊ တဲး ဘေ ငဝ်း ယမ် တူတ့် ဒူအီ ခဲင် မိူင် နီ။ ကူပ် ဟဲ့ ဟွတ့် တး ဘေ၊ ယေ ဟဲ့ ယုဝ် ကာဆဝ် ဘေ။ ခုဝ်၊ ယေ ဟဲ့ ဘူင် ပါယ် တီ။ ယေ ယုဝ် အာဆာက် ယေ ဘောကာဂ့လျီတ် ဒီ ဘော စှိုမ် ဒီလူယ် ဒီလာယ်။ 25 ဒေါ တီ နီ ယေ မုး မှာယ် မဲ။ မဲ ဟဲ့ အိုပ် ယေ။ ပီ ထာင် မဲ ဟဲ့ ဘွတ် ဟဲ့ မွှိုမ် ဒီ ယေ၊ တဲး မဲ ဘူင်။”

26 အာယုဝ်ဆူအာ မိူဝ် ဘူင် ပါယ် နီ ဒီ ဂေ ဘော ဂွင့် ရဲ ဂေ၊ တူ တဲး ဒူအီ အီဆာရေလ ငဝ်း ယမ် ဂေ။ 27 ဆီငဲ တီ၊ အန် ဆုင်ဖျာတ် ဒီ ဂေ၊ တဲး ဂေ ခမ် ဒီ ဘဲန် မှာယ် အီ တဝ့် အိုမ်၊ အီ ကေတ် ဟေ ဒွါ ဒီ ဒူအီ အီဆာရေလ အီ မုး ဒူအီ ရဝ် ဒူအီ ကာင် ဘော ဒီ ဂေ အီ ဘူင် ဂါန် ဒီ ကာစှူင့် လှူ ဒီ ဇဝ်ဖြာ။ ဂေ လုဝ် ဘူင် ဂါန် တီ ဒူင် ရဝ်း အုန် ဇဝ်ဖြာ အာဒါ ဂေ ဒူအီ အီ ကြိုပ် အန် တဲး ကော ဇမ် အာတိုဝ် နီ။