1 အာတောနီဇေဒိက် အီ မုး ခုန်ဒီခမ် ခဲင် မိူင် ယေရူဆာလဲမ်၊ အန် ဟဲ့ ယိုဝ် လွင် အာယုဝ်ဆူအာ ဟဲ့ ကာဂုဝ်း၊ ဟဲ့ ပွိုန် မိူင် အာယီ၊ ဟဲ့ ပျာတ့် ဝဲန် ဘောကာဂ့လျီတ်။ ဘော မိူင် ဘော ခုန်ဒီခမ် ခဲင် မိူင် တီ၊ အန် ဟဲ့ ဘူင် ပီ ပီ ဘူင် အန် ဒီ မိူင် ယေရီခုဝ် ဘော ဒီ ခုန်ဒီခမ် ခဲင် မိူင် တီ။ အန် ဟဲ့ ယိုဝ် ဘော လွင် ဂေ ဒူအီ ခဲင် မိူင် ကီပွင် ဟဲ့ လာယ် ဘဲန် အူ ဂိုက် ဒီ ဒူအီ အီဆာရေလ၊ ဟဲ့ ဝီ ကွယ် ရိုမ် ဒူပ် ဂေ။ 2 ဒေါ အန် တီ ခုန်ဒီခမ် ဘော ဂေ ဒူအီ ခဲင် မိူင် ယေရူဆာလဲမ် ဘော ကာပိုန့် ဘော ယုဝ် ကာဆဝ်။ ခုဝ်၊ မိူင် ကီပွင် တီ ဘော မုး မိူင် တာင် ပီ ဒွန် မိူင် အီ မိုဝ်း ခုန်ဒီခမ်။ န့ ဘော တာင် လွှိုမ် မိူင် အာယီ။ ဒါ ဆိုက် ခဲင် မိူင် တီ မိူဝ် မုး တူတ့် ဒူအီ ကျ။ 3 ပါယ် တီ အာတောနီဇေဒိက် အီ အိုပ် မိူင် ယေရူဆာလဲမ် ဘော စ်ု အီ ဟာဝ် ကာလာင် ဒီ ခုန်ဒီခမ် အာဟောရမ် အီ အိုပ် မိူင် ဟေဘြုဝ်၊ ခုန်ဒီခမ် အာဘီရမ် အီ အိုပ် မိူင် ယာမူတ်၊ ခုန်ဒီခမ် အာယာဖာ အီ အိုပ် မိူင် လာခိတ် ဘော ဒီ ခုန်ဒီခမ် အာဒေဘီရာ အီ အိုပ် မိူင် အေကာလွန်။ 4 အန် တဝ်း ဒီ ဂေ၊ “တဲး ဘေ တး စွယ် အုဝ် ကာဂုဝ်း ဒီ ဒူအီ မိူင် ကီပွင်။ ဒူအီ ဂေ တီ ဟဲ့ ဟွတ့် ဝီ ဘဲန် အူ ဂိုက်၊ ဝီ ကာလဝ့် ဒီ အာယုဝ်ဆူအာ ဘော ဒီ ဂေ ဒူအီ အီဆာရေလ။”

5 ပါယ် တီ ဂေ ခုန်ဒီခမ် ဒူအီ အာမုဝ်ရိတ် ဖန် ကာဒင် တီ ဘော လာယ် ဖြူမ် ဒီ ဟာဝ် ကာဂုဝ်း၊ ဟာဝ် တိုက် မိူင် ကီပွင် တီ။ န့ ဘော မုး ခုန်ဒီခမ် မိူင် ယေရူဆာလဲမ်၊ ခုန်ဒီခမ် မိူင် ဟေဘြုဝ်၊ ခုန်ဒီခမ် မိူင် ယာမူတ်၊ ခုန်ဒီခမ် မိူင် လာခိတ်၊ ခုန်ဒီခမ် မိူင် အေကာလွန်။

6 ဂေ ဒူအီ ကီပွင် တွိုန် မိူဝ် ဝီ တိုယ် ဒူအီ ဂေ၊ ဟာဝ် ကာလာင် ဒီ အာယုဝ်ဆူအာ အီ ကွယ် ဒီ ဒပ် ခဲင် မိူင် ဂီလဂါ တွိုန် တဝ်း၊ “ယေ မှာန့်၊ ကွဲ့ တဲး မဲ ဘ့လေး ဝဲန် ယေ၊ တဲး မဲ တး စွယ် ယေ ခြန် ခြန် ဒေါ တီ နီ၊ တဲး န့ ချွတ် ယေ။ ဂေ ခုန်ဒီခမ် အာမျုဝ် အာမုဝ်ရိတ် အီ ကွယ် မိူင် ဒီ နွန် ဟဲ့ လာယ် ဖြူမ် ဒီ တး ကာဂုဝ်း ဒီ ယေ။”

7 ပါယ် တီ အာယုဝ်ဆူအာ ဘော ဂေ ဒါ ဆိုက် အန် ဘောကာဂ့လျီတ် ဘော ဒါ ဆိုက် အီ ကျ ကာဆဝ် ဒီ ကာဂုဝ်း၊ ဂေ ဘော လေး ဒီ မိူင် ဂီလဂါ တွိုန်။ 8 ဇဝ်ဖြာ ဝီ ကာလာင် ဒီ အာယုဝ်ဆူအာ တဝ်း၊ “အာဝ် လုဝ် ယုဝ် ဂေ။ အုဝ် ဒီ တဲး မဲ ပဲ ဂေ၊ အာဝ် မိုဝ်း အာဆေ အီ ဒီ ပွိုန် ခမ် မဲ။”

9 အာယုဝ်ဆူအာ ဂေ ဒါ ဆိုက် အန် ဘော လေး ဒီ မိူင် ဂီလဂါ ခဲင် မှိုဝ်၊ ဝီ ဟုဝ့် ဒီ မိူင် ကီပွင် ဘော ကာဂုဝ်း ဒီ ဒူအီ အာမုဝ်ရိတ် ဂေ တွိုန် အူ ဇေန့်။ 10 ဇဝ်ဖြာ ဘော တဲး ဂေ ဒူအီ အာမုဝ်ရိတ် ကာဝှ်ု ကာဝျှီန် ဘော စှိုမ် ဒီ ဒူအီ အီဆာရေလ။ ဂေ ဒူအီ အီဆာရေလ ဘော ငဝ်း ယမ် ဂေ ကိူန် ခူပ် မိူင် ကီပွင် တီ ဘော ဝီ ခုင်ခြး ဟာဝ် ဂေ ဒူပ် န့တေန့် အီ လူင် ဒီ မိူင် ဘေတ်ဟုဝ်ရုန်၊ ဘော ကာဂုဝ်း ဒီ ဂေ ကော ဇမ် ဒီ မိူင် အာစေကာ ဘော မိူင် မီကာတာ။ 11 ဒေါ ကာဘ့လဲပ် တဝ် ဂေ ဒူအီ အာမုဝ်ရိတ် ဒီ ဒူအီ အီဆာရေလ၊ ဟာဝ် ဒူပ် န့တေန့် အီ လေး ခဲင် မိူင် ဘေတ်ဟုဝ်ရုန်၊ ဇမ် မိူင် အာစေကာ၊ ဇဝ်ဖြာ ဘော ဘ့လေး လူင် ဘျြီ တာင် စုဝ်း ဒဲင် ဂေ၊ တဲး ဂေ ကိူန် ယမ် ဒီ တီ။ ဒူအီ ဂေ အီ ယမ် ဒူပ် န့တေန့် တီ၊ န့ ဘော ကိူန် လွှိုမ် အီ ယမ် ဒီ မာပွါ့ လာင် ဂေ ဒူအီ အီဆာရေလ။

12 ဒေါ တဲး ဇဝ်ဖြာ ဂေ ဒူအီ အီဆာရေလ ပဲ ဒူအီ အာမုဝ်ရိတ် တီ၊ အာယုဝ်ဆူအာ ဝီ ဆာခိုဝ် ဘော ကာလာင် ဒီ အာတ့် ဂေ ဒူအီ အီဆာရေလ တဝ်း၊ “အိုယ် ဆီငဲ၊ တဲး မဲ စွင့် ဂိူတ် ကာရူယ် မိူင် ကီပွင်။ အိုယ် မာဂျီန်၊ တဲး မဲ စွင့် ဂိူတ် ကာရူယ် ဒီလယ့် အာစာလုန်။”

13 ပါယ် တီ ဆီငဲ ဘော ဂိူတ် အူ ဇေန့်။ မာဂျီန် မိူဝ် ဂိူတ်၊ တဲး န့ ကော ဇမ် ပန် ဒီ ဟွတ့် ဂေ ကာဂုဝ်း အွင် ရန်ဆူ ဂေ။ လွင် အန် တီ၊ န့ ဟဲ့ ဒဲမ် အုန် ခဲင် ဘပ် အာယာဆာ။ ဆီငဲ ဘော ဂိူတ် စွင့် ခဲင် ဂါင်ဟြာဝ်၊ အာဝ် ဟူ ကာတဝ် ဒီ ဂေတ့်၊ န့ ကော ဆီ နုဝ့် အူ ဆီငဲ။ 14 အာတ့် အန် တီ အာဝ် ဒွိုမ် ဘဲန် ပါယ် တီ ခေါ အူ ဆီငဲ။ ဝါယ် အန် တီ မိူဝ် အာဝ် ဟူ မိုဝ်း ပါယ် တီ ပေါ န့ ပွါ။ ဇဝ်ဖြာ ဟဲ့ ထူမ် ဂြုဝ်း ဒူအီ။ ခုဝ်၊ အန် ဟဲ့ ကွယ် ရိုမ် ဒူပ် ဂေ ဒူအီ အီဆာရေလ၊ ကာဂုဝ်း ဒီ ရန်ဆူ ဂေ။

15 ဝါယ် အန် တီ အာယုဝ်ဆူအာ ဘော ဂေ ဒါ ဆိုက် အန် ဘော ဝီ ဝေန့် ဒူင် ကွယ် ဂေ ဒီ မိူင် ဂီလဂါ တွိုန်။

16 ဂေ ခုန်ဒီခမ် ဖန် ကာဒင် တွိုန်၊ ဂေ ဘော လွတ် ယမ်။ ဂေ ဟဲ့ တဝ် ဟာဝ် ချြီင် ဂေ ခဲင် ကာဒဝ် မာဝ် အီ ကွယ် ဒီ ဒူင် စိူဝ် မီကာတာ။ 17 အီ ဟဝ် ဟဲ့ ဝီ ယိုဝ် ဂေ ကွယ် ခဲင် ကာဒဝ် မာဝ် ဒီ မီကာတာ၊ ဂေ ဝီ ဝေန့် ကာလာင် ဒီ အာယုဝ်ဆူအာ လွင် အန် တီ။ 18 အာယုဝ်ဆူအာ ဝီ တဝ်း ဒီ ဂေ၊ “တဲး ဘေ ဒိုဝ်း မာဝ် တာင် ကာဘိတ် ကာဒဝ် မာဝ် တီ၊ ဝီ စ်ု ဒူအီ မင် အီ ဘ်ု။ 19 အီ မုး ဘေ၊ ကွဲ့ ကွယ် ဒီ တီ၊ တဲး ဘေ ခုင်ခြး ဒူပ် ဟာဝ် ရန်ဆူ ဘေ၊ ဝီ ကာဂုဝ်း ဒူပ် ဒီ ပန် ဂေ၊ ကွဲ့ တဲး ဂေ ဝီ ပွိုန် ဒီ တး လိုပ် ခဲင် မိူင် ဂေ။ ခုဝ်၊ ဇဝ်ဖြာ ဟဲ့ တဲး ဘေ ပဲ ဂေ။”

20 အာယုဝ်ဆူအာ ဘော ဂေ ဒူအီ အီဆာရေလ ဘော ငဝ်း ယမ် တူတ့် ဂေ ဘောကာဂ့လျီတ်။ မင် အီ ဂေ ဘော ဟဲ့ ရိန် ဒီ တဝ် ဘော ပွိုန် ဒီ ဝေန့် လိုပ် ခဲင် မိူင် ဂေ အီ မိုဝ်း ရဲင်၊ တဲး ဂေ လွတ် ယမ်။ 21 ဝါယ် တီ ဂေ ဒါ ဆိုက် အာယုဝ်ဆူအာ ဘောကာဂ့လျီတ် ဘော ဝီ ဟာဝ် ဇမ် ဒူင် ကွယ် အာယုဝ်ဆူအာ ဒီ ဒပ် မီကာတာ တွိုန်။ ရန်ဆူ ဂေ တီ အာဝ် မိုဝ်း အာဆေ အီ ယ ကာလာင် ကာဘး ဒီ ဒူအီ အီဆာရေလ ခေါ အူ ဝီ။

22 ဝါယ် အန် တီ အာယုဝ်ဆူအာ ဝီ တဝ်း၊ “တဲး ဘေ ဝိုဝ်း ကာဒဝ် မာဝ် တွိုန်၊ ဝီ ဒိုဝ်း တး ခုန်ဒီခမ် ဂေ ဖန် ကာဒင် တီ ဒူင် ကွယ် အုဝ် နီ။” 23 ဂေ မိူဝ် ဘူင် ဒူပ် ပီ တဝ်း အန် တီ။ ဂေ ဘော ဟာဝ် ဒိုဝ်း လေး ခုန်ဒီခမ် မိူင် ယေရူဆာလဲမ်၊ ခုန်ဒီခမ် မိူင် ဟေဘြုဝ်၊ ခုန်ဒီခမ် မိူင် ယာမူတ်၊ ခုန်ဒီခမ် မိူင် လာခိတ် ဘော ခုန်ဒီခမ် မိူင် အေကာလွန်။ 24 ဂေ ဟဲ့ ဟွတ့် တိုယ် ဂေ ဒူင် ကွယ် အာယုဝ်ဆူအာ၊ အာယုဝ်ဆူအာ မိူဝ် ဝီ ဒဲ့ တူတ့် ခဲ့ ကွယ် ဂေ ဒူအီ အီဆာရေလ ဘောကာဂ့လျီတ်၊ တဲး ဂေ တး ဒူင် ကွယ် အန်။ အန် ဝီ ဘ့လေး အာမိင် ဒီ ဂေ ဒါ ဘုဝ် အီ အိုပ် ဒါ ဆိုက် အီ ဟဲ့ ဟာဝ် ကာဂုဝ်း ဒူပ် အန် တွိုန်၊ တဲး ဂေ ဒါင် ပ့လဝ် ဂေ ဒဲင် ကူမ် ခုန်ဒီခမ် ဂေ တီ။ ဂေ မိူဝ် ဘူင် ဒူပ် ပီ တဝ်း အန် တီ။

25 ဟဲ့ ဟွတ့် ပါယ် တီ အာယုဝ်ဆူအာ ဝီ ကာလာင် ဒီ ဂေ ဒါ ဘုဝ် တီ တဝ်း၊ “ဘေ ကွဲ့ ယုဝ်၊ အာဝ် လုဝ် နဝ်း တျီ့။ ပီပ့လူမ် နဝ်း ဘေ၊ တဲး ဘေ မိုဝ်း နဝ်း ယ။ ဇဝ်ဖြာ ဟဲ့ တဲး ဘေ ဘူင် ပါယ် တီ ဒီ ရန်ဆူ ပီ ဒီ ကာဂုဝ်း ဘေ။” 26 ဝါယ် တီ အာယုဝ်ဆူအာ ဘော ငဝ်း ယမ် ခုန်ဒီခမ် ဂေ တီ၊ ဝီ ပက် ဟွယ် ဂေ ဒီ ဟေ ဖန် ကာဒင်၊ တဲး ဂေ ဟွယ် ပါယ် တီ ကော ဇမ် ဘာ ဒီ အပ်။

27 ဆီငဲ ဘော ဂေတ့်၊ အာယုဝ်ဆူအာ ဝီ စ်ု ဂေ၊ တဲး ဂေ ဒိုဝ်း လူင် ဒုဝ် ယမ် ဂေ၊ တဲး ဂေ ဝီ ဟာဝ် အုန် ခဲင် ကာဒဝ် မာဝ် ဒူင် ချြီင် ဂေ တွိုန်။ ဂေ ဘော ဝီ ဒိုဝ်း မာဝ် တာင်၊ ဘ့လေး တဲး န့ ပိုမ် ဘာင် ကာဒဝ် မာဝ် တီ။ န့ ဘော ဆီ ကွယ် ကော ဇမ် အာတိုဝ် နီ။

28 ဆီငဲ တီ၊ အာယုဝ်ဆူအာ ဘော ကာဂုဝ်း ဘော ပွိုန် မိူင် မီကာတာ။ အန် မိူဝ် တူ အုန် တဲး န့ ဂိတ် ခေါ အူ ဝီ။ အန် မိူဝ် ဘူင် ဒီ ခုန်ဒီခမ် မိူင် မီကာတာ တီ၊ တဲး န့ ပီ ပဲ့ ဟဲ့ ဘူင် အန် ဒီ ခုန်ဒီခမ် ခဲင် မိူင် ယေရီခုဝ် တွိုန်။

29 ဝါယ် အန် တီ အာယုဝ်ဆူအာ ဂေ ဒါ ဆိုက် အန် ဝီ လေး ဒီ မိူင် မီကာတာ တီ၊ ဝီ ဟာဝ် ဒီ မိူင် လီပါနာ။ ဂေ ဘော ကာဂုဝ်း ပွိုန် မိူင် တီ။ 30 ဇဝ်ဖြာ ဟဲ့ တဲး ဂေ ဒူအီ အီဆာရေလ အွင် ဒါ ဆိုက် ခဲင် မိူင် တီ။ ဘော မိူင် ဘော ဒွန် အီ အီ ကွယ် ခဲင် မိူင် တီ၊ ဂေ ဘော ပျာတ့် ဘော ငဝ်း ယမ် တူတ့်။ ဒီ ခုန်ဒီခမ် ခဲင် မိူင် တီ ဂေ ဘူင် ပီ ပဲ့ ဟဲ့ ဘူင် ဂေ ဒီ ခုန်ဒီခမ် ခဲင် မိူင် ယေရီခုဝ် တွိုန်။

31 ဝါယ် တီ အာယုဝ်ဆူအာ ဘော ဂေ ဒူအီ အီဆာရေလ ဘောကာဂ့လျီတ် ဘော ဝီ လေး ဒီ မိူင် လီပါနာ တီ၊ ဝီ ဟာဝ် ဒီ မိူင် လာခိတ်။ ဂေ ဘော ဟာဝ် ဝဲင် ရူပ် မိူင် တီ ဘော ကာဂုဝ်း ဘော ပွိုန် မိူင် တီ။ 32 ဇဝ်ဖြာ ဟဲ့ အာပ် မိူင် လာခိတ် ဒီ ဂေ ဒူအီ အီဆာရေလ ဒေါ ကာဂုဝ်း ဂေ ဆီငဲ ဟာအာ။ ဂေ မိူဝ် ဘူင် တဲး န့ ပီ ပဲ့ ဟဲ့ ဘူင် ဂေ ဒီ မိူင် လီပါနာ တွိုန်။ ဂေ မိူဝ် ငဝ်း ယမ် တူတ့် ဒူအီ ခဲင် မိူင် တီ၊ တူ တဲး ဂေ လွတ် ခေါ အူ ဝီ။ 33 ဒေါ အန် တီ ခုန်ဒီခမ် အာယေဟုဝ်ရမ် အီ အိုပ် မိူင် ကေစာ ဘော ဝီ တး စွယ် ဘ့လာက် ဒူအီ မိူင် လာခိတ် ဂေ တီ။ အာယုဝ်ဆူအာ ဘော ကာဂုဝ်း ဘော ပဲ အန် ဘော ဂေ ဒူအီ အန်။ န့ ကော ဟူ ဂိတ် ခေါ အူ ဝီ။

34 ဝါယ် တီ အာယုဝ်ဆူအာ ဘော ဂေ ဒူအီ အီဆာရေလ ဝီ လေး ဒီ မိူင် လာခိတ် တီ၊ ဝီ ဟာဝ် ဒီ မိူင် အေကာလွန်။ ဂေ ဘော ဟာဝ် ဝဲင် ရူပ် မိူင် တီ။ ဂေ ဘော ကာဂုဝ်း ပွိုန် မိူင် တီ။ 35 ဆီငဲ တး ဂေ၊ ဂေ ဘော ကာဂုဝ်း အူ ဆီငဲ တီ၊ ဟဲ့ ဟွတ့် အွင် တူတ့်။ ဂေ ဘော ငဝ်း ယမ် ဒူအီ ခဲင် မိူင် တီ ဒွန် အီ၊ တဲး န့ ပီ ပီ ဘူင် ဂေ ဒီ မိူင် လာခိတ် တွိုန်။

36 ဝါယ် အန် တီ အာယုဝ်ဆူအာ ဘော ဂေ ဒူအီ အီဆာရေလ ဘောကာဂ့လျီတ် ဘော လေး ဒီ မိူင် အေကာလွန်၊ ပီ ဝီ ဟုဝ့် ဒီ မိူင် ဟေဘြုဝ်၊ ဝီ ကာဂုဝ်း ပွိုန် ဘော မိူင် တီ။ 37 ဂေ ဘော ငဝ်း ဝဲန် ခုန်ဒီခမ် မိူင် တီ ဘော ဒူအီ အန် ဒွန် အီ။ ဂေ ဘော ငဝ်း ဝဲန် ဘော ဒူအီ ရဝ် ဒူအီ ကာင် အီ ကွယ် ကာတတ် မိူင် တီ။ အာယုဝ်ဆူအာ ဘော ပျာတ့် ဝဲန် တူတ့်။ အန် ဘော ဘူင် တဲး န့ ပီ ပီ ဘူင် ဂေ ဒီ မိူင် အေကာလွန် တွိုန်၊ တူ တဲး န့ လွတ် ခေါ အူ ဝီ။

38 ဟဲ့ ဟွတ့်၊ အာယုဝ်ဆူအာ ဘော ဂေ ဒူအီ အီဆာရေလ ဘောကာဂ့လျီတ် ပီ ဝီ ကာဘတ် တး ဒီ မိူင် ဒေဘီရာ၊ တဲး ဂေ တိုက် မိူင် တီ။ 39 ဂေ ဘော ပွိုန် မိူင် တီ၊ ပွိုန် ဘော ခုန်ဒီခမ် ခဲင် မိူင် တီ ဘော ရဝ် ကာင် အီ ကွယ် ကာတတ် မိူင် တီ ဘောကာဂ့လျီတ်။ ဂေ ဘော ငဝ်း ဝဲန် တူတ့် ဒူအီ ခဲင် မိူင် တီ ဒွန် အီ၊ ကွဲ့ တဲး န့ ဆီ ဂိတ် ခေါ အူ ဝီ။ အာယုဝ်ဆူအာ ဘော ဘူင် ဒီ မိူင် ဒေဘီရာ ဘော ဒီ ခုန်ဒီခမ် ခဲင် မိူင် တီ၊ တဲး န့ ပီ ပဲ့ ဟဲ့ ဘူင် အန် ဒီ မိူင် ဟေဘြုဝ် ဘော ဒီ မိူင် လီပါနာ ဘော ဒီ ခုန်ဒီခမ် ခဲင် မိူင် ဂေ တီ။

40 အာယုဝ်ဆူအာ ဟဲ့ အွင် မိူင် ဂေ တီ ဘော မိူင်။ အန် ဟဲ့ ပဲ ဘော ခုန်ဒီခမ် ဂေ ဘောကာဂ့လျီတ်။ န့ ဘော မုး မိူင် အီ ကွယ် ဒီ ဒင် နွန်၊ မိူင် အီ ကွယ် ဘ့လာက် နာ တေတ့်၊ မိူင် အီ ကွယ် ခဲင် ဂ့လင် ဘော မိူင် အီ ကွယ် ဒီ နွန်။ အန် ဟဲ့ ငဝ်း ယမ် တူတ့် ဒူအီ ခဲင် မိူင် ဂေ တီ ဒွန် အီ။ အန် တူ တဲး န့ မိုဝ်း အီ လွတ် ခေါ အူ ဝီ။ အန် ဘူင် တဲး န့ ဒူပ် ပီ ကာလာင် အုန် ဇဝ်ဖြာ ပီ ကြိုပ် ဒူအီ အီဆာရေလ တွိုန်။ 41 မိူင် ပဲ့ ဟဲ့ ကာဂုဝ်း ဟဲ့ အွင် အာယုဝ်ဆူအာ န့ ဘော စုး ဒီ မိူင် ကာဒေဘာနာ၊ ကော ဝီ ဇမ် ဒီ မိူင် ဂါဆာ။ န့ ဘော စုး ဘော ဒီ ကာဒါယ် မိူင် ဂုဝ်ဆေန်၊ ကော ဝီ ဇမ် ဒီ မိူင် ကီပွင်။ 42 အာယုဝ်ဆူအာ ဟဲ့ ပဲ ဂေ ခုန်ဒီခမ်၊ ဟဲ့ ပွိုန် ဘော မိူင် ဂေ ဒေါ ကာဂုဝ်း ဂေ အူ ဇေန့် တီ။ ခုဝ်၊ ဇဝ်ဖြာ ပီ ကြိုပ် ဂေ ဒူအီ အီဆာရေလ ဟဲ့ ကာဂုဝ်း ဒါင် ဂေ။

43 ဝါယ် တီ၊ အာယုဝ်ဆူအာ ဂေ ဒါ ဆိုက် အန် ဘော ဝီ တး ဒီ ဒပ် ဂေ အီ ကွယ် ဒီ မိူင် ဂီလဂါ တွိုန်။