1 ခုန်ဒီခမ် အာယာဖိန် အီ အိုပ် မိူင် ဟာစော ဘော ယိုဝ် လွင် ဂေ ဒူအီ အီဆာရေလ ဟဲ့ ကာဂုဝ်း၊ ဟဲ့ အွင် ဘဲန် ပ့လုဝ့် ဘဲန် ပ့လုဝ့်၊ အန် ဘော စ်ု ဒူအီ ဟာဝ် ကာလာင် ဒီ ခုန်ဒီခမ် အာယုဝ်ဘာပ် အီ အိုပ် မိူင် မာဒူန် ဘော ဒီ ခုန်ဒီခမ် အီ အိုပ် မိူင် အာဆီမာရုန် ဘော ခုန်ဒီခမ် ခဲင် မိူင် အာခါဆာပ်။ 2 အန် စ်ု ဂေ ကာလာင် ဘော ဒီ ခုန်ဒီခမ် ဘ့လာက် နာ ကွာ ဘောကာဂ့လျီတ်၊ ဘော အီ ကွယ် ဒီ နွန်၊ အီ ကွယ် ခဲင် ပြဲ ကာဟဝ်း အီ စိူဝ် အာရာဖ အီ ကွယ် ဘ့လာက် နာ တေတ့် အိုမ် ဒိုင် ဂါလီလေ၊^a ဘော အီ ကွယ် ခဲင် ဂ့လင် ဘော နာ တေတ့် ဂ့လင် ဘော ဒဲင် နွန် အီ ကွယ် ဘ့လာက် နာ ဂေတ့် ဆီငဲ အီ ကာတတ် မိူင် နာဖူတ်ဒေါရာ၊ 3 ဘော ဒီ ခုန်ဒီခမ် မိူင် ကာနန့် အီ ကွယ် အာ ဘ့လာက် အိုမ် ဘ့လဲင် ယောဒါန်၊ ဘော မုး ဒူအီ အာမျုဝ် အာမုဝ်ရိတ်၊ ဒူအီ ဟေထိတ်၊ ဒူအီ ဖေရေဆိတ် ဘော ဒူအီ ယေဘူဆိတ် အီ ကွယ် ဒီ မိူင် ဒဲင် နွန်၊ ဒူအီ ဟီဝိတ် အီ ကွယ် ဒီ ဒင် နွန် ဟေရာမူန် ဘော ဒူအီ ခဲင် မိူင် မီဇာဖာ၊ အန် ကာလာင် ဒီ ဂေ ဘောကာဂ့လျီတ် လွင် ဒူအီ အီဆာရေလ ဂေ တီ။ 4 ဒူအီ ဂေ တီ မိူဝ် ဟဲ့ ရဲန် ဒါ ဆိုက် ဂေ၊ တဲး န့ ကိူန် ကိူန်၊ တဲး န့ ကော ပီ ကာဟာတ့် ခူပ် အိုမ် နမ်မုက်ဆာရာ။ ဂေ ဘော မိုဝ်း ဘော မင်ပြွင့် ဘော လက်လဝ်။ 5 ခုန်ဒီခမ် ဂေ တီ ဟဲ့ တး လာယ် ကာဇု ခဲ့ မိုဝ်း ဂေ ပ့လူမ်။ ဂေ ဘော တး ချ ဒပ် ဂေ၊ တဲး ဂေ ဘဲန် အူ ဖိုင်၊ ကွယ် ခူပ် အိုမ် ဒိုင် မဲရမ်၊ ဘ်ု ဒီ ကာဂုဝ်း ဒီ ဒူအီ အီဆာရေလ။

6 ဇဝ်ဖြာ ဝီ ကာလာင် ဒီ အာယုဝ်ဆူအာ တဝ်း၊ “အာဝ် လုဝ် ယုဝ် ဂေ။ ခုဝ်၊ ခဲညှာ အာခြာဝ် နီ အုဝ် ဒီ အာပ် ဂေ ဒီ ဘေ၊ တဲး ဂေ ယမ် တူတ့် ဘောကာဂ့လျီတ် ဒီ အာတ့် ဘေ ဒူအီ အီဆာရေလ။ မဲ လုဝ် ဒဲပ် ကာဒတ် ဆီန ဒီဂဲ့ မင်ပြွင့် ဂေ၊ ဒုဝ့် ကာဆိုမ် ဘော လက်လဝ် ဂေ။”

7 ပါယ် တီ အာယုဝ်ဆူအာ ဘော ဂေ ဒါ ဆိုက် အန် ဘော ဟာဝ် အူ ဇေန့်။ ဂေ ဘော တး ကာပ့လုး ဘော ကာဂုဝ်း အူ ဇေန့် ခူပ် အိုမ် ဒိုင် မဲရမ် တီ။ 8 ဇဝ်ဖြာ ဘော တဲး ဒူအီ အီဆာရေလ ပဲ ဂေ။ ဒူအီ အီဆာရေလ ဟဲ့ ကာဂုဝ်း ဒီ ဂေ ဘော ခုင်ခြး ဂေ ကော ဇမ် တူင့် ကာဆဝ်။ ဂေ ကော ဝီ ဇမ် ဒီ မိူင် တာင် အီ စိူဝ် မိူင် ဆီဒူန် ဘော မိူင် မီဆာရာဖောဆာမိန်။ ဂေ ကော ဝီ ဇမ် ဘော ခဲင် ဒီလယ့် မီဇာဖာ အီ ကွယ် နာ လေး ဆီငဲ တွိုန်။ ဂေ မိူဝ် ဟဲ့ ငဝ်း ယမ် တူတ့် ရန်ဆူ ဂေ။ အူ ဝီ မိူဝ် အာဝ် ဟူ မိုဝ်း။ 9 အာယုဝ်ဆူအာ မိူဝ် ဘူင် ဒီ ဂေ၊ တဲး န့ ဒူပ် ပီ ကာလာင် အုန် ဇဝ်ဖြာ။ အန် မိူဝ် ဒဲပ် ကာဒတ် ဆီန ဒီဂဲ့ မင်ပြွင့် ဂေ၊ ဒုဝ့် ကာဆိုမ် ဘော လက်လဝ် ဂေ။

10 ဒေါ အန် တီ အာယုဝ်ဆူအာ ဘော ဝီ တး ကာဂုဝ်း ဒိုဝ်း မိူင် ဟာစော၊ ငဝ်း ယမ် ဘော ခုန်ဒီခမ် ဂေ။ အာခြာဝ် ဒေါ အန် တီ မိူင် ဟာစော မိုဝ်း အာဖုင် တာင် လွှိုမ် မာန် မိူင် ဘောကာဂ့လျီတ်။ 11 ဂေ ဟဲ့ ဟွတ့် ငဝ်း ဝဲန် တူတ့် ဒူအီ ခဲင် မိူင် တီ၊ တူ တဲး ဂေ လွတ် ခေါ အူ ဝီ။ အန် ဘော ဒုဝ့် ဝဲန် ဘော မိူင် ဟာစော တီ။

12 အာယုဝ်ဆူအာ မိူဝ် ဟဲ့ ကာဂုဝ်း ဟဲ့ ပွိုန် မိူင် ဒီ တာင် ဂေ တီ ဘောကာဂ့လျီတ်။ အန် ဟဲ့ ပွိုန် ဘော ခုန်ဒီခမ် ဂေ၊ ဟဲ့ ငဝ်း ယမ် ဒွန် အီ၊ တဲး န့ ဘော ဒူပ် ပီ ကာလာင် အုန် အာမုဝ်ဆဲ အီ မုး ဒဲစေန့် ဇဝ်ဖြာ တွိုန်။ 13 မာလဲ၊ ဒဲင် မိူင် ဟာစော တီ၊ မိူင် အီ ကွယ် ဒဲင် နွန် ဂေ တွိုန်၊ ဂေ ဒူအီ အီဆာရေလ တူ ဒုဝ့်၊ တဲး န့ ကာဆိုမ်။ အာယုဝ်ဆူအာ ဒုဝ့် ကာဆိုမ် မီ အူ မိူင် တီ။ 14 ကြုဝ်ကြာမ် အီ မိုဝ်း ဒီ ငဝ်း ဒီ ခန် ဘော ဒုဝ် ဆတ်ဒါဝါ ခဲင် မိူင် တွိုန်၊ ဂေ ဒူအီ အီဆာရေလ ဟဲ့ ဒိုဝ်း တူတ့် ဒီ ဂေ။ အီ မုး ဒူအီ၊ ဂေ ဘော ငဝ်း ယမ် တူတ့် ဒွန် အီ၊ အူ ဝီ မိူဝ် အာဝ် လွတ်။ 15 ဇဝ်ဖြာ ဟဲ့ ကာလာင် ဒီ အာမုဝ်ဆဲ ပါယ် တီ။ အာမုဝ်ဆဲ ပီ ဝီ ကာလာင် ဒီ အာယုဝ်ဆူအာ။ အာယုဝ်ဆူအာ ဝီ ဘူင် ဒူပ် ဒွန် ဒဲ၊ တဲး န့ ပီ ပီ ကာလာင် ဇဝ်ဖြာ ဒီ အာမုဝ်ဆဲ၊ တူ တဲး န့ ဘ့လိူင် ခေါ အူ မျုဝ်။

16 ပါယ် တီ အာယုဝ်ဆူအာ ဟဲ့ ကာဂုဝ်း၊ ဟဲ့ ဟွတ့် ပွိုန် မိူင် ဂေ တွိုန် ဘောကာဂ့လျီတ်။ န့ ဘော မုး မိူင် အီ ကွယ် ဒဲင် နွန် ဘော မိူင် အီ ကွယ် နာ တေတ့် နာ ကွာ၊ ဘော ကာဒါယ် မိူင် ဂုဝ်ဆေန် ဘောကာဂ့လျီတ်၊ ဘော ခဲင် ဂ့လင် နာ တေတ့်၊ ဘော ဂ့လင် အာရာဖ၊ ဘော နွန် အီဆာရေလ ဘော ခဲင် ဂ့လင်၊ အန် ဟဲ့ ပွိုန် တူတ့်။ 17 ကာဒါယ် ပီ ပွိုန် အန်၊ န့ ဘော ဘြဲ ဟာဝ် စုး ဒီ နွန် ဟာလက် အီ ကွယ် ဘ့လာက် အီ ဟုဝ့် ဒီ နွန် ဆေအီ။^b န့ ကော ဝီ ဇမ် ဒီ မိူင် ဘာလကာတ် အီ ကွယ် ဒီ ဒီလယ့် လေဘာနုန်၊ ဘော နာ တေတ့် နွန် ဟေရာမူန်။ ခုန်ဒီခမ် ခဲင် မိူင် ဂေ တီ အာယုဝ်ဆူအာ ဟဲ့ ပဲ တူတ့်၊ ဟဲ့ ငဝ်း ယမ် တူတ့် ဂေ ဒွန် အီ။ 18 အန် မိူဝ် ဟဲ့ လာယ် ကာဂုဝ်း ဒီ ခုန်ဒီခမ် ကိူန် ဂေ တီ၊ ကော လှေန့် ကာဆဝ်။ 19 န့ မိုဝ်း မီ ဒူအီ ဟီဝိတ် အီ ကွယ် မိူင် ကီပွင်၊ အီ ဟဲ့ လာယ် ဘဲန် ဂိုက် ဒီ ဂေ ဒူအီ အီဆာရေလ၊ ပီ တူ ကာဂုဝ်း အန်။ မိူင် ဟဝ် အန် ဟဲ့ ဟွတ့် ကာဂုဝ်း ပွိုန် တူတ့်။ 20 ခုဝ်၊ န့ မုး ဇဝ်ဖြာ အီ ဘူင် တဲး နဝ်း ဂေ ဒိူဝ် ကာဆဝ်၊ တဲး ဂေ ကာဂုဝ်း ဒီ ဒူအီ အီဆာရေလ၊ တဲး အန် ဇဝ် ပွိုန် ဒီ ပျာတ့် ဝဲန် တူတ့် ဂေ ဘောကာဂ့လျီတ်။ အန် မိူဝ် တူ မိုဝ်း နဝ်း ကာဝေ ဂေ၊ တဲး အန် ငဝ်း ယမ် တူတ့် ဂေ၊ တဲး န့ ဘော ဒူပ် ပီ ကာလာင် အုန် ဇဝ်ဖြာ ဒီ အာမုဝ်ဆဲ တွိုန်။

21 ဒေါ အန် တီ အာယုဝ်ဆူအာ ဘော ယဲတ့် ဂေ ဒါ ဆိုက် အန်၊ ဟာဝ် ပျာတ့် မိူင် ဂေ ဒူအီ အာနာခိမ် အီ မုး ဒူအီ ဒုဝ် တူင့် ဒုဝ် တာင်။ န့ ဘော မုး ဒူအီ အာမျုဝ် အီ ကွယ် ဒဲင် နွန်၊ ခဲင် မိူင် ဟေဘြုဝ်၊ မိူင် ဒေဘီရာ၊ မိူင် အာနာပ် ဘော ဒဲင် နွန် ကာဒါယ် မိူင် ယူဒါ ဘော ကာဒါယ် နွန် မိူင် အီဆာရေလ။ 22 ခဲင် မိူင် ဘော မိူင် အာဝ် ဟူ မိုဝ်း ဒူအီ အာနာခိမ် တီ။ အီ ဆီ ဂိတ် အီ စီ အီ စဲက်၊ ဂေ ဆီ ကွယ် ခဲင် မိူင် ဂါဆာ၊ မိူင် ဂါထ ဘော မိူင် အာစုတ်။ ဒဲင် တီ၊ အာဝ် ဟူ မိုဝ်း ခေါ အူ ဝီ ခဲင် မိူင် ဒူအီ အီဆာရေလ။ 23 ပါယ် တီ အာယုဝ်ဆူအာ မိူဝ် ဟဲ့ ပွိုန် ဒွန် မိူင် ဒွန် ပ့လုဝ့်။ န့ ဟဲ့ ဒူပ် ပီ ကာလာင် အုန် ဇဝ်ဖြာ ဒီ အာမုဝ်ဆဲ တွိုန်။ အာယုဝ်ဆူအာ ဘော ကာဆာင် မိူင် ဂေ တီ ဒီ ဒူအီ အီဆာရေလ၊ တဲး န့ ဘဲန် ခါဂုန် ဒီ ဂေ၊ ခြိုဝ် မှဝ် ခြိုဝ် အန်။ ဝါယ် အန် တီ၊ ဂေ ဟဲ့ ပွိုန် ဒီလှဝ်၊ အာဝ် ဟူ လုဝ် ကာဂုဝ်း။