1 ဝါယ် အန် တီ အာမုဝ်ဆဲ ဘော လေး ခဲင် ဂ့လင် ဒီ မိူင် မုဝ်အာပ်၊ ဝီ ဟာဝ် ဒီ နွန် နေပေါ၊ တဲး အန် ကော ဝီ ဇမ် ကာဒဲ့ နွန် ပီဆာကာ အီ ကွယ် လာယ် ကာဆိူဝ် ဒီ မိူင် ယေရီခုဝ်။ ဇဝ်ဖြာ ဘော ဘျ ကာဒါယ် မိူင် ဘော မိူင် ဒီ အန်။ န့ ဘော စုး ဒီ ကာဒါယ် မိူင် ဂီလေအာတ် ကော ဇမ် ကာဒါယ် မိူင် ဒါန်။ 2 န့ မုး ဘော ကာဒါယ် ဒူင် ကွယ် ဂေ ဒူအီ အာနာပ်ထာလီ ဘော မိူင်၊ ကာဒါယ် မိူင် အာအေဖာရိမ်၊ ကာဒါယ် မိူင် အာမာနာဆေ ဘော ဒူင် ကွယ် ဂေ ဒူအီ အာယူဒါ ဒွန် ပ့လုဝ့်၊ ကော ဝီ ဇမ် ဒီ အိုမ် နမ်မုက်ဆာရာ။ 3 အာမုဝ်ဆဲ ဘော ယိုဝ် ဘော ကာဒါယ် မိူင် ယူဒါ ဘ့လာက် နာ တေတ့်၊ ဘော ခဲင် ဂ့လင် ဒီ မိူင် ယေရီခုဝ် အီ ဘော စိူဝ် မိူင် ဟေ စိုက်၊ ကော ဝီ ဇမ် ဒီ မိူင် ဇုဝ်အာန်။ 4 ဇဝ်ဖြာ ဝီ တဝ်း ဒီ အန်၊ “န့ မုး မိူင် ပဲ့ ဟဲ့ ဒိူင် ဟဲ့ ကာဆဲန့် အုဝ် ဒီ အာဘြာဟမ် ဘော အာဆဲက် ဘော အာကူပ် ဂေ တွိုန်။ အုဝ် ဟဲ့ တဝ်း ဒီ ဒွါ ဒီ လှုက်လှာန် ဂေ။ အုဝ် ဟဲ့ တဲး မဲ ယိုဝ်။ အုဝ် ယီ တူ တဲး မဲ လိုပ် ဟာဝ် ခဲင် မိူင် တီ။”

5 ပါယ် တီ အာမုဝ်ဆဲ အီ မုး ဒဲစေန့် ဇဝ်ဖြာ ဘော ယမ် ခဲင် မိူင် မုဝ်အာပ် ပီ ဒွိုမ် ကာလာင် ဇဝ်ဖြာ ဒီ အန်။ 6 ဇဝ်ဖြာ ဘော ဒိုဝ်း ဒုဝ် ယမ် အန် တီ၊ ဒိပ် ခဲင် ဒီလယ့် အာဒါ အူ ပ့လုဝ့် အီ မုး ခဲင် မိူင် မုဝ်အာပ် တီ၊ အီ လာယ် ကာဆိူဝ် ဒီ မိူင် ဘေတ်ဘေအူရာ။ ပီ ဘော ဟဲ့ တဝ်း ပါယ် တီ မိူဝ်၊ န့ ယီ တူ မိုဝ်း အာဆေ အီ ယိုဝ် န့အွုန် အန် ကော ဇမ် ဒေါ တီ နီ။ 7 ဒေါ ယမ် အာမုဝ်ဆဲ၊ အာဆာက် အန် ဟဲ့ နုဝ့် အူ မာယဝ်း ဒီ အာ ဂိုဝ် ဆီနမ်။ ငါယ် အန် မိူဝ် တူ မုဝ် တူ ကာပျွယ်။ အန် ယီ မိုဝ်း ပ့လူမ် မိုဝ်း ဟဲန့် ပီ ဘြိမ်။ 8 ဂေ ဒူအီ အီဆာရေလ ဘော က့လိုဝ် ဘော ယာမ် ကူပ် ယမ် အာမုဝ်ဆဲ ကော နုဝ့် အူယ် ဂိုဝ် ဆီငဲ။ ဒေါ အန် တီ ဂေ ကွယ် ခဲင် ဂ့လင် ဒီ မိူင် မုဝ်အာပ် တွိုန်၊ တဲး န့ ကော ဟွတ့် အာခြာဝ် ဒီ လုဝ် ယာမ် ဘော က့လိုဝ် ဂေ။

9 အာယုဝ်ဆူအာ မိူဝ် ဟဲ့ မိုဝ်း အာငျာန် ပဲ့ ဟဲ့ ဒွါ ဇဝ်ဖြာ ဒီ အန်။ ခုဝ်၊ အာမုဝ်ဆဲ ဟဲ့ ဒွိုမ် ဒါင် ဒဲ အန် ဒဲင် ဂိန့် အာယုဝ်ဆူအာ၊ မွင့်ကာရာ ဒွါ ဒီ အန်။ ဂေ ဒူအီ အီဆာရေလ မိူဝ် ထူမ် ဂြုဝ်း အာယုဝ်ဆူအာ ဘော ဘူင် ဒူပ် ဒါရာ ဇဝ်ဖြာ ပီ ကာလာင် အုန် ဇဝ်ဖြာ ဒီ အာမုဝ်ဆဲ တွိုန်။

10 ဝါယ် အန် တီ အာဝ် ဟူ မိုဝ်း ဒါ အီ ဘျာန် ဂြုဝ်း ဇဝ်ဖြာ ခေါ အူ ဝီ အီ ပီ အာမုဝ်ဆဲ။ ဇဝ်ဖြာ ဟဲ့ နပ် အန်၊ ကာလာင် ဂြုဝ်း လာယ် ဒုဝ် နာ ဒီ အန်။ 11 အာမုဝ်ဆဲ မိူဝ် ဟဲ့ ဘူင် အီ မွှိုမ် အာမ် ဘဲန် မျုဝ် ဘဲန် မျုဝ် ပီ စ်ု ဇဝ်ဖြာ အန် ဘူင် ဒီ ခုန်ဒီခမ် ဘော ဒီ ဂေ အာမူ အာမာတ် အန် ဘော ဒီ ဂေ ဒူအီ ဘောကာဂ့လျီတ် ခဲင် မိူင် အဲဂိုပ်။ 12 န့ မိူဝ် တူ မိုဝ်း အာဆေ အီ ဟဲ့ ဒွိုမ် ဘျ ခဲ့ တာင် ပွုန် ဇဝ်ဖြာ၊ ဘော ဘူင် အီ မွှိုမ် အာမ် ဘော အီ မွှိုမ် ယုဝ် အီ ပီ ပဲ့ ဟဲ့ ဘူင် အာမုဝ်ဆဲ၊ တဲး ဂေ ဒူအီ အီဆာရေလ ဒွန် အီ ယိုဝ်။